بسم الله الذي لا يضر مع إسمه شي ...

ماادري موضوعي بـ المكان الصح .. بس ان شالله انه المكان الصح ..
انا أدري أنه ماحد مرتاح بحياته وان الراحه راحة الاخره .. وان الشكوى لغير ربي مذله ... لكن أنا أحس اني بموت من الضيقه ..

المهم ..

انا ادرس في الخارج مع اهلي من 4 سنوات .. أبوي الله يرحمه توفى اول سنه وصلنا فيها مقر الدراسه .. بقى لي أمي الله يطول في عمرها واخت اكبر مني وأخواني العيال صغار ..
يوم من الايام الملحقية الثقافيه مسويه احتفال في اليوم السعودي في مقر دراستي , وهناك زوجي شافني و جت اخته وخطبتني .. وافقت مع العلم ماكان لي نيه بالزواج بما اني بدراسه , لكن اخته اقنعتني بكلام واجد وكثير ... بعد ماوافقت كلمت واحد من عمامي يسأل عنه .. وفي هاذي الفتره انا تواصلت معه عشان نعرف بعض اكثر قبل الملكه .. كان عصبي , يشك احيان بروحتي لصديقاتي ... بس كان عموما ً طيب , كنت اقول يمكن هو يسوي كذا عشان مايعرفني لسه وماينلام واعطيه اعذار واجد ...

المهم سألو عنه اعمامي تمت الملكه برياض .. آآه و ليتها ماتمت ..
في الملكه شوي شوي بدأ يطلع على حقيقته شكاك , عصبي , مايحشم احد .. بس امي كانت تقول لي يمكن لأنه جديد على الزواج ومن هالكلام حق الامهات ومشيت معها ..
انا المشكله تعلقت فيه , مدري ليه حزنت عليه هو بعد والده متوفي .. فـ حنيت عليه ومن هالكلام ..
واهله كل مابغيت اتركه خلاص وكل واحد يروح في سبيل حاله .. يدقون وتحمليه هاذي صدمة ابوه تو متوفي , هو تعبان نفسيا ً ومن هالكلام الي اي بنت فـ هالدنيا ماتتحمل تقسى لو وشو ..

المهم مرت الايام .. وعلى هالحاله .. رجعنا الرياض عشان حفل زواجنا وقبل بـ اربعه ايام تهاوشنا لأني انا طلعت اخلص اخر ترتيبات الزواج وهو يدق ماقدرت ارد كنت مشغوله مع صديقتي واختي المهم صار يرسل مسجات وانتي خاينه وماتدرين تبين تودعين حبيبك , وانا الحين بجيك بيتكم وتفتحين لي .. وسوى لي قصه فلم وقسم بالله خياله واسع .. المهم سفهته ورجعت نمت الا ثاني يوم كان عند باب البيت وكنت بالبيت لحالي دف الباب ودخل وصار يدور في الغرف والخزاين في رجال مدخلته البيت , انا شفته كذا المهم قعدت اصيح وحالتي حاله وادق على امي الحقيني .. وارسلت اخوي بس قده راح ..

ثالث يوم وصلني صك طلاقي !!!!!!!! من تحت الباب ..

امي دقت على امه , امه ماتدري انه طلق المهم قاموا يصيحون وامي تتحسب عليها وعلى ولدها الي هو زوجي .. انا عشت بصدمه قويه .. الناس وش بيقولون عني .. خلاص عزمنا الناس وكل شي .. كيف بكنسل ... المهم كنسلنا .. وقعدت انا برياض فتره انا واختي واخوي الي اصغر مني بشوي وامي رجعت لمقر دراستنا .. طبعا ً نفسيتي ماتنوصف ايامها , المهم بعد 9 ايام من الانفصال .. ارسل مسج يحزن وصدق مدري ربي يومها نزل حزن في قلبي عليه وكلمته وتصالحنا !! انا ماادري وش الي صار ضعف مني ولا مدري بالضبط بس الي ااعرفه ان انا قلبي مايتحمل تعب وفراق .. وتعودت عليه وهو كان يجيني من باب انه كل الي صار فوق ارادته .. وانه بيحاول عشاني يصير احسن ومن هالكلام ..

