هذه اول مشاركه لي في هذا المنتدى
بمااني دايما ادخل عليه اعرف ان الاخوه والاخوات عنه ماراح يقصرون في حل مشكلتي
موعارفه هل هي مشكله كبيره او صغيره
كنا انا واخت زوجي (خطيبي )راجعين من زواج تقريبا الساعه 12 مع السواق والشغاله(زوجته)
في طريق رجعتنا للبيت لازم نمر في شارع فاضي مافيه احد تقريبا طول الطريق كنت ادعي الله ان نوصل البيت بسلامه عندي خوف شديد من الشوراع الظلمه مادري ليه دايما اتخيل ان راح يصير فيها جرايم
وطول الطريق ماسكه الجوال في يدي استعدللخطر يمكن يصير شي لاسمح الله
واخت زوجي تتكلم عن مكياج فلانه وفستان علانه وانا مو معاها ابغى نوصل البيت
وفجأه تجي سياره وتسد الطريق على السواق ويطلع منها واحد ملثم
ويروح جهه السواق ويقول اطلع من سياره ويصارخ عليه
في هذا الوقت مو قادره استوعب الموقف اقول يمكن قاعده اتخيل
وطلع السواق من السياره مع الشغاله وقال له الرجال المتلثم اخذ سيارتي وروح البيت
وفي السياره مبلغ 100 الف اخذها وسافر مع زوجتك ومابغاك تقول لاحد عن الي صار
خل البنات هنا واخذ الشغاله وامشي
بعد مامشي السواق والشغاله صار ماحد في الشارع الا انا واخت زوجي والرجال
لو اكتب لكم شنو كان شعوري ماراح اقدر اوصفه ابدا
جاء ناحيه الجهه الي انا فيها وفتح الباب وقام يصارخ ويقول لي نزلي بسرعه
في هذه اللحظه بجد احس ان رجولي نشلت مو قادره احركها
سحبني من ذراعي وبعدها طلع سكين صغيره وقال لي خليني اشوف وجههك
ابغى اصارخ احس ان صوتي راح مو قادره حتى اتكلم
كشفت وجههي وفي نفسي مليون سؤال الحين اذا عرفوا اهلي وزوجي شنو راح يكون موقفهم
وموقف الناس شنو راح يكون اذا عرفوا؟؟؟
كنت اقول يمكن كابوس وبعدها راح اصحى منه
قرب السكين من وجهي وقال لي ماعرفتيني!!!!!
وشال الشماغ عن وجهه في البدايه من الصدمه ماكنت مستوعبه شي
بعد مادققت عرفت انه زوجي
في هاللحظه بجد انهرت جات له حاله هستيريا من البكاء
هو يهدي فيني ويقول والله حبيبتي كنت امزح معاكي خلاص انسي
كان هو متفق مع السواق واخت زوجي على هذا الشي
طول الطريق وانا منهاره وهو يهدي فيني ويسكتني ويقول انها مزحه
بالله عليكم في احد يمزح بهالطريقه الدفشه
كلما افكر في الموضوع تجي لي حاله رعب ماقدر انسى الي صار
لانه بجد عشت حاله رعب في حياتي كلها ماعشت مثلها
وصلت البيت وانا تعبانه نفسيا على طول دخلت غرفتي وطول الليل يدق علي وانا ماررد عليه
هو صحيح اعتذر لكن مو قادره انسى المقلب السخيف الي عمله