مرحبا وأهلين ع الجميع ، كل عام وانتم بخير وعيد سعيد وايام جميلة بإذن الله

يمكن كثير منكم يعرفني من اول ويعرف طبيعة علاقتي
مع زوجي
صارت مشاكل وازمات لاتعد لكنها عدت ، هالشهر نوعا ما مستقر بسبب انه ماخذ اجازة لرمضان وانا تخرجت ف صرنا ببيت واحد وانحلت مؤقتا حكاية اللي يجيني كل ويكند بإندفاعاته وحبه لي وعدم صبره وانا العكس

يمر اسبوع او اقل بحب وهداوه ورضى ، بس لانه حساس جدا جدا ، وعصبي جدا ف يدقق على اشياء تافه لدرجة صرت احسه يتقصد يخرب الجو ، مدري !
لمن يتحسس من شيء ويزعل يصير يتكلم ويسب حوالي الساعة الا ربع او ساعة من غير مايوقف ، ويسيء الظن ويتهمني بأشياء واشياء ، تخيلوا طول الوقت مع تفاصيل الكلام ، تخيلوا كمية الظغط اللي اعيشه مع تدقيقه بأنفاسي ولو قلت اه من التعب او غمضت وحاولت استرخي واتمالك اعصابي عصب وانفعل زيادة وانتي قليلة ادب وماتحترميني وماتسمعين لي وتبغين تسكتيني وووو ويصير يعيد مواضيع سابقة منتهيه مالها علاقة للمشكلة ف اتعب اتعب اتعب
كذا هو فضفض وارتاح وخلص ، بسرعة عصب وبسرعة رضى
فيستغرب ويتنرفز مني ليش ساكتة ! ليش ماتضحكين ؟ سولفي يلا قولي شيء
الموضوع انتهى لاتكبرينه ، يطالبني بإلحاح اني ارجع زي قبل ، ف اقوله شويات ارتاح وان شاء الله اسولف ، فيقول متى شويات ؟ كم يعني ؟ علميني كم بالطبط يعني ؟ ..

بأي وقت يزعل ، يتكلم تلقائي ، وانا شايله بيدي الاكل بروح ، كذا وانا واقفة يكلمني ماينتظر لحد ما ارجع
او لما احط الاكل ونصير بناكل ، الوقت اللي يتكلم فيه كفيل بأن يترك الاكل يبرد واتعب انا وتنسد نفسيتي ، ثم يصير يطلب مني اكل معه وانا مقدر ، ثم يلح يلح واجلس اصيح من ظغطه علي
او يكلمني وانا رايحة عزيمة او زواج بالسيارة ، طول المشوار وهو يتكلم
احتاج انزل للناس بوجه مرتاح ! مو وجه توه باكي وممسح دموعه
او يكلمني وانا طالعة لاي مكان
ولو اطلب منه نأجل الموضوع لحد مانرجع يصير يقول انتي انانية وهمك نفسك وتبين تصيرين مبسوطة وانا احرق بنفسي وانتظرك

مشاكلنا تافه ، بسيطة من الممكن انها تنحل بوقتها ، لكن طريقته تعقد مشاكلنا زيادة
اختلافنا بالشخصيات سبب لمشاكلنا ، عقلانيتي وسكوتي سبب للمشاكل ! هل يتطلب اني اصارخ واعصب وتفقد علاقتنا للاحترام !
مو عارفة كيف اتعامل معه
متطرف بكل شيء ، مندفع ويبي كل شيء مره وحدة
وغيوور لدرجة جنونية ، مره كنت تعبانة وكنا واقفين بالاشارة فجأه عصب وصار يقول احترميني ولاتناظرين بالرجال ، اي رجال ! انا مو شايفة شيء ولا ادري حنا بالسماء ولا بالارض من التعب !
وطبعا كل مايزعل ويتكلم معرف ليش لازم لازم يجمع بين اكثر من مشكلة لها علاقة ومالها علاقه واشياء قدييمة صايرة واشياء سويتها او سالفة قلتها اكتشف انه فاهمني غلط والحين بوقت ماعصب علي جاب طاريها
اه يارب
كثير اوقات احس انو خلاص ارتحنا وان شاء الله الامور تمام ، لكن يجي موقف تااافه يكبره هو ويمحي كل شيء حلو كان بالايام اللي راحت
الحب شيء يريح ، لكن حبه القوي لي سبب كل خلافاتنا
عمره 27 وانا 21
عمر زواجنا سنة الا شوي ، مع ملكة 5 شهور من الألم
حل لحياة مستقرة وراحة بال ارجوكم

