03-09-2010, 09:59 AM
طفشت منها ومن دلعها ومن تدخل أهلها!! ابي حل رجاء رجاء
03-09-2010, 11:59 AM
|
المشاركة الأصلية كتبت بواسطة غير مروق
السلام عليكم ورحمة الله وبركاته مدري من وين ابتدي انا متزوج من 5 أشهر وزوجتي حامل والان بالشهر الرابع البنت وحيدة امها وعندي احساس ان كل شي تقوله لها اسرار أو اي شي عني وذالك الاحساس جاء من مواقف سأذكرها بالبداية انا مدلع البنت اخر دلع وموفر لها كل شي وماعمري قلت لا طبعا بالمعقول. المهم ببداية الحمل البنت وديتها عند اهلها يوم من الايام ولما طلعت من الدوام رديتها معي البنت اشوفها بدت تلمح عن موضوع الوحم وانا مطنش ادخل مني واطلع مني قلت توكلي على الله واللي بيصير بنرضى فيه لكن مع الايام كل فتره تكرر لي الموضوع وانه انا اخاف ياأكرهك أو اكره بيتنا وفي كل هالحالتين انا بروح بيت اهلي !! طبعا برضاك << عجيب والله كأنها تمهد الطريق !! المهم مليتها انا سيرة قلت يامعوده اللي بيصير بنرضى فيه صار اللي صار ذاك اليوم رجعت من الدوام وهيا بالبيت تغدينا سوا ويوم جيت باخذ قيلولة قالت لي اشم ريحه كريهه تفقع الراس قلت تعوذي من ابليس ماأشم انا!! قالت مو قادرة اتحمل ومدري كيف قلت انا بنام وذا صحيت يصير خير قالت لا مقدر اتحمل قلت خلاص لاقمت يصير خير قمت من الغفوة قالت لي انا رجعت (أي طلعت الله يكرمكم )وجتني دوخة << قلت بنفسي ياسبحان الله امداها تتوحم في بيتها وتكره ريحته لسا قبل كم ساعه مافيها شي << انا شك ان هذي تعليمات امها عشان البنت ترتاح ببيت اهلها ولاتكرف في الطبخ والشغل مع اني انا مو قصر ابد أغلب اكلنا من برا!! المهم انا قلت اوكي راح اوديك كم يوم ترتاحين لأني ماقدرت اتحمل ونينها!! بعد كم يوم قلت يالله ارجعي لبيتك قالت لا مأبي حتى ذكر سيرته اكرهها قلت قومي عاد ووريتها العين الحمراء وقالت اوكي نمنا ذيك الليله وهي متلثمه ومن بكرا الصباح صحتني قبل الفجر انا اغمى علي بالصالة مارضى يجيني النوم ودني بيت اهلي الله يخليك مو قادرة اتحمل!! قلت لاحول ولاوة الابالله يالله اوديك صليت الفجر ووديتها دقت علي امها قالت البنت تعبانة ومو قادرة تتحمل خلها عندنا الى مايروح عنها قلت الشكوى لله اوكي نصبر ونتحمل انا في قلبي حاس ان هناك تمثيلية سخيفه من الام عشان تريح بنتها وتضمن انو الجنين مايكون في خطر وكل هذا على حساب مين على حساب زوجها اللمسكين اللي هو أنا ايه انا اللي كرهت الحمل من فعايلهم والله واضح ان الموضوع تمثيل والدليل قبل الوحم وهي تلمح لي يافيك يافي البيت << يعني سبحان الله ماقالت في شي ثاني يعني في كل الحالتين انا رايحه بيت اهلي!! المهم وديتها بيت اهلها وبيتي الاجار يمشي على الهواء والشمس واللحين مر 3 شهور عالموضوع قبل اسبوع كلمتها وقلت لها يابنت الناس خلاص المفروض اللحين وصلتي لمرحله تتحملين وتضغطين على نفسك لأن المعروف ان الوحم