السلام عليكم و رحمة الله و بركاته

انا عمري 30 سنة متزوجة من ست سنوات من رجل عمره 36 سنة ، طبيب ، و عندي طفلين و حامل الان بالشهر الرابع ، زوجي من بداية حياتنا مع بعض و هي مشاكل في مشاكل ، كم مرة توصل للطلاق و نرجع ، بالسنوات الاخيرة علاقتنا تحسنت نوعاً ما .. لا زالت في مشاكل بس تعدي .. لاني قررت ما أغث أهلي بكثرة مشاكلي ،، كل واحد و فيه اللي يكفيه

زوجي انسان عصبي جدا. و فوق كذا عنده غرور و شوفة حال مو طبيعية ، مستحيل يعترف انه غلطان او يعتذر لو اموت ، حصل سابقا انه مد يده علي مرتين و رحت بيت اهلي ، و يتركني فترة بعدين يجي جية المغرور يحل الامور و تمشي و يوعد ما يكررها .. مع ان بعدها بفترة صار يقول لي احنا تعدلت علاقتنا مع بعض لاني ضربتك !!!
مرة من المرات اللي ضربني فيها كنت حامل بطفلي الاول ..

كل زوجين تصير بينهم مشاكل عادية، بس هو في كل مشكلة عادية يبدأ يطول لسانه و يهدد بالطلاق و بالزواج من ثانية و يعددني لو اجيب له عشرة اطفال بيطلقني و ياخذ عيالي مني و يتزوج علي ، و يبدأ يهين ..
غير كذا اسلوبه شوفة حال مع الناس كلهم مع انه مو مقتنع بهذا الشي ابدا .. هو يشوف نفسه طيب و متواضع و يحترم الكل و اهله يعززون له طبعا و هو الشهادة لله حتى اهلي ما يحبون يتعاملون وياه يحسونه شخص مو مريح

قبل فترة حصلت لي مشكلة في مكان عملي و انظلمت كثير و تركت العمل .. و هو الشهادة لله وقف معاي وقفة رجال ما انساها له بعمري كله .. حتى امي والله قالت شوفي ما يبين معدن الرجال الا بهالمواقف عشان تعرفين قيمة زوجك

طيب الى هنا اوكي

صارت بينا مشكلة عادية سخيفة ، و كالعادة كبرها و طول لسانه و انا عصبت و قلت له احترم نفسك و لا تقعد تهددني بالطلاق ، طول لسانه مرة ثانية قلت له انا ما يقهر الا لما اهلك يقولون فلان طيب و قمت عنه .. جاني و اخذوا من كمية طوالة اللسان قالي انتي قليلة ادب و انتي سواد وجهك كل الناس يعرفون فيه ( يقصد مشكلة العمل ) يقول انا اتفشل اني اقول انك زوجتي .. و تستاهلين اللي سوو فيك دعسوا على خشمك و كسروا راسك !!!!

انا اللي مستحيل ابكي قدامه انهرت و بكيت ، احس انصدمت فيه و في تفكيره .. صرت اكرهه من كرهي للي ظلموني .. صرت ما اثق فيه و احسه يبني انهان و انذل

كرهته حيل و قررت ان هذا فراق بيني و بينه .. و اني ما اقدر اعيش معاه .. تحملت من خرابيطه كثير بس خلاص طفح الكيل
صار لنا الان اربعة اسابيع من المشكلة ،، انا مقررة الطلاق في نفسي بس ما طلعت من بيته .. احتاج وقت افكر و ارتب لي مكان لي و لعيالي .. و كمان عندي ظرف خاص فيني انتظره يخلص على خير و امشي
اربعة اسابيع ما نتكلم مع بعض نهائي .. و لا نجلس في مكان واحد ، صرت ما اشوفه و هو كذلك 24 ساعة جالس على الجوال و ما يشوفني .. صرت اكرهه جدا .. اذا اطلع اجلس ادعي عليه ما يرجع و يصير عليه حادث و يموت .. عندي لقب أرملة أهون من لقب مطلقة
ملاحظة انا متأكدة 85٪ انه ما يكلم بنات و لا يعرف بنات ، هو مو راعي هالحركات و الدلع و الرومانسية و هالامور اللي يبونها البنات ، بس يبقى نسبة بسيطة و مل شي جايز
هو ما يحترم اهلي ابدا و كذا مرة يتكلم عنهم بالسوء .. و يجلس يمدح في اهله ............................ .. لين قررت امنعه من جية بيت اهلي و انا بعد ما اروح بيت اهله مع انهم جدا طيبين و يحبوني و احبهم

