السلام عليكم ورحمة الله وبركاتة
ماخاب من استشار ،،
عندي مشكله الا وهي انني تزوجت قبل أربع سنوات وفي وقت الملكه فهمت زوجتي ان أمي بتعيش معنا باذن الله وبنقل عملي من جدة الى ديرتي ونستقر هناك طبعا أمي مريضه نفسياً لدرجة انها تهرب من البيت ووسواس قهري وماتنام الا قليل وسكر عسى الله يشفيها وفي نفس الوقت طيبه وماتغلط على احد ،، المهم زوجتي ماعندها مشكله متفهمه الوضع وقالت امك معنا باذن الله ،، دارت الايام وتزوجنا وطلعنا خارج المملكة لشهر العسل ،، وللاسف بدت المشاكل بيننا ،، وللامانه اللي يبدى المشاكل هي على سبيل المثال أول مشكله صارت نمت لين الساعه 9 الصباح تقريباً وصحيت وقلت تجهزي بنطلع مع شوية كلام معسول طبعا هي صاحيه قبلي ونومها خفيف شوي المهم ماردت ومكشره قلت عادي بتدلع شوي وترضى والله وطلعنا واحاول الطف الجو وقعدت الى الليل زعلانه ؟؟ ولاترد ولاتعطيني وجه وفي الاساس لاحظت منها عدم احترام لي ولاتقدير واستعلاء غير طبيعي .. والزبده صعب ارضائها والمصيبه تزعل من لاشيئ هذي السالفه غيض من فيض استمرينا على نفس الموال شهر العسل كله احاول اراضيها مع اني ماسويت شي وهي تقعد يوم او يومين زعلانه ثم ترضى شوي وتدور مشكله ثانيه ،،،( للامانه تحطمت وصار اغلب وقتي نوم ) ورجعنا من شهر العسل رحنا لديرتنا وسكنا مع أمي في بيت أبوي الله يرحمه البيت صغير .. المهم تعاملها مع امي فيه استعلاء ولاتعطيها وجه للاسف .. مع الوقت استاجرت بيت ونقلنا له وقلت بجيب أمي ،.،.، قالت والله ماتدخل بيتي ابغى استقلاليه ،،! معي أخ اكبر مني ومتزوج فهمته ياخذ أمي فتره بسيطه بحكم توني متزوج قال لا ماباخذها تخرب بيتي ؟؟ طبعا هو من زمان للاسف مايهتم فيها ولايدور لها ،، طبعاً ما انكر ان كان بيني وبين زوجتي لحظات جميله تنعد على الاصابع ،،
وديتها لاهلها عشان حلفها ماتدخل امي بيتها وطلقت وجلست فترة واستخرت ورجعتها قلت يمكن تتعدل الامور ورجعت مثل اول واردى مع اني والله العظيم طيب معها لابعد درجة رغم الظروف النفسيه اللي أمر بها ولدرجة انها تتحكم فيني احيانا بقمة قلة الادب وواضح عليها انها مشحونه من بداية الزواج خليه يسمع كلامك ومن ذا القبيل وكل مشكلة تصير تكلم اهلها سوى كذا وكذا واكبر همها السفيرات والطلعات لدرجة اني اطلعها شبه يوميا في اول سنه زواج واذا قعدت يومين في البيت مصيبه عندها ويوم استقرينا بدت بمشكله جديدة تقول لازم ننقل من ديرتك وكل يوم تعيد نفس السالفة وتسبب مشاكل .... واللي خلاني اتمسك فيها الى الان يوم كثرت المشاكل عرضت عليه نروح لشيخ يقرأ رحنا والصدمه اني طلعت انا تعبان والحمد لله على كل حال وتعب شديد جدا لان من يوم خطبت تغير وضعي ضيق في الصدر 24 ساعه وخمول ووسوسه ..الخ مع الوقت صار يجيني نفور منها ولا اتقبلها ومع ذلك اضغط على نفسي واجامل .. انا الآن عرضت مشكلتي بتفاصيلها ودي تعيشون واقعي وادور حل ولا انسى اني قلت بسوي بيت جنب أمي ووافقت واليوم الثاني قلبت عليه وحلفت ماتسكن هناك ... انا غير مستقر أمي في بيت وانا في بيت ووضعها صعب وهي للان ماتدري بالمشاكل اللي بيني وبين زوجتي .. مع العلم لم يحصل حمل الى الحين
وانا الحين موسوس جدا مادري هل المرض اللي مسبب المشاكل ولا هذا شي واقعي عذراً على الاطاله
تم تعديل العنوان ليتناسب مع مضمون الموضوع