السلام عليكم ورحمة الله وبركاته
بالله عليكم يا جماعة حد يقولة حاجة
أد اية انا قعدت منهارة الصبح وبعيط كتير وحسيت انى بجد تعبانة
بس مش قادرة خالص اقولة حاجة ( جايز من كتر ما اتكلمنا فى الموضوع وجايز لأنى كان نفسى أحل الموضوع بطريقة تانية أفضل بس حقيقى نفسيتى ما اتحملتش وجايز لأنه مش معقول مش واخد باله خااااااااالص ؟؟؟؟؟؟؟؟؟؟؟ )
فقررت انى احكيلكم انتو وانتو تقولوله بقى مرة
بالله عليكم يا جماعة هل طبيعى ان الانسان اول ما يصحى من النوم يروح على الكمبيوتر ولما يجوع يروح لمراته يقولها حضرى الاكل ويرجع للكمبيوتر ويروح ياكل بسرعة وقبل ما مراته تخلص أكلها يكون هو راح للكمبيوتر مرة تانية
وعلطول علطول علية باستثناء انه عاوز ياكل او ينام او يصلى الفرض او يدخل الحمام
حيث انه وهو بياكل يتفرج على الاخبار وقلتله كتير انت مازهقتش؟
هو الاساس بتاع الناس انها بتتفرج على التليفزيون واللا بيفتحوه بس يتسلو شوية؟
وقفلته بهزار قالى انا كدة هزعل رحت فتحته وقلتله طب انت اقفلة قالى طيب بس شيلى الاكل واعملى شاى الاول
رحت وعملت المواعين كمان وتوقعت انى هرجع الاقيه قافله بقى ذوق
فضل يتفرج علية وانا كنت هدخل جوة علطول مادام ماليش لازمة وهو كدة كدة بيتفرج بس قلت علشان مايبقاش له حجة اقعد شوية وقعدت شوية أخيط وفضل يتفرج رحت دخلت جوة بقى وانا على اخرى
دخلت انام ففضل يتفرج شوية وبعدين دخل زعلان انى ماقلتلوش قبل ما انام وهو كل مرة يدخل ينام من غير ما يقولى قلتلة اية دة اول مرة اعرف منك ان المفروض نقول لبعض قبل ما ننام؟
المهم قلقت حوالى الساعة 3 بليل وقلق هو بعدى بشوية بس لس نايمين على السرير
بعد شوية هو قام كنت بحسبة هيدخل الحمام ويرجع طلع راح يقعد على الكمبيوتر وحتى الساعة حوالى 10 صباحا قاعد علية باستثناء الصلاة والفطار اللى هو جة كل وشرب الشاى وراح بسرعة بسرعة على الكمبيوتر
المهم انه ملاحظ انى مش طبيعية
واللى ينقط انه ييجى يقولى مالك ما ردش او اقول مافيش وأحسبة هيقعد معايا بقى يراضينى
لا يروح يقعد على الكمبيوتر
مالك مفيش ويروح للكمبيوتر
مالك مفيش ويروح لكمبيوتر
وانا باين عليا انى معيطة ومدمعة ومتضايقة وهو بعد دة كلة الاهم طبعا عندة الكمبيوتر
بجد بجد حاجة تنقط
اة بيحبنى
واة سألنى كتير كتير مالك
وأة هو طيب
وأة انا بحبة
وأة انا متأكدة انه عايز ونفسة يرضينى ونفسة أكون سعيدة
بس هو بيحب الكمبيوتر وهوايته الالكترونيات والموبايل وهكذا
مشترك فى موقع على النت وعلطول ناس بيبعتولو حاجات ومشغول بيها جدا جدا وعلطول بيتفرج عليها ما بيزهقش
بجد بجد تعبت اوى النهاردة
كان نفسى اقولة لما بيسألنى مالك ان (( انا نفسى ارضيك بس مش قادرة
نفسى اعملك الكل زى ما تحب والنوم زى ما تحب والبيت انظفة زى ما تحب والهدوم اكويها زى ماتحب وممكن اقدر على كل دة
بس بجد اللى مش قادرة علية انى احسسك بعد دة كله انى سعيدة ومبسوطة انى عايشة لوحدى؟))
كنت ناوية بجد اقولة كدة ........... بس ماقدرتش اتكلم خالص خالص
بجد متضايقة اوى
بس والله الحمد لله ياجماعة بحبة وهو كمان بيحبنى وانا عارفة انه عايزنى ابقى راضية لكن ...............