طبعا ً رجعنا لا امي تدري لا عمامي يدرون ولا احد يدري غير الله .. مرت الايام ورجعت انا معه لمقر دراستي معاه واول ماوصلت اول يوم طحت حراره ومستشفى ماعرفوا وش فيني قعدت 10 ايام منومه و3 ايام بالعنايه المركزه ... اكتشفوا اخر شي ان طالع لي كتله في حالب وقاعد ياثر على الكلى الله لا يذوقه لأحد .. المهم هو ماتركني ابد في المستشفى ماقصر معي , يجي بالفتره الي امي ماتكون فيه ولااحد من اخواني ... الا يوم من الايام تقابلوا صدفه عند الباب وامي قامت تصارخ وهو يصارخ , هو الله يهديه ما يحشم أحد ابد ...
عرفت امي اننا رجعنا , قالت لعمامي الكل قلب علي طبعا ً , وانا وقفت بـ وجه الكل عشانه , رجعت السعوديه معه واجلت دراستي سنه طبعا ً صارت الدخله بدون حفلة زواج , فقط ملكه .. ماحد من عيلته يعرفني غير امه واخته واخوه , وانا عيلتي كلهم قلبوا علي ... كل ذا عشاني صدقققققته .. : (

المهم عشت معاه سنه طبعا ً السنه هاذي كلها مستشفيات والله هو ماقصر والله شاهد مايتركني لحالي ابد , ويوقف معي وكل شي ...
في هاذي السنه الي عشتها معه كلها مستشفيات ومشاكل وتعب وقهر ...
اول شي هو شكاك لأبعد درجه اقولها لكم.. يقوللي انا وش دراني قبلي ماكنتي تعرفين احد ,
واذا عصب يبدأ يتكلم عن خوياته !! فلانه انا غدرت فيها ممكن انتي تغدرين فيني بكره ’ انا كلمت بنات متزوجات وش يدريني بكره انتي ماتكلمين واحد من وراي ,,, وانتي ماوراك رجال هذا ابوك متوفي وعمامك مايدرون عنك واخوان صغار تربيتك تربية حرمه , ومجتمع امك كله اختلاط , (انا امي اجنبيه * ) فـ يحسب كل الاجانب متفتحين , فـ يعايرني بـ امي ,
سنه كاااااااااااامله نفس الموال , وبعد كل هوشه يجي يصيييييح : ( وانا وقلبي وماضيعني الا قلبي , انا احس البنت عمر العشره ماتهون عليها مثل بعض الرجال .. وانا بالذات اانا الكل كان يحلف براسي سحبت على الكل عشانه , ماابي اصير مطلقه مااحب هالكلمه أبد : ( ..

الحين في هذي الايام تطور الموضوع ماصار يقتصر على الشك وبس , انا حملت قبل شهرين تقريبا ً, المفروض ما احمل بسبب حالتي الصحيه ما تسمح والدكتور كان محذرني و المستشفى مايعطون حبوب منع الحمل مع المضاد الحيوي لأنها ماتعطي مفعول , المهم جينا انا وياه نكمل دراستنا لأني انا اجلت سنه وهو بيبدأ دراسه , المهم انا اخذت موعد في المستشفى عشان يشوفون مشكلة الحمل لأني تعبت مره انا كليتي وحالبي مايتحملون فـ اعطوني يوم الاثنين موعد وهو يبي يسافر قبل العيد لأخوياه يعيد معهم مع العلم اني ترجيته يقعد معي عشان اذا صار شي في المستشفى يكون زوجي جنبي , المهم سافر وانا جا موعدي ورحت , وفعلا طلبت المستشفى بتنزيل البيبي لأنه لو كبر في الشهر السادس وبدا يضغط على الحالب والكلى بيكون على حياتي خطر , طبعا ً كلمته والتقاريير المستشفى عندي وقلت له قالي توكلي على الله اهم شي صحتك ومن هالكلام , رحت المستشفى وخلصت ونفسيتي مره تعبت مره , انا مره ابي بيبي .. بس اقول يمكن خيره لان حياتي لسه مب مستقره ,

المهم كلمته بعد كم يوم من العمليه , في جده يقضي العيد وفالها وساحب علي , بس اقول يغير جو شوي ..
يكلمني عادي , انا بجي بعد كم يوم .. وانه حياتي بدونك ولاشي , مااقدر ادخل بيتنا بدونك وانتي روح البيت ..
ومن هالكلام الرخيص الي قلبي يصدقه ..
جا قبل كم يوم قالي انا حجزت بكره قلت انا بسوي حواجبي اجل وكذا وفي كوفيره بتجيني الساعه 3 العصر , ان شالله تجي قبل لاتوصل انت عشان تشوفني مره كاشخه , الحين انا اكلمه بالجوال واسوي حواجبي قالي فجأه , انتي خاينه !!!!!!!!! وانا عارف كل شي نزلتي البيبي , وان انتي لو اسافر شهر برجع القى عندك درزن عيال : ( ... حسبى الله بس .... قفلت بوجهه .. وقمت اصيح اصيح ويرسل مسجات انتي قاعده تتزينين لخويك مب لي وهو الي بيجيك الساعه 3 مب الكوفيره وانتي اصلا تربية حرمه !!! ...

