بسم الله الرحمن الرحيم
كما يقال
رب صدفه خير من الف ميعاد
في يوما من الايام كنت في بيت اختي الكبرى بعد صلاه العشاء كنا مجتمعين انا وزوج اختي وولدها وبعض الاطفال الا وتاتي اختي الكبرى وامي وبقية اخواتي وكانوا عائدين من بيت قد دلوهم عليه وحده من قريباتي لكي يشوفوا وحده لاخي اللذي يكبرني بعدة سنوات والا اختي الكبرى تقول لي لديهم اخت ثانية ما شاء الله عليها زي القمر ومواصفاتها كيت وكيت وكيت ونفس المواصفات اللي اتمناها في بنت الحلال مع العلم لم ابلغ احدا من اخواتي اني اريد في بنت الحلال اي مواصفات ولم ابلغهم وقتها اني اريد الزواج من اصلا ولكن عندما مدحت اختي البنت وتقول لي عن اوصافها ما صدقت خبر وقلت في قلبي فرصه لن تتكرر هذه هي المواصفات التي اريدها وقلت لاختي قدام على يدك الا وتتصل اختي على قريبتي وتقول لها بلغي اهل العروسه اذا البنت الثانيه مخطوبه او ما شابه ذلك وردت اليها وقالت لها لا فقالت اختي اجل قولي لامها بدل العريس عريسين وابلغتها بذلك فقالوا اهلا وسهلا
فتم تحديد موعدا مع والد العروستان ليقابلنا ونعرفه بانفسنا وذهبنا نحن الرجال الى والد العروستان فرحب بنا وتبادلنا المعلومات الشخصية واخذ فكرة عن وظائفنا وموقع اعمالنا والحمد لله كل شيء على ما يرام وقال لنا اعطونا فترة لنرد عليكم وبعد اسبوعين تم تحديد النظرة الشرعيه وما ادراك ما النظرة الشرعيه
كنت انا واخويا مع والد واخوان العروسه في صالون الرجال الملاصق لصالون النساء الذي كان يوجد فيه اهلي كلهم مع جده العروسه الكبرى واذاهم ينادوا على اخويا الكبير ليدخل عليهم ويرى وانا انتظر دوري تقولوا زي الواحد اللي عنده مقابله في شركة ارامكوا المهم الا ودقايق اشوف اخويا دخل علينا وباين عليه مبسوط وانا اقول في قلبي مليون احتمال الاولى يمكن ايوا والثانيه يمكن لا وماني عارف وانا انتظر ومستني دوري وقلبي يقول ياهووو ليش كل هذا التاخير الا ولحظات يجي الفرج وينادوني الا وادخل والقى عروستي بسم الله ما شاء الله في وجهي جالسه اول ما دخلت وشفتها لا اراراديا قلت بصوت عالي ما شاء الله تبارك الرحمن واهلي جالسين يضحكوا عليا وعروستي تطالع فيا بنص عين ومبتسمة وكانت كاسة العصير امامي جاهزه شربت منها شويه والا اختي تاشر
اني اطلع الشبكة من جيبي واحطها على الطاوله ولكني رفضت وقمت وجلست جنبها ولبستها الشبكه واهلي مستغربين من جراءتي مو متعودين والا متوقعين اني اسوي زي كذا لاني خجول نوعا ما الا واشوف جدتها كانت جالسه في ركن الصالون ما انتبهت لها الا لما جلست جنب خطيبتي واهلي ياشروا ليا خلاص قوم اخرج بصراحه لما دخلت وشفت بسمتها اللي ما انساها حسيت براحه ما يعلم فيها الا رب العالمين واحس قلبي يمكنو نقز من مكانو المهم انا خرجت قبل اهلي واهلي رجعوا مع اخويا الكبير والا اختي الكبرى تقول ليا ايش رايك عجبتك وعرفت اختار لك قلت لها كيف قراتي افكاري قالت ليا مجرد صدفه وعروستي سبحان الله جاها نصيبها بالصدفه كانت في سنه التخرج من الثانوي وهذا اليوم تقول امها انها دخلت بالصدفه على اهلي في اول زياره ومافي في تفكيرها اي زواج لانها صغيره ما خلصت الثانوي وسبحان الله اختي شافتها