السلام عليكم جميعا


عندي اليوم قضية شائكة وتخص بعض حريم حواء .. طبعاً حريم حواء يتنكدون إذا قلت حريم ولا قلت بنات .. وإلي جاب هالطاري ..إني جالس مع واحد من كبار السن عمره 75 سنة الله يطول عمره على طاعة .. ويسولف ويقول .. شف وأنا عمك من أول إذا وصل عمر البنت 14 سنة قلنا عليها خلاص صارت حرمة لا زم تتزوج , وبعد زواجها باسبوعين تشوف وجهها ولا هو شاين وما غير تطريش .. الله يكرمكم جميعاً , حامل طبعاً .. ومن أول الوحم حقهم يختلف عن حريم هالوقت .. الحرمة أول إن توحمت توحمت على خبز بر ولا برسيم ولا تمر سكري .. ومعصي تقول يابو فلان ريحتك خايسة والله إن يدفنها في الأرض وهي حية .. لكن حريم هالوقت تسب وتسخط علشانها حامل .. وتقول ما عاد أقدر أطبخ وإن دخلت المطبخ جتني دوخة يمه يمه وتقول إن شف الجريش حامت سبدي ونفسي بأيسكريم باسكن روبنز .. وتلقاه بوقت الصقيع والبرد .. بس ما أدري وشلون تركب .. وتقول لزوجها أنت يافلان ريحتك خايسة أووف وععع صرعتني بريحتك رح تروش ( والمسيكين الزوج يدربي راسه ويروح يتروش ويتنظف ويتعطر خايف على هالنونو لا تجي ريحته خايسة )

نرجع لسالفة العم

يقول أنا زوجتي أم راشد من أول يوم وهي حامل تقول ماطور كهرب ما شاء الله عليه .. خبركم من أول نشيطين لا رجال ولا حرمة .. من المزرعة للبيت وأكلهم كله بر ولبن .. مو مثلنا هالحين مقاضي من كارفور ولا بنده ويخب علينا بعد .. وتلقا الواحد بعد يخاف على زوجته ويداريها ولا يقولون أول سنة ما فيه حمل نبي نستمتع بحياتنا قبل يجي الطفل .. أمحق ..


نكمل سالفة العم ..

طيب يا عم وأم راشد ما توحمت على شيئ .. قال ألا توحمت على شماغي ويقول إذا جيت من المزرعة حذفت شماغي عليها وهي تتلطم فيه ..


نرجع لسالفة الزواج

طبعاً 14 سنة بالنسبة للبنت .. من أول يتزوجون ماشاء الله عليهم ..

أما في زمنا هذا :

من 15 إلين 20 هذي فترة مراهقة تلقاها عمرها عشرين وهي ماغير كل ما قالت لها امها انخطبتي قالت : يعني وشو خطبة على بالها ما تدري .. وإن عرفت تلقاها تقول لا توني بزر ما نيب متزوجة !

ومن 20 إلين 24 فترة دراسة البكلوريا وزودها سنة تلقاها مسكينة تدور وظيفة .

ومن 25 إلين 30 تلقاها يرحم حالها حاطة لها شروط تعجيزية للزواج , وإن صار الزوج مكتمل الشروط كلها طلعت لها عذروب وقالت لا شين !

جينا لمربط الفرس

أولاً / لا تنفرون أزواجكم منكم بالوحم هالي مادري وشلون قايل . تلقا الواحد مسيكين ما بقى حصاة ما فرك فيها ظهره وما خلا عطر ولا كريم إلا شراه من هالمحلات ولا فيه فايدة

ثانياً / بنياتكم الله يستر عليهن زوجوهن بدري ( يعني من 18 وفوق ) لا يكبرون ويعنسون .. وياالله عاد عن الدلع الزايد ..

( ومع ذلك كله أقول الله يعين الحريم على الولادة )

نتمنى لكم حياة زوجيه سعيده

لآآحلل نقل مواضيعي التي من صنعي ولاتصاميمي ولا وسائطي ولاحتى نكي نهــــــــآئيآ او حتى فكرت تصميم عملته

اخوكم / ابونواف

المشاركة الأصلية كتبت بواسطة روعة المعنى يا سلااااااااااااااام على الموضوع والله مادري ارد وش ولا وش بموضوعك من جمال افكاره ههههههههههههههههههه احلا شي : لا تنفرون حريمكم بالوحم لالا دنتا رهيب يا راقل

الرهيب مرورك

وفقك ربي

المشاركة الأصلية كتبت بواسطة ابو فراس النمري كلام سليم ومنطقي ولو فيه وسيلة إنتقال للماضي كنت اول المسافرين ... لكن وانا اخوك خلك واقعي !! انت الحين بالزمن الحاضر .. إذن تكلم بلغة نفهمها ! والمثل يقول (إن كنت في دارهم ...جارهم) ماعاد فيه حريم مثل ام راشد ... لأنه ماعاد فيه رجال مثل ابو راشد واحب اؤكد على مسألة الوحام لأنها صحيحة وموجودة في كل العصور.. الله يعين الحريم والدليل (شماغ ابو راشد) عاد الله يعينك على الردود ... فقد أرتقيت مركباً صعباً في منتدى ذو لون فوشي فرفقاً به ياصبايا .. فالرفق لا يأتي الا بخير

انا معاك يا ابوفراس

بس ولو وانا اخوك فيه كما سمعنا انه في طلبات تعجيزيه

يعني موب معقول انها تروح لبيت اهلها وتتركني لحالي

ولا انت متعطر ونظيف وتقول عليك ريحتك خايسه هههههههههههه

عموما لا هنت ابوفراس وشاكر مرورك

وفقك ربي

المشاركة الأصلية كتبت بواسطة ابونوافـ [align=center]السلام عليكم جميعا نرجع لسالفة الزواج ومن 25 إلين 30 تلقاها يرحم حالها حاطة لها شروط تعجيزية للزواج , وإن صار الزوج مكتمل الشروط كلها طلعت لها عذروب وقالت لا شين ! بالله تتزوج واحد طايح من عينها انا عن نفسي شروطي قهرية مابي ارتبط بواحد في نقص بعيني ادري باتييني الردود طراقات

المشاركة الأصلية كتبت بواسطة عزوبي بس رجل فيه كلمة التعنفص عزوبي بس رجل

انت مرتاح عزوبي وما حولك احد

شاكر مرورك

وفقك ربي

المشاركة الأصلية كتبت بواسطة ابونوافـ انا معاك يا ابوفراس بس ولو وانا اخوك فيه كما سمعنا انه في طلبات تعجيزيه يعني موب معقول انها تروح لبيت اهلها وتتركني لحالي ولا انت متعطر ونظيف وتقول عليك ريحتك خايسه هههههههههههه عموما لا هنت ابوفراس وشاكر مرورك وفقك ربي