يخف دايم في نهاية الشهر الرابع على حسب معلوماتي لكن البنت قالت يوه ماأقدر والله مو قادرة اتحمل قلت طيب البيت حل الاجار 6 شهور الثانية ولازم ادفع وحرام ادفع وانتي مافي امل تسكنين معاي وخصوصا انها ملمحه ان هذا الوحم ممكن يمتد للولادة !!! لأن قريبه لها ماراح منها الا بعد الولادة !! وأنا وش عرفني بقريبتك وعن مصداقيتك بالموضوع!! انا مابينت لها اي شي أو انا شاك في مصداقيتها بس ضغطت عليها انا ترجع عشان ادفع الجزء الثاني من الاجار ونعيش حالنا حال اي عرسان!!!! قالت لا والله مو قادرة قلت يعني ماأدفع وأفك كل الأثاث وأحطه في بيت أهلي في المستودع قالت ايه!! ليش تتخسر وتدفع وحنا مو ساكنين فيه<<< افى والله عليها من زوجة مافي اي تضحية!! قلت خلاص اوكي << انا طاوعتها ولاأقدر اغصبها بس كل خوفي والله على الجنين وخاصة انها تقول اغمى علي يوم اغصبها ذاك اليوم!! مادري والله بديت اشك بمصداقيتها!! فكرت فكرت قلت خلاااص اوووكي حليتها قالت وشو الحل قلت خلاص بستأجر شقه ثانية وأنقل الأثاث وانتهت المشكله قالت هاه والله ماأدري قلت انتي فكري انا الليحن بروح لدوام اكلمك لاطلعت يوم طلعت من الدوام اتصلت فيها وقلت لها ها فكرتي قالت ايه تصدق عاد ماينفع ننقل لشقه ثانيه انا عصبت قلللت ليه؟؟ قالت لأن الريحه بعد بنفس الأثاث!! والله ياناس انها طلعت كل شاطيني ولو هي قدامي وقتها عطيتها طراق<< عارف انه تخطيط امها تعوذت من ابليس وسكت شوي وقلت اها خلاص انا بفك الاغراض ولما تخف معك او بعد حتى لو بعد النفاس مافرقت معي ببين لها اني خلاص طفشت لأن هذا العذر أثبت لي انها كذابة هي وأمها وان الموضوع مافيه اي وحم كله كذب بكذب والمبرر الوحيد اللي هو انها تريح ببيت اهلها لاكرف ولاطبخ لين مايثبت الحمل او لين ماتولد !!! انا مابينت ابدا لها اني مو مصدقها مشيت الموضوع والله ياناس اني احترق بنفسي انا اللي ماتهنيت ككوني عريس ولا اللي تهنيت بالحمل واني اكون قريب منه !! دقيت عليها قبل 5 ايام وجلسنا نسولف بسوالف ومن ضمن السوالف قلت لها يعني خلاص مافي امل افك الاثاث الاسبوع الجاي قالت ايه ايش اسوي هذا من الله وغصب علي << مادري عنك والله قلت لها حرام عليك المفروض توقفين مع زوجك اللي بتخسر من جديد وبيدور من جديد وزي ماتعرفين تدوير السكن هم مو سهل انتي لازم تضغطين على نفسك انا طبيعة عملي متعبه ولا في وقت لراحه فكيف بتفرغ ادور بعدين والله شغله << بغينا نستقر بهالزواج انعلينا !!! المهم قالت والله انا ابغى لكن هذا من الله مو قادره!! قلت طيب يالله في امان الله انا بتسحر بيذن الفجر صكينا وانا متضايق عالاخر ماتسحرت ذيك الليلة اذن الفجر واتصل فيني عمي (ابوها) جالس ينافخ <<< سلااامات وين الاحترام وين !! يقول انت بينك وبين بنتي شي؟ قلت اييييش لا ليش قال هيا اغمي عليها اللحين وانا بالمستشفى قلت وش وش وش مستشفى لسا انا مصكر منها مافيها الا العافية قال اشوف اذا صحت وأتأكد بنفسي قلت ياعم وش قصدك يعني انا مسوي لها شي ؟ قفل الخط بوجهي واأقوم انا وأركب السيارة وطيران لبيتهم قسم بالله ياناس اني بغيت اموت بحادث كنت طاير ربك ستر الحمدالله وصلت لبيتهم في ضرف 5 دقائق دقيت عليه يعطيني مشغول وكل شوي اكرر الاتصال رد علي قال وش تبي قلت انت وينك بأي مستشفى قال هاه ليييه؟ قلت انا عند باب بيتك ياعم بأي مستشفى قلي قال ماعليك مالك دخل انا اتولاها والله ماتطب المستشفى قلت كيف هذي زوجتي بأي مستشفى ى ى ى قال خلاص اكلمك بعدين وصك بوجهي الخط دقيت على امها ردت علي قلت انا عند الباب وين بنتك بأي مستشفى قالت انت عند البيت وش جابك قلت حلوه وش جابك زوجتي تقولون مغمى عليها جاي طاير بتطمن عليها قالت هاه انا مادري بأي مستشفى بس ابوها بالطريق لا لا هذا هو يفتح القراج ايه ايه خلاص رجعوا من المستشفى انا قلت اها خلاص طيب مع السلامه والله ياناس انا واقف عند الباب ماشفته يدخل بسيارته << يعني شوفوا قمه الكذب والتمثيل وأصلا من بداية اتصاله الى لحظة اصكرها من امها بالضبط 14 دقيقه واقرب مستشفى لهم 10 دقائق رايح و10 جاي غير الكشف والتمريض !! يعني ماتدش العقل هالسالفة انا والله ماقلت لهم شي ولا قلت كذابين اتصل فيني عمي على طول قال انا رجعت من المستشفى والبنت اللحين نايمه فوق << ياسبحان الله !! قلت افتح لي الباب بدخل قال لا ماراح تدخل << انا عارف انهم خايفين ينفضحون والبنت برضوا خايفه قلت بدخل بالغصب ماتسوى روعتي جاي من بيتي طيران وأخرتها تقولي ارجع قال طيب وهو معصب بعد الصلاة تدخل !! << ههه على بال ماتتجهز البنت بالتمثيل عجيب والله قلت امري لله وصليت بجنبه على طوول دخلت بعد الصلاة على زوجتي منزلينها تحت بجنبها امها اول ماجيت عندها البنت مررره خايفه وترتجف على طول لمست قلبها اوقسم بالله يرجف رجف من الخوف مني اكشفها هم ماتوقعوا اني اجي الهدف كما استنتجت من هذي التمثيلية << انه انا يازوجها لازم تعرف ان البنت حامض على بوزك تزعلها وان زعلتها تراها ماتتحمل وعلى طول يغمى عليها هههه اي والله شر البلية مايضحك والله ياجماعة ان البنت مبين عليها تمثل التعب قلت ياعم ايش اسم المستشفى قال خلاص هوا تحقيق!! قلت هدي ليه معصب ويمسك بنته ويصارخ بوجهها بيخوفني قال يابنت هاه اتكلمي رجلك سوا لك شي اتكلمي مسكت يده قلت ياعم يعني اذا انا سويت شي بتهاوشتي << يقلع ابو الاسلوب الهمجي قال ايه بهاوشك قلت وليه تهاوشني مشاكلنا نحلها سوا وهذا اصلا اذا فيه مشكله اصلا انا مو عارف انا مزعلها ولا لا!! قلت طيب ايش قالوا لها عطوها مغذي شي قال لا لا وهو يتلعثم قالوا هيا حامل مايصلح يعطونها شي ههه عجيب امرك!! قلت يالله انا اترخص وراي دوام ولازم انام والبنت الحمدالله مافيها شي طلعت من بيتهم وقلت قسم اوريهم ويا هذا التمثيل اللي ماأدري