السلام عليكم
من تطلقت وانا حاسه بقهر والم وحسره
وراسي يلف بالف فكره
ادري انه قضاء وقدر وانه كتبه ربي ولو اجتمعوا العالم كلهم محد كان يقدر يوقف طلاقي لان ربي اكتبه
المهم اني هاليومين بديت الوم اخوي الكبير واحس فعلا اني يتيمه وماعندي سند
بقول لكم الموقف وقولوا رايكم
انا حصل خلاف بسيط بيني وبين طليقي وكنت مسافره عمره قبلها لانه قالي انه بالعمل عمله خفاره فقلت خلاص ماني قاعده بروحي بروح اسافر مع اهلي وقال اوكي عقبها يقول لي انه بيروح البر مع اصدقاءه فانصدمت قلت انا يوم قلت لك حاول تغير موعد الخفاره عشاني قلت صعب والحين قدرت تغيرها عقب ماضمنت اني اسافر مع اهلي واهلي كانوا حاجزين وخالصين واضطريت اني اكلف على اخوي الكبير واوديه يحجز لي لانه كان حاجز من مكتب بعيد المهم قبل السفره بليله يكلمني ويضحك وسوالف عادي بعدها بيوم كلمني معصب وانا من امس استخير ومش مرتاح قلت كلم اخوي لان هذي ثاني مره خلال شهرين يلوح بالطلاق رجعنا من السفر اتصل عليه مايرد عقب ماتاكد انا رجعنا اتصل على اخوي الكبير وقال بيض الله وجه اختك بس خلاص ماعاد ابغاها وكرهت الزواج وكرهت الشقه وابيك تواعدني بالمحكمه نطلق اخوي انصدم قال اهي مسويه شي قال لا قال مسافره معانا العمره بدون اذنك قال ابد انا سامح لها اخوي انصدم مره وقال بروح استفسر من اختي جا اخوي وجه اسود ومنصدم مره قالي فيه شي بينكم قلت له ابد كان يكلمني قبل السفر ويضحك وادعي لي فجاه قلب علي قال اخوي لاحول ولا قوة الا بالله المهم راح اخوي دق عليه ثاني يوم على طول يله متى نواعد المحكمه عصب اخوي وقال تدري مو انت الي ماعاد تبينا احنا الي ماعاد نبغاك وانا الي بدق عليك اواعدك بالمحكمه مهب انت وصار يدق على اخوي كثير واخوي ساحب عليه اتصل علي قال روحوي يله شيلي اغلااضك من الشقه قمت اقول له عندي شغل ومدرسه واختبارات ودوام استنى علي شوي صار ينافخ ويقول خلصيني كله هذا مايبغى يدفع اجار الشقه شهر قدام لانه يدفع كل شهر بشهر وقعدت اصيح ورحت الشقه عشان اشيل اغراضي لقيته شايل اغراضه كلها وتحطمت مره اختي اتصلت على اخته قالت انا مشغوله وماكنت فاضيه امه اتصلت على بيتهم ماترد وساحبه علينا وقالوا انها مسافره وطلع كذب هي الي شالت اغراض الشقه ابوه كان مسافر ماكلمه اخوي الا بعد فتره وقال وش اسوي الموضوع بين الولد وامه ولا انا كارهه انها تتطلق واحبها مره
بعد فتره قبل مايروح المحكمه كلمه اخوي الثاني قال ليه كذا وقال اسباب تافهه وسخيفه كتبها بموضوعي السابق
اخوي انصدم من هالاسباب وقال لو على كذا كلنا نطلق حريمنا اجل المهم صار يدق علي انا بالمحكمه الحين تعالي نتطلق قلت ترضاها اروح المحكمه قال تعالي خلينا نخلص واعطيك فلوس النفقه يبي يغريني بالطلاق قلت ماني ميته على النفقه وبتنازل عنها قال ازين بعد وانبسط مره وصار يكلم الموظف والموظف قرفان منه قال هي بتتنازل وش لازم تسوي قال لازم تجي المحكمه قال تعالي قلت مادخل محاكم يجيك اخوي
اتصلت على اخوي واخوي عصب وكلمه قال لاعاد تكلمها وش تروح المحكمه انا اجيك معاي توكيل اتصلت عليه من بكره ابكي ومنهاره وقلت له تكفى لا تطلقني توني عروس حرام كذا وبكيت وشهقت ولا هامه قال انتي الي تكفين اطلعي من حياتي وبيجك بلاغ من المحكمه قلت طلب اخير ابي اشوفك بكره ونتفاهم قال مافي تشوفيني بالمحكمه ونخلص وكلمته من بكره مايرد وساحب علي ويوم صار يوم المحكمه صار يدق علي يبغاني اجي المحكمه ومارديت عليه ومن بكره راح له اخوي وانهى الموضوع ويقول اخوي انه مبسوط وقاله بيض الله وجهك ولا نبي نفترق عشان مره قاله اخوي الا سود الله وجهك انت وهالمره تاج راسي وسحب وتخانق معاه

سؤالي تشوفون اخوي الكبير في بدايه المشكله غلط انه ماناده البيت وخذا وعطا معاه كان ممكن تنحل المشكله
لاني مره تاثرت من الطلاق ولا كان بودي اتطلق
احس اخوي كان موقفه سلبي ماناده وحاول يصلح
مدري احسني شايله على اخوي ولا تشوفون ان طليقي كان بايع بايع
شرايكم

ان شاء الله ربي يعوضك خير ..
هذي الجمله تشمل اشياء كثيرهـ وهي احلى جمله بالوجود ..

