السلام عليكم ورحمه الله وبركاته

كيف حاالكم جميعا

من زمان عنكم طبعا مو لانه ماعندي مشاكل بس لاني صرت هاديه اكثر واطنش واحاول امشي اللي يمشي


بس هالسالفه عيت تمشي طبعا انا متزوجه واصير الثانيه


زوجي دايم خارج البيت جداا مشغول ويوم هنا ويوم هناك واذا هو عندي مانجلس مع بعض ولا تجي اربع ساعات وبالشكل ذا مايعرف اغلب امور البيت


وزوجي يثق بالخدم والسواقين بشكل عجيب عندنا سواقين واحد كبير وواحد صغير كلهم عادي بس احس الصغير نظراته لي ماتريحني ابداا وحتى لو رحت لمشوار وقلت له بابا لايدري اني بتأخر مايعلم علي يقول زحمه وكذا طبعا لااحد يفهمني غلط مشاويري كلها بالسليم بس زوجي رجال كبير ومو كل شي يقتنع فيه حتى المستوصف اودي عيالي تعبانين اروح بالسر يكون طالع ولا اقول بروح اهلي وامر اللي انا ابيه

الزبده من ذا كله اني كل مشاااويري مع السواق وانا لاموظفه ولاشي واغلب شي انا اكون بالبيت مع الشغالات

وكانت عندنا شغاله اندنوسيه وكانت مقرره تجلس مده طويله وفجأه صارت تبكي ومصره تسافر مع انهم وصلو راتبها في رمضان ل اربع الاف عشان تجلس ورفضت بعد ماراحت عرفت انها راحت لانها حامل من ولد زوجي شاب ماتزوج وغرفته بالحوش والشغالات غرفتهم بالحوش بعد الا شغالتي غرفتها عندي
وطبعا بما ان كلا يطلع فضايح الثاني صارت كل شغاله تجي وتعلمني بسوالف الثانيه الين عرفت ان الشغالات يتجمعون في بيتي عندي غرفه برى البيت ويواعدون

انا انام فتره الصباح وهالوقت مافيه احد بالبيت بس السواقين والشغالات والزوجه الاولى كبيره وفي بيتها والباقين مدارس ودوامات



انا الحين عندي مشكله ان الباب اللي بيني وبين اهل زوجي ماله مفتاح وهو وسيله الخدم للدخول وان مطبخي خارج البيت ولافيه امكانيه يكون جو والغساله برى ولازم افتح باب البيت للشغاله ويكون المدخل مفتوح وانا ماافيه الا اني اقفل باب غرفتي اللي هو باب مو خشب هذا الباب الشفاف يعني برفسه وحده ينفتح علي


انا ماني عارفه اعلم زوجي ولا كيف احافظ ع. نفسي ذبحني الخوف لو احد تعرض لي وين اروح بس
حتى ولد زوجي خايفه منه مووووت اخاف يدخل علي ولا الشغالات يدخلون احد ع البيت


تكفون كيف اتصرف بدون مايكون علي مشاكل اخاف اعلم زوجي بكل السالفه ويقلبون الامور علي وتصير مشاكل كثيره

انا مابي مشاكل بس مابي يصير لي او لعيالي شي ولا ابي البيت يقلب دعاره اخاف لو قدر الله احد من خارج البيت شاف الرجال الصباح يدخلون ويطلعون يتهموني انا ويقولون بنت وتبي رجال وزوجها كبير


انتظر رايكم

أختي لو مكانك شغله من اثنين بسويها
يا اني بركب باب كويس يحجز اللي اقدر عليه من بيتي.. على الأقل لو غرفتي وغرفة عيالي
ومايهمني حتى لو تشوه شكل البيت..

أو بنتظر واقعد اقنع زوجي وأخوفه من هالشغالات خصوصا بعد جرايمهم الاخيره في البلد
لحد مايسوي الباب بنفسه او يشوف صرفه للموضوع

لا تتحملني هذي المصيبة لوحدك هذا رجال وهذا بيته وماهو من حقك أختي تحلي الأمور على رأيك اللي ممكن مايكون صحيح هذا بيته وهو أولى انه يعرف مشاكل البيت ويحلها حماك الله

خبري زوجك بكل هذي المصايب

__________________
انا لله وانا اليه راجعون

طيب انا قلت ل امي ع الموضوع وطبعا هي متهوره الله يهديها قالت بجي بوقت زوجك مو فيه الصباح وبجيب عامل يغير مفاتيح الابواب كلها وتقفلين دايم باب الشارع والباب اللي بينك وبين بيتهم الا اذا كنتي قايمه عادي اتركيه مفتوح

