السلام عليكم جميعا :
في البداية أحب أشكركم على الموقع المتميز و بصراحة هذي أول مرة أنا أدخل فيها منتدى و أشارك فيه و هالشي طبعا لان منتداكم حييييل متميز و فيه كل اللي أحتاجه من مواضيع و أشياء حتى لو كانت جريئة نوعا ما لكنها و بصراحة معروضة و مكتوبة بطريقة لبقة و راقية و هالشي نادر ما نراه

فأرجو أنكم ترحبون فيني كعضوة جديدو بينكم

أخواني و أخواتي خصوصا المتزوجين منكم أنا عندي مشكلة يترتب عليها هدم بيتي و حبيت أستشيركم قبل لا أسوي شي لاني ضايعة بالتفكير و أرجو أنكم تفيدوني

أنا فتاة عمري 23 سنة متزوجة حديثا و حامل في الأشهر الأولى . تزوجت زواج تقليدي جدا و كان زوجي في بداية زواجنا من أحسن ما يكون معاي و في احد الايام كنت أتمشى معاه في أحد المجمعات التجارية و اذا بفتاة هي في نفس عمري تقريبا تنادي من بعيد و تصرخ باسم زوجي و هو يحاول تجاهلها لكنها أصرت و اقتربت كثيرا منه و نادته باسمه
و قالت له و هي تبكي و منهارة جدا ( حسبي الله و نعم الوكيل فيك الله لا يوفقك و أنا راح أقعد طول عمري أدعي عليك )
و اخذت تقول كلام كثير فهمت من خلاله أن كان لها علاقة محرمة مع زوجي و أن زوجي أستغلها و خدعها ووعدها بالزواج
طبعا طوال هذه الفترة زوجي لم ينطق و لا بكلمة و لم يحاول حتى الرد عليها أحترامات لي على الأقل و هي لم تكلمني مطلقا
يعني لهالدرجة في ناس جذي بايعينها و لا يهمهم الناس في بنت جذي تصرخ بمكان عام و تسوي هالشي لازم يكون في شي قوي حيل اللي خلاها جذي
و لما ركبنا السيارة لم ينطق بكلمة و قال لي ( ماعليج منها هذي محترة عشان ما خذتها )
طبعا هالكلام ما أقنعني كلش و من وجهه واضح أنه كذاب
و من يومها صار في حاجز قوي بينا حتى لما يعاشرني أحس أني مو متقبلته و لا أبيه و سبحان الله مع مرور الأيام بدأت أرى وجهه أسود لا من سحر و لا عمل و لكن من غضب الله عليه و كل مايحاول يسوي شي تنسد الابواب بوجهه و لا ينجح بشي
أخواني ..
ماذا أفعل أرجوكم دلوني هل أطلب الطلاق أم أستمر بالعيش مع شخص مثل هذا أنا أدري أن كل رجل له ماضي لكم مو لهالدرجة من العلاقات
يعني لو واحد ثاني مكانه مو على الاقل يسكتها عشاني و لا يرد عليها مو يسكت مرة وحدة

أبي مساعدتكم ...
و شكرا لكم

__________________

أسأل الله العظيم..رب العرش العظيم..الذي جمعنا في دنيا فانية..

ان يجمعنا ثانية..في جنة قطوفها دانية

والله يااختي وضعك صعب ولو اني مكانك مدري وش اسوي بصراحه موقف قوي ويمكن انا من النوع اللي ازعل بسرعه ويمكن في وقتها اروح بيت اهلي اناطبعا ماانصحك انك تتركين البيت ولا عندي حل لمشكلتك بسا قول حسبنا الله ونعم الوكيل

اختي الكريمة اعانك الله, موضوعك يحتاج الى تروي, عليك الجلوس معه و التكلم بمنتهى الصراحة, فان كان قد تاب فعلا, فان الله قبل توبته, فكيف لا تقبليها انت..و مع الايام وحسن سلوكه سوف تعودي لحبه..اما اذا شعرت العكس ففكري بحلو ل اخرى لكن لا تنسي ان تحسبي حساب الفرد الجديد القادم..والله الموفق.

انا ما ألومك أختي على شعوري...
بس اولا ليتك تقرين ردودنا على الأخت الهنوف....تستفيدين منها ان شاء الله..

شي ثاني...
افترضي انه لو سوابق؟
يا اختي ربي يغفر احنا ليش ما نغفر؟

اذا انسان ترك الطريق الاول وبدا بداية ان شاء الله انها طيبة ونظيفة.. فليه نربطه بماضيه؟

يا اختي لو انك أذنبت ذنب وظلوا الناس يقولون فلانة سوت وفلانة قالت ماتموتين قهر..
الى متى وهم رابطيني في هالذنب؟

اذا زوجك بدامعاك كويس وبداية طيبة..
بالعكس ساعديه ينسى الماضي خليه يقول من عرفتك وانت حياتي كلها وماعد اشوف غيرك..
لا تخلينه يتحسر على ماضيه ويتمنى يرجع له
نصيحتي لك اختي انتو تزوجتوا خلاص... وبما ان الحياة بدت حلوة فلا تنهينها بهالسرعة..

