السلام عليكم والعشر عليكم مباركه
الله يتقبل منا ومنكم صالح الأعمال


طبعا مشكلتي الأزليه مع زوجي وبعده واهماله العاطفي
، ماحس اني بظيف موضوع جديد
نفس مشكلتي الأزليه نفس الشخص اللي تزوجته من ست سنوات الى الان
ماتغير ! لو انه كان حلو وتغير برضى بالقليل الجميل اللي عشته معاه لكن لا اول ولا الان
💔 قد قلت له لو معيشني شهر حلو زي الارادم راح احفظه واتذكره طول عمري لكن انتا غير غير عن كل البشر عن كل النماذج عن كل امنياتي بالزوج والحياه
انا عايشه الدنيا وملذتها كلها ببيت اهلي ماكان ينقصني سوا شريك حبيب زوج واحساس عاطفي ، كنت قبل اكتب شعر عن الحب ومن تزوجت حتى الكتابه ماتت داخلي مالي نفس ابد ماتت احلامي معاه مافي اي اضافه سوا البنتين اللي جوني منه والمشاكل والهموم ،
هو يبيني آله ماتحس جماد جدار ، الشيء الوحيد اللي منفذه من واجبات الزوج النفقه بس بس خلاص مليت تعبت اول كنت اتمشكل الان تبلدت مت منه ماقدر اغصبه ماقدر اغيره ، مشكلتي صرت افكر بالطلاق هالتفكير هد حيلي لما كرهت زوجي تماما او جالسه اتمرن على اني اكرهه مو معقوله زوج مايقر ببيته زوج يفطر عالاستراحه مايرجع الا السحور او بعد السحور وكل يوم عذر مو معقوله اعيش مع شبح زوج اسم زوج ، انا واجهه اجتماعيه حتى بناته مايدري عنهم ولا يحس فيهم والله انهم متعلقين ب اهلي واخواني اكثر منه ويحبونهم اكثر لانه اب وزوج مع وقف التنفيذ حياته برا البيت رمضان شعبان شوال اي شهر بالدنيا منظم جدوله انو يكون برا ولو انجبر وجلس على جواله يلعب انا جماد ، عارفه البعض بيحط فيني السبب قسم بالله اني انسانه بسيطه احلامي بسيطه ابي لمة اسره ابي زوجي معاي بالبيت ابي نضحك ونسولف سوا ابي اذا تقهوين اتقهوى مع ادمي مو مع التي في ولا الجوال انا مو من النوع اللي اطلب لانه اصلا موفر لي ماديا كل شيء فما اطلب، حتى طلعات وروحات اعرف انها تزعله ف اطلع مع سواق اهلي ابيه هو ابي يحس بهالادميه اللي عنده ، حتى بالسفر لازم نسافر لدوله فيها مقاهي شيشه ولازم يطلع اربع خمس ساعات وانا مقابله الجدران بالاوتيل واذا رجع على جواله ، يأدي واجب حياته معاي يأدي واجب عشان يسكتني مو من قلبه هالامور لما كرهت السفر والمطاعم والحياه لما اطلع مع اخواني لمطعم واشوف زوجين تخنقني العبره ماقدر اكمل فرحتي لما اطلع لمول مع امي واشوف زوج يختار لزوجته انكتم ماحسد احد الله يهني الجميع بس انا فاقده هالامور وهو عندي لو اني مطلقه كان قلت امر الله بس موجود اللي قادر يسد عيني وقلبي بس لا حياة لمن تنادي ، اذا زعلت ورحت بيت اهلي كذب علي بكلمتين واصدقه وارجع لاني ماسمع هالكلمتين ابد ، وهو يبيني عشان اغسل واكوي وانظف ناقشته صريح مايفهم او يستغبي مدري عنه لكن كيف تجبر شخص على انو يحبك يهتم فيك ماتقدر ، بعد عيد الاضحى عندي دراسه وراح اشغل نفسي عنه بس لمتى لمتى اتوظف عشان ادعس احلامي بالزوج الحنون العطوف الرحوم لمتى اهرب من دوره لدبلوم لمتى صارت فعلا حياتي هروب من الواقع انا مادري طمنوني قولو كل المتزوجين كذا مهملين زوجاتهم عاطفيا وجنسيا خلوني ارتاح شوي واشيل الاماني اللي رافضه تموت بقلبي ، دايم اسأله ليش متزوج مايرد انا مابيه يقابلني 24 ساعه ابي لو يوم بالاسبوع لي راضيه لو ساعتين باليوم لي راضيه بس ماعندك احد ، ومو صغير عشان يكون بهالشكل المهمل لاسرته لا عمره 36 او 37 ماتوقع اقدر اغيره ابد بس اقدر اتركه وهالشيء اللي معشعش بمخي بس مادري متى راح تكون لحظة التنفيذ ، صبر جميل والله المستعان