كل عام وانتم بخير
ما شاء الله تبارك الرحمن على ما تفضل وأنعم والله يسعدكِ بزوجكِ
قليل ما تجد زوج محب لزوجته لهذه الدرجة. وانتِ محظوظة به ، وغيركِ من البنات محرومات من الاهتمام والحب .
ما فهمته ان زوجكِ يطلب منكِ اشياء كثيره وينتظر تفعليها بنفسكِ.
اختي الكريمة اذا كان هو محب لكِ، ألا يستحق المحب التقدير والاهتمام؟
لماذا تقصري فيه حقه ؟
عتابه الكثير دليل انه محترق لأجلكِ، فلناذا لا تبادري بنفسكِ وتحسسيه
انكِ ايضاً تحبينه ؟
هل تعودتي على الأخذ منه بدون ما تعطينه شيء يفرح قلبه؟
اذا اخذتي منه كل ما يسعدكِ ولم تعطيه ما يسعده فهذه هي الانانية
نعم انانية بمتياز ، وهو يبربر ويحلطم على راسكِ لأن يحبكِ وينتظر منكِ الافعال التي تسعده ، ولكن ربما ان برودكِ سبب متاعب في علاقتكما .
لم تقولي لنا ما الاشياء التي يخلطم ويبربر عليها ؟
حتى نعرف ما نوع الازعاج الذي يضايقة.

زوجك من النوع العصبي

لا تتدقيين بكلامه إذا عَصّب علشان ما تتعبين

الله يوفقكم

كناري البحرين

اشكر لك ردك واهتمامك
الكل منا بلا استثناء يريد الحب والاهتمام ، لكن الشيء لازاد عن حده يكون منفر ، ف الورد لو اسقيته من الماء فوق كفايته ، يموت

كثيرا مايعطيني ، اوقات فوق طاقته عشان يسعدني ، وهالشيء متعب لي لاني ارحمه واحس بتأنيب فضيع
يهمني اكون مرتاحة ومستقرة ، اهون من كل اسبوع هدية مع مشاكل ماتنتهي ..
بالمقابل انا اعطيه قد ما اقدر لشيء معنوي او مادي ، وجالسة احاول
وعمري ماطالبته او اتعبته ، دايما الشيء يجي منه
كثير يقول لي انه يحمد ربه اني زوجته ، لاني ارضيه بأشياء ومقتنع فيني وو ، لكن نقطة العواطف والانفعالات بيننا مره مختلفة
بالنسبة لي كنت اكرهه جدا ، حاليا خف ظغطه وصرت اتقبله واوقات اكون مرتاحة

متى يتحلط ؟ امم امس كنا بالسيارة وكنت اتكلم بشكل عادي ، هو انبسط من كلامي وطلب مني اعيد منه كلمة ، وعدتها له ، فقال لا قوليها بمثل الدلع تو
قلت له انا كنت اتكلم بشكل تلقائي ماتذكر كيف نطقتها ، فجاة عصب وصار يقول حارمتني حتى اتلذذ بكلامها ، وش فيها لو قلتيها وتدلعتي لي ، ولا مخليه الدلع مع البنات واهلك وانا زوجك مو شايف منك شيء وووووو لساعة من الوقت ..

والله بهالفترة كنا مبسوطين وراضين ومرتاحين ، يالله ليش مو قادرة اسيطر على هالوضع ويستمر وضعنا مرتاح !

كنت اظن كل ماكثرت بيننا اللحظات الحلوة تلقائي يبطل حساسية وترتاح نفسه ومايتضايق من اسباب تافه ،
كنت اظن كل مادلعته وارضيته تخف عاطفته وحساسيته ، كنت اظن !

وهو يهاوش علي ، جالسة افكر انو يالله وش سبب المشكلة ! عشان ماظبطت نطق كلمة !!

