بسم الله الرحمن الرحيم
حابة اطرح مشكلتي لعلي الاقي منك حل امشي فيه حياتي الباقية وراح احكيلكم من البداية عشان تستوعبو الوضع انا انسانة متزوجة من انسان اخته متزوجة اخوي اتمنى فهمتوني يعني ( اخ واخت اخذين اخ واخت ) في الاساس اخوي وزوجي كانو اعز اصحاب من ايام يدرسوا بالثانوي واتخرجو سوا ودخلو الجامعة سوا ونفس التخصص وحتى في السكن كانو مع بعض المهم انا اتزوجت اول قبل اخوي في بداية حياتنا كنا مبسوطين وطبعا زي أي حياة زوجية ما تخلى من المنغصات وطبيعي بالنسبة لاي زوج اكبر مشكلة تواجهه في حياته الزوجية وجود (حماه .عمة .ام الزوجة ) ما اخفيكم انو الوالدة متطلبة كتير احيان كنت اشوف الحق معاها واحيان لا وصار مشاكل كتير ايام الملكة وفرش البيت وعدت على الخير والكل نسيها الا طبعا زوجي مانساها وخلاها في قلبه
المهم خطبنا لاخوي اخته ومن يومها وحياتنا اتغيرت وصارت حياتي الزوجية تتاثر باصغر مشكلة اخته تمر فيها مع اخوي سواء فترة الملكة او حتى بعد الزواج والى هدا اليوم
زوجي انسان يحب اهله مررررة كتيررر ويبرهم وهدا الشي مرة كان عاجبني فيه وكنت اشجعه عليه بس صارت تاثر على حياتي بصورة سيئة جدا وراح ابينلكم كيف
نسيت ابينلكم انو زوجي البكر في عايلته وانا البنت الوحيدة في عايلتي ودي الشيئين اثرت كتير في مشكلنا زي ماحيبانلكم دحين
قبل سنتين في نفس هدا الشهر زوجة اخويا اللي هيا في نفس الوقت اخت زوجي طلبت الطلاق من اخوي وهو رفض فرفعت خلع عليه في المحكمة المهم في هديك الفترة كان اخوي كل ما يبغى يتفاهم مع ابو زوجته رفض وفوض امر البنت لاخوها اللي هو زوجي على اساس (انت اللي عرفتنا عالادمي دا يللا اتصرف معا ه انت (
طبعا صارت مشاكل كتير لها اول ولا لها اخر واتدخل من الطرفين الخوال وبدل ما تهدى الامور زادت الطين بلة االلي اتر عليا في هديك الفترة اولا انا كنت حامل في الشهر الخامس وطبعا عندي بنتي قبلها الكبيرة
من يوم بدات المشكلة دي وزوجي ما خلا ولا بقا في تجريح واهانات في اهلي وغير انو منع روحتي لهم وصبرت شهرين وقلت معليش الادمي له حق يزعل على اخته ولانه يعرف نقطة ضعف الوالدة في حبها الكبير لبنتي لانها اول حفيدة من بنتها الوحيدة حلف عليا انو لو بنتي دخلت بيت اهلي انا طالق زي ما قلتلكم اناصبرت الين خلاص ماعاد قدرت استحمل ورجعت عند اهلي وتركني انا وبنتي الين ولدت طبعا خلال هادي الفترة لسه مشكلة اخته قائمة ومشااااااكل لها اول مالها اخر بعدت ماولدت جاني استدعاء من المحكمة انو زوجي رافع دعوة على اهلي انهم مانعيني عنه رحت المحكمة وحطيت شروط وخلصنا ورجعت له
بعدها تقريبا بسنة اخته اتنازلت عن قضية الخلع ورجعت لاخويا
حتقولوا فين المشكلة
المشكلة اني من بعد مارجعت وانا حياتي سيئة اكتر من انها حلوة مع زوجي
اول شي سواه مارضي يعطيني مفتاح لبيتي