وقالت بدل العصفور عصفورين المهم بعد ما ردوا علينا اهل العروستان بالموافقة تمت الزيارات التبادلية للتفاهم على امور الزواج من مهر وما يترتب على الزواج والحمدلله تم الاتفاق على كل شيء وتم تحديد الملكه بعد الخطوبه باربعة اشهر بسبب الاختبارات وضيق الاجازه الصيفيه وبعده رمضان الى بعد عيد الفطر المبارك افتكر اول هدية اهديتها ياها كانت عبارة عن كيكه وعليها عبارة الف مبروك على النجاح يا ...... وكانت وقتها في زياره مع اهلها في بيت احدى اخواتي ولكن لم استطيع ان اشاهدها وقلت لاختي ارسل لي رقمها وارسلته ليا وارسلت لها مسج فقط مكتوب فيه نفس العباره التي على الكيكه ونهايتها خطيبك ......
وبعد اسبوعين عملت عملية جراحيه تبع اللوز وارسلت مع اخوها هديه مع عطر وكتبت لي في الكرت الحمدلله على سلامتك وما تشوف شر وتحت خطيبتك ......
لم استطع ان اكلمها وكيفية الوصول لمحادثتها المهم كلمت اختي قلت لها كلمي امها على اني ابغا احادثها للتعرف عليها اكثر فوافقت بعد الاستئذان من ابيها ولكن بشرط ساعه اسبوعيا وعلى تلفون البيت فقط واتذكر اول اتصال كان مع دخول شهر رمضان المبارك وارسلت لها مسج اني اريد ان اكلمك فارسلي الي رقم تلفون البيت وانتظريني بجانب الهاتف واتصل عليها الا واخوها الصغير يرد وجالس اقول في قلبي هذا وقته المهم قلت لها كيف حالك وكل سنه وانت طيب ومن النمك هذا وهو مصدق نفسو المهم راح ينادي اختو ولطعوني على الخط زي 3 دقايق حسيت انها مستحيه انها تكلمني وماهي عارفه ايش تقول لي
المهم ردت وقلت لها كيف حالك ياعروسه وكل سنه وانتي طيبه وهيا بس ترد ماهي عارفه ايش تقول
المهم دخلت لها من باب بعيد عن الزواج قلت لها ايش سويتي سجلتي في الجامعه قالت ايوا قلت لها ايش نفسك تتخصصي قالت ادارة اعمال قسم موارد بشريه قلت لها حلو قلت لها كم نسبة تخرجك قالت لي ماشاء الله عليها 96 % في شيء ماني عارفه ما عمري سمعت انو في بنت رسبت والا نجحت بتقدير جيد حتا كلهم يا ممتاز او بالميت جيد جدا مرتفع معقول الكلام هذا الله يرحم الطلاب ويستر على فضايحهم افتكر كنت اسمع عن الصف الاول ثانوي لم ينجح احد والصف الثاني ثانوي لم ينجح احد والصف الثالث ثانوي فلان بن فلان بن فلان مدير المدرسه يكرمه على نجاحه بتقدير مقبول
المهم المكالمه ما استمرت على بعضها اكثر من ربع ساعه تاني اسبوع بدات تطول المكالمه ايش تحب ايش تكره ايش برنامجك كيف الملكه فين حتسووها ايش حتلبسي فين رحتي فين جيتي ومن هذا الكلام وبدانا نتكلم كل 3 ايام الين اخر ايام رمضان صرنا شبه يومي وعلى الجوال الين ما جاء يوم العيد قلت لاختي قولي لامها اني سوف اذهب لاعيد على ابيها ومن ثم اشوفها واعيد عليها مره وحده استئذنت من ابيها فوافق وقبل العيد رحت لمحل ذهب اشتريت لامي الله يحفظها تعليقه واشتريت لاختي اللي شافت لي خطيبتي اسورة ولزوجتي هم اسورة وانا اخترتها بنفسي وماحد داري عن الموظوع المهم في صباح العيد اعطيت امي هدية العيد وسلمت على يدها وراسها وشويه قلت لاختي الكبيرة ايش فيها يدك منفوخه قالت لي يتهيئلك قلت لها اشوف اعطتني يدها الا وانا منزل الاسورة من جيبي ولبستها ياها وقلت لها تسلملي يدك