السلام عليكم

اريد رأيكم في مشكله اعاني منها ربما كل مشاكلي الزوجيه تنصب في نفس النقطه لكن انا وحده ماأيأس ولله الحمد
ودائما احاول بكل الطرق ومن جميع الجهات لان الاحباط يؤلمني جدا واكره ان اخسر اكره ذلك بشده

انا ابي رايكم انا زوجي طبعا متقلب مره رايق ويطلعني اعلى سما ومره كارهني ويخبط بي اخر القاع

الي فهمته من بعض تصرفاته هي تاثير الي حوله عليه زوجي مثل اي انسان يتأثر من الي حوله اذا كثر الكلام عني فاحيان يدخل وبعيونه كره وشك وكأني أسوأ الخلق
طبعا انا شاورت ناس كثير من بينهم وحده حكيمه ماشاءالله
نصحتني اني مااترك مجال او مساحه للشك وللكلام من طرف اي شخص حتى لو هم اهله
كيف؟
قالت لي كوني دايما حاضره معاه في المناسبات
في اي قصه تصير كوني عون وافزعي وحتى لو كان الموقف يضايقك
وفيه تحامل عليك او سحب لزوجك عن مسؤليته الاساسيه كأب وتسخيره لاخواته المتزوجات وخدمة. ابنائهن
اضغطي على نفسك وتحملي وخلي زوجك يشوف الجانب الحلو اللي فيك (طبعا هي فهمت من شكواي عليها النقاط اللي اعاني منها وهي تصيد اخطائي ووضعي بصوره سيئه دايما دايما امام زوجي)
الان انا حاولت بكل الطرق اقرب نفسي منهم ومن زوجي
واجد الصد وهذا الوضع من زمااان لكن توي استوعب انه مقصود
لاني ركزت وحاولت اني اتقرب وافزع واكون بالشوفه عمي ابو زوجي فرحان وعاجبه الوضع لكن البقيه احسهم ماعجبهم الوضع ولايحبون افزع معهم وأعد نفسي منهم وفيهم
حتى العزايم والاجتماعات طلعوني منها حبه حبه
وصاروا يصرفوني مره يقولون لزوجي المسبح خطر على الصغار رغم انه فيه عيال بناتهم؟!!
ويبون زوجي يجي معهم لحاله .. لو فقط العائله ماقلت شي لان الواحد وده يجتمع بالاخوان والاخوات وعيالهم لحالهم
لكن فيه من اقاربهم عيالهم وزوجات عيال اقاربهم يعني مثلي
وهذا اللي صدمني اكثر
احيانا اتفاجأ ان اخوات زوجي الصغار الغير متزوجات مايدرون ليش ماجيت ويتضايقون ليش ماتجين ياليتك جايه
انا بصراحه انصدمت وتضايقت
حاولت اقرب بالافراح احاول اهديهم ويصدوني صاروا يخبون عني حفلات النجاح
بالاحزان اوقف معهم وازور واعزي اقاربهم قبل اقاربي
بالاول حاولوا يصرفوني وبالاخير زوجي طقها بوجهي لاتروحين ؟؟ بدون سبب
الان انا بعيدده عن زوجي
معنوياااا ابدا مالي وجود
مايبوني اكون مع زوجي نهائي
زوجي صار 24 ساعه عند اهله ويحاولون بعيالي يكونون 24 ساعه معهم نفس زوجي
معليش بس احس قلة ذوق واحترام يعاملوني هالمعامله مايبون الا عيالي وولدهم حتى صحن الحلا لاجبته لهم واكلنا منه يرجعونه لي بباقيه يعني مرره كانهم يقولون مانبي منتك
الناس للناس والعلاقات الاجتماعيه اخذ وعطى
مادري مافهمت وش يبون مني ولافهمت وش قصدهم بمعاملتي بهالطريقه
انا متضايقه لانهم لو اقصر بشي بسيط قوموا الدنيا براس زوجي ولاقعدوها
وانعادت السالفه يجيني زوجي منفس وكل كره الدنيا بقلبه علي وعلى عياله

انا بديت امل من الوضع واكره زوجي وسلبيته
للعلم اهل زوجي يستميتون عشان زوجي يجلس طول الوقت عندهم يجلس طبعا مثله مثل الكنبه وبشوف عيني
ويخدمونه خدمه غريبه ويركضون يلبون طلباته اهم شي اجلس كل اليوم عندنا انا مايهمني اذا كان يخدمهم او يسعدهم بوجوده ويقضي حاجات والديه
لكن انا اللي اشوفه انه تعود على الكسل والاتكاليه صار لو يقعد عندي يوم واطلبه غرض يتأفف ويروح ركض لبيت اهله !!
وش الحل ياجماعه انا محتاره بصراحه .. اذا فيه حل لاتبخلون علي واذا مافيه لاتنسوني من دعواتكم





تم تعديل العنوان ليتناسب مع المضمون

__________________

خلك بعيد..
حبك يزيد

علاقة زوجة الولد لازم فيها حدود..

