السلام عليكم ورحمة الله وبركاته
اخواني حبيت اعرض مشكلتي عندكم هنا عل وعسى القى حل لمعاناتي
انا متزوجه من خمس سنوات وعندي 3 اطفال
عشت اول سنه في حياتي ملكه زوجي ماكان مقصر معي بشيء وحملت حملي الاول باولادي الاثنين بعد كذا بدا زوجي يتغير بدا يقصر في اشياء كثيره بدا يهملني
زوجي راعي نوم وسهر
من الدوام على طول نوووووم ثم يصحى يطلع على طول لزملاؤه ومايجي الى الفجر
تناقشت معه تهاوشنا كل شيء في الاخير ترك السهر واشترك في النادي ونفس الحاله نوم ثم النادي ثم يرجع نوم على طول
وترك النادي حاليا ورجع لزملاؤه
انا وعياله مالنا في حياته وقت كل ماقلت نبي نطلع يرفض ويقول انتي ماهمك الا الطلعات والروحات
جلسة البيت اخنقتني انا وعيالي
ماصار لي شغله غير اني افرق بينهم طول اليوم
هذا غير بخله اللي ماني قادر اتحمله انسان بخيل بمعنى الكلمه
مالي مصروف بحجة اذا طلبتي شيء اجيبه لك واذا طلبت مايجيب كل ماقلت شيء يقول اخر الشهر مامعي فلوس مع ان وظيفته ممتازه وراتبه ممتاز هذا غير انه ساكن ببلاش ماعنده التزامات غير القرض واللي عند كل الناس مو بس هو
اتذكر مره ليلة عيد بالسوبرماركت اطلبه شامبوا وبلسم يقول اختاري يا شامبوا او بلسم الاثنين مع بعض ما اقدر
المهم رحنا قبل فتره في نفس المنطقه اللي ساكنينها اهلي وكان عنده عمل 6 شهور هناك وسكنا مع اهلي
على اخر شهر اكتشفت للاسف انه يكلم وحده انصدمت طبعا واجهته واعترف بذنبه واعتذر واوهمني ان مكالمتهم بريئه وانه هو مايعرف يكلم اصلا وانه ابتلته في نفسه ((صدقته وسامحته واتفقنا ماعاد يجي طاري لهالموضوع وان خير الخطاؤون التوابون ))
ورجعنا لبيتنا بعد هالسالفه باسبوعين ومره تدق علي البنت اللي كان يكلمها علشان تمغصني بالكلام اللي كان يقوله له (( انصدمت بصراحه وانقهرت بالذات انه انسان جاف معي الى ابعد حد )) مايتفاعل معي بشيء نادرا مايضحك او يسولف عمره ما اهداني شي عير يوم زواجي
وكل مالمحت له يفهمني انه مايفهم في الرومانسيه (( طلع مخبيها لبنات الشوارع ))
وتمشكلت يومها مع زوجي وقلت اني قررت اروح لاهلي رفض وقال هذه كذابه (((مع ان احساسي انها صادقه ))
وش سوى اخذت شريحة جوالي
يعني هو وياها اللي اذنبوا جوالاتهم معهم وانا يروح علي جوالي وكاني انا اللي كنت اكلم
حاولت فيه يترك جوالي اخذه غصب عني يقول علشان ماعاد تتصل فيك والغى رقمي
المهم مرت الايام وامسك يوم جوال زوجي وافتح الرسائل المرسله مدري الذاكره تبدلت مدري وش السالفه والقى صوره مصور نفسه بدون ملابس ومرسلها للبنت اللي كان يكلمها طبعا في فترة مكالماتهم
انصدمت لحظتها والله اني كرهته وكرهت الساعه اللي شفته فيها
طبعا ماعاد اقدر افتح الموضوع بناء على اتفقنا ولا اقدر اسكت احسه بقهر فظيييييع
تركت جواله مفتوح على الصوره علشان يعرف اني شفتها وجاء واكتشف اني شفت الصوره سالني مسكتي جوالي انكرت لاني لو واجهته بالصور
بيقول احسن مين قال لك تشوفين جوالي
عشت معه اسبوع وانا اتجاهله تماما بارده معه الى ابعد حد ولا كانه موجود
وحصل بيننا خلاف على قضيه تافهه وجبت سيرة الصوره وسالته انا مقصره معك بشيء علشان تبحث عن هالشيء مع بنات الشوارع
00(((اللي اشوفه انا اني مو مقصره )) قال اي قلت مثلا قال الله يسامحك قلت لا عادي قول رفض قال انا مسامحك
قلت اذا قصدك على اللبس انت اللي ماتشري لي
واذا على اشياء شخصيه انت ماتوفري لي اي شيء كلها بس انتظر على نار متى اروح لاهلي علشان اقدر اجيبها
قال انتي ماتطلبين
كيف وانا كل شوي اطلبك اغراضي الناقصه وحتى دائما يتهمني بكثر الطلبات مع انه مايجيبها
كل شيء اطلبه لازم تذلل وتشحد حتى بعض اللي احتاجه اسكت ما اطلبه انسدت نفسي ماني فاضيه موال شحاده وتذلل صرت ادبر نفسي
المهم انتهى نقاشنا وكتبت ورقه فيها جميع ماينقصني قلت يالله شد حيلك
كالعاده اخر الشهر
قلت في اشياء ابغاها اليومين هذه ضروري وماتتحمل التاخير اشياء خاصه من الصيدليه قال خلاص اكتبيها وباجيبها
طبعا الورقه معه لها اسبوع ورجعت لنفس التذلل والتشحد كل يوم بكره ماني فااااضي (( فقط يتهمني بالتقصير ومانظر وش وصلني لهالشيء ))
مع العلم حتى لو علبة الشامبو انطق في شحادتها الين تجي
حتى لنا اسبوع مويه نشربها بالبيت مافي كل ماقلت له قال طيب ولا يجيب او دبري نفسك خذي من اهلي
انا لي يومين بس ابكي من القهر احس بالظلم ولا اقدر حتى انصر نفسي
فكرت اكلم واحد من اخواني لكن اخاف من عواقبها
والله لو ماعيالي ماجلست ثانيه كل همي وتفكيري فيهم واصبر علشانهم لكن هاللحين خلاص ماعاد اقدر حياتي صايره جحيم بس بين اربع جدران وابكي من الظلم والقهر
بعيده عن اهلي وماعندي احد