والله احيانا بدعى على الكمبيوتر دة.........
بعتلو رسالة اول ما نزل على الشغل وفيها قلتله الله يسامحك
والله يدمر ال..........
كنت عايزة اكتب الكمبيوتر وبعدين افتكرت انه حتى قبل النوم يفضل ماسك الموبايل مش عارفة يعمل بيه اية وافتكرت التليفزيون ...........قلت هكتب اية واللا اية.......
هقولكم على حاجة............احنا قبل ما ننام احيانا بكون تعبانه اوى الا انى بفضل انى اقعد اتكلم معاه وبحب اكلمة اوى قبل ما ننام......... زى ما تقولو كدة لان دة الوقت الوحيد اللى ينفع اكلمة فية بدون حاجة تانية تشغلة
ولكنه للأسف............بيكون تعبان وعايز ينام
طب نتكلم امتى؟.............. بس كلام صافى بدون لا تليفزيون ولا موبايل ولا كمبيوتر.............قالى بعد الاكل
قلتلة والاخبار و.خلافة
المهم دة تقريبا كان امبارح او اول امبارح بالكتير
واديكو شفتو انه بيجرى على الكمبيوتر قبل ما انا حتى اخلص اكل و..قلتلة على الموضوع دة قبل كدة
ووحنا بناكل بيشغل التليفزيون وحاولت اقفلة لكن بدون جدوى
اعمل اية يا جماعة بالله عليكم
والله عارفة انه بيحبنى ............ لكن بقى الحب تضحية شوية........ دة حتى فيه حاجات تانية كان بيعملها علشانى علشان يرضينى ويسعدنى والحاجات دى ماكانتش بتسعدنى بقدر سعادتى باحساس انه بيعملها علشان يسعدنى
ومؤخرا بقى يختصر الوقت ومابقاش يعملها ........... اصل وقته ثمين؟
انصحونى وانصحوة بالله عليكم
خايفة اكون تماديت فى الكلام شوية علشان حالتى النفسية دلوقتى
لكن ادينى قلتلكم انى بحبة اوى الحمد لله وهو بيحبنى وبيحاول يرضينى بأنه كل شوية ييجى يسالنى مالك ويمشى
بس بصراحة دة بيغيظنى اكتر.....لان اللى متضايق دة اكيد عايز حد يفضل جمبة يخفف عنه وخصوصا لما يكون متضايق من كدة اصلا
مش مالك ويروح يقعد بمزاجة على الكمبيوتر ولا كأن فى واحدة جوة منهارة.....
مع ملاحظة ان الفترة الوحيدة اللى حسيت فيها انه ماشاء الله اتحسن اوى وفرحت الفترة اللى كان بيروح فيها الشغل كل يوم ويخلص الشغل هناك عالكمبيوتر فكان بيرجع زهقان منه
وهو حتى لاحظ كدة وقالى ان الميزة انه بيرجع من الشغل زهقان من الكمبيوتر وقلت انه خلاص قصد يبعد عنه شوية علشانى
لكن للأسف ظروف الشغل اتغيرت وبقى يخلص الشغل من البيت فبقت علطول علطول بقى حجة الشغل موجودة
انه بيروح علشان يشتغل وكتير بيقعد مش على الشغل وماتقولوليش انه صحى من النوم الساعة 4 الفجر جرى على الشغل
والمهم لما تيجى تلكلمة بقى...........مثلا قعد على النت عادى زى ما حب وانا مثلا نايمة او مشغولة فى المطبخ
وفى الوقت اللى انا قاعدة فية بقى...........هو بيشتغل بحيث ما أقدرش اكلمة
ممكن مايكونش دة اللى بيحصل اوى علشان ما افتريش علية يعنى ممكن ما يكونش قاصد
لكن انا حاسة ان دة اللى بيحصل حتى لو بدون عمد منه
شكرا ليكم ومعلش دوشتكم
بس بالله عليكم ادعولنا وانصحونا
وجزاكم الله كل خير
تم تعديل العنوان ليتضح المضمون
الإشراف