السلام عليكم

بأختصار ... والد زوجي عمر بيت كبير و دورين و بمنطقة حلوة ... المهم بعد سنة تزوجت اختة الصغيرة آخر الاخوات البنات و صار البيت فاضي ما فية الا زوجي و ابوة .....

لما خطبني زوجي و كنا ندور شقة قال لة ابوة ليش ما تسكن انت تحت تاخذ الدولا الارضي كلة و انا اسكن فوق .... وافقنا لان البيت جديد و ملك و كان زوجي علية ديون العرس ....

بعد الزواج دريت ان فية اخو لزوجي تعبان مسكين أظن ان معاة مس جن او جنون مدري بالضبط شفية بس اللي عرفتة ان ابوة تعب منة و مأجرين لة بيت بعيد عنهم .... و مسكين ناسينة و لا يتواصلون معاة ابدا و لا يدرون عنة .... يكسر الخاطر .... بس زوجي كل شهر يروح يدفع لة الاجار و يعطية مصروف اكل و شرب ....

المهم .. البيت مصمم على شكل اجنحة كل غرفتين مع حمامهم بعد الزواج بفترة قالت اخت زوجي الكبيرة ان اذا جو يزورون ابوهم يعجزون يطلعون فوق ليش ما ياخذون جناح و يفتحون لة فتحة عالحوش و يكون المفتاح عند كل العيال و يسدون الباب من عندنا .... بدون لا احد يستشيرني رضى زوجي تفاجئت بعمال و دريلات و ازعاج من الصباح لما سألت قال لي زوجي انهم يبون الجناح لعمي سكت ما قلت شي .... و صار الوضع ممل يدخلون و يطلعون على كيفهم ما سدو الباب زي ما وعدوني ... تخيلو بالشتا لان ما فية مكيفات احيانا اعجز انام من الازعاج ...هم و اطفالهم و سوي شاي و قهوة و بالاجازات اتمنى اني ما تزوجت اصلا من كثر ما اكرة الوضع .... كل هذا و ساكتة و لا شكيت و لا بينت اني متضايقة .....

بعد سنتين من هالكلام اتصل اخو زوجي التعبان على اخوة الفجر يصرخ تعبان فزعنا بالفجر مسكين راح لة زوحي يؤكض و جابة و قعدة بالجناح المقابل لحناح عمي .... و لانة تعبان سدو الجناح بلوح خشب و حطو زرفيلة ..... على بالي ان الوضع بيصير يوم او يومين او حتى اسبوع او حتى شهر ... الحين اخوة عندنا من اول الاجازة لها شهر و نص ...و مسكين تجيلة حالات ينهار و يصارخ و يطقطق بالابواب و انا عندي طفلين و الله خايفة عليهم .... اذا طلع زوجي للعمل اخاف لا عيالي يسمعون شي تشوفوني بس اعلي التلفزيون و لا اطفي المكيف ابدا .... الوضع متعب انا نفسيتي تعبانة ... و زوجي كل يوم و الثاني ماخذني عند اهلي و يخليني عندهم طول اليوم و اذا دقيت اطمن علية تكون اعصابة تعبااااااااااانة و يصرخ علي و انا اتحمل من لة غيري يتحملة ....

الحين صفا لي من البيت الطويل العريض غرفتين و مطبخ و حمام فقط و الصالة هي صالة و هي مجلس .... غرفت عيالي فيها كل الملابس التشتوية بشنط سفر تحت السرير و البطانيات الزايدة و المخاد صاير مخزن تحت سرير الولد .... ما عدت اشتري ملابس جديدة و لا مواعين حتى لو تعجبني لان ما عندي مكان وين اوديهم ؟؟؟؟؟

بالله عليكم هل هذا وضع ينسكت علية ؟؟ هل انا غلطانة اني اتضايق او اني شايفة بحالي زي ما اهل زوجي يقولون عني ؟؟هل اسكت و الا ادخل ابوي بالموضوع .. ؟ انا بصراحة ابي خصوصية .. ابي البس زي ما ابي بدون لا احد يطب علي و انحرج من لبسي ... نفسي ارتاح و لا احس اني ضيفة عندهم لان هذا بيت ابوهم ....


انا تعباااااااااانة اعجز و انا اقول شكثر تعبانة و ابي حل ما يزعل زوجي لانة بصراحة ما يحبني مررررررة و لا مستعد يزعل اهلة على شاني و لا ابي اخسرة عشان عيالي على الاقل .... شورو عللي كيف اتصرف

الله يعينك...بس زي ما قلتي بيت ابوهم ومو لزوجك بس فمن راي انك تقنعين زوجك انكم تطلعون وترتاحين في بيت لحالك وتتمتعين بخصوصيتك...

هذا الخطا الاول

وهو باب المشاكل

لما قراته استغربت كيف عائله كبيره وبيتهم جديد يسكنوا فوق

وانتك تحت

كانت هي المغالطه الاولى وليست ذنبك

ممكن ياعزيزتي تكلمي زوجك بهدوء تنتقلي للاعلى ولو نص القسم
يكون اكثر خصوصيه

الله ييسر امرك

__________________

	لاتقل أنا طيب فالكل طيب! ولا تقل أنا متعب فالكل متعب! ولا تقل أنا حزين فالكل حزين! بل قل فقط الحمد لله صبحاً ومساءً ، ليخف أنينك وتضمحل أوجاعك وتقل أمطار دموعك ... وعش هانئاً مؤمناً...متسامحاً عفواً متعاطفاً مع الغير..و ابتعد عن النزاعات والأحقاد والانتقام فلن يكسبوك سوا الندامه في الدنيا والآخره..