لازم تتغلين وروحاتك تصير رسمية ومحددة وماتطولين..

هذا لصالحك غالبا.. ولصالح علاقتك مع زوجك

الحين اكتشفتي ان اهل زوجك مو مفتاحه ولا هم طريقة لاسعاده

الناس يختلفون

وترا في حريم يتمنون مثل وضعك.. ان زوجك ما الزمك بشي تجاه اهله

وبيني وبينك معاهم حق.. احيانا يبون جمعة عائلية بينهم بدون زوجات العيال وغيرهم

بالله تخيلي زوجك مطيح عند اهلك بكل جمعاتهم ويفزع بسبب او بدون.. ماراح تقل هيبته؟

ماراح يصرفونه يعني؟

لا تقارنين نفسك ببناتهم لانك مهما خدمتي ومهما سويتي بتظلين بنت الناس

ولا تسوين خدمات ما انطلبت منك وتستنين الناس ينتبهون لها ويلاحظونها ويقدرونك عليها.. لان محد حولك وكلهم منشغلين بانفسهم

واذا نويتي تسوين خدمة او خير بدون طلب.. قطيه بالبحر..

لاتستنين ردة فعل او تقدير

روحته لاهله لا تتدخلين فيها.. خليه

بس اذا حسيتي فعلا ان في احد يخببه "مانتي متوهمة"

كلام ثاني

كلامك على العين والراس

انا مااشعر انا اشوف زوجي كيف يتاثر ويقولي احيانا روحي اثبتي وتملمي قدام اهلي كلهم انه ماصار هالشي طبعا انا حرمه وافهم حركات الحريم ووعشان كذا انا مارحت ولااثبت ولاهببت قلتله انا احلفلك بالقران ان هالشي ماصار وحسبي الله على من تقول علي
وماعندي مانع اقول بوجيههم لااخاف ولا شي لكن هذولا اهلك وبيضلون اهلك وان صار الحق معي ماراح يزيد من فدري معك ولاينقص(بحكم اني اعرف طبعه بسرعه يقور وبسرعه يهجد)
والضحيه هي انا بيكرهوني ويكرهون تصرفي طول عمرهم ويخلونه سبب للمشاكل وقطع العلاقات
انا يااختي ماركضت لهم بداعي وبدون داعي
انا الي اشوفه ان زوجي مثله مثل اي رجال يحب ويفرح انه يشوف زوجته مع اهله وعلاقتهم حلوه
لكن هم وضعوا خيارين
يااحنا ياهي
وهو مسكين مجبر يختار من الاثنين ولاعنده قدره وقوه يجبرهم او يفرضني عليهم بطريقه غير مباشره
يعني مثال السفرات يختارون وقت مايناسبني نهاااااائي
والحريم يدرون اننه مايناسبني
ويفولون يله نبي نسافر زوجي اذا رفضت يتضايق ويحس اني انا اللي اخرب عليهم وناستهم وبالمقابل مسستحيل يقتنع باي سبب واي عذر مني
انا متضايقه على نفسي وعلى زوجي وعلى وضعي حتى تدليل عياله محسوب عليه وينزعل عليه ليش يدلعهم لو بوسه يبوس ابناءه يتوتر ويتلفت ويحس انه مسوي جريمه :/
مادري انا اكمل افرض نفسي او ابعد واترك الوضع مثل ماهو

__________________

الحل هو انك تبيني لهم سعادتك بهالوضع
هذا هو الحل وعن تجربة
مثﻻ الله يسعدك ياعمة ريحتيني من اﻻوﻻد كان عندي شغل وخلصتة
الله يسعدك ياعمة كنت مصدعه ونمت بدون ازعاج اﻻوﻻد
زوجي يحب طبخكم فصرت فاضية واطبخ الطبخات اللي أحبها انا
ﻻتبيني لهم اللي يزعجك راح يعملوة
مثﻻ قولي مااحب اوﻻدي يتعلقو فيا حتى اروح واجي براحتي
مااحب الجمعات تعب وكرف ..لو في مناسبة قولي موحابة اروح
معزومة عند صديقاتي وراح استانس معاهم ..وهكذا
زوجك تعاملي مع اهلة باحترام واهم شي يشوف لو اخذتي معاك حﻻ او هدية
وبدون ماتقولي لة اهم شي يشوف تعاملك معهم

