السلام عليكم ورحمة الله تعالى وبركاته

تقبل الله صيامكم وقيامكم وجعلكم من العتقاء في هذا الشهر الكريم.

بما ان المطبخ عندي من التحف الجميلة في شقتي ، قررت ازور هالمتحف واتفرج على مقتنياتة الثمينة والتاريخية التي تعود إلى سنة 2010م ، ف قلت لنفسي عشان ما أتأثر فيه عوامل التعرية "ويصدي" بخلي هالزيارة علمية وعملية ، بحيث استمتع بالذكريات الجميلة وانا اتفرج عليهم واتذكر كل شي شريتة ف هالمطبخ قبل زواجي(علمية) ، ومنها بعد اقعد اطبخ فيه شوي واعيد حيويتة ونشاطة(عملية).

وبقولكم شي وهو يعتبر نفاق بصراحة ، ومعظمكم جربتوا هالشي اكيد اذا مو كلكم ، ليه في اول الزواج الحريم هبات ريح وقرمات ويسوون روحهم يعرفون يطبخون ، وتكون علاقتهم بالمطبخ علاقة جداً حميمية وجميلة؟؟ وليه بعد ما اطيح الميانة والكُلف اتخرب هالعلاقة ؟؟ للدرجة هاذي الحريم مالهم صاحب يعني ؟؟ هههههه (فقرة اخبال ماعليكم مني)

ف لما سويت رحلتي العلمية والعملية قررت اني اطبخ اليوم واسترجع ايامي لما كنت اطبخ في المخيمات والرحلات ولما كنت اطبخ لأمي (ايام ماكانت نفاس) وأغسل لها المواعين، بس بقولكم شي عني عشان اكون امين ترى كل شي كان بحسابة ههههههههه امزح

المهم رحت حق زوجتي وهي في عز نومها وفتحت الضوء وماحسيت إلا الزوجة النايمة الرقيقة الوديعة انقلبت وحش كاسر فجأة وقالتلي ياخي حراااام عليك والله مانمت شي طف اللييييييييت والله فزيت فزة مو طبيعية هههه (مادري ليه تذكرت امي بهالموقف لان امي كانت اتصايح علي لما افتح عليها الليت وهي نايمة) المهم قلت لها قومي ونسيني ضايق خلقي ، وبعدين ترى بطبخ اليوم وبدلعك واوكلك بيدي(بسويلها اغراءات عشان اتساعدني بالمطبخ) ومنها بعد نرحم التحفة اللي عندنا(اقصد المطبخ) ونحسسة ان فيه احد مهتم فيه .. حرام عليج خليينا انحسسة انه مطبخ على الاقل.

ردت علي بكلمة وحدة .. مليغ .. (يعني ثقيل دم) ، والله ضحكت على شكلها وهي تقول مليغ ، المهم قلت لها منتي قايمة يعني ؟؟ قالت اشوي اقوم مو الحين وعلى فكرة طبخك مو حلو ولا راح اتعرف تطبخ اصلاً ، خلاص سكررر الباااااااااااب الحيييين تكفا ابغى اناااااااام

سكرت الباب وانا اقول بقلبي ش هالزوجة الخايسة هاذي وش هالتحطيم انا اوريها والله لأطبخ واحرق قلبها!! (اللي يبي يقول ليه تقول بقلبك احب اقولك مالي خلق للمهاوش عاد هي اتصيد علي الغلطة هاليومين)

ف نزلت لأمي تحت وقلت لها يمة لاتحسبين حسابنا ع الفطور لأن بنطبخ بشقتنا ، بس هله هله بالحلويات خلي الخدامة اتصعد لنا الحلويات ولاتنسين الشوربة ، فقالت امي وكلها علامات استغراب!! صدق يوليدي بتطبخون ؟؟ حسستني اني بشرتها ان جاني ولد !! قلت اي يمة بنطبخ شفيج متكهربة؟؟ قالت يوليدي مافيني شي بس مو متعودة!!

ورحت لبست ملابسي وطرت ع السوبر ماركت جبت خضار وفواكة ولبن ودجاج ورز وسمبوسة وهالامور.

وجيت للبيت وللحين المدام نااااااايمة وادخل مطبخي واسنع ذاك المجبوس السنع (اللي ودكم تاكلون اصابعكم وراه ههههه امدح طبخي) اللي كان ناقصة بس شوية ملح!!! لحد يضحك علي تراني صايم وماقدرت اذوق شي ف عن الشماتة لو سمحتوا ، وامدحوني تراني احب المدح.

المهم مابي اطولها عليكم وانا اسوي الفطور وقبل الأذان بساعة صحت الأخت وجتني بالمطبخ تضحك علي وتقول الله يستر من طباخك ، لكن اعتبرتة كلام عذاااال ومارديت علية ، ورديت اقول بقلبي (اوريج ان ماحريتج من حلات طباخي هين يالخايسة)

وبيني وبينكم حسيت ان الطبخة ماراح تكون موزونة بالملح وهذا احساسي مايخيب ابداً في طبخاتي فيني عقدة من الملح ، ف رحت وقلت لها شوفي من الحين امدحي الشغل واذا طلع الملح ناقص ترى مو مني منك لان من عرفتك وانتي ماتحسين بطعم الملح (ابجهز الضماد قبل الفلعة) ابتسمت ابتسامتها الصفرا بس قلت ماراح اتأثر.