ريف

صحيح ان الواحد لاعصب يقول كلام مايقصده
بس لمن توصل انه يقول الله ياخذ هالوجه ، وضفي وجهك لاهلك ، وانتي قليلة ادب وماتربيتي
قوية جدا وماتحملها

اهلا وسهلا وكل عام وانتي ومن يتابع بالف خير والف مبروك على التخرج واسئل الله ان يئلف بين قلوبكم ..
يااختي الكريمة الحياة الزوجية لاتخلو من المشاكل ابدا ولاكن قد تختلف من بيت لاخر ومايحصل معكم من سوء تفاهم يحدث معى غيركم من حديثي الزواج ولاتعتبر مشكلة حقيقتا وللمعلومة فأن اصعب فترة في الزواج هي اول خمس سنوات الى ان يتم التكيف والتأقلم معى طبيعة الطرف الاخر .

__________________
تمنيت حبـاً يدوم طويـلاً .. فـدام الحب وَ رحل الحبيب.

شخصيته متعبه مرررا
صارحيه ان اسلوبه منفر ولازم يتعود على الصبر والثقل شوي ولاترى هذا الضغط عليك بيوصل علاقتكم لحال شيء
استغرب من جد ان فيه رجال مندفع لهاالدرجه
مااعتقد الحب له دور باندفاعيته والله اعلم من طبيعة شخصيته فلازم يغير من هالطبع فيه فالعلم بالتعلم والحلم بالتحلم
قولي لو انا اسوي فيك هالتصرف كان ماقدرت تتحمل

لا شكر على واجب يا اختي نقاء
ربي ينقي قلبكِ من الدنس
اظن انه عانى من نقصان عاطفة في طفولته، او عنده عاطفة جياشة طاغية .
انتِ محقه فالحب اذا زاد عن معدله يصبح منفر جداً، الا اذا كان الطرفان
يتبادلان نفس الشعور فزيادته لا تصبح منفرة بل على العكس من ذلك.
واوافقكِ ان الشيء الذي يأتي بالجبر يصبح كريه ومقزز.
ولكن اختي الكريمة نقاء حتى تعالجي النقص الذي يعانيه زوجكِ المسكين، ما عليكِ الإ ان تنزلي عليه طن من العاطفة لحد التخمة حتى لو بالتصنع في بداية الأمر وسوف تتعبي كثيراً ولكن تصبري واطلبي من الله العون ، في سبيل اسعاد زوجكِ وبعد ان يرتوي سترينه يكتفي ولو بكلمة واحدة جميلة في الأسبوع تسد نهمه وجوعه العاطفي .

هو بحاجة لإرشاد وتوجيه ، لأنكِ قلتي هو اذا لم يعطيني كلام جميل او افعال تدل على المحبة فأنا لا اطالبه .
تعرفي لماذا ؟
لأنه يحتاج أولاً يكسب قلبكِ ويبتعد عن التحلطم والبربرة الزائدة
ثم سترين قلبكِ يحبه ويجوع للعاطفة معه ، ولكنه مسكين لا يردي ان هذه الحلطمة والبربرة تسد نفسكِ .
فأنتِ اختي يمكنكِ نختاري وقت مناسب فيه رومانسية وحب وبكلماتكِ الناعمة والرقيقة تقولي له حبيبي العسل اريدكِ تصارحني بكل ما يضايقكِ مني قل لي بهدوء ولا تنفعل وسوف اتقبل منك ، وأنا سوف اقول لك بكل صراحة ما الاشيء التي تجعلني اتعلق بك واحبك.
ثم تقولي له بكل صراحة لو انك تبتعد عن الحلطمة والثرثرة ووجع الراس سوف احبك اكثر من هذا الحب فحاول انك تتحكم بنفسك اشهر وسترى ما يسعدك .

كلامك صحيح وأنا اقول ان الحل من الزوج قبل الزوجة

عندي اسئلة لك لو تجيب عليها فأنا كنت مثل زوجك وانت نفس شخصية زوجتي

هل زوجك يعمل طوال اليوم أو عند نشاط أخر؟
هل تكلمين أهلك وصديقاتك طول الوقت على الفيس بوك و الواتساب أمامه؟
هل علاقتكم الحميمة جيدة بينكم؟
هل تحبينه أو تشتاقين له عندما يغيب عليك؟

شكرا