هذا في حال ان العلاقة كانت قوية فما بالك لو كانتتكذب او كانت علاقة بسيطة؟!!!
صدقيني اي رجال يمكن يناظر يمين وشمال وتثيره اي امراة بس لما يحب يتزوج يتزوج انسانة شريفة... لانه يحس ان الحياة ما تكون الا معاها..
وهذا هو اختارك الانسانة اللي راح تعيش معاه... الصح انك تخلينه يرجع لها؟!!! والا يبدا حياة نظيفة معاك؟!
يا اختي يمكن فيه جرح لك وحاسة فيك بس صدقيني هي فترة اذا قدرت تتجاوزينها...راح تلقين نتائجها جدا ممتازة!
الله يهدي بالك...

انا اقول اتقي الله
بمجرد انه تزوجك
فهذا يعني ان الرجل له نية ان يستقر
اعطيه فرصة
منذ اول موقف في حياتك معه تتعرضين لهكذا مشكلة و تقولين طلاق !!



مع هذا
انصحك ان لا تمرري الموضوع مرور الكرام
ناقشيه - بهدوء - و حاولي ان تقولي له انكِ ستسامحينه اول و آخر مرة ( حتى يشعر أنك فاهمة الموضوع و مهتمة به )

__________________

أن تشعل شمـــــــعة .. خيرا لك من ان تلعن ... الظـــــــلام

هل زوجك شخص ملتزم بالصلاة والدين

__________________

يمكن زوجك تاب و عقل و طلب الحلال

إذا كانت معاملته معك طيبة فخلاص ما فيه داعي لنقاش الماضي

الماضي راح و الله غفور رحيم

>>>>>>>>>>>>>>>>>>>>> 100%

التنبيش في الماضي من أكثر الأمور اللي تتعب الواحد ولا تفيده بشي ..
فكري بحياتك معاه وكيف انك تقدري تكسبيه

وبعدين كثير ماندعي اننا نحب فلان ونعزه ولو طلب عيوننا تفداه ... ولو طاح أو مر بضيقه حننتظره لآخر يوم في عمرنا ونساعده ...

أجل أعتبري هالشي - على أسوأ الاحتمالات - موجود وأنه بالفعل كان شخص له ماضي ... أجل انظري لنفسك وش تقدري تقدمي شي مفيد لزوجك مو تتركيه أسير الفشل والماضي وخجل منكي ...

والله إني أحيان أعرف أشخاص أخطأ علي وماااااااااافيها كلام ..
كلن أشوف الخجل في عيونه مني >> أقوم أساعده لتجاوز المرحلة هذيك يرجع يحترمني أكثر من السابق لأنه عارف إني تغاضيت عن الموقف لالا وساعدته بعد ...

أتمنى ما أكون طولت ... والأخوان جايين بردودهم


أخوكم / ساي

__________________

أنك إذا لم ترضى سوى بالأفضل فسوف تحصل عليه - بإذن الله -

مشكورين يا أخواني على ردودكم
لكن أسمحولي أتناقش معاكم شوي

بالنسبة للاخوان اللي قالوا أن ربنا يقبل التوبة ليش أنتي ما تتقبلينها
أنا أراي و الله لكن الماضي اللي فيه لعب و علاقات عابرة أنا ممكن أسامح فيه و أنا أدلري أن كل أنسان له ماضي لكن مو لدرجة أن مسوي جذي بالبنت و معلقها و معشمها على زواج لدرجة أن أهي تفاجئت منه لما شافتني معاه و هذا يعني أن على علاقة فيها للحين أو أن معشمها و كشت فيها و طبعا من كلامها فهمت أن ما تقدر تتزوج بعده لان كانت بينهم علاقه محرمة ) و أعتقد أنها مو عذراء من زوجي ) و أنا شنو اللي جابرني تدعي على بناتي غدا يصير فيهم مثلها بسبب أبوهم
و الله فهموني شلون أعيش مع أنسان جذي شلون أعيش مع واحد أدري أن ظالم و أستمر معاه
صحيح أن يحاول ينسيني لكن أحس أن في وجهه ذنب كبير و حرام هالبنت شنو ذنبها المسكينة لو كانت وحدة من بنات الشوارع ماكنت أهتميت لكنها مبينة بنت ناس و مدامها سوت هالموقف يعني أنقص عليها
و حاولت أن أقعد مع زوجي و أتفاهم معاه ما وصلت لحل مقنع معاه و لاحاولت أفهم شنو المقصود منه لف و دوران و كلام غير هادف
مرة يقولي :
محترة
و مرة يقولي ماعرفها يمكن مشبها ( تخيلوا و أهي نادته باسمه )
و مرة يقولي ماذكرها
و مرة يقولي طبعا في أصدق لحظات الصراحة ( كنت أحبها و قلت لها أني بتزوج و أطلق لان أهلي ما يبونج و قاصبيني على وحدة شايفينها وبعدها أطلقها و أرجع لج ) بذمتكم هذا كلام
ليش بنات الناس لعبة
وفي مرة كنت أسولف مع بنت جيران أهل زوجي كانت تقولي أنها كانت تجي البيت كل يوم و كانت تقعد معا ه طول الوقت و معشمها بزواج و أهي بنت ناس معروفين و بعدها لما تطلع كان يروح مع خواته يخطب غيرها
في أحد جذي في نذالة لهالدرجة
و بالنسبة للأخ اللي سأل ( عن الصلاة ) زوجي يطوف أكثر فروضه و غير ملتزم بالصلاة كثيرا )

و أنا شلون أعيش مع واحد مو مضمون مثل هذا أنا ممكن أغفر له لو كان الوضع عادي و علاقات عابرة لكن جذي هذا اللي أعرفه الله يستر من الخافي
و الله محترقة من داخلي ماني عارفة شسوي