اللي اختارت لي احلى عروسه في البلد وهيا مو مستوعبه ما عمري جبت لها هديه واخواتي الثانيات حاقدين عليا ويطالعوا فيا زي اللي يقولوا واحنا طيب قلت لهم المره الجايه دوركم ولا يهمكم المهم في نفس اليوم بعد صلاة العشاء رحت اعيد على اهل العروسهوانا رايح لهم في الطريق مريت على محل ورود وقلت له ابغاك تزبط لي بوكيه ورد يكون مرة محترم ويكون سعره معقول ومن حسن حظي لقيت عنده واحد بوكيه ورد كبير جاهز شكله سواه لزبون واختلفوا في السعر او الله اعلم المهم كاسرته واخذته بسعر معقول جدا اخلى مافيه انه مره كبير ومليان ورد المهم وادخل على ابو العروسه واسلم على خده وراسه ويده ( واقول في نفسي والله سرت محترم يا واد ) كله لاجل قمرنا يهون المهم شربت القهوه مع الحلى ومع البخور الا وشويه تدخل عليا خطيبتي وهيا مستحيه قمت وابغا اسلم على يدها سحبتها خجلانه الا وابوها يقول لها وهو مازح يا بنت لازم تتعلمي الاتيكيت هههه
المهم قدمت لها البوكيه والاسورة وانبسطت مره وانا جالس ماني قادر اتكلم من ابوها وهو لاحظ الشيء هذا وقال لنا انا حسيبكم تتكلموا مع بعض شويه ومعاكم الاولاد المهم خرج من هنا والا احنا بدانا نتكلم من هنا وفي هذه اللحظه حسيت ان الحواجز اللي بيننا بدات تتلاشى وجلست معها حوالي 10 دقايق والا ابوها جا وزودتها كمان 5 دقايق واستاذنت ومشيت ولساع وانا راكب السيارة والا اشوف مسج منها مكتوب فيه تسلملي على الهديه الذوق يا ذوق وبعدها بيوم اللي هو ثاني عيد سالتها فين رايحين اليوم قالت لي رايحين المكان الفلاني قلت لها خلاص انا حروح هناك قالت لي من جدك انك جاي قلت لها ايوا من جدي قالت ما يسمحوا لك انك تدخل لازم عوائل قلت لها انتي حتدخليني قالت لا ما اقدر قلت لها حادخل يعني حادخل قالت لي اتحداك المهم لما عرفت انهم راحوا كلمت بنات اختي قلت لهم ايش رايكم امشيكم وهما مستغربين ومو مصدقين اني انا اقلهم امشيكم المهم قلت لهم اتجهزوا خلال نص ساعه انا حاوديكم المكان الفلاني وهم بعد دفعت لهم تكت الدخول المهم دخلنا المكان الفلاني وقلت لها انا دخلت مو مصدقه الا لما قلت لها انا في المطعم الفلاني جات وشافتني قالت لي انت مجنون لو امي شافتك او اي واحد من اخواني ايش حيقولوا قلت لها ما حطول المهم كلمت اختها الكبيرة قالت لها على القصه كلها وجلست معاها زي نص ساعه طلبت لها وجبه خفيفه مع عصير واتكلمنا شويه الا ووحده من بنات اختي شافتنا وفرصعت عيوني فيها وفهمت الموظوع وهيا تقول مو لله في لله خالنا جابنا هنا ودفع لنا التكتات المهم جلسنا نص ساعه وخليتها تروح عشان امها ما تشك وخليت بنات اختي يلعبوا ساعتين وخرجنا وطول الطريق وبنت اختي اللي شافتنا وهيا تطالع فيا نظرة خبيثة وتضحك وتغني وتطقطق على راسي
المهم لما وصلنا البيت فضحتني بنت اختي عند امها واختي تقول يا مصيبه لو انكفشتوا من امها ايش حيكون موقفكم قلت لها عادي مجرد صدفه اتقابلنا حرام