ف عشان انهي هالموضوع اليوم بوريكم الطبخة ، والله يرحم والديكم امدحوني هههههههههههه





للامانة العلمية!!
كل اللي سويتة هو الرز والدجاج والمرق واللبن والسمبوسة وسلة الفاكهة والباقي من امي!!


الله يسعد الجميع يارب العالمين.

__________________
استغفر الله واتوب إليه

ما شاء الله تبارك الله الله يعطيك العافيه ما قصرت الله يحفظ لك امك ويوفقك يا رب

__________________
لامنياتنا بقايا لن تكتمل الا في الجنه

ما شاء الله تبارك الله،،، والله يطلع منكم اذا اشتهيتوا تسوووون اي شيء ،،، بالعافية ،،،،
ودي أشوف المطبخ بعد ما طلعت منه !!!

__________________
علمتني الحياة .. أن استمع لكل رأي واحترمه وليس بالضرورة آن اقتنع به ...

ماشاء الله لاقوه الابالله .الله يحفظكم ويرزقكم الذريه الصالحه
سؤال يمكن يكون ماله داعى بالنسبه لك وانت حر بالاجابه عليه هل تحب زوجتك؟
سؤالي حاجه في نفسي

__________________
دعاء المعجزات:حسبي الله سيؤتينا الله من فضله انى الى الله راغبه.
لوعلم الانسان كيف يدبر الله الامور لذابت القلوب من محبته عزوجل

عفية عليك
ماشالله تبارك الرحمن

بس تبي الحقيقة اخوي متفائل المرأة يبيلها ريال يشد عليها شوي

والا اذا بتخليها جذي مطبخكم بيصير تحفة اثرية

__________________
لا اله الا انت سبحانك اني كنت من الظالمين

صحتين صحتين شكل الكل جنان خاصة الحين واحنا صايمين

ما شاء الله لاقوة الا بالله .. وليه تتعب الوالدة .. كل يوم سوي طبخة دام معاك وقت .. حرام المدام ما معها وقت .. شفت كيف انها صحت من النوم قبل الاذان بساعة يعني بساعة ما يمديها تطبخ




وانا كمان

__________________

من جد انت مسوي الرز وبيتك وبرمضان بعد !!!!!!
شكلي بقلب ع هالرجال الي عندي 😔
مالي شغل ابي طريقه الرز بضبط
والله انك اسنع من اسنع حرمه الي طلع منك كل هذا طبخ وتقطيع وكذا
طيب بصراحه وش موقف حرمتك بعد هالفطور وش سوت لك ؟؟
وبرجع اقولك موقف لزوجي بشغل البيت بكسر خاطرك وبتجي تطبخ لي مثل هالرز 😁

ياحليلهم بعض هالرجال مازالو موجودين ع وجه الارض مع اني كنت متوقعتهم منقرضين الي يطبخون ويدلعون والحرمه نايمه بعد 😊

__________________
سبحان الله وبحمده

بالله صادقه والا تتريقين يطبخ هو والحرمه نايمه 😳😳

__________________
سبحان الله وبحمده

أماني مفقودة
الله يجزاج خير يارب على هالدعوة الطيبة ، الله يسعدج.

ambitiousdream
الله يعافيج يارب ، اي طبعاً يطلع مننا بس اذا اشتهينا ، والمطبخ والله ماصورتة ، بس كان حووووسة
القدووور بالارض والاكل كان طايح منة شوي ، هذا غير اللبن اللي طاح من ايدي وغير الحوسة اللي في الحنفية.

عزتي ديني
الله يرزقج الجنة يارب ، بجاوبج وبكون سعيد في اجابتج ، بس قبل كل شي شنو الغاية اللي بنفسج ؟؟ ههههههه فضول

موهبة الكويت
زين مابغيتي اتزورين متصفحنا !! لو اعرف ايبب يببت ههههههه
ياموهبة ياوخيتي هي مو رافضة فكرة الطبخ ابداً بس المشكلة انها ماتعرف تطبخ وان طبخت والله ماتضبط شي لأنها لما كانت ابيت اهلها ماكانت تطبخ (اصغيرة ودلوعة امها) ، بس اهي قاعدة تتعلم الحين ، وبين فترة وفترة تطبخ لها شغلات خفيفة حلويات وهالامور وتجرب علي هههههه

والشدة وانا اخوج مو في هالامور البسيطة هاذي ، الشدة لأمور الشدة ، والوضع هذا يبيلة شوية مرونة وتشجيع ومع الوقت بتتعلم.

Beta2
مرحبا وسهلا بالخالة بيتا ، نوووورتي المتصفح وصاحبووو ، شوفي ياخالتوا ، امي اتسوي الفطور للبيت كلة ، وانا اخذت من فطور البيت (جزاهم الله خير تفضلوا فينا) ، بس عشان هذاك اليوم كنا سهراانين نامت كل هالنوم ، ولو ماكنا سهرانين كانت قطعت المطبخ من كثر الطبيخ ههههههه

على فكرة ياخالتوا .. ابتعجبك في غسيل المواعين جد اتكلم هههههههه هذا الشي الوحيد اللي مستفيدة منها بالمطبخ.

__________________
استغفر الله واتوب إليه

نفسي اعرف وش علاقة الموضوع بقسم المتزوجين مع ان فيه قسم المطبخ
مفروض ينقل للقسم المناسب
بس صراحه شكل الكبسة زين لو ذكرت المقادير
والدقوس كيف طريقته