فوق هذا كله مبذرررررر لابعد حد و ياليت شي عدل .. يبذر على نفسه فقط ، ما اقول مقصر في حق البيت لا والله يجهز مطبخ بيته كل شهر ، لكن انسى يعطيني مصروف او يعطيني اشتري لعياله شي ، حتى بالعيد انا اشتري لنفسي و اشتري لعياله ملابس ما يعطيني نهائيا و لا عيدية يعطيني و لااا شي ،، فوق كذا انا اللي دافعة فلوس استقدام الخدامة و ادفع راتبها الشهري و اجرة السواق اللي يوصلني العمل و فلوس مدرسة البنت الأهلية
مرة خلصت فلوسي و طلبته فلوس قال لي بأي حق اصرف عليك ؟؟!!!!!! مع انه ما عليه قاصر شغلته مرررة كويسة و يستلم راتب مرررة محترم و انا ما طلبت غير 100 ريال فقط
و هو في المقابل يشتري اغراض لنفسه ساعات و نظارات و جزم الله يكرمهم بالالاااااااااف و لا يفكر

احس اني مليت من عيشتي معاه .. خلاص طفح الكيل و ما عندي استعداد اصبر اكثر .. ما احس عنده جدية بالعلاقة الزوجية ، و لا شهر كامل زعلانة عليه و موجودة وياه بالبيت ما يحاول يصلح الخلاف و لا يعدل هالعيشة .. و اعرف لو نجلس سنتين على هالحال ما راح يتغير شي

اعرف اني كبيرة [/CENTER]العمر ( اصلا هو كل شوي يعايرني انتي مو بنت 16 ما يشوف حالة كم سنة و يصير 40 و تصرفاته تصرفات بزران ) و اعرف اني احتمال ما اتزوج او اتزوج واحد مو زين .. لكني شخصيا احس اني تعبانة قلبي محروق اني مالي كرامة و لا وجود .. احس كل شي انا اسويه لنفسي .. ليش اتحمل اهاناته بعد ؟؟

الي اعرف رايكم بنات و نصيحتكم الله يسعدكم

لازلتي صغيره لكن عندك طفلين و حامل

واعتقد ياقلبي زوجك كلامه مجرد ردة فعل منه لما ذكرتي أهله
الرجل كل شيئ يتسامح فيه إلا أهله وفرغ غضبه بشيئ يعرف إنه يقهرك مثل ماقهرتيه وانتي ذكرتي إنه عصبي المفروض تخففي من الكمات الي توتره وتخرجه من طوره

زوجك اكيد فيه عيوب بس انتبهي تكوني انتي الشراره الي تشعله

برأيي أفتحي صفحه جديده معاه وغيري أسلوبك معاه تعلمي البرود مع عصبيته وكلامه اعتبريه يكلم الجدران
يوم بعد يوم رح تكتشفي انه تغير وهدي

انتي نفسيتك الان تعبانه وصعب تستوعبي كلامي لكن صدقاً الشخص العصبي محتاج إحتواء وكلمة حلوه واحضان رح تلاقيه يبذر عليك اكثر من انه يبذر ع نفسه

تعوذي من الشيطان وتذكري انه عندك طفلين والثالث جاي في الطريق حرام ينحرم من أبوه

ممكن كلامي مايعجبك بس ماعليه اضغطي على نفسك واقريه اكثر من مره
احملك جزء من الخطا

لييييييه ماتغيرين من نفسك
زوجك يحس انك مو شايفته شيء
عشان كذا يسمعك الكلام الجارح
وليه تتحملي نفقة الاطفال والمدارس
انتي من اوصل اموركم لهذى المستواى
من اليوم غيري مجرا الامور
حمليه مسؤلية اطفاله من مدارس
ولبس
انتي اذا موضفه اصرفي على نفسك
بس اطفالك ونقتهم ومدارسهم على ابوهم

طريقتك في التعامل مع زوجك من وجهة نضري غلط
ليه ماتعامليه على انه سيد السيد
امدحيه وافتخري فيه في جيته
بنفسك تقولي ان اهله يعززون له
وهو يشفوهم افضل شيء كانهم ملوك
انتي اولا انه يشوفك ملكه
زوجك يبي الاحترام واتقدير
ارفعيه فووووووق
ايش خسرانه
بالعكس انتي الكسبااانه
تغيري تدريجيا
وتغيرك مايكون بعد موقف منه مثل ضرب
او اهواش
عشان مايقول ماتعدلت الى بعد اللي صار

اشكرك على اهتمامك

انا فعلا مو كاسر قلبي غير الاولاد .. استغفر الله كارهة الطفل اللي حامل فيه قبل لا يجي .. و اتمنى حقيقة انه يطيح و يموت و لا يجي لهالدنيا .. اقول طفلين بياكلونها بهالزواج الخربان كاااافي

لدرجة في حملي هذا الشهر الرابع عديته ما تابعت و لا متابعة ، و ما اتمنى يتم الحمل

هو عصبي .. و لما قلت ان حياتنا تحسنت بالفترة الاخيرة

تحسنت لما صرت اطنش كلامه و ما اتصادم وياه و كلامه المسيء ادخله من الادن اليمين و اطلعه من اليسار

هو ما تغير ابدا .. لساته عصبي و لساته لسانه وصخ و ما يحترمني

انا والله كارهته تماما لدرجة اني احاول اتأقلم في حال انه نفذ تهديده و اخذ مني العيال

اعرف ان مشكلتنا مافي حوار ابدااااااا ابدااااا من قبل ، و قالي سابقا اذا تحسين ما تقدرين تتكلمين معاي اكتبي لي وش يضايقك و اشترا لي دفتر صغير عشان اكتب له

و صرت اكتب له و الله وكيلك ما قراه و لا مرة ..

