(زوجي يهملني منذ وقت طويل )
السلام عليكم
معلومات عني
متزوجه من 12 سنه
عندي اطفال
ربة منزل لكن ناويه اتوظف واطلع من ذا القوقعه
جامعيه
سريعه الغضب
سريعة الرضى
متسرعه
عنيده لفتره وبعدها يطيح الي في راسي بمعنى اصح بعد فتره اقلب المشكله في راسي واتندم على ردة فعلي حتى لو ماكنت غلطانه
احب الاطفال وحنونه بس من تزوجته صرت عصبيه وما اتحمل اعيالي بسبب الضغوطات واكتشفت ان اعنادي لعب بزران يوم شفت اطباع المحروس

نجي لابو العيال
جامعي
منصب ممتاز
راتب ممتاز الحمدلله
عملي جدا
زعوووول جدا
مايبي مرادد وقت المشكله
عنيييييييييييييييييد اتعب وانا اقول عنيد
مواظب على صلاته الحمدلله
يحب الشغل واصدقائه
في حالات الرضا يكون طيب

المشكله

مدري من وين ابدا لكن
لي 4 سنوات ماني مرتاحه معه ابد ابد ابد
السنه هذي زادت المشاكل بسبب السهر اليومي واهمالي هذا غير الزعل الي يستمررر شهور هجر كامل اللهم يكون بيننا تواصل على الاشياء الضروريه فقط وكله علشان العيال
ما ابي اقول التفاصيل السابقه لانها تغث
لكن ببقولكم الحاصل ها الفتره
لنا شهور وحنا شيل وحط اغلب الوقت متقاطعين لو اغيب عنه شهورما اتصل وسئل عني انا الي اكلم وانا الي ابادر ناقشت تكلمت زعلت بكيت هددت مافيه فايده يعانداكثر
صار يستانس بوقت الزعل علشان ياخذ راحته برا البيت
علاقتي مع اهله حلووه جدا اقدرهم واحترمهم وهم نفس الشي لكن هو له فتره ما يروح لاهلي ولا يكلم الوالد الا من العيد للعيد فقط
وها الشي زعلني منه
قلت له الحين حضرتك ما توديني عندهم ومره تكلف على نفسك من العيد للعيد تكلم تعايد وبس وانا من اليوم ورايح بصير مثلك ومثل ما تعامل اهلي انا بعامل اهلك
مع انه يحترم اهلي بس التقصير مزعجني وسوالهم الدائم مضايقني
يعني انا ليش حاشمه اهلك لانهم اولا كويسين معي وثانيا علشانك تحصل بعض المواقف لكن اعرف احلها معهم
المهم
كنت معصبه قبل شهرين وارسلت المسج هو ما صدق وزعل طبعا قبلها كان لنا اسبوعين ماشيه امورنا
وهو قبلها ما كان يتصل علي ابد وانا مسافره وكنت استغرب طيب امورنا اوكي ليه ما يدق ويسئل بتقولون لانك تكلمينه والله طنشته شهر وشهرين ولا تغير حاله
المهم
بعد رسالتي له طنشني لحد ما جا العيد وعايدته ويكلمني برسميه ما كاني زوجته ا>ا حب يستفسر عن شي يخصه ارسل لي واتز اب
بعد فتره ارسل لي ع الواتز بصيغة الامر شوفي في اي تاريخ تبين اخذ للبنت موعد
بدون سلام بدون سؤال بدون ما يتطمن علي والا على العيال وكاني شغاله عنده لاحظو ان له تقريا شهرين ونص ما كلمني غير لما كلمته انا اعايده لاننا كنا مسافرين لاهلي
قلت له لا تكلف على نفسك طال عمرك شهور وانت ما تدري عنا ت على هذي
وما رد عي
وقبلها كنت مقهوره من تطنيشه لنا وشايل مسوليتنا ما يعرف غير المصروف اخر الشهر قلت له كوني من عائله غنيه هذا لا يعني انك تشيل يدك من مصاريف اعيالي انا لي شهرين عنداهلي لاني عامله عمليه فا مو معقول ابوي يتكفل باكلهم وشربهم عيب صح ابوي يزعل لو احط اريال با البيت لكن انا بعد احب ان زوجي ما يقصر يبيض وجهي على الاقل خصوصا ان الله مغنيه
طبعا كنت معصبه وانا اكتب الرساله وهي الي خلته يزيد بزعله ويوم ارسل لي المصروف طلع زايد عليه
لكن بدون ما يتكلم معي
المهم قبل 5 شهور قال لي انه عنده انتداب للدوله الفلانيه وراح الموضوع بعد رسالة الواتز انا قلت له لا عاد ترسل لي شي على الواتز انا زوجتك ماني صديقك ومن ها الكلامم ما رد علي
الصدمه
اكتشفت انه سافر بدون ما يقول لي قمت ارسلت له مسج وقلت
اهمال وتطنيش وتقصير وزعل با الشهور تحملت
اما انك تقلل من قيمتي واحترامي وتخليني سيره على السان الي يسوى والي ما يسوى لا الموضوع كبر وما ينسكت عليه وحتى لو كتب ربي اننا نستمر تاكد بيكون بيني وبينك حاجز كبير
كنت ناويه اكلم اهلي واتخذت بيني وبين نفسي قرار بعدم الرجعه له لاني با العربي مو مستفيده من شي غير الغثا برضو ما رد علي راح اسبوع ورجع
بنفس اليوم الي جيت بفاتح اهلي با الموضوع سمعت اعيالي يتكلمون عن ابوهم وانهم مشتاقين له ومتحمسين للرجعه رحمتهم وانطيت وسكت ولا تكلمت وهو برضو ما كلمني
رجعت للدوامات والمدارس واول ما شفته قال السلام واخذ الاغراض ودخلهم بدون ما يتكلم معي وانا مطنشه وواضح مالي خلقه بعدها الكلام موجذ للعيال وش تبون تاكلون وش اجيب لكم ومن ها الخرابيط وانا طنااااش ولا كاني موجوده له الحين 10 ايام على ها الوضع

