كل الكلام اللي بتقوله صحيح و ليك حق فيه إنك عاوز زوجتك تفرح لفرحك و تزعل لزعلك (ربنا ما يجيب زعل إن شاء الله) ،، لكن ليه بس تعليق بسيط يمكن يكون هو سبب المشكلة و بوجه كلامي لكل الأزواج اللي اشتكوا من نفس الموضوع
زوجتك محتجالك و محتاجه لحنيتك و عطفك عليها ، و كمان محتاجه لنجاحك لأنها أكتر إنسانه هتكون فخورة بيك في وسط أهلها و أصحابها بالنجاحات اللي بتحصل عليها (و ربنا يزيدك إن شاء الله من فضله) لكن لما تهتم بنجاحك أكتر ما تهتم بزوجتك و لما تلاقي زوجتك إنك بتقضي وقتك كله في تحقيق نجاح ورا نجاح و اهتمامك بيها بيقل يوم عن يوم فتحس إن النجاح ده بقه (
ضرتها) و بياخدك منها و هتبدأ تكرهه و تغير منه ...
صدقني ده عن تجربه على قد ما نفسي زوجي يخلص دراسته و يحصل على أعلى الدرجات على قد لما بتيجي أوقات الامتحانات و يهتم بالمذاكرة أكتر مني أو حتى اهتمامه بيه بيقل عن المعهود بتدايق جداً و بغير عليه من مذاكرته أوي لكن الحمد لله إن فترة الامتحانات دي مش بتكون كبيرة
نصيحه علشان تبدأ تقربها منك و من نجاحاتك و تخليها تشاركك فيها ،، مش تحال تنشغل عنها و حاول على قد ما تقدر إن اهتمامك بالشغل مش يطغى على اهتمامك بيها .. و كمان بعد كل نجاح روح لها قدملها هدية بمناسبة النجاح ده و اطري عليها بكام كلمة حلوين كده من اللي قلبك يحبهم و قولها إنها أكيد لولاها بعد الله طبعاً ، و مساعدتها ليك مش كنت هتحصل على هذا النجاح
و صدقني مش في أكتر و لا أحلى من كلمة حلوة من الزوج لزوجته يحسسها فيها إنه ممنون لإنها معاه (حتى يا سيدي لو مش كنت مقتنع بالكلام ده)
و اعتذرلها عن إنك انشغلت عنها الفترة اللي فاتت و حاول تعوضها بيوم تخرجوا فيه مع بعض
كمان إذا كنت بتقدم شئ لله بالنجاح ده خليها تساعدك فيه ،،
و ربنا يديم محبته عليكم و يزيدك إن شاء الله بالنجاح المستمر