المهم ثالث عيد الا وهم جايين يعيدوا على امي واول زياره لهم لبيت امي الله يحفظها المهم انا كنت في غرفه المعيشه وخليت اختي تناديها وانا جالس كنت اشرب مويه وظهري معطيه الباب الا وهيا داخله عليا وتبغى تفجعني الا والكاسه فيها شويه مويه وارشها بالمويه والا هيا واختي مو مصدقين الموقف اللي صار وكيف تدخل عليهم وملابسها فيها مويه واااااو قويه دي الا اختي تقولي وتخاصمني في احد يرش خطيبته بالمويه الا وخطيبتي تقولي ما حانساها لك وجالسه تضحك المهم اعطيناها المناديل تنشف ملابسها وجلسنا نتكلم شوي من عند باب الغرفه الا واختي تقولها يلا نجلس هناك سيبيكي منه
المهم راحت لغرفه الضيوف واحس اني كسرت كل الحواجز اللي بينها وبيني وبعد كدا صارت تتكلم معايا بكل اريحيه ونمزح واخذنا على بعضنا الين جاء يوم الملكه كانت ملكه الرجال يوم الاربعاء في استراحه وملكة النساء يوم الخميس في قاعه وما انسى يوم ملكتي سويت لهم فلم ومفاجأة يوم الزفه اول شيء يكون التصوير وبعده الزفه المهم بداية الزفه من البلكونه وانا لابس المشلح والغتره ولما جينا نبغا ننزل كل واحد ينزل من درج عشان نتقابل تحت ونمشي على الممر الى الكوشه انا كنت مجهز بدله رسميه مع كرفته في غرفه اهل العريس وا حد داري عنها نهائيا الا وحده من اخواتي وقلت لها لا تقولي لاحد على فكره كنت مخلي واحد من اصحابي مغربي الجنسية يعلمني كيف اربطها للاسف ما عرفت اخر مره قلت له انت اربطها وخليها مرخيه وانا لما البسها اشد عليها قالي اوك المه دخلت الغرفه بسرعه وخلعت الثوب والمشلح والغتره ولبست البدله وجهزت نفسي وشعري في اقل من 3 دقايق ونزلت مع الدرج والا اهلي يقولوا لاختي من هذاك الرجال اللي لابس بدله قالت لهم هذا العريس وزوجتي اتفاجأت لما شافتني باللبس ومشينا الين ما اتقابلنا في الممر وقالت لي شكلك ما شاءالله مره واااو بالبدله المهم انزفينا ورقصنا وتمت الامور على خير والحمدلله وجلسنا شويه مع بعض وبرجك يا حمام شيء يحزن والله بعد هذا كله تنسحب من البطوله زي اللي يشتري لولده دراجه ويقول له ما تاخذها الا لما تنجح ههههههه
المهم بعد الملكه وما ادراك ما بعد الملكه
اول ويك اند بعد الملكه كانوا اهل خطيبتي يخلوا واحد من ابنائهم مرافق مع اخي وخطيبته ويخلوا 3 من ابنائهم مرافقين معي انا وخطيبتي اين العدل ؟
المهم خرجنا في اول ويك اند انا وخطيبتي و3 من البودي قارد حقينها اتخيلوا اول مره تركب معايا السياره الا واحنا مسوين حادث ؟؟؟!!!
هذه اولها الله يعين ايش نهايتها قلت في قلبي طلعة شؤم بس الحمدلله مو انا الغلطان اللي صدمني كان خارج من الصيدليه ومستعجل يقول ولده تعبان الله يشفيه المهم اعطاني رقم جواله وقالي لا تخاف انا مؤمن على السيارة ودحين مستعجل وما يصير خاطرك الا طيب قلت له اوك روح الله يشفي ولدك ويعطيه الصحه والعافيه وما قصر اليوم الثاني اتصل عليا وقالي ابشر باللي تبيه المهم كملنا يومنا هذاك وانبسطنا وحاولت اسوي حركات نص كم والا الشله المحترمه ما شاء الله عليهم تقولوا عليهم كاميرات مراقبه لا ذقنا الحلى ولا شيء مو مشكله قلت الجايات اكثر
اقترحت عليها اقتراح جهنمي قلت لها مو انا دحين زوجك صح والا لا قالت نعم قلت خلي ابوكي يرتاح من توصيلك للجامعه انتي واختك ونصير انا واخويا نوديكم ونرجعكم قالت والله فكره نريح ابونا واحنا مو لله في لله حنوصلهم ونرجعهم ( الذيب ما يهرول عبث ) المهم استمرينا نوديهم ونرجعهم من الجامعه انا واخويا واحيانا نخرج نفطر سوا واحيانا نتغذى سوا الين شويه شويه صرنا نشتري الفطور واجيبها البيت عندنا وامي تكون نايمه وادخلها الصالون ونفطر سوا وخذ راحتك يا ذيب بس اخويا ما قدر يتجرأ يجيب خطيبته البيت ( خواف ) بس من حقه