ملييييت يا ناس ما كان كذا حتى لو طال الزعل واعرف ماعنده خرابيط غير ها الشله البايخه وشغله والواتس اب تصدقون انه قعد مره عني 4 شهور يعاند يحسب اني بمسك عليه ذاك الشي واقول له لاء رد على الي صار بيننا يعني انسان غريب صار
احيانا اقول يمكن من كلامي عنه عند الناس اول وعدم توضيح مشاكلي عند احد خلى الناس يحسبون اني مدلله وماعلي قاصر عنده وانه مدلعني
اتضايق لاصار عندي با البيت مع اني اشتكي من عندم وجوده عندنا لكن لا جا ودي يطلع ما ارتاح با النوم الا اذا كان برا الغرفه اذا كان فيها احس بكتمه
يقول لي لا صرتو موجودين با البيت ما اقعد واذا مسافرين ييحلى لي البيت
احيانا اتخيل كاني اشوف زول مر من قدامي زي الظل واتعوذ من ابليس لاحظت المشكاكل بيننا كثرت
احلامي كلها مرعبه صارت
لي فتره انتظم اسبوع على سورة البقره وبعدها انشغل
اقرا اورادي بعد الصلاة واحيانا انسى لكن الغالب اقرا
مليت من وضعي
احس نفسي وحيده بين اعيالي بس
والمشكله انه فوق شينه قوي عين الطلعه مع ااعياله وبس وانا محبوسه بزعمه يعاقبني
انا ما انكر اني اذا زعلت منه اشتغل با الرسائل لانه دايم عنده النقاش ما ينفع بيننا قلت اكيد مافيه نتيجه لانك تبيني اوافق على كل شي تقول
هذا شي بسيط
تعبت وماعندي احد افضفض له
على فكره كله كوووم والسفر الي صار بدون علمي كوم ثاني وانا حالفه ما اتكلم معه لحد ما هو الي يبدا ويعتذر ويوعدني ما يتكرر ها الشي مره ثانيه ما عاد الا هي اسمع من الحريم انه مسافر وانا اهز راسي كاني ادري ولا ابيه يكررها وعارفه اننا احتمال نستمر سنه او 2 ماعنده مشكله
ولا تحسبون انه فيه قصور لكن عنده عزة نفس غير طبيعيه فوق العناد



