السلام عليكم ورحمة الله وبركاته.

بدخل بالموضوع علطول مالي بالمقدمات ...

انا بنت في الجامعه باقي لي ترم و أتخرج ؛ مشكلتي أني أنعجبت بشخصية وحده انا أعرفها من زمان كانت تعرف أختي ريم بس ما تعرفني و كنت أهاوش أختي اقول لا تكلمينها ولا تجلسين معها ﻷني توقعتها بويه لانها ما تحط ابد مكياج و طويله ونحيفه مرره بس ظلمتها صارت مو بويه و شعرها طويل بس خفيف كذا مو واضح انه طويل ، و اختي ريم متخرجه من تقريباً سنتين ف ما عاد تتواصل معها ، و جت اختي ريم زياره لكليتي و شافتها و سلمت عليها و قالت لختي انها متملكه و زواجها قريب بس مدري هي تزوجت ولا لسه!. هي معي في نفس القسم بس انا سابقتها بمستوی بس أعتذرت فتره و رجعت و جمعني معها ماده ف صرت اقابلها مره أو مرتين أسبوعياً ف مدري صرت انبسط اذا شفتها مبسوطه و اصلا هي انسانه مرحه كنت أضحك لما أشوفها الصباح قبل وقت المحاضره يعني من بعيد لبعيد و ما اكلمها ولا تعرفني ولا شيء هي معها مشكله في القلب يمكن يكون اهتمامي بها لهالسبب. و صدفة جمعنا عمل في الماده و صرنا في قروب واحد في الواتس كنت مره مستحيه أتكلم فيه بس تشجعت و تكلمت و صرت انا وياها اللي مسؤولين عن العمل و صارت تكلمني خاص عن العمل و نتكلم بس في مجال الماده و عن العمل فقط و تخلص السالفه علطول . ف انا انسانه خجوله و ما أعرف أكون صداقات جديده مع أحد ، ف خلصنا العمل و كلش ولا صار يربطني معها شيء ف كلمتها بعد ما خلصنا بكم يوم عشان اشوف كم درجتها في العمل و اخذتنا السوالف عنها و عني و شوي عن شخصياتنا و أنعجبت فيها أكثر صارت انسانه طيبه و تحب تساعد الناس و قارئه و متطوعه ، بس مدري كيف اتقرب منها أبي أكون صديقتها مو شيء ثاني اصلا ما قلت لها شيء اني معجبه ولا شيء ، بس المشكله انا اللي أبدا أسولف معها بعدين تسولف معي بس ما عمرها هي سولفت معي ف احترت مدري وش أسوي معها أحس مو مهتمه لي و قلت لها اني أحس أني افرض نفسي عليك و انك قاعده تجامليني ف قالت لا هي ما تجامل و هذي هي شخصيتها و طبيعتها و انها تعتبرني زميله و هي الحين تخرجت ولا ودعتها و قالت عادي لانها سلمت علي سلام سريع الصباح . مدري وش أسوي معها انا اصلا ترآ ما عندي هالحركات إعجاب و حب ابداً بس كذا من الله انتبهت لها و ترا انا متدينه شوي و أخاف الله كذا دايم أحاول اربط كل شيء يعجبني فيها في الله زي تطوعها و حبها لمساعدة الناس و يمكن في حاجات لسه ما عرفتها عنها كويسه.و حتی ما أفكر اقول لها عن اللي بقلبي لها مستحيل بس احترت بعلاقتي معها برودها و ردودها البارده تحيرني و أحس أني افرض نفسي عليها وهي ترا ما تسألني ولا تعرف عني شيء وحتى ما تعرف اني اعرف ان عندها مشكلة في القلب ولا تدري اني أخت ريم و اقول لها اني اعرفك من زمان بس ما سألتني وش اعرف عنها أو من وين أعرفها مدري غريبه هالانسانه ؟! وهي ترا في الواقع جريئه و اجتماعية . وش رأيكم وش أسوي ؟و في أحد صار له مثل هالموقف و كيف تعامل معه؟ و كيف اتقرب منها و أكون لها صديقه ؟
بعض المرات اقول لنفسي مشاعري و قلبي غاليين ليش احط نفسي بموقف زي كذا يمكن هي ما تقدرني ولا تقدر اهتمامي بها . بس حابه وجودها بحياتي و أبي تكون لي صديقه مو شيء ثاني اصلا ما أفكر اقول لها اللي بقلبي أخاف تشوف نفسها علي أو ما تقدر مشاعري . و مرات اقول ببتعد و بدعي ربي يكرهني فيها أو يشيل حبها من قلبي . مدري محتاره في امري .اتمنی تحطو نفسكم مكاني و حاولو تحسو فيني و اتمنی القی حل عندكم . و آسفه ع الإطالة .