بسم الله الرحمن الرحيم
السلام عليكم ورحمة الله وبركاته
ساعدوني الله يخليكم أنا تايهه وضايعه وماعندي غيركم يساعدني أنا تعبانه نفسيا أفكر بالطلاق عشان أرتاح مني همي أنا عروسه صار لي خمسة شهور متزوجه من شخص مطلق وعنده 3 أولاد زوجي تقدم لي أكثر من مره وأقنعوني أهلي فيه وقالوا شاريك وباغيك وإستخرت ووافقت مدري شلون كل شي خلص بسرعه
وإنخطبنا وتملكنا وإتفقنا على حياتنا الجديدة وكان مدللني مو مخلي علي قاصر مايطيق فراقي حتى صاحباتي بالدوام يحسدوني عليه وعلى حبه لي وحرصه علي حتى والدته كانت تقول إني سحرته وتروح تصارخ قدام الناس تقول ساحرته ساحرته طبعا على بالها الكلام مايوصلني وقدامي غير مره
قبل زواجي بإسبوع تغير وصار إنسان غير مهتم فيني وكنسل سفرتنا ودور لي أرخص فندق وسكني فيه أول ليله وبعدين أخذني لشقتي قبل لاتتجهز وخلاني على بساط إشتراه من المحطه أجلس وأكل وأغسل وأطبخ ثاني يوم من زواجي وصار يعصب علي ولا كانت علاقتنا الزوجية إلابعد شهر وكان قاسي وعنيف ولارحمني ولارحم خوفي وجلس يضحك علي لما تآلمت
حارمني من كل شي حتى الشامبو يحسبه علي يقول وش تسوين تشربينه بالرغم من أنه مقتدر ويقدر يعيشني ملكه زي قبل الزواج تخيلوا قبل إسبوع قال إنتي إيش تسوي بالإريال خلصت علبته بسرعه ؟؟؟؟؟؟؟؟؟؟؟ يعني إيش أسوي جالسه أكررف لك ياحيوان
أخذ ملابسه وراح يعيش مع أمه وأولاده وتركني في البيت دون أن يسأل عني
يقول أولادي ماراح يحبوك كذا تقول أمي ؟؟؟؟ طيب في فترة الملكه كنا نروح المولات مع بعض وننبسط إيش اللي تغير؟؟؟
صار له يومين ببيت أمه يجي الظهر ويجلس شوي بالمجلس ويمدد رجوله بوجهي ويجلس نصف ساعه ويبوسني على راسي ويروح بدون مايشوف انا إيش أحتاج؟؟؟ كل راتبه يصرفه على أمه؟؟؟ بالرغم من أنها بخير وعايشه
قسم بالله حتى مصروف أبي أشتري ملابس أبي أروح الكوافير يقول مامعي فلوس أنا حالته الماديه زفت ؟؟؟؟ والله صرت كئيبه وحزينه ومتضايقه مدري إيش أسوي وليش يسوي كذا حاولت اتفاهم معه قال أعرف أنك منتي مبسوطه معي ولاسعيده وحزينه
قلت حياتنا موعاجبتني إيش صاير قال أمي محتاجتني وعيالي بحاجتي
قلت وأنا قال ماقصرت جيت وشفتك؟؟؟ أكرهه ياعالم والله ماأطيقه ولاأشعر بشي إتجاهه صرت أنبسط لما ينام براة البيت احس براحة غير طبيعية
يقول بطلع أسافر مع أولادي وأمي أسبوع ننبسط طيب وأنا المحرومه من تزوجته مارحت معه لأي مكان أشعر بكرهه لي ونفوره وأنا قايمه بواجباته لله كل الناس يقولوا حقريه بصراحه مقدر أهتم فيه كثير مجرد يجي يقول من له وحده زيك تعيشه هالدلال يقول ماكنت متخيل فيه وحده تسوي لزوجها زي ماتسوي لي ؟؟؟طيب ليه تتعامل معي كذا ؟؟؟
قولوا لي كيف أتعامل معه هل أنا غلطانه على سكوتي؟؟؟ على تعاملي الكويس معه؟؟؟ أنا أحب يكون لي بيت وزوج وحياة هاديه؟؟؟ ماأحب المشاكل ؟؟؟ قسم بالله فيني حاله نفسية وقولون عصبي بسببه ؟؟؟؟
قسم بالله من حالتي النفسية صارت فيني أمراض موطبيعية ؟؟؟؟ تعاملي الكويس معه غلط وإلا لا ؟؟؟
والله العظيم محتاجه مصروف
دائما يقول إلبسي وحطي وسوي طيب إيش أسوي من وين ياحسره؟؟؟؟؟؟

ابنتي الفاضلة
لا تنتظري منه المبادرة بل كوني إيجابية بحق نفسك
إذهبي لأهلك
ليطالبوا بحقك الشرعي فيما اتفقتما عليه
(إمساك بمعروف أو تسريح بإحسان) فأمه لها حق ولأولاده حق ولك حق فيجب أن يعطي كل ذي حق حقه.
والسكوت عليه يغريه بالتمادي.