(تم التعديل ليتناسب مع المضمون)

إنتي تشدين وهو يشد وتراكمات كثيره

طيب إلى متى؟؟ للأسف تعودتوا على هالوضع

تعوذي من أبليس حافظي على أذكارك وصلاتك وقرآنك

ودخلي أحد بينكم بس شخص يكون حكيم وعارفه ماراح يطلع مشاكلكم لبرا

إنتم تحتاجون جلسه جاده مع بعضكم وإللي بينكم صاير زي كرة الثلج كل ماله يكبر

حلوا الأمور بوقتها لاتخلون شي بالقلوب وحاولي تتذكرين متى بالضبط تغيرت علاقتكم

وش الحدث إللي أشعل هالشراره أحياناً نهمل أشياء صغيره لكن تأثيرها يكون كبير وعلى المدى البعيد

اختي
انا من اخذته وانا وهو في مشاكل لكن كانت كا اي مشاكل تكون بين الازواج لكن كنت احس بلهفته علي حتى لو طال زعلنا كان بعد ما نتراضى ونتكلم يحاول يسوي الي ابي لكن كان احيانا يدقق على امور بايخه انا ما انتبه لها
لكن با الضبط لي 4 سنوات والحال متغير انا اول ما احب اطول با الزعل زاحاول اراضيه واتكلم با الموضوع بس مع كثر زعله وتطنيشه وعناده صرت مثله لا بل اني صرت احس بنفووور واحس اني صابره علشان اعيالي حتى لو تناقشنا يشوف اني ما اعرف اناقش وان الكلام ضايع ومافيه تفاهم يبيني على هواه تصدقين مره كنت رايحه زياره للاهل وانكسر اصبعي وكان بيننا زعل تصدقين يوم شافني با المطار ما سئلني يدك ليه ملفوفه ولا حتى سلامات طنشني وطنشته انا معك مافيه حوار بيننا ها الفتره خلاص مليت منه ومن كلامه المكرر

مرحبا بك اختي الكريمة في المنتدى ..

خلال هذه الاربع سنوات كيف كان مستواك في الاهتمام بهندامك الشخصي
وخدمة زوجك ؟ هل كنت ممتازة او جيدة او ضعيفة ؟

__________________



احيانا يجب ان نفقد ذواتنا كاملة لكي نستعيدها كاملة ...

حياك الله اختي
هندامي الشخصي ممتاز الحمدلله واهتم جدا
خدمة زوجي اسوي الي علي لكن ها الفتره صار ما يهمني وصرت اقصر متعمده ردا على الي يسويه فيني
ينققهر لو يجيب شي واكون انا ما طلبته او مو محتاجته او متوفر بكثره عندي واقول له ليش تجيب ك>ا يقول قولي شكرا وبس واذا خرب ارميه لكن لا تسوين لي سالفه
اما من الناحيه الشكليه اعرف اني اعجبه لانه كان يقول لي اول نفس المواصفات الي انا ادورها اللهم لسانك يبي له قص شوي قلت لانك ما تبي وحده تخالفك
العلاقه الخاصه بيننا ممتازه لكن في وقت الزعل ما يلتفت للشي هذا ابد ابد حتى لو هو يحترق يخاف اني ارده ويضيع وجهه يمسك نفسه حتى لو يبي يستمر مطنش لحد ما ارضخ انا وانا مليت ماعاد ينفع معي الحين