كذا راح تصير لي مشكله وزوجي بيقول من صلح لك الابواب وايش فيه وبيحقق معاي وامي تقول قولي اني خايفه وابي اسوي المفاتيح الجديده اللي نسخها ماتتكرر ومن هالكلام وهو بيقول ليه ماعلمتيني وانا لو قلت له لايمكن يغير لانه بارد ومايصلح شي ولايقتنع الا في الظروف القاهره ومهمل معطي السواق مفاتيح الشارع حقت بيتي من كثر ثقته فيه

ابي حل عاجل وبااقل الاضرار

جيبي الشغالات و استدرجي كل وحدة بالكلام ،، و خلي الكاميرة أو المسجل ( شغال ) ..
و صوري كل شي تقوله ، و حتى لو تعطيهم بعدين فلوس عشان يعترفوا

و بعدين حاولي تقنعي زوجك بأي طريقة ، إنه فيه مصايب تصير من وراه ..
و في الأخير ، خليه يشوف اللي سجلتيه ..

مو المشكله انه يصدقني او لا انا عندي ادله كافيه لتصديقي بس المشكله وش بعد كذا
راح تطيح فوق راسي ولاعاد بيخليني اروح او اجي وانا مشاويري مايوصلني هو ولا اي مكان كل شي ع السواقين
هو مررره مشغول وبعد فتره جايه انتداب وبيغيب يمكن ثلاث شهور وهذا اللي مخوفني اني بكون بلحالي

وانا اخاف الشغالات يلزقون فيني تهمه ويطلع كلام او هو يصير بعدين يشك فيني ويقول فعلا كنت اغيب كثير عن البيت ويمكن قد جابت احد ولا شي


مرررره خاايفه ومحتاره ايش اصلح المشكله امي بتتدخل ولا اقدر امنعها لانها صعبه تقتنع وتخاف علي كثير وتدخلها بيزيد الموضوع تعقيد

الله يعين بس

دام فيه ابواب تحجز ومو ناقصها الا كوالين
غيريها وانتهى الموضوع
وقلتي انه بارد مايتحرك
خلاص تمام انت عطيه خبر
وتغيير الاقفال ترى مايحتاج مهاره
اذكر امي الله يذكرها بالخير
عندنا بيت في مدينة ثانية ومن فتره لفتره هي تغير الكوالين بنفسها
وبسطي له الموضوع وانه امان اكثر وانت تخافين

يالله يا وحدانيه توقعت ان تفصيل بيتك مايساعد ومافي ابواب
طلعت الابواب موجوده بس انتي توك تتذكرين الخوف !!!!

فعلا مثل ماقالت لك العقد الفريد خبريه انك بتغيرين الكوالين وماتوقع انه بيرفض اذا غيرتيها بنفسك
الله يسهل امورك ويبعد عنك كل شر

__________________

يعني ابلغه اني بغير الكوالين وان مفتاحي ضاع وخفت ودقيت ع امي وساعدتني وهو طالع وكذا كاانه صار صدفه
واقفل وبس بدون ماابلغه عن شي او المح؟؟

تفصيل بيتي المطبخ خارجي للشارع عندي باب واحد والابواب الداخليه اثنين ابواب حديد تدخل ع البيت حقي واحد دايم مقفول هو حق جهة الضيافه والثاني اللي من واجهة الحوش والمطبخ واللي يودي للباب اللي بين بيتي وبيت اهله وهو اللي دايم مفتوح عشان الشغاله تطلع وتدخل للمطبخ وللغساله وانا اكون نايمه الصباح وقافله باب غرفتي بس
باب الشارع السواق معاه مفتاح له

بيتي دور واحد والشغالات عارفين مافيه الا انا وشغالاتي يعني فاهمين انه امان اكثر والباب اللي بينا وبينهم عمري ماقفلته وهو ماخذ مفتاحه مني ورافض اني اقفله يقول لاصليت الفجر امر اطفي الانوار ويقول لو لاقدر الله صار شي اقدر اوصل لكم انا او اي احد بدون مفاتيح وخرابيط ويقول لااشوفك قافلته بيني وبين عيالي لو احتاجو شي

يعني لو قفلت باب الشارع بصير بمشكله الباب اللي بينا وهو المصيبه اخاف يدخل احد من مدخلهم وعقب ع بيتي


احتاج حل عقلاني بااقل الاضرار الممكنه وبالذات بعيد عن اثاره شكوك مابي مشاكل مع احد منهم انا صغيره وعيالي صغار من يفكني منهم وعياله كبار