استغفر الله بس ,,, مادري وش اسوي .. انا تعبانه .. اقوله ياخي اذا شايف علي شي لا سمح الله وشوله تخليني على ذمتك سنه , انا اخلاقي يحلفون فيها خاف ربك فيني ’ عشان ابوي متوفي تدوس علي شايف انه مافي رجال .. مره كانه ماخذ بنت شوارع مب بنت ناس .... وامه تقوللي معليش هو مريض نفسيا ً تحمليه ...

وانا مادري من وين القاها من صحه ولا من دراسه ولا من وين بس ياربي ...
وربي احيان اتمنى اقول لو ابوي عايش ماكان صار الي صار , عمامي مهما كانوا كثيرين الحين في ذي الدنيا كل الناس يالله نفسي ,,, : ( حسبي الله عليه وعلى اهله حرقوا قلبي مافرحت بحفلة زواج ولا فرحت بزواج من الاساس ..

أنا ماابي الطلاق وماظنتي يتغير هو عمره 32 سنه , اكبر مني بـ 12 سنه وتعلقت فيه المصيبه الكبرى , كل الي كنت ابيه زي اي بنت حياه راحه وزوج يهتم وسند لي ,

مدري وش اسوي اروح لمين , اشكي لمين ... هله ماعندهم سالفه وهلي خير شر يكرهوه ...
بس الطلاق مره صعب علي ... هو للحين قاعد يرسل مسجات وانا مقفله جوالي , جت الكوفيره الساعه 3 وخلصت منها ويرسل لي جاك هو الحين داخل عنك , حسبي الله عليك ياخاينه , ياحقيره .. يازباله.. طبعا ً مقفله جوالي لأن الضرب بالميت حررام : ( ... انا تعبانه بس ابي اخذ القرار الصح .. ومدري وش اسوي .. ناس كثيره قالت لي طلاق .. وهم مايعرفون نص المشاكل حتى .. ارجو تساعدوني ’ داخله على الله ثم عليكم : ( ...
استغفر الله بس .. الله يفرجها علي وعلى المسلمين يارب ...

وجعت راسكم : ( .. السموحه

ومن قالك يا أختي إن البنت تحب كلمة طلاق!!!!!!!!!!!

يا أختي في مثل حالتك
وزوجك يشك

أطلبي الطلاق
وش تستفيدين منه

قولي

يشك فيك وأهلك

هذا اسمحي لي مو رجال

لو يعرف الرجوله ماشك فيك

هو يمكن مريض

بس مو ذنبك تعيشين معه لآخر العمر!!!!!!!!!!

وإذا حبيتي

الله أكبر حب قيس وليلى

اسحبي عليه وانسيه

يما حبينا وربي قدر علينا نفترق

يا أختي فكري صح

أتركي الحب

إنا ماضيعنا ولا جاب لنا الأامراض إلا الحب

أتركي الحب على جهه\\

وفكري في كلامه ترضين أحد يشك فيك



لا وتوصل معه يشك في شرفك


لا ياقلبي


استخيري واطلبي الطلاق

عشتي سنه وشفتي المعاناة معه

اجل لو تعيشين باقي العمر


الطلا ق خير لك

والله بيعوضك خير

__________________
الله يصبرني على فراقكم يا أهلي
الله يجمعني معكم بالقريب العاجل

طلااااااااااااااااق

ليه تخافو من كلمة طلاق او مطلقه

خلاص واحد شكاك وابشع الكلام ويسمعك ويرسل


اتركيه ولا يغرك كلامو المعسول

__________________
http://live.gph.gov.sa/
اللهم اني استودعك اولادي

بكرة تجيبي اطفال، و راح يتهمك انهم مو منه
قولي الحمدلله ماجبتي منه اطفال

روحي كملي دراستك و أنسيه
يا انه يتعالج، او حياتك معه بتكون دمار

و الله يعينك

كل شئ الا الشرف و العفة، لا احد يشكك فيها
و ليت تسمعي لقصة الاخت بيتا، لانها تعاني
تقريبا من نفس مشكلتك

بدون تفكير ياعسل انتي اهــــــــمـ بكثير منه ومن نفسيته اذا معه نفسيه ليش يتزوج


ماراح اقولك اهله غشوك انتي بنفسك كنتي شايفه الوضع وقلبك خضر للحين


لكن هذا وقتك وعمرك وحياتك لاتسمحين لواحد مريض يخربها ابد دوووسي على اي واحد يحاول يعفسك