__________________
أستغفر الله العظيم واتوب اليه

الله يعينك ياأختي .. والله ماأدري وش أقولك .. بس أتوقع لازم تقتنعي بوضعك خلاص وش تسوي اقل شيء عشان بناتك .. وادعي له .. واشغلي نفسك بدراستك .. بأهلك .. بأي شيء .. لازم واحد منكم يتغير ويتنازل عشان تستمر حياتكم زي ماتبي .. ياهو يتعدل ويصير زي ماتبين .. او انتي تصحين من هالاحلام اللي رسمتيها لحياتك وتعيشي الواقع المر اللي عايشته حاليا .. وإلا ستتعبين كثير حبيبتي .. الله يفرج همك يارب .. دايم ادعي إن ربي يرده لك ويسخره لك ..

ولا اتخذي موقف منه إذا ممكن يجيب هالحل فائدة ويتغير ..

__________________
اللهم أسألك أن تحقق لي ماأتمناه عاجلا غير آجل .. وأن تحقق لأختي "المنسية" راحة وسكينة وعافية ..

__________________

لحظه لحظه واذا تطلقتي تضنين ان ضرر الطلاق بيكون عليك بس
اكيد بناتك بينضررون معاك
زوجك عايش حياته بطول والعرض وانتي طيب ؟؟؟
مسألة انك معلقه سعادتك بزوجك غلط وأكبر غلط
لنفسك عليك حق بناتك محتاجينك انتبهي لنفسك لايجيك المرض
من الهم والنكد حتى وانتي تتكتبين موضوعك واضح انك حزينه
ليه طيب
اهلك صديقاتك بناتك امك وين راحو
ليش ماسحه الكل من القائمه ومخليه حياتك بس زوجك
تعوذي من ابليس واتركي سالفه الطلاق عن جمب
مثل ماهم عايش حياته بطول والعرض انتي ليه حارمه نفسك
اطلعي مع صديقاتك خواتك يااختي ترا الحياة بتعيشها مره وحده
لاتنكدين على نفسك وترا بناتك بحاجه لك

__________________
استغفر الله وأتوب إليه

اختي هل يعاني زوجك من ضعف جنسي ؟

فرج الله همك وسخر لك زوجك
انا اعاني مثل ماتعاني اختي الفرق انه حتى النفقه تكاد معدومه ويمن علي على القليل الذي يقدمه لي تركت زوجي سنه ووعدني واعترف بغلطه وتقصيره ورجعت له وكل وعوده كذب وصار اخس من أول وكل مناقشته يقول أنا تربيت كذا جاف مااحب اعبر ولااتكلم مع أنه قبل وعدني انه يتغير

أستغرب الردود اللي تقول عيشي لنفسك.
ليش تزوجت طيب ما دامت تبغى تعيش لنفسها!!!؟

ليه هو يتزوج ما دام راح يهملها كذا.
صح ان بينهم أطفال ولكن الاهمال صعب على الأنثى وكثير نساء يصبحن فريسة سهلة لأي عابر بسبب اهمال الزوج وانغماسه في عالمه الخاص .