السلام عليكم ...

اختي فيافي نجد اشكر درك و انا ادري اني انا الغلطانة من البداية رضيت ... بس اخوانة كلهم متزوجين يبون مكان اذا زارو ابوهم يقعدون فية و مشكلتهم العجز انهم يطلعون فوق .... و الا عمي ساكن لحالة زوجتة متوفية ....

طيب و الاخ التعبان و الله خايفة على عيالي ...

كان الله في عونك

وقصتك محيره جدا لان من تتحدثين عنهم هم الاساس في العائله


لذالك انا من راي اختي فيافي نجد انتقلي انتي للاعلي

وابو زوجك واخوه يتمون تحت

الله يسهلك امورك ويوفقك

وبالنسبه لاخوه ليه ما يرجع شقته التي كان فيها

واصري علي زوجك وفهميه ان الاطفال ممكن تصاب بعقد نفسيه بسببه لا سمح الله

__________________
الحمدلله علي أنعم الله الظاهره والباطنه

السلام عليكم

اختي الفارسة جوري .... اشكرك من قلبي على التعقيب .... بس للتوضيح اكثر فوق فية شقتين وحدة ساكنها واحد من اخوانة مع عيالة و الثانية لعمي و لاهو راضي ينزل تحت ... يبي شقتة اللي فوق و اذا جو عيالة ينزل لجناحة اللي تحت ....

احس ما فية حل غير اللي قالتة اختي شيخة الزين اني اطلع من البيت .... بس زوجي مو راضي يطلع بدون ابوة و ابوة مو راضي يطلع من بيتة و لا الومة لانة ملكة شلون يطلع منة .... و انا اللي ماكلتها على راسي ...

الله يعينك إصبري


الصبر عاقبته زينه إلين ما تقنعين زوجك بالطلوع


كان الله في عونك

السلام عليكم ...

حاولي بطرق غير مباشرة مع زوجك للاستقلال وتحججي بالأبناء .... مع الاكثااار من الاستغفااار وربي يفرجها عليك ...

دمتي في حفظ الرحمن ,,,

بسم الله الرحمن الرحيم

اتمنى ان تأخذي ردي بالاعتبار اولاً لاتقولي عن زوجك انه لايحبك بالعكس يجب عليك ان تفخري بزوجك بانه يقف مع

اسرته واهله ووالده واعتقد ان من لا خير في اهله لاخير له في الناس ، اختي ان زوجك رجلا بما تقتضيه الكلمة اذ يساعد

اخوه المريض ويقف معه بما يستطيع ,, واياك اياك ياختاه ان تقولي ان زوجك لايحبك لانه مايزعل اهله لكي يرضيك هل

تتمنى ان يقبع زوجك في مشاكل مع اهلك اسئلك بالله هل ترضين ان زوجه اخيك تجعل اخيك يعصي كلام ابيك او لايطيع

له امراً قبل ان تحكمي او تتهمي زوجك او تريدين منه ان يعصي اهله انظري ماذا لو فعلت زوجه اخيك هكذا تقول له والدليل

انك ماتقدر تزعل اهلك لترضيني او لخاطري وهل ترضين ان يترك زوجك ابيه الوحيد في البيت وحيدا دون ان يساعده احد


الحل من وجهه نظري ان لك رب يفرج كرب المسلم حين يلتجئ له وان يغفر لكل من التجأ اليه واجعلي من نفسك الزوجه

الصالحه اوقفي مع زوجك واسعديه فهو يمر بمحنة عظيمه صحيح انتي تريدين بيتا مستقلا لك وتكوني مالكته بس

تاكدي من قول العلي العظيم (( ومن يتق الله يجعل له مخرجاً ))

,الله يعينك ويصبرك
تذكري ان الصبر اخرته دائما حسنه وان وقفتي مع زوجك في هذا الضرف الصعب فسيحسبها لك يعني ماينساها طول العمر ان شاء الله
لانه واضح ان زوجك ايضا متضايق لانه مابيده حيله
وهذا رائئ لك لاني لاارى انه فيه مشاكل كبيره تستدعي الخروج من عندهم يعني مو لاحقتك مشاكل ونكد وتدخل في حياتك اذن اكسبي اجر وخليه جنب ابوه
عموما خلوا الشقتين الي فوق زي ماهي وحده اخوه وحده الابو
وتحت اجروا شقه وشقه اقسموها جناح للاخ المريض وجناح للبنات العجازات انهم يطلعوا فوق
وانت خلي زوجك يعمر لك فالدور الي فوق دور ثالث يعني غرفه لك وغرفه لعيالك وغرفتين مجالس وصاله
واقنعيه بانه اريح لكم واهدئ واضمن للعيال عشان نفسيتهم
وهذا ابوه جنبه
وان كان من ناحيه فلوس فااصبري وعلى قد مايقدر يسويه وياخذ من ابوه شويه شويه لانه اخيرا الخير راجع للجميع
وكل شئ بالهدوء واللين يجي
اما الشده ماتنفع تزيد من حده الامور وتوترها
وارى انه لسه بدري على ابوك لاتدخليه في الموضوع حاليا عشان زوجك يقدر لك صبرك وانت حريصه على عدم زعله
الله يوفق بينكم
ولاتنسي الدعاء ثم الدعاء بان الله يفرج همك وييسر لك امرك فتجدي ان امورك بين عشيه وضحاها قد حلت لك بامر الله استغفري يزيح الله عنك همك

__________________