Bsmlh
فعلا كلامك صح وسويت تقريبا في فتره من الفترات نفس كلامك
اللي حصل مايبون عيالي الا وانا في بيتي لو دروا اني بطلع من البيت مصيبه والضحيه زوجي ياويله وياسواد ليله
مايستقبلونهم الا وانا في شقتي اما لو طلعت مستحيييل لو بطلع لمشوار قصير تقلب زعله على زوجي لشهوووور
وبعدين الاحظ لو ووضحت اني مبسوطه يرسلونلي عيال بناتهم لشقتي كل ماشافوني مريحه وانا فعلا ارتاح احيانا من عيالي الله يهديهم
ولايقارن بيت جدانهم عن شقتي
مع ذلك طنشت واسكت استقبلهم وعااادي لمن المضايقات مستمره كل بين فتره وفتره يطلعون لي بسالفه جديده
المشكله زوجي مايشووف شي من اللي اسويه له ولايقدر مايهمه الا اهله وش يقولون عني ؟ طيب اذا اهله ياجماعه مقررين انهم مايحبوني ولاقربوا مني عشان يشوفون خيري من شري

__________________

ماادري ممكن انتي من النوع اللي يسكت ويمشي وتبغي زوجك يفهم لوحدة
اتكلمي معاة بهدوء واذكري لة امثلة وانة انتي وياة عيلة وحدة وانتو جزء من العيلة
الكبيرة ﻻكن ﻻزم يحترمك عشان اهلة يحترموك ..ووضحي لة اهتمامة المبالغ من حيث
انة مايبغى يكون موضع نقد من اهلة. .يمكن ينتبة لنفسه

السلام عليكم اختي..
كنت داخلة بكتب موضوع نفس موضوعك ولقيت العنوان وشدني..
والله يا اختي نفس الحاااااال وانا اردى منك الحمدلله
انا امه وخواته يعبون راسه علي لييين كرهني ويدور المشاكل لاتفه سبب..
قبل اسبوع مسافر مع خواته لحالهم ورافض اني اروح تخيلي..
وراحو اخذو عمره.. والحين توهم راجعين وبيروح بخواته للرياض بدوني طبعاً
......
ومع قلت احترامهم لي واذا حضر زوجي يسووون نفسهم هم الطيبيين وانا الشريره ... بغرض انه يكون في صفهم ومعهم ويقضي حاجاتهم ...!!!!
مع انه خواته متزوجات بس 2 ماتزوجو ..
.....
ومع هذا يا اختي ما سكتت حاولت ابين له كثييييير ومافي فايده ..
ومع الدعاء والدعاء والحاح مني وكأنه صحى من غفلته وحسييت فيه
وبدأ يفهم الوضع طبعاً الرجال مستحيييل يعترفون بالخطأ..
ويكابر مع اني فاهمته وماحبيت اصر اكثر عشان لا يعصب..
.........
وهو الآن وعدني بسفره للخارج وان ننسى الي فات واعتذر على انه لايستطيع الغاء رحلته مع خواته وامه واول مايرجع بيسفرني..
رضييت على طووووووووول مع اني احس كرامتي ماتسمح لي
لانه قلل من احترامي امام اهله وعصب علي امامهم بدون سبب..
وخواته وامه يضحكوووون بقوه علي .. موقف لن انساه.
.............
وضحي لزوجك تصرفاتهم وبيني له انك تبين رضاهم وودهم
والله يسخره لك يارب ويسعدك يارب..

اسفة جدا على الاطالة ... وذكرت لك ماحصل لي للفائده .. وليس للخروج عن اطار موضوعك...
الله يسعدك ويرزقك ماتتمنين

مايبغوك بمناسباتهم وجمعاتهم علشان يضلوا يعبو براسه ليه ماجت وليه ماتعمل الواجب ووووو
الله يعينك عليك بالدعاء الله الي بينصرك لانه مايحب الظلم اهل زوجك اذا نيتهم يخربوا بينكم فالله حسيبهم

__________________



هل تتعرضين للأبتزاز ؟؟ أدخلي هنا

مفضلة المتزوجين 2011-2014



مفضلة المقبلين على الزواج 2014

.

فعلا انا اسكت لاني اشوفه يتوتر لو المح بس تلميح وجهه يتلون ويتغير ويعصب
والاهم مالقى حل من النقاش يمكن يتغير يوم يومين زي التسكيته !!
ويرجع مثل اول
الشي الثاني انا ارتاح لطريقة المعامله بالمثل لانها اريحلي من النقاشات العقيمه ولانها افضل بالنتائج
لكن للاسف الظروف ماتسمح اهلي بمدينه ثانيه ولاعندي احد!!
واذا عندك يااختي طريقه او اسلوب اقدر اوصل لزوجي فيه المعلومه بدون مايثور ويعانددد ياليت تعلميني
ولك اجري لاني تعبت من الوضع هذا

__________________