__________________

لتوفير الجهد والوقت للجميع :
1- كتابة الوقائع ثم المشاعر ثم المطلوب.
2- ما أقوم به هو التعامل مع عقل صاحب أو صاحبة المشكلة وشخصيتهما ونظرتهما للحياة لترقيتها للأفضل بإذن الله على ضوء ما يكتبان هنا.
3- لا بد أن تكون لدى صاحبة أو صاحبة الموضوع الرغبة في القبول بالنصح والرغبة في التغيير لا طلب الدوران معه على محور شكواه والبكاء معه.
4- لا يمكن بعد الله أن أعدل من ظروف الكاتب أو من شخصيات أطراف العلاقة في مشكلته إلا بتواصلهم معي هنا شخصياً.

يا هلا فيكي يـ اختنا المحتسبة عما يحصل لها ..

يصيب الكل الحزن لما يحصل لكى وللجميع من هذه المشاكل ولكن دائما نقول اللهم صبرنا فيما اصابنا ولا تبعدنا عن رحمتك..

راح اضع لكى بعض الخطوات لعل الله يكتب لكى فيها الخير وهي وجهه نظر ..

* انسى موضوع الطلاق الان وفي هذه الفتره الحاليه تعرفي ليش ؟ الحياة تحتاج الى صبر واحتساب ولاتنسى انتى مااخذتيه إلا وانتى مستخيره الله وثقي تماماٌ بان الله لا يكتب على عبد شي إلا كتب له فيه الخير سواء ظهر لنا او خفى عنا لحكمه هو يعلمها سبحانه وتعالي ..

* انتى قوية جدااا بعون الله لمرور من هذه المشكلة بذكائك وصبرك وذلك من خلال تحليل شخصية زوجك والحلول بالنتائج لصالحك بدون اي ضرر لا عليكي ولا على امه ولا على اولاده ..


* هو الان يقارنك بزوجته الاولي المطلقة ولكن بدون تصريح لك وذلك من خلال تعامله كما ذكرتي .. غيرى هالنظرية في عيونه وذلك بالقرب منه اولاُ ..


* امم اطلبى منه ياتي باولاده عندك يعني زيارة تعرفي عليهم خاصه يمكن انهم اطفال محتاجين لشخص يكون قريب منهم .
* مهما صار لا تظهري امام امه بانك لا تريدنه اسئلى عنه بمكالمه هاتفيه من وقت لوقت ..

* التعامل الحلووو مع جميع الاطراف يكسبك المحبة والتقدير والاحترام منهم ..

* ما راح ياتي ثمار هالشي إلا بالدعاء والصبر وكثره المحاولات ..


وثقي تماماٌ بانك قادره على تغير الحال للافضل وكما تتمني مادائم انك قريبه من الله ونيتك لا فيها ضرر على احد ...


ادعي لكى من قلبي بالتوفيق والنجاح والتغلب على هالامور البدائية في اول مشور لك في حياتك الزوجية ..

اختي الكريمة ادعو الله ان يصبرك وان يهدي زوجك ويفرج كربك
اختي الكريمة ..........شيء غريب .........زوجك تغير كثيرا .........ربما زوجك يفكر في ان يعيد ام اولاده .........؟؟
او انه اصبتم بالحسد ............ اساليه لماذا تغير هكذا ..........تحدثي معه واطلبي حقك حاولي ان تتقرب من اولاده

__________________

	بسم الله الرحمن الرحيم اللهم اهدي زوجي الى طريقك المستقيم

أخوي رجل الرجال مااقدر أكلم أهلي بشي ماعندي سند أقدر أسند عليه ظهري وأمي ماعندها غير الطلاق وأبوي مريض بغيبوبه بالمستشفى وأخواني كل واحد لاهي بحياته حتى سؤال عني مافيه
بس قدامه يسوون نفسهم مهتمين وسائلين عني لكن من وراه كأني ولاشي كذا تربينا ماحدا له خص بحدا

طهر المطر اشكر لك مرورك وخطتك اللي سويتها لي لكن فيه نقطه مافهمتها:
هو الان يقارنك بزوجته الاولي المطلقة ولكن بدون تصريح لك وذلك من خلال تعامله كما ذكرتي .. غيرى هالنظرية في عيونه وذلك بالقرب منه اولاُ ..
أبي توضيح لها