في يوم من الايام وانا داخل البيت ومعايا خطيبتي الا وافتح الباب والاقي امي الله يحفظها في وجهي ( موقف مره بايخ ) شافتني مع خطيبتي وسوت نفسها ماهي شايفتنا وراحت على غرفتها انا كنت حاسس انها عارفه كل شي اسوي بس ساكته الين يومنا هذا وهي ماسكه عليا هذه الزله تقول لاخواتي اخوكم الصغير هذا مصيبه وزوجتي والله كل ما تفتكر الموقف هذا تجلس تهزئني تقولي الله يفشلك زي ما فشلتني قدام امك ايش تبغاها تقول علينا المهم الموقف عدى على خير وقرب موعد الفرح يعني زي شهرين باقي على الفرح
استاجرنا شقتين مقابل بعض شقه ليا وشقه لاخويا قريبه من بيت اهلها وبيت اهلي المهم كان نظامي مع خطيبتي كنت محدد للاثاث ميزانية محدده وغير كدا انا ديموقراطي بمعنى ان الحياة شراكه كل قطعه اشتريتها للبيت لازم اخذ راي خطيبتي فيها او انو هيا اللي تختار بس بشرط تكون على قد ميزانيتي ولو زادت شويه مو مشكله والحمدلله كنا نخرج كل ويك اند عشان اثاث البيت واحلى شيء في الموظوع في بعض الطاولات والدواليب الصغيرة اشتريناها من ايكيا وركبناها انا وزوجتي مع بعض الى الان مفتكرين
بعض الطاولات التي تذكرنا بالايام الحلوة واللحظات الجميلة والتي لاتزال وستزال جميلة الى نهاية اعمارنا باذن الله وكان عندي مبدأ في شراء اثاث البيت وهو اني كنت حاطت ميزانيه لكل شيء على سبيل المثال غرفه النوم كنت حاطت لها ميزانية وقلت لخطيبتي ميزانية غرفة النوم كذا واذا زادت بنسبة 20 % مو مشكلة ازود من عندي ولكن لو كانت اكثر من ميزانيتي فعندك حل من الاثنين اما ان تصرفي النظر عنها وتشوفي بديلها او انك تدفعي الفرق وكانت متفهمة ومقدرة لوضعي الحمدلله احيانا كانت تدفع واحيان كانت تبحث عن البديل
هذا هو روح العمل الجماعي
وتمضي الايام والاسابيع ونحن مشغولين بتاثيث البيت الى ان غلقنا منو والحمدلله وكان عندي هدف اخر اني اخرج من الزواج هذا بدون اي ديون من اي جهة تذكر وتحقق لي والحمد لله بعد ان كلفني الفرح انا واخويا من الالف الى الياء بحدود 250 الف ريال شامل المهور واطقم الذهب واثاث البيت وقاعه الفرح مع العشاء ومع سفريه شهر العسل التي كانت في شرق اسيا الذي وفر عليا انو انا واخويا اتزوجنا في يوم واحد وشهر العسل كنا مع بعض هذا وفر علينا كثير جدا
ويقترب موعد الفرح الذي كان في يوم نهائي كاس العالم 9 جولاي بين فرنسا وايطاليا التي انتهت بفوز ايطاليا بكاس العالم واشتهرت هذه المباراة بنطحة زيدان للاعب الايطالي وافتكر هذاك اليوم ان اغلب المعازيم اتاخروا لحظور الفرح بسبب المباراة التي امتدت الى الاشواط الاضافيه ومن ثم الى ركلات الترجيح مع العلم اني اخبرت اغلب المعازيم ان القاعه يوجد بها شاشات لنقل المباراة
والحمدلله تم الفرح على اروع ما يكون بفضل الله ومكثنا بضعة ايام ومن ثم سافرنا الى شرق اسيا ومكثنا بها اسبوعين وعدنا الى ارض الوطن الغالي بحمدالله