___

شوفـي كلنآ نعرف ان الاخ الكبير دايم يكون حساس وكرامتـه فوق كل شيء
ويحس ان خواته واخوانه كلهم برقبتــه .. ويكون جدي بزيادهـ
دايمآ الاخ الكبير له وضع خآص كلنآ نعرفهـ

فمآ بالك لو انه سمع مثل هالكلمه ( تعال خذ اختك ) ولا ( نتواعد بالمحكمه واطلقها )
اكيد بيعرف وقتهـا ان الموضوع كرامـه وجرح كبرياء .. بالنسبه له .. لانك اخته حبيبته عرضه وكرامته
طيب لو نقول ينسى نفسه ويفكر فيك ويكون انسان ( حكيم )
هل من الحكمـه انه يفاوض او يناقش انسان ماطلب النقاش ؟ وانسان بايع ؟
ايش يقوله ؟ ماباقي الا يقوله تكفى لا تطلقهـا ولا يترجاهـ وش السبب !!

وبالبدايه اخوك توقع انه لما يقوله حتى احنآ مانبغاك واوكي نتقابل بالمحكمه ..
انه بيوقفه عند حده وبيوريه وجهه الثاني .. وبيقوله هيه ترا عندنآ كرامه وهذي بنت رجال ..
ويمكن اخوك ماكان متاكد ان هالانسان بيطلق من جد وبأسرع وقت وبكل هالبرود ..
ولآآكن ما زال زوجك بااايع !!

لا تحزني نفسك ولا تلومي نفسك ولا اخوك .. تدري ليه ؟
لأن اسألي اي انسان بالمنتدى او اي انسان تعرفيه او ماتعرفيه .. وقولي له
اذا وصلت المرحله بين الرجل وزوجته إلى انه يقولهـا خذي اغراضك ويتصل على اخوهـا يقوله تعال المحكمه بطلق اختك
.. ومايهمه حزنك ودموعك .. ويقولك انتي الي ارجوك تطلعي من حياتي ..
اذا وصلت الامور لهالمرحله .. هل ينفع نقاش مع هذا الزوج ؟
هو غير راغب فيك كيف تفرضي نفسك عليه .. لو بقيتي معاه بيقلب حياتك جحيم
.. اذا لم يكن حب وألفه فالحياه تصبح جحيم ..

صعب صعب صعب تعيشي مع انسان مايبغاك !!!

واخوك بالعكس موقفه روعه .. حفظ كرامتك لأخخر لحظه ..
النساء عاطفيات .. كنتي بحاجه لموقف رجولي ..
واخوك ماقصر اختصر الموضوع .. وماخلاك تعرضي نفسك لاهانه وترجي ..
وشاف بعينه وعرف ان هالانسان بايعك ومايبغاك ..
وهو كمان قاله احنآ بايعينك ومانبغاك ..
هذا الرد الطبيعي والي يتطلب شجاعه .. وهذا الرد المفترض ..

ولا تفكري ان اخوك اذا حط راسه ع المخده مايفكر فيك !!
والله انه يفكر ويعيد مشاهد واحداث كثيره ..
ويمكن السؤال الي انتي طرحتيه .. هو يسأله لنفسه كل يوم ..
ويقول انآ اخطأت او تسرعت !!
ولآكن اعتقد انه سرعان مايرجع لقوتهـ وحكمته ويقول الي سويته هو الصح !!

لا تفتحي هالموضوع لانه لن يعاقب اخووووك لو اخطأ
ولن يرجع زوجك
ولن ولن ولن ..
بل بالعكس ربمآ تخسري اخآك .. بعد ان خسرتي زوجك !!
لا تجعلي الاحزان والهموم تسيطر على عقلك وتبدأ بإعطائك الاوامر السلبيه
اعتزي بكرامتك وكبريائك لانه هو الحل الاخيـر الذي ليس لديك سوآهـ

السلام عليكم ورحمة الله تعالى وبركاته

أختي متفائلة خير
مافعله اخوكِ هو عين العقل وعين الكرامة والكبرياء ، بل ان كل مافعله لأجلك أنتي ، ومن اجل كرامتكِ وكبريائك ، ولو أن كل رجل كان في مكان أخيكِ لـ فعل مثل مافعل ، فلا تلومي اخوكِ ولاتتحاملي علية ف والله ان مافعله هو من اجلك انتي لا من اجلة.

طليقك عديم المروءة والنخوة والرجولة كان يضمر نية الطلاق في نفسة ولم يجد الأسباب الحقيقية التي تعينه على هذه الخطوة ف لما احس بذلك أختصر طريق الخساسة ووضع تلك الاسباب الواهية البسيطة التي تحدثتي عنها سابقاً متذرعاً بها الطلاق.