* مهما صار لا تظهري امام امه بانك لا تريدنه اسئلى عنه بمكالمه هاتفيه من وقت لوقت ..
أكره أسأل عنه يعاملني بطريقة حقيره مره وبعدين يقول أمي وخوال أولادي عندي وش تبين أكلمك عندهم كيف يعني أقول ياحبي مثلا؟؟؟؟؟؟؟؟؟؟
بصراحه أكره أكلمه بالعكس والله صرت مااغار عليه ولا اخاف عليه إذا تأخر متى جاء حياه الله لأني ولاشي بالنسبة له عادي رحت وإلا جيت كله زي بعضه
وجالس يهددني يقول إنتبهي أكرهك وبعدين أتركك زي الأولى تراها ولاشي بالنسبة لي ومستحيل ترجع لي وعيالي بعيوني وعارف أنك تحبينهم
لكن امي تقول إنك شريره لأنك مرة أبوهم هذا الكلام بعد الزواج طبعا
وأولاده كله عند أمهم بمنطقة ثانية وإذا راحوا مايسألوا عنه حياته بين أمه وشغله وأنا ولاشي حتى أي شي أطلبه يحسبه علي ويزعل أمه من الظهر لحد الليل وهي وياه بكل مكان الله حسيبي عليها إن كان لها طرف باللي يصير لي عمري ماراح أسامحها
قسم بالله حياة لاتطاق حتى حقوقي الشرعية ماأخذها وحقوقي المادية ماأخذها ماخذ البيت فندق يجي ويتفرج فيه ويطلع بأي وقت يحب بدون مايخبرني
والله ماأحب أسبب مشاكل لأحد لكن امه ماتخاف الله عندها بنات ماتخاف وحده من بناتها يصير لها زي اللي يصير لي
كل الناس يقولوا تطلقي ومليون واحد يحلم فيك وزواجك منه غلطه
والله نفسي أغير حياتي معه لكن مدري كيف أتصرف حتى أولاد يقول ماأبي ألحين عيالي عيالك يلعب علي بهالكلمتين أنا بصراحه نفسي بظنا يشيل علي وحدتي ويخلي زوجي يتغير شوي خصوصا بأنه يموت بأولاده

أختي أم فلانه
اختي الكريمة ..........شيء غريب .........زوجك تغير كثيرا .........ربما زوجك يفكر في ان يعيد ام اولاده .........؟؟
او انه اصبتم بالحسد ............ اساليه لماذا تغير هكذا ..........تحدثي معه واطلبي حقك حاولي ان تتقرب من اولاده

بالعكس يكره طاريها ومايواطنها حتى لما تجي لمنطقتنا يبعد عن المكان اللي هي فيه لكن مومقصر معاها بشي طبعا غصب عنه بأوامر امه أستغفر الله
تغييره قريب المشكله لم أعد أحرص عليه ولاعلى وجوده ولاأسال عليه مقدر أسأل عليه فيه أحد يدور الشقا
كذا خليه إذا جاء حياه الله وإذا ماجاء ألهي نفسي باي شي وأبكي وأدعي ربي وطول الليل أسأل ربي الخيرة وين ماكانت
من ناحية أولاده بالعكس أحبهم كثير وأخاف عليه وأحرص عليه ويحبوني لكن تصرفاته معي كرهتني حتى لأولاده لم اعد أسأل عنهم ولايهمني أمرهم لكن لوأحتاجوني راح أحطهم بعيني لأنهم صغار وأطفال مالهم ذنب

أمانه اي واحد يقرأ موضوعي يرد علي لو بكره علها تكون سبب في سعادتي وسبب في دعوة له بظهر الغيب

الله يعينك ياختي ...

زوجك مفروك 180 درجة ,,احد معبي راسه ومدخل فيه قناعات وامور مادري وش تبي ؟؟
والا ليه تغير عن اول ؟؟

اساليه وش فيك ؟؟ وش مغيرك؟؟ فيه شئ تكرهه فيني ؟؟

واحرصي على اذكارك صباحا ومساء وكثري ادعيه واستغفار..
الاستغفااااااااااار مهم مهم والله ما تخيلين وشلون يغير النفسية للافضل ..بكلوقت استغفري وانتي تصفخين النت وانتي تنظفين الصحون وانتي تكوين واي شغل تشتغلينه خلي لسانك مستمر بالاستغفار ..
واجلدين ان ما تغيرت نفسيتك وصارت احلى ..

السلام عليكم ياختي باينه من البدايه كل شئ ولا الظلم روحي عند اهلك وشوفي ويش رح يسوي اذا بيتغير ولا لا واذا طنشك اعرفي ان مافيه خير يعني الفكه منه غنيمه لاتقهرين نفسك ولاشئ انتي باقي شابه وفيه غيره الف لاكن لاترضين انه يدوسك هذا وانتي باقي في البدايه كيف اذا صار عندك عيال وربي يسر امرك وينصر على من ظلمك....