ايش راح يجنون منه مايدرون ان هذي الحركات كرهتني ببنتهم وممكن توصل لطلاق عند البعض !! لفيت كل المستشفيات القريبه منهم عشان ماأظلمهم كلهم يقولون لا مامر علينا حالة طارئه في هالوقت!! والى يومكم هذا البنت ماتصلت فيني ولا اي مسج 5 ايام ولا ألو ولا مسج انا عرفت اخبارها من اختي مافيها الا العافية لكن هيا تتغلى وتضن اني ماأقدر اعيش يوم بدونها !! فعلا هي المفروض تفهم كذا لأني انا طايح فيها اتصالات وسوالف واشتقت لك ومقدر اعيش بدونك صدق الحريم اذا عطيتهم وجه ركبوا عليك واذا عطيتهم قفى لحقوك!! انا من طلعت منهم وقلت بنفسي ماراح اتصل فيها راح اادبها على الكذبه اللي سوتها وفعلا انا الان اتبين لي انا تكذب بالوحم وبالتعب هذا لكن هنا السؤال ليه تسوي فيني كذا؟ وليه اهلها يسوون كذا؟؟ هل هو مثلا فرض شخصية للأسف الزواج شركة تتكللها الشراكة الصادقه مو مسألة كل يفرض شخصيته عالثاني!! انا الان ماوضحت لها اني عارف انهم يكذبون أنهم ماراحوا للمستشفى قلت ماراح اصارحها فيها الا لما أأدبها ماراح تسمع صوتي ان شاء الله شهر وعمي اذا اتصل راح اقول له اني عارف انك مارحت للمستشفى وانت ليه تسوي كذا ايش الهدف يعني ووين الاحترام والتقدير وكيف بتتخيل شخص يقدر بنتك وانت ماقدرته ترفع صوتك علي وتهاوش وتتهمني انت ماتعرف ايش مصير البنت اللي اهلها يتدخلون بمشاكلها سواء صغيرة ام كبيرة؟؟ مصيرها تربض في بيتك وتكون علك بحلقك!! راح اقوله كل هالكلام لأن خلاص مو قادر اتحمل... والبنت انا راح اادبها ولما ترجع بيتي راح اشد في التعامل كافي دلع << صدق بنات هاليومين الدلع يخربهم !!!عجيب والله انتم ايش رايكم عارف طولت لكن ارجوكم ابي رأي سديد ابي اعرف ايش الحل كيف اوقف اهلها عند حدهم ومايتدخلون بحياتنا الشخصية وكيف اقع البنت ماتقول كل شي لأمها ؟؟ مع العلم دايم اقولها في فترة الملكة انا وياك لما نطلع من البيت اخبارنا وعلومنا ببير وكانت مره مقتنعه لكن مالحل ارجوكم ابي حل مقنع وحكيم؟؟؟ اوخوكم/ غير مروق |
03-09-2010, 12:52 PM
03-09-2010, 01:36 PM
03-09-2010, 02:08 PM
03-09-2010, 02:15 PM
|
المشاركة الأصلية كتبت بواسطة غير مروق
ياعم الدلع والتعب سهل التفريق بينهم
انا ماأقول مافي تعب انسان ينخلق جوا مو سهله ترى لكن ياكثر الحريم اللي بيدها طفل عمره سنه وهي حامل فوق كذا قايمة بحقوق زوجها !! |
03-09-2010, 02:22 PM
03-09-2010, 02:29 PM
|
المشاركة الأصلية كتبت بواسطة غير مروق
الحل وانا اخوك ادوره منكم
بس مسألة طول بالك هذي مفروغ منها انا مطول بالي عالاخر رغم كل اللي صار للحين مانطقت ببنت شفه ووضحت لهم |
03-09-2010, 05:04 PM
03-09-2010, 05:23 PM
| مواقع النشر |
ضوابط المشاركة
|
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك
BB code متاحة
الابتسامات متاحة
كود [IMG] متاحة
كود HTML معطلة
|
العرض العادي