صدقيني بأن السعادة الحقيقية في حياتك لم يحن وقتها بعد ، وبأنها خيرة من الله ، وبما أنها إرادة الله ف لاتلومي نفسك ولاتلومي أخاكِ ، وبما أن معرفك يدعوا للتفاؤل ك ما هو مُعرفي وبما أنكِ تتنفسين الهواء ف أبحثي عن مصدرة!! وانا هنا أدعوكِ للحياة ، ف الحياة والله ليست رجل!! بل الحياة هي عمل نتوصل به إلى إرضاء الله وإرضاء أنفسنا وسعادتنا.

يوجد لي أبنة عم بمثل قصتك ، كانت تعتقد بأنها تحب طليقها حباً جما ، وتمرضت وإنهارت من بعدةِ ، وكل يوم وهي في مستشفى من كثرة الأعياء والتفكير ، فلما انقضت الأيام ودارت الشهور أتاها رجلُ وخطبها ووافقت وتم الزواج ، ومن ذلك الزواج تغيرت حياتها كُلياً ، ومع طيب زوجها الجديد وصفاته الطيبة أحبته حُباً لم تحبه لبشر إلى أن أكتشفت مع تلك الأيام أن حبها لطليقها كان وهماً وكان فقط مجرد حاجة لوجود رجُلٍ في حياتها ، وهاهي سعيدة الآن وعندها ولدان وتعيش كما تعيش باقي المتزوجات.

ف هوني عليكِ يا اختي وقولي الحمدلله ، وقدر الله وماشاء الله فعل ، تلك حكمة لاتعرفين الآن ماهي فوائدها ، وستعلمينها في القريب العاجل إن شاء الله ، وكما قلت في ردودي عن الطلاق!! الطلاق سُنهُ فرضها الله ليفصل الخبيث عن الطيب والطيب عن الخبيث ، ليكافئ الطيب بالطيب ، ويعاقب الخبيث بالخبيث ، ف كوني على ثقة بأن الطيب سيأتيكِ ولو بعد حين!! فقط الصبر.

عيشي حياتكِ كما كنتِ تعيشينها ، ولاعليك من نظرة المجتمع ، ولا من شفقتة ، ف المطلقة كما باقي النساء تماماً ولاتفرق عنهن شيئاً ، ولو كانت تفرق لما تزوج نبينا الكريم إلا الأبكار !!

كل التقدير.

__________________
استغفر الله واتوب إليه

جزاكم الله خيرا

باختصار حاولي الا يأخذك التفكير السلبي فيما تم لك سابقاً ان تأخذي اخوك بجريرة طليقك
طليقك كان بايع بايع.. وهذي لها اسباب في نفسه وقد تعلمين بعضها او لا .. لكن النية موجودة
وهذه النية فيما يبدو لي اكبر من ان يُحَاول معه كي يتراجع.. فلا تلومي اخوك اي واحد بموقفه بيسوي مثله


زاوية نظرك للحياة ضيقة جداً يأخذ منها طليقك الجانب الاكبر من تفكيرك..
حاولي ان تري الحياة من زوايا اخرى اكبر وافضل والرزق من رب العالمين

__________________
ان انت اكرمت الكريم ملكته.. وان انت اكرمت اللئيم تمردَ!!

زوجك اكيد علي علاقه مع واحده اخري وحابب يتخلص من زواجكم ؟ ده واضح كوضوح الشمس في كبد السماء ؟ لا تنظري الي الخلف ولكن انظري الي الامام ؟ قدر الله وما شاء فعل ؟ هو الخسران - خسران قلب كان بيخلص له -وخسران الموده والرحمه وعشرت سنين الزواج ؟في مثل مصري بيقول اللي باعك بيعوه..ولا تبكي علييه..

حسبي الله على كل من يلعب ببنات الناس

تحية مني لاخوك و الله رجال ينسند فيه الظهر
ما خلى فرصة لواحد بايع علشان يساوم موقفه موقف رجل مسؤول له خبرة بلي يريد العمار و الي ناوي على الخراب
الله يرزقك انسان يقدر قيمتك و يحترمك و يخاف عليك

كرري دوما اللهم اجرني في مصيبتي واخلف لي خيرا منها
طليقك كان بائع اختي فلاتندمي على مافات لانه لن ينفعك بشيء بل سيزيدك حزنا
الطلاق وقع وانتهى الامر فماذا سيفيدك خطا اخيك من صحته ولن يغير هذا شيء
اسال الله الكريم ان يرزقك زوج صالح خير من طليقك تجدين فيه سعادتك وكل ماتتمنين انه على كل شيء قدير

__________________
اللَّهُمَّ إِنَّا نَسْأَلُكَ نُفُوساً مُطْمَئِنَّةً تُؤْمِنُ بِلِقَائِكَ، وَتَقْنَعُ بِعَطَائِكَ، وَتَرْضَى بِقَضَائِكَ.

امين الله يعوضهي