ودراستك اولــــى دامه شاك فيك وفي تربيتك واهلك بيعيه بتراااب


اقسم بجلال الله ارتفع ضغطي فل منه ومنك ><


شوفي من الاخر ياعسل واعذريني على الاسلوب : انتي ماتحبين اهلك لو تحبينهم صدق واحترمتي ابوك كان من اول كلمه قالها عنك وعن تربيتك شخطتي في وجهه وتوكلتي على بيت اهلك


واخيراً مااقول الا الله يكون في عونك قلبك بيوديك في داهيه انتبهي على صحتك ومستقبلك ورضا اهلك


وسامحيني ع الفضاضه في الرد بس جد حسيت بقهرك ><

اقسم بالله رفعتي ضغطنا الله يسامحك
اقوووول فوووووووووووووقي
فوووقي يابنت الناس لو تحملتي شوي راح يجيك ضغط وسكر وممكن مثل حالته تجلطك
انسان مريض الحمدلله الله يعافيني لا مرضه مرض قلب واخلاق
وش تحبين فيه
انتي صغيره صغيرة والف واحد يتمناك
اصبري كمان موب بعيد بعدين يقول للناس تراها تخرج لاخوياها
سبحان الله اغلب اصحاب السوابق هم اصحاب الشك ومرض القلوب الامارحم ربي
اقسم بالله عنوستي بالرغم الشدة والتعب اللي فيها ارحم من حياتك وان شاء الله اثاب عليها ويكفي القناعة وحسن الظن بالله
الله لا يرزقني بمثله حسبي الله ونعم الوكيل
اكثري من الاستغفار والاستخارة
وفكري بعقلك هذا وضع موب عادي
اذا الشك دخل بين اثنين صارت الحياة جحيم
سبحانك ربي كنت اشوف النك تبعك يثير اعجابي لكن لما عرفت قصتك رفعتي ضغطي قهر عليك
ماتحتاجين لا اب ولاشيء معاك اقووى من ابوك رب عظيم قهار جبار قادر يفصمه ماسكة نفسي ماابى ادعي عليه اتصرفي يااختي الله يخلي التكاسي قادرة تروحين محكمة خلي علاقتك مع الله وقويه واطلبي منه المخرج واصحك تحملي من هذا المريض والله تعضين اصابع الندم الله يسهل امرك

__________________
[COLOR="Indigo]اللهم اجعل حبك وحب نبيك احب الي من نفسي واهلي والماء البارد يارب ارضى عني وارضني يارب* ارجوا من كل من اسأت اليه ان يسامحني بالنسبة لي مسامحة الجميع
[\COLOR]

الله يخليك أتصلي بأقرب شخص لك ويقدر يفهمك من أعمامك
وخليهم يخلصونك منه ... هذا مو رجل
كيف بتعيشين كذا .... الله يكون في عونك

وانا مع رأي الأعضـــاء .. هذه تجربــة مريرة إنتي تمريــن فيها ..

حبيبتي الطلاق ما نهايــة العمر. إنتي ولله الحمدلله ما زلتِ ببداية شبابك .. بإذن الله يعوضك بأحسن منه ..

والخيرة إنك ما جبتي عيــال منه .. بعد يجلس يشكك فيهــم .. فيه مرض نفسي .. فلا تخليه يعذب نفسيتك ..

ارجعي لأهلك استسمحي منهــم .. وتحملي اللي يقولونه .. أفضل بكثير من العيش في هذا الهم ..

والله يرفع همك ويسهل أمرك .. ويعطيك العافية ويشـــافيك ..

