السلام عليكم،،،


مساء النور او صباح الخير،،،

اريد ان اخذ رايكم بموضوع بسيط،،،


انا كتبت كتابي على بنت من جماعتنا قبل شهرين و الزواج ان شاء الله خلال 8 الى 10 شهور،،،

عندنا عادات ان البنت ما تتكلم و لا تشوف خطيبها قبل الزواج ابداً "الا يوم الملكة وقت ما تعطيها الشبكة" و بس !!!


المهم الموضوع ان امي كانت عند اهل خطيبتي قبل فترة ما ادري شنو قالت امي لهم بالضبط بس
هي تقول اهل البنت ما عندهم مانع اني اكلم البنت بحكم ان علاقتي معاهم جيدة جدا و واثقين فيني
كثير و قالت على كيفك اذا تبغى تكلمها او لا ؟؟


انا مثل اي شاب ابغى اتمتع شوي بالفترة و اكلمها ووو بس خائف من اشياء كثيرة بس اهمها اني
اخاف المكالمات تاثر على اول ايام زوجنا يعني نكون وقتها عرفنا بعض ووو ما فيه عندنا شي جديد
و بكذا تقل متعة اول ايام الزواج،،


و بعد انا معروف بالعائلة بأني متمسك بالعادات و التقاليد و كل الناس تعرف اخلاقي و تحترمني و
اخاف لو فعلاً اطلب اني اكلمها ان تقل قيمتي شوي و و تقول خطيبتي و اهلها وين الثقل و وو و
يعني بأثر على احترام زوجتي لي بالمستقبل،،،



عموما انا ما رديت لهم خبر الى الان و الموضوع بصراحة يعتمد علي اذا ابغى او لا،،،

ابغى رايكم عندي حق بالمخاوف او لا ؟

تحياتي للجميع،،،

وعليكم السلام
بالعكس اخوي شي جميل انه تكلم خطيبتك في هالفترة خصوصا انكم مملكين
وما اقصد جميل من ناحية متعة هالفترة وبس بالعككس هالمكالمات بتفيدكم بأشياء كثير
ولاتشيل هم انه بتخلص سواليفكم
بتتغير نوعيتها ممكن لكن تخلص مستحييييييييييييل الحكي ما ينتهي وكل فترة لها سواليفها ووناستها
الملكة لها جوها واول الزواج جو ثاني وسوالف ثانيه
يكفيك ان هالمكالمات بتزيح كثير من التوتر من خطيبتك بحكم انها انثى وانت رجل بخلاف لو ما كلمتها وقابلتها بتصير سالفتها سالفه باول ايام الزواج وبيكون الحمل عليك ثقيل عشان تشيل الحاجز بينكم

لكن بهالفترة تكونون رايقين وعلى هداوة تخف الحواجز وتتأكدون من ارياحتكم لبعض

ومن ناحية ان العائلة يحترمونك وبينتقدونك بهالفعله المفروض هالشي ما تلفت له دامه ما يخالف الشرع وبالعكس هي زوجتك حلالك وانت حلالها ليه تحرمون نفسكم عشان الناس
وبإمكانك ماتعلم الناس اساسا ماله داعي يعرفون ! هذا شي خاص بينكم

ومسألة احترامها لك ما له اي اثر بالمكالمات الاحترام يجي من اسلوب التعامل واسلوب الحوار مو بحق من حقوقك وحقوقها

اتمنى لك التوفيق والسعادة

وعليكم السلام ورحمة الله وبركاته ..
مرحباً بك أيها الأستاذ الفاضـل ..
أسأل الله أن يُبارك لكما ويجمع بينكما بخير ..
بالعكس عادي جداً وجميل التعارف ويكون ببساطة ..فلايؤثر مادام ضمن الحدود المتعارفة ..
ووفقك الله لكل خير ..

يعطيك العافية أختي حيرة منطقية،،،

انا ادري السوالف ما راح تخلص بس أقصد أن المتعة في بداية الزواج ان نتعرف على بعض و كل شي جديد بالنسبة
لنا بس اتوقع بس مو متأكد انو لو تكلمنا مع بعض في هذه الفترة راح تقل المتعة في اول ايام الزواج و نكون عارفين
بعض ما فيه شي جديد.