ليتكم ما غيرتو العنوان حسيته بارد

يارب رحمتك ابيش هالحياه !!!
غريبه لسئ ماتزوج عليك ولا لعب بذيله !!!!
ياحبيبتي انتي المراءه انتي الي تتنازلي بشكل اكبر ومستمر منه
مو تعامليه بالند ماكلمت اهلي مااكلم اهلك
ماتسال عني مااسال عنك
ماترد ع اتصالاتي اطنشك وماارد ع اتصالاتك
لا يا حبيبتي كل الرجال عنيدين وعندهم عزة نفس لا تتوقعي يتنازل هو لك كل مره
الحرمه الشاطره هي الي تخلي زوجها يفقدها ومايرضئ ع زعلها
هاذا زوجك بداء يسافر من وراكي انتبهي لتجر هالسفرات شي اكبر
مو مقصر معك بالمصروووف ولا ضربك ولا خانك انتي اجل الي مقصره
صراااحه انتي العنيده مو هو
ياحبيبتي تنازلي وغضي الطرف ولا تدققي ومشي الامور
وخلك حبوبه ونفسك حلوه وبشوشه وسهلة المعشر
بيني له لهفتك وشوقك وخوفك وغيرتك عليه
سيطري ع عقله قبل قلبه بالكلام زي الله لايحرمني منك،،،فقدتك بغيبتك،،،انت الشي الوحيد الحلو بحياتي يعني غرقيه بهالكلام وبعدين بالافعال
لا تشدي الامور بينكم اكثر لاتجي وحده تفر راسسسه وتاخذه وتعيش ملكة زمانها معه ويقول لها والله كنت محرووم قبلك
خلك ذكييييه وشاطره وكلها شوية كلمات وحركات وعصرة ليمونه علي عنادك وخشمك وبصير زي الطفل عندك
وفيه رجال يحب يخانق ويتغلي عشان زوجته بس تقول سم ياابو فلان ولبيه وابشر مو ضعف منها وخوف من زعله
لا شطاااااره وذكاء وهي عارفه ان الرجال بيشيل لها انها مازعلت ولا دققت
يا قلبي لاتزعلي من كلامي اتركي عنك الاعتداد بالنفس وطلب الاعتذار
هي امور بسيطه وسهله وشوي تكتيكات وحركات وبتشوفي كيف تقلبي كيانه
الله يسخركم لبعض يارررب

يا عزيزتي
انا ترا اتكلم عن الي بيننا ها الفتره
من قالك ما اتنازل كل حياتي معه تنازلات حتى تمشي ها السفينه لكن وصلت لمرحله خلاص مليت منه صرت اطالع خاطره وانا منسيه سم وابشر وامر ومن عيوني وبس يتصل عليه احد يتركني ويطير عندهم طيب انا وين حقوقي وين لا تحسبين انو مافيه احد دخل بيننا الا صارت وبدا يقول اعذار واهيه وسخيفه انتي تدرين انه حتى بلحظات الرضا حده معنا با اليوم ساعه فقط ونص اليوم مع شلته لو انتي مكاني وش كان سويتي تخيلي تقعدين يوم كامل ما شفتيه ويطلع من شغله يمر اهله وبعدها بدل ما يجي للبيت يروح عطول على شلة الانس اسئلك بالله ها الشي ما يزعل وبرضو امسك اعصابي واكلمه اسئل عنه يقول رحت للشباب طيب ليه ما مريت اشوفك ما شفتك اليوم يقول قلت مره وحده اجي يؤ عجبي والله مين اهم انا واعيالك والا هم
اتركي هذا كله
لو ابي مشوار ما ينتظرني لو 10 دقايق اعمال الدنيا تطلع له لكن لو احد من اهله يبي مشوار لمدينه ثانيه قام وكانه ماعنده شي وراح يوصل مشوار 4 او 5 ساعات اشياء تقهر
اعطيك شي يرفع الضغط اكثر
تخيلي من زمان ما جلستي مع زوجك ولا تكلمتو جت فرصه وصارو العيال مع اختي تخيلي اخذني وحطني با البيت وماشي 140 علشان يحلق على الشباب وش ها الهبل وين حقي انا ليه مخلي اعيالي مع اختي اجل