جربي أن تتكلمين معه بهدوء وحنان
اطلبي منه يخبرك بسبب اهماله لك
ربما لديه سبب وجيه- لنقل يراه هو من وجهة نظره وجيها

في سوق الاسهم المالية
اذا اتجه السوق للطريق الخطأ يأتي وقت لابد من هزة عنيفة لتصحيح مسارة وقد تكون هذه الهزة مؤلمة للمتعاملين بالسوق ويلحق بسببها خسارة لهم
في وضعك الحالي لابد من اتخاذ موقف قوي من جانبك ليستيقط زوجك من نومه وانتي تحددين نوع وطريقة هذا الموقف لانك الاقرب لزوجك ومايناسبه من تصرف..السكوت عنه قد يظن ان تصرفاته صحيحة..لعلمك الكثير من الازواج للاسف يتصرفون نفس تصرف زوجك لجهلهم باحتياج الانثى العاطفي ظناً منهم انها مثل الرجل باحتياجاتها والغريب في الامر انه مع هذه التصرفات فهو يحبها!

__________________

طعنة العدو تدمي الجسد،وطعنة الحبيب تدمي القلب

اتفقي معه ان لازم تشوفون بعض ساعتين في اليوم على الاقل مثلا

لست كغيري /
ست سنوات وانا احاول اتأقلم وعجزت ، والله يسعدك على دعواتك .

ابو مريم /

عن نفسه هو ماعنده اهل او احد حكيم من اهله زوجي منفصل عن اهله عنده اخوان واخوات مايعرف الا اشقاءه بس عنده تسع خوات ساكنين معانا بالرياض ومتأهلات وحريم كبار بالعمر ماقد جاب لي طاريهم وربي ماعرف حتى اسمائهم ، لانهم مو شقيقات وعلاقته بالاشقاء سطحيه ماحسه يحبهم او يعنون له ( امه بس اللي يحبها ، ادخل مين وهو قطوع ماحد يعرفه الناس يعرفون اخوه الكبير ( وهو رجل سيء العشره لزوجته ومطلقها بعد سته اطفال بالله ذا مستشار ومابيه يدخل نهائي ، وعندنا الشخص اللي بينا اللي هو ( خالي ) انا تزوجت عن طريق تقدم زوجي لخالي لان خالي يطلع ولد عم زوجي ، وخالي مافي منه حكيم وراقي ويخاف الله بس بخبرتي بزوجي بعد هالتدخل بتنتهي الحياه بيننا لانه يحب يكون بنظر اهلي الانسان الواو طبعا بدخل اهلي وخوالي بيطيح من عينهم بالتالي انتهت الحياه بينا وهو يشتغل مع خالي بنفس المستشفى ونفس التخصص الثنين بس خالي اعلى منه ، كل ماشاف خالي راح يتذكر انه طلعته حياته راح اتضرر انا ، اعرف زوجي يهمه يكون عند الرجال مافي منه انا منتظره التدخل هذا للطلاق عشان محد يلومني ليش تطلقت ويقولون والله ي زوجها ( رجال ) زي اعتقاد العالم كلهم عنه .


ظل الياسمين ،
هذي المشكله يمكن لو انطلقت للعالم هدأت من بحثي عنه او خدرت نفسي هالنقطه جابت لي المشاكل لما سكت ممنوع عنده صديقات وان شفتهم اكون رايحه لهم من بييت اهلي ، اما من بيتي يرفض واذا طلعني بعد زن ثلاث شهور اربعه شهور يوافق ويخليني ساعه يجلس تحت عند العماره ، ساعه مامداني افصخ عبايتي 💔 بس طلعاتي لازم معاه وماتجي هالطلعات الا بعد نق ومعاد صرت ابي اطلع معاه الطلعه معاه تجيب المرض منفس وزعلان ويهاوش عشان زحمة الرياض ويسكت بنتي اذا حكت طلعه مر زيه ، حتى اختي الكبيره بيتها وراي مايوديني لها اطلبه اذا طلع يحطني عندها يرفض فمالي الا الويكند ويكون لبيت اهلي بس لانه بعيد مره عن بيتي اظطر اجلس يومين مايمدي بهاليومين اروح للصديقات وغالبا جمعاتهم وسط الاسبوع الويكند مخصص للاهل 💔 خالاتي واقاربي اشوفهم الويكند مع امي ، على ان عندي امنيه سخيفه اتمنى ادخل لهم يوم يكون زوجي هو اللي موديني لهم 💔 دايم اندق بالكلام وذي وين رجلها يوديها ويجيبها وامي هي اللي ترد مرات تصرف مرات تقول شدخلكم بس تبقى اثر الكلمات بقلبي ماتروح

__________________
أستغفر الله العظيم واتوب اليه