و النقطة الثاية أكيد ما أحد راح يعرف بس انا اقصد خطيبتي نفسها لانه حسب ما تقول لاخواتي انها مبسوطة جدا
اني شخص جدي و ثقيل حبتين وهي تحب هذه الصفة و اخاف يعني اضيع هذا الشي بطلبي اني
اكلمها و بصراحة اخاف تحس انها طيرت عقلي وو و انتي بنت و تعرفينهم اكثر مني.


و الله يعطيك الف عافية و باتطار ردك الله يخليك.

بالعكس بتزيد المتعه اول الزواج
لان بتكونين شوي كاسرين خاجز الخجل
احسن ماتكون مستحيه ومتضايقه طول الوقت

بداية انت حط لك مبادئ في مكالماتك معاها حتى ما تخف المتعة
يعني مثلا لا تكون مثل الي يكلمون يوميا وبالساعات <ماتعجبني هالحركة لانه فعلا بتخلص السوالف الحلوة وتبعد الرسمية من العلاقة خصوصا انها في بدايتها
خليك مرة مرتين بالاسبوع على ربع ساعه او نص بالكثير حسب الموضوع الي تتناقشون فيه

زياراتك مثلا مرة كل شهر وما تتجاوز ربع ساعه

الحوارات خليها في دراستها ووظيفتك وعن تجهيزاتكم للزواج وبيتكم وسوالف بسيطة

اذا التزمتوا بهالاشياء اكيد ماراح تتعمقون لاتدخلون بسرد ذكرياتكم ومواقف حياتكم هذي لها وقتها بعدين

ولا تفتحون لنفسكم مجال ان كل واحد فيكم يتكلم عن شخصيته لانه مستحيل يصف نفسه بالطريقة السليمة وبيدخلكم في مواضيع انتوا في غنى عنها


ومن ناحية انها معجبة بثقلك وجديتك انا وجهة نظري ان الثقل يكون بانتقاء المواضيع والتصرفات في مكانها المناسب وان الواحد ما يخوض في التفاصيل من البداية
والجدية هي انك تكون عند كلمتك لما توعد بشي وتكون صاحب مسئولية ومهتم بعملك ومواعيدك

اما المكالمات فمثل ما قلت لك اذا حددتها بنقاط ما تتجاوزها ماراح تأثر على جديتك وثقلك

وما ادر عن راي خطيبتك لكن انا ما اشوف ان مكالمات خطيبي لي تنقص من جديته او ثقله لانه ملتزم بالحدود وبالعكس تعجبني فكرة المكالمات وما ارضى اتزوج بدونها تخيل فجأه من بيت اهلي اطلع اعيش مع واحد ما اعرف الا شكله !! مررة صعبة

الله يعطيك الف الف عافية و فعلاً كلامك صحيح و ينطبق ما راح يكون فيه مشاكل،،،

بس خائف خطيبتي تكون طريقة تفكيرها غيرك و هنا المشكلة يعني تصير تبغى تعرف اكثر و اكثر و تنشب لي
مكالمات ليل و نهار و وقتها لو نهرتها راح تزعل ووو و تاخذ فكرة سيئة عني و اذا تركتها على كيفها خرب كل
شي علشان كذا انا محتار،،،

و بالنسبة للزيارات ما فيه امل و لا اي زيارة لو نص دقيقة

عموما الله يعطيك العافية و بنتظار المزيد من وجهات النظر،،

اكيد الحياء راح يكون أقل بس خايف الشي يزيد عن حده و نصير باول ايام الزواج كنا عايشين من سنين
مع بعض و لا كنه شي جديد علينا و هنا تقل المتعة بصراحة خصوصا اول ايام الزواج احس لها شي
مميز و لازم تكون وناسة بإذن الله هذا الشي اللي محيرني،،،

الله يجزاك كل خير أختي الكريمة،،

اخي نصيحة شيل العادات و التقاليد
شوف الحلال و الحرام
شرعا هذه زوجتك
من حقها عليك انو يكون في مكالمات بينكم و غزل و دلع و هدايا لا تحرمها هالفرحة
هذه الفترة لا تكرر و لا تعوض
وولا تخاف مافي شي يقتل اول ايام الزواج لانو اول ايام الزواج بكون كل شي جديد انكم بتصيرون ببيت واحد
تاكلون مع بعض تنامون علا سرير واحد .. تبلس. اشيا عمرها ما لبستها و انت عمرك ما شفتهايعني كل مرحلة ليها خصوصية معينة
توكل علا الله و تكلم معها و عيشو هالفترة الحلوة و تعرفو علا بعض