لا حول و لا قوة إلا بالله...
لن أخوض في شخصية زوجك فهي واضحة كوضوح البدر في الليلة الظلماء...هو رجل يحتاج إلى علاج نفسي مكثف.
:::
أنتِ يا حماكِ الله أمام خيارين:
1) إما استمرارية العيش معه بهذا الأسلوب وهذه الطريقة حتى يقضي الله أمراً.
2) أو رؤية حل آخر.
:::
أقترح ما يلي:
أ‌) إن كنتِ تريدين زوجك لكن ترغبين في تأديبه وهذا ما يظهر لي:
تتصلين على أحد أعمامك أو جدك لوالدك أو رجال من محارمك...تجعلينهم يقرؤون رسائله...يتصلون عليه لمقابلته...يواجهونه برسائله...بعدها يطلبون منه إثبات ما كتبه في الرسائل أو إقامة دعوى قذف محصنة في المحكمة من أجل إخافته، ثم يطلبون منه احترام نفسه وأخلاقه، ويتعهد أمامهم، ويعتذر منك.
ب‌) إن كنتِ لا تريدينه:
تتصلين على أحد أعمامك أو جدك لوالدك أو رجال من محارمك...تجعلينهم يقرؤون رسائله...يتصلون عليه لمقابلته...يواجهونه برسائله...بعدها يطلبون منه إثبات ما كتبه في الرسائل أو إقامة دعوى قذف محصنة في المحكمة، وفعلاً يتم رفع الدعوى...في المحكمة سيُسأل زوجك عن التهم الموجهة لك، ويُطلب منه إحضار أربعة شهود...فإن لم يحضرهم ولن يفعل ومع وجود إنكارك فربما يطبق عليكما آية اللعان
يقول تعالى: (وَالَّذِينَ يَرْمُونَ أَزْوَاجَهُمْ وَلَمْ يَكُنْ لَهُمْ شُهَدَاءُ إِلَّا أَنْفُسُهُمْ فَشَهَادَةُ أَحَدِهِمْ أَرْبَعُ شَهَادَاتٍ بِاللَّهِ إِنَّهُ لَمِنَ الصَّادِقِينَ * وَالْخَامِسَةُ أَنَّ لَعْنَتَ اللَّهِ عَلَيْهِ إِنْ كَانَ مِنَ الْكَاذِبِينَ * وَيَدْرَأُ عَنْهَا الْعَذَابَ أَنْ تَشْهَدَ أَرْبَعَ شَهَادَاتٍ بِاللَّهِ إِنَّهُ لَمِنَ الْكَاذِبِينَ * وَالْخَامِسَةَ أَنَّ غَضَبَ اللَّهِ عَلَيْهَا إِنْ كَانَ مِنَ الصَّادِقِينَ).
وبعده يتم التفريق بينكما، وتحرمين عليه حرمة أبدية لا رجوع فيها.
:::
أوصيك أيضاً:
1) حافظي على صحتك، وتابعي علاجك.
2) استخيري كثيراً في ِشأنك معه.
3) لو كنت تريدين إكمال الحياة معه فافعلي التالي:
أ‌) باللين والتحايل أقنعيه بمراجعة طبيب نفسي، وأخصائي اجتماعي.
ب‌) تجنبي الحمل.
ت‌) تقربي منه، وتجنبي إثارة شكوكه، واتركي الزينة.
ث‌) راقبي أمره ووضعه وتغيراته، ثم احكمي من ناحية الاستمرار أو الانفصال.
ج‌) أكثري من الاستخارة، ودعاء الله تعالى.
:::
الكرة في ملعبك، والأمور واضحة، وأنت ما زلتِ صغيرة في ريعان الصبا، والعمر أمامك، والقرار لك.

اعانك الله عزيزتي وفرج همك واله يشافيك ويعافيك،،

حبيبتي انت لساتك بأول شبابك، حرام تضيعي شبابك وصحتك ودراستك بهيك حياة،،
انت ببداية الطريق والحياة قدامك،، اجلسي مع نفسك جلسة هدووء وصفاء بوقت يكون ذهنك صافي،،
شوفي حياتك هلا وتخيليها لبعد 5 سنين،، هل انت بتتحملي هالاتهامات ومايترتب عليها من زوجك؟؟
فيما لو اجاك منه اولاد (الله يطعمك الذرية الصالحة يارب) هل بتشوفي ان زوجك أهل للثقة وانه يكون أب؟؟
فكري بكل شي كل شي، مهم وغير مهم، كبير وصغير، شوفي الحسنات ان وجدت وشوفي السيئات،،،
وبناءً عليه قرري، اما بتستمري وبتتحملي او بتفترقوا وان الله يحب المحسنين!!

اما بالنسبة لرأيي الشخصي، فأنا أرى ان كلمة "مطلقة" التي تخافين منها أرحم مليون مرة من الحياة مع زوجك (بالصورة المذكورة)
لانه بكل بساطة يمكن بكرة توصل درجة الشك بأولاده انهم من حدا تاني، ويمكن يطلقك وبهيك بتصيري مطلقة ومعك أولاد+يمكن مستقبل ضاع+العمر راح+ ... الله أعلم شو

لهيك اذا حابة انك تستمري معه انصحية بجد للعلاج واذا لم يستجب فانفذي بجلدك وحاولي ترجعي المياه لمجاريها مع الأهل
زوجك مش من النوع يلي بيستاهل تبيعي الدنيا والناس والعالم كله عشانه،،،

الله يوفقك ويهديك وييسرلك أمرك لما يحب ويرضى،،،