تاني شي حلف عليا بالطلاق انو اهلي ما يدخلوا بيتي
عزايم وزواجات وخرجات مع اهلك انسي (ماهمني كتير ))
العلاقة الزوجية بدات تختفي تدريجيا
اكتشفت انو له علاقات بالمسن لبنات من المنتديات ومن مجال عمله المشكلة متزوجات وعندهم عيال
طبعا اعلاقته باهلي مقطوعة نهايئا كان اذا شافهم في مكان ما يتنازل يسلم حتى لو كان بابا بس في الفترة الاخيرة صار يسلم عليه اذا شافه في الشارع
علاقته باخوي اللي هو كان صديقه اتقطعت برضه
المهم هادا كله انا استحملته وصبرت وقلت يابنت عشان بناتك وعادي عشت حياتي
الى ان جاء يوم الجمعة الماضي اتشاكل اخوي واخته والله يهديه ضربها كف وبعدها طلقها
طبعا انا هنا صارت حياتي عالمحك جا زوجي قلي قومي لمي اغراضك واغراض بنتك حوديكي بيت اهلك وتبريره انه نفسيتو تعبانة من الكشكلة واني لو قعدت في بيتي راح يظلمني ومن الكلام دا انا رفضت ومارضيت وهو اصر الين قمت بدات الم اغراضي بعدها بعشر دقايق قلي خلاص اجلسي ماراح اوديكي
لعب باعصابي لعب والله العظيم جنني صحيح بيننا كل دي المشاكل بس والله شاريته وشارية بيتي وراحتي وراحة بناتي ونار زوجي ولا جنه اهلي لاني جربت القعدة عند اهلي ايام المشكلة الاولى والله صعبه مهما اهلي شالوني ورزوني مو زي بيتك ومملكتك الخاصة
طبعا انا من الجمعة متوترة يوم السبت عدا على خير وطبعا كان اجازة خرج من يوم صحي ما رجع الا وجه الفجر والله ما كلمته قلت اكيد نفسيته ما تسمح ورغم كنت تعبانة وكنت طالبته علاج من الاسبوع اللي راح وما جابه وزاد عليا الوجع يومها ونمت وصحيت الاحد وانا متنرفزة منه ومن وضع بيتنا لمتى أي مشكلة لاخته ابوه يرمي الحمل عليه يعني معقولة ابوه ما همته حياتنا للدرجة دي
المهم اتناقرنا على شي بسيط صار يتطاول عليا بالكلام وعلى اهلي وطبعا مو اول مرة بس انا دايما اسكت ما ارد لكن يومها مع الوضع الزفت اللي عايشته صرت ارد عليه يسبني اسبه يدعي عليا ادعي عليه صحيح انا غلطانة بس والله ما قدرت استحمل المهم طلبته يوديني بيت اهلي مارضي في البداية لكن اصريت عليه ووجابني في النهاية
ورجعت لاهلي بعد سنتين في نفس الظروف وفي الشهر وانا نازلة من السيارة قلي انا مسامحك دنيا واخره واتنمى تسامحيني ومن الكلام دا انا ما رديت عليه وخرجت
وماني عارف هل انا غلطانة في خرجتي من بيتي ولا لا وهل ارجعله ولا لا علما هو ماطلقني ولا انا طلبت الطلاق محتارة مرة في اهلي ماما سعات تقولي لاترجعي وساعات تقولي بيتك بابا معارض الرجعة بس يقول امرك في يدك قرار راجع لك استشرت اخوي الكبير متزوج وقالي ارجعي
فمحتارة جدا ابغى اكبر عدد من الاراء سواء ذكور ولا اناث خصوصا الذكور
ولو انت مكان زوجي هل تصرفه صحيح في انحيازه لاخته ومشاكلها للدرجة دي
حتى لو بدعوة ولو في ظهر الغيب
اسفة طولت عليكم
28-03-2011, 04:18 AM
ضوابط المشاركة
العرض العادي