ترقبوا الجزء الثاني من مذكراتي في قسم المتزوجين قريبا

__________________
حبيبتي .... عندما تبتسمي الي سوف تنير كل النجوم التي في السماء

ماشاءالله تبارك الله
الله يوفقكم ويسعدكم ويجمع بينكم بخير ويجعل ايامكم كلها سعاده.

روعة ماشاءالله
جري ماشاءالله اكتشفت انوه البنات يحبوا الزوج عنده جرأة شوي.
أحسن من مسوي نفسه ثقيل وفاهمة المرجلة غلط.
الله يسعدك ونترقب البقية.

__________________
( قال الله تعالى : يابن آدم إنك ما دعوتني ورجوتني غفرت لك ما كان منك ولا أبالي ، ياابن آدم لو بلغت ذنوبك عنان السماء ثم استغفرتني غفرت لك ولا أبالي ، ياابن آدم إنك لو أتيتني بقراب الأرض خطايا ثم لقيتني لا تشرك بي شيئا لأتيتك بقرابها مغفرة )كربي عظيم ادعوا لي (اللهم لا تكلفني من كرب الحياة ما لا أطيق)..

صراحة عجبني أسلوبك .. وشخصيتك .. ومغامراتك ..

رغم إني كنت متوقع أسمع مغامرات أكثر وأروع من كذا ..

ذكرتني بالأيام الخوالي يا رجل

منتظر الجزء الثاني بفارغ الصبر ..

الله يهنيكم ويجمع بينكم على الحب والخير دائماً وأبداً ..

__________________
... ( بالحب نعيش أجمل حياة ) ...

ههههههههههه
موضوع رائع
فرحتني الله يفرح قلبك انت وحرمتك

ماشاء الله تبارك الرحمن

احلى مافي الموضوع ان الخير جاك بدون ما تتعب فيه

__________________
الحمدلله الذي بنعمته تتم الصالحات

ربي يخليكم لبعض ..

منتظره الجزء الثاني ..

__________________

[SIZE="3"][/SIZ الله يخليكم لبعض ويسعدكمE]

انت كاااابتن كبير ..

انا سجلت في الموقع بسببك .. انا خاطب و اهلي و اهلها محافظين ..
الشوفة الشرعية قابلتها و كشكل الحمدلله مقتنع .. بس ما قدرت اكلمها ابوها موجود .. يعني تكلمت وهي ساكتة مستحية من ابوها ..
(( وقد اخذوني اهلي على حين غرة ومارتبت نفسي مزبوط )) .. ماعندها حساب في التويتر و لا الفيس بوك .. بالقوة قدرت اجيب رقمها ( بطريقة ملتوية )

دبرني .. ابغى اكلمها و اتواصل معاها واتس اب او مكالمة ( قبل العقد ) و ما ابغى احد يعرف لا من اهلي ولا اهلها
ابغى اعرف تفكيرها و طريقتها .. مش بعد العقد يطلع اختلافات بيننا

دبرني .. اعطيني افكارك ... والله دخلت بعد ماشفت موضوعك ..

هههه احلى ايام تعجبني جراتك ياخي الواحد من حقه ينبسط بهالايام الله يهنيكم

تتهنووو يارب وجعل السعاده دوووم