احنا ما نتحاور ابدا .. لذلك تتراكم المشاكل بشكل بشع

حتى اذا رجعنا مع بعض بعد خلاف ، نرجع بس القلوب مو صافية و لسه الجروح ما طابت

و هو عارف هالشي و ما يهتم له .. اهم شي ما احد يزعج دائرته المنطوية اللي فيها ماخذ راحته جوال و تلفزيون 24 ساعة

اما الانسانة اللي عايشة وياه ، مو مهمة مو لازم

انا وصلت لمرحلة الاكتفاء و انفجرت .. و ما عدت قادرة على تقبل اي شي اضافي

يؤرقني وضع اطفالي .. لو ما عندي اطفال ما ترددت لحظة اني اتركه

و لعله خير

بكل صراحة الاحظ فيك عناد وندية وقلت تصرف وهذا مايكرهه
الزوج في زوجتة
من خلال سردك للاحداث اشوفة انه ماهو مقصر
ولاهو راعي خيانات او مخدرات
وسلوكة مقدور علية اذا غيرتي استراتجية
التعامل معة ..ومعرفة نمطة مهم لاحداث
التغيير ....عموما ضعي سلبيات
واجيابيات الطلاق في ورقة وبعد ذلك قرري
عسى الله يوفقك

__________________
سبحان الله وبحمده سبحان الله العظيم

اختي الكريمة أشعر ما تعانيه ولكن

لدى صديق في العمل شخصيته قريبه من شخصية زوجك وزوجتي تعرف زوجته
وعندما يأتي الحديث عن الزوجات وما يعانيهم من هموم ترببه أبناءهم ومذاكراتهم لأبناءهم أراه يدافع بقوه على الزوجات وأنهم مظلومات وكنت اقول في نفسي لا اصدق ما يقوله لأنني أراه لا أحد يطيق الكلام معه لأنه عصبي جدا ومتقلب المزاج فيوما ما سألت زوجتي عن زوجته كيف متحملته فكانت تقول لزوجتي أن الزوجه هي مفتاح السعاده الزوجية مهما كانت طباع الزوج لا بد من مسايسته وتعطيه على قد جوه من أفعال وأقوال وان تحسس زوجها انه هو الكل في الكل فكانت تأخذ منه كل ما تريده بالكلمة الحلوه واللمسه الحنونه وتكبر رأس زوجها التي لا تستطيع أن تعيش بدون زوجها لدرجه ان زوجتي بدأت تطبق هذه السياسة التي تنجح بالفعل مع كل الأزواج

جربي هذه الطريقة وبإذن الله ستتحول حياتك الزوجية إلى نعيم

ودمتم في حفظ الرحمن

__________________
حبيبتي .... عندما تبتسمي الي سوف تنير كل النجوم التي في السماء

مع هذا الرد

أعتقد أن كل الكلام اللي كنت بقوله لقيته بالرد
اختي زوجك مو راعي خرابيط ولا حشيش
ينصبر عليه
داممه مو مستغفلك من ورا ظهرك بأشياء اذا كشفتيها تعطيك صدمة عمرك

طبعا انتي غلطانه ...لانك امراه
لازم مايكون لك كرامه ولا احساس

سهليها تسهل صعبيها تصعب المدار عليك انتِ زوجك ماعنده نية طلاق والا كان طلقك من زمان ، دائماً الملامه تكون على الاحكم من الازواج فإذا هو انسان على غير قدر المسئوليه فيجب هنا تدخل الزوجه بالحكمه وتحل مشكلتها واذا الزوجه سفيهه فيجب على الزوج الحكمه ومعالجة الامور برويه ، المدار كله على من هو الاحكم من بين الازواج لعلك تكوني انتِ الاحكم ...!

__________________
رَبِّ أَعِنِّي وَلَا تُعِنْ عَلَيَّ، وَانْصُرْنِي وَلَا تَنْصُرْ عَلَيَّ، وَامْكُرْ لِي وَلَا تَمْكُرْ عَلَيَّ، وَاهْدِنِي وَيَسِّرِ الهُدَى إِلَيَّ، وَانْصُرْنِي عَلَى مَنْ بَغَى عَلَيَّ، رَبِّ اجْعَلْنِي لَكَ شَكَّارًا، لَكَ ذَكَّارًا، لَكَ رَهَّابًا، لَكَ مِطْوَاعًا، إِلَيْكَ مُخْبِتًا قَلْبِي

طيب واذا طبع
اذا شخص طبعه نكدي والكل ينفر منه
اخلاقه ماهي حسنه
كيف تتحمل الزوجه
انا مو اقول تتطلق
لكن عطوها حلول عمليه
هل تتجنب وتتحاشاه طول عمرها