حبوب مقويه جنسيه مع الخيانه ياسلام
السلام عليكم
بعد طول غياب عليكم , كنت اظن فيها ان زوجي رجع لي مثل الاول, وترك عشيقته المفتون بها جداجدا,مع انها ما تسوا!وحس بقيمه بيته واطفاله الحلوين, وكرس وقته لعمله وبيته ولمستقبلنا كما يقول, اكتشف انه قبل شهرين يختلق معي مشكله جدا تافهه بعد قدومه من العمل وعلى الغداء ونحن لا نتحدث حتى اليوم هذا ملخص لها:
هو:الان انتي اجمل من اول ما اخذتك..
انا:بالعكس اول انا احلى بسبب التعب والسهر والاطفال والولاده
هو:بالعكس انا اشوفج الحين احلى,الي يعيشون مع بعض ما يقدر يشوف الي جدامه كبر او صغر لان كل يوم يشوفه.
انا:صح كلامك.
هو:الي يطلع بره وشوف بنات صغار والوان ولبس واجسام وحلوين دائما يقارنهم بزوجته,الي كل يوم يشوفها,ويبدء بالمقارنه, ويبدء يكره زوجته وبالتالي يخون.
انا: صح كلامك يبدأ يقارن ولكن ليس سبب للخيانه!
هو:لذالك الحجاب هو الفاصل.
انا:الحجاب شعليه؟
هو:هذي نظريتي ,وانا كنت اكتبها واقولها حق الشباب ,نفسج جذي كانو يستغربون.
انا:شلون؟الحجاب ماله شغل بالخيانه.
هو:لو يطبق شرع الله كله عدل والبنات كلهم يتحجبون جان الريال مايطالع بره وبالتالي ما يقارن زوجته في باجي الحريم ويكتشف ان في احسن واحلى منهاوبالتالي ما يخون.
انا:بس هذا مو منطق,يمكن له دور بس مو شرط انه السبب الاساسي للخيانه وهم ممكن زوجته وايد زينه واحسن من الي بره,وهم يخربط,حبيبي البنات بره مثل الكاكاو المغلف كل وحده شكل ولون ما تدري شنو تاخذ,وبعدين تنصدم بالي داخل,
هو:صح كلامج.
وانتا شنو من هالنظريه؟
هو:انا مو مثلهم انا غير.
انا:شلون غير وانتا الي مألف هالنظريه اكيد مار عليك جذي وشفت وقمت تقارن!
هو:اهني تثبتيلي ان عقلج صغير.
انا:لا بس بعرف انتا شلون غير, يعني ما تطالع اذا مر احد يمك؟
هو:لا ما اطالع,اصلا انا اذا طلعت ولدي(ولده من طليقته عمره11 سنه)معاي بالسوق , وابي اروح الحمام ,اطلعه من الالعاب عشان يمشي معاي استحي امشي بروحي.
انا:وليش تمشي بروحك حبيبي, انا قتلك اطلع معاكم بس انتا رافظ.
هو:انتي عارفه ليش وانا قايلج السبب(انه يبي ولده ياخذ راحته بالطلعه ويحس ان الجو حقه بروحه)
انا:اه ه ه ه .... كنت احلم بوايد اشياء للاسف ما تحققت( قصدي ان نعيش اسره وحده ) .
هو:صح كلامج اتصدقين, انا بعد ولا شي من احلامي حققتها وانا لما تزوجتج انصدمت انج مو الزوجه الي احلم فيها وولا شي حققته معاج ولا راح احقق شي,وانتي بس واجهه اجتماعيه جدام الناس,اييب منج عيال ومستقر وعندي بيت ناجح,وعلي فكره البيت بالنسبه لي مثل الفندق بس اكل وانام واطلع وانتي بالنسبه لي ولا شي.
انا:انتا شقاعد تقول؟؟؟
هو:مو انتي ما حققتي احلامج ؟حتى انا ما حققت ولا راح احقق معاج شي.
انا:ما سالتني ولا خليتني اكمل وقول شنو احلامي؟!!
هو:مو مهم اعرف ولا ابي اسال,المهم مابينا شي غير ان احنا اسم زوج وزوجته جدام الناس بس مو عايش حياتي بالبيت حياتي بره القاها,على فكره ....ماعتقد راح اخليج تحققين شي وانا ما عطيتج ولا تنطرين اني بعطيج شي بالمستقبل.
انا:شنو يعني شقصدك؟( مصعوقه)
هو:كل شي.
انا: شنو هالاسلوب انا شقتلك؟؟انتا ماعطيتني فرصه اكمل كلامي!وطلعت الي بقلبك وانا ماقدر ارد عليك لاني مابي اكبر الموضوع وتصير مشكله.
هو:لا ختصير مشكله.. انا اعرف شلون اتصرف معاها.
انا:انتا طلعت اي بقلبك وما سمعت انا شنو قصدي؟ّ
هو: مو مهم اعرف قصدج ما تهميني.
انا:شفيك ياي من بره شايش علي.
هو:اي مشحون , وشبعان للاخر ومالي خلقج وبعدين انتي منو منو منو اصلا؟؟؟؟
انا:ما اعرفت ارد مع ان الفرق بالاصل والفصل بيني وبينه يفوق كل الحدود وطبعا العمر والشهاده والاخلاق الحمدلله وقلت:انا محد ! انا انسانه خلقها الله حالي حال البشر.خلاص روح بره انتا مو شبعان بره؟
هو:أيي بروحلها
انا:هذا مستواك لازم تنزل مو مكانك معاي , لازم تنزل بالمستوى الواطي مالها.
هو ليش ممكن هي ترفعني؟!
اوكي روح لها ليش قاعد عندي؟
هو: لا ما اروح لها انا ايبها اهني وفي بيتي هذا.
انا : تصدق انتا طلعت كل الي كنت حابسه بقلبك وتنطر اي فرصه عشان اطلعه.بس ماراح ارد عليك الا بكلمه وحده انتا خبيييييث.
هو:لا واذا تبيني اسمعج كلام اكثر اسمعج ترى عندي وايد واعصابي جدا هاديه
انا:ماراح ارد عليك.(وانا اغلي من الصدمه ومن الكلام)
هذا الحوار صارله شهرين , مصدومه جدا منه , واذبح فيني الاحساس والمشاعر اصبحت جامده وبائسه
خلصت جميع الحلول, هو بختصار مازال يخون , ويحبها وانا فعلا مجرد واجهه,رغم كل هذا لا اريد ان اكرهه واريد حياه مستقره وزواج طبيعي وليس مثالي حتى تمشي الحياه بسلام ولاحافظ على صحتي ليس من اجلي , بل لرعايه ابنائي .
بالمناسبه ...هذه بعض الدلائل على الخيانه وبعدها حلفت ان لا افتش في اغراضه حتى لا انصدم اكثر وبالتالي انهار:
مكياج على الملابس.
حبوب مقويه جنسيه.(مع انه هاجرني )
تاخر حتى منتصف اليل.
واشياء اخرى احسها من خطواته...لاني احبه وللاسف هو اخر من يحس فيني.
21-06-2007, 02:16 PM
ضوابط المشاركة
العرض العادي