اختي انا ردي كان بناء علي كلامك بدون زعل
تقولي 12 سنه زواج
من 4 سنوات منتي مرتاحه ابدا ابدا ابدا
من 1 سنه زادت المشاكل والهجر بسبب اصحابه والسهر
ايش الي صار بهالاربع سنوات وغير الحال
تقولي من صفاتك،،،سريعة الغضب،،،عنيده،،،متسسسسسرعه
وهاذي ابغض الصفات الي يراها الرجل بالمراءه ويخليه يتهرب من الجلوس او الاستئناس بها
سردتي احداث بالمشكله وايش قلتي له من ردود مثل
قللت من احترامي وقيمتي لما ماقال لك عن سفره
مو لااني من عائله غنيه ماتصرف علي ابوي يزعل لو انا اصرف ع البيت بسالفة المصروف
قلت له لاتكلف ع نفسك طال عمرك شهور وانت ماتدري عنا جت ع هاذي يعني ،،بسالفة موعد البنت!!!!
يا حبيبتي هو غلطان اي والله غلطان بس انتي الي المفروض تكوني ذكيه واذكئ منه وتحرجيه بردود افعالك
بقولك شي انا مررره زعلني زوجي زعله جامده وصار فيها مواقف الله لايوريكي وصلت للطلاق وتهديده يأخذ عيالي مني رحت لااخوي ابكي بحرقه وقلت له كل شي ،،،سالني اخوي يضربك قلت لا ،،قالي مقصر معك ولايصرف عليكي قلت لا،،، قالي اجل ارجعي تاسفي انتي منه ولمي السالفه ،،،والله اني رجعت مكسوره بس امثل اني مااستغني عنه ولا انا مجروحه من جوا من موقفه ومشت الامور ورب الكعبه من سبع سنين للحين هو يذكرني بهالموقف ويقولي لو الف الدنيا مالقي مثلك كبرتي بعيني من ذيك السالفه علي انه بوقتها قلب السالفه علي واني رجعت لااني انا الغلطانه وشد علي كثير بس طاطيت له،،،وتري زوجي زي مواصفات زوووجك بس العصبيه ازوووووووووووود وصرت اعرفله الحين وارخي معه،،وبعد يسهر احيان علي حساب وقته معي بس احيان اعض ع اسناني وابلع الكلام وبالعكس ماابين ضيقتي لما يرجع متاخر يلاقني مستنيته يقولي معلش اخرتك معي اقوله المهم انت تغير جو وتستانس لااني ادري جلست البيت تهم القلب ،،، ولا ابين اني محرووقه من جو علي سهره واصحابه بالمقابل معطيني حقوقي وزود ولو اقوله ابي لبن العصفور قال تم الله لايغير علينا انا بعد 12سنه متزوجه ،،يعني اتغاااااااااااضي بكيفي ولا انكد عنفسي ولا عليه ،،،بيقولولك الحين اجلسي معه وحاوريه وخيريه بينك وبين اصحابه ولاترضي عنفسك انتي الخسرااانه تري
طولت بالكلام يااااارب فهمتيني وعرفتي ان تغير زوجك من تغييرك انتي وتغير مفاهميك
ودققي بااخر سطر انتي كتبتيه بمشكلتك ززززززززين

عزيزتي انا لا الومك على ردة فعلك فمن الطبيعي حدوث التقصير حال المشاكل
والجو المتوتر بينكما ، لكن حل المشكلة يبدا من الجذور عزيزتي ..

من الواضح انك لم تعرفي مالذي يثير غضب زوجك بالضبط منك ، وان عرفتيه
فلم تجدي الحل المناسب ، تقولين انه يقول (لسانك يبي له قص ) وهناك مثال اوردتيه
بشان احضاره لغرض لا ينقص بيتك ، اذا كان ردك (بان الغرض لا تحتاجينه ) يضايقه
فغيري طريقة الرد فحسب ، قولي : ماتقصر والله لكن ليتك معلمني قبل لاننا ما نحتاجه موجود

وايضا من الواضح انكما لم تتصارحا منذ وقت طويل بشان ما يزعج كلا منكما
من جهة الاخر ، لذلك اراه امرا يخدم مصلحتك ويقوي جانبك ان تبدئي انت بهذه الخطوة ، أي
ان تبدئي انتي بتهيئة الجو لفترة زمنية معينة (من خلال التجمل والمعاملة اللطيفة وطبخ مايحبه)
ثم تصارحينه بجلسة واحدة ، ما رايك ؟

اختاري عنوانا ترينه مناسبا شرط ان يكون مطابقا لمحتوى موضوعك وساغيره ..

__________________



احيانا يجب ان نفقد ذواتنا كاملة لكي نستعيدها كاملة ...