السلام عليكم ..
كل مشاكلي انحلت بفضل الله ثم مساعدتكم لي .. واليوم جايتكم بحيره مابي اظلم زوجي وبنفس الوقت مقدر اسيطر على تفكيري ..

الحمدلله انا ولدت من عشرين يوم تقريبا .. وقبل اولد بأيام جلست عند اهلي وبعد ماولدت جلست 12 يوم اول مره نغيب عن بعض اسبوعين وكم يوم.. وبعدها طلب مني ارجع اكمل نفاسي عنده .. بالبدايه رفضت بس بعدين وافقت لانه احتاس من بعدي و دوامه تغير وصار يداوم دوامين ورجعت عشانه .. كل وقته شغل او عالجوال او مع بنته مع ان توها مولوده بس يحب يجلس معاها .. انا ماعطاني وقت ابد والفرصه الوحيده هي لما نبي ننام .. اول ليله رجعت كان طبيعي باسني وحضني ونومني بحضنه بس بعد ساعات تغير وثاني يوم كل ماقرب له يبعد ويعطيني ظهره ومرت ايام بدون لمسه كنت احاول واتقرب له و ابوسه بس ماااشوف ردة فعل .. الحين صرت ابعد عنه بعد و انام بعيييد عنه .. ولما بحثت بالنت لقيت اغلب المشاكل يقولوا كشفت زوجي خاين عشان كذا مايقرب لي واللي تقول لقيت بجسمه علامات والخ .. صرت ادقق بجسمه و اسئله كل ماشفت شي وش هذا وهو يجاوب حساسيه وبدا يدور الشك ببالي وقلت لازم اسئله وكل ما احاول اسئل يكون يمزح خلص كبرنا او يقول ماعاد ابيك خلص المهم جبتي هالبنت ماعاد لك فايده وكذا .. اليوم كلمني بشكل جد وقال شيلي الوساوس من راسك ترى والله مافي شي منهم وانا كذا بسبب الضغوط النفسيه وظروف الشغل ومسؤولية البنت والخ قلت اللي اعرفه ان الرجال يقرب لزوجته عشان ينسى همومه و ظروفه قال لا كل رجال يختلف وانا هذا طبعي ...
---- يعني معقوله فيه كذا ؟؟ وش رايكم انتوا ؟ وكيف اتصرف ؟ لأني بفترة نفاس ومابي اطلع الاربعين وهذا حاله

ممم يعني انت لساتك نفاس حتى ماكملت شهر 🙂
طالما اهلك موجودين تريحي عندهم لين يشتد ظهرك وتتعافي لاحقه عليه 🙂

اذا مشغول و مو رومانسي معناها لازم تفتشي وراه و تفترضي الخيانة ؟؟؟؟؟
مصدومة فيك و كيف افترضت انه بخونك لا و بتسألي كمان على العلامات الي بجسمه
انا ما فهمت شو هي علامات الخيانة ؟ حبوب مثلا؟؟
يا اختي هي الوساوس من الشيطان اطرديها
في الف سبب حتى زوجك يبعد عنك
بلكي شاغل باله مشكلة مادية او مشكلة بالشغل او مو حابب يقرب منك لأني هالشي بثيره و انتي بفترة نفاس اصلا
بلكي انتي مو متحممة و طالعة ريحتك او اكلة بصل و توم و مو مفرشية اسنانك هههه مزحة طبعا
انا قصدي انه في كتير اسباب ممكن تخلي الزوج يلف للطرف التاني و ينام صارحيه و الاهم بالمصارحة ما يكون في اي اتهام

__________________
.
.

استودعتك أهلي في سوريا يا من لا تضيع ودائعه

انا غلطتي اني بحثت بالنت وشفت مشاكل الناس .. وحتى لو انا نفاس محافظة على نظافتي الحمدلله ومو بس اني نفاس معناه ابعد عنه 40 يوم بالعكس حلو نبقى قريبين من بعض .. وفكرت كمان ان ممكن لان هالشي يثيره وخاصه ان زوجي مايقدر يمنع نفسه حتى بأيام الحمل جاني نزيف والدكتوره قالت ابعدوا عن الجماع ومن وصلنا البيت جاني واحاول امنعه وماقدرت .. بس هو يقووول ان السبب الضغوط النفسيه و دوامه الجديد مع المسؤوليه الجديده وكذا ..

بالنسبه ان ليه ماكملت عند اهلي .. لان هو طلب وضغط علي وصارت مشكله وماحبيت اكبرها

الحمد لله على سلامتك والله يبارك لكم في البنوتة ويرزقكم برها وصلاحها

عزيزتي عندك سببين أقوى من بعض في التغير اللي شايفته
اولا أنتِ باقي نفاس + المسؤولية الجديدة لزوجك ودوامه الاضافي

هذي كفيلة انها تخلي زوجك مشغول ذهنيا لفترة قد تطول وقد تقصر
حسب تأقلمه مع المتغيرات الجديدة في حياته ..
لو انك مخلصه نفاس ولاحظتي امر يثير شكوكك ، نقول ممكن فيه شي

تعوذي من ابليس ولا تخلين الوسواس الزايد يخرب عليك ، واضح ان زوجك ما تكلم
معاك بصراحة الا هو لاحظ انك موسوسة بزيادة..
ولو عنده اي خرابيط ماكان أصر انك ترجعين تكملين النفاس في بيتك
بالعكس فرصة انك مو موجودة في البيت عشان ياخذ راحته ..

__________________
ما يكتبه الله لنا ألطف مما نُحب ..وأعظم مما نطلب ..وألطف مما نشاء ..


[IMG]http://im67.***********/mg87DX.gif[/IMG]

سحابه .. الله يسلمك ويبارك فيك ..

والله حتى انا فكرت كذا قلت لو يلعب او مرتاح بغيابي ماكان رجعني كان تركني عشان ياخذ راحته .. حتى انا علي ضغوط و عندي مسؤولية مولودتي وانتوا عارفين هالتعب وخاصه بفترة الاربعين وكمان رجعت عشانه عشان اهتم بأكله وشربه ودوامه وملابسه والخ لان لما كنت عند اهلي صار يغيب او يتأخر عن دوامه .. رجعت وانا بالنفاس ولما رجعت عانيت بأول يومين والحمدلله بعد اليومين تعدل كل شي ونظمت له مثل قبل .. بس اللي انصدمت منه تصرفه ويقول ضغوط نفسيه.. انا خايفه انه يبقى كذا لبعد الاربعين ما احب اعوده على بعادي .. بس السؤال اللي يدور ببالي معقوله ضغوط نفسيه تسوي كذا ؟

ياحبيبة يا ريتاج هههههههه والله السالفه مافي ابسط منها
على كلامك زوجك يبيك يحبك والدليل يبيك تجينه مايبيك تكملين النفاس عند اهلك
اللي انا صراحة استنتجته وبكل بساطة انه يـــبـــيـــــك لكنه مايقدر يجيك ! فهمتي؟
يعني ممكن تقربك له واحضانك وبوساتك تزيده رغبة وهيجان فهو يبيك تبعدين
وثانيا لاتنسين انك نفاااااااس !!!
ترا هرموناتك منحاسة حوس يعني حتى تفكيرك ومشاعرك مو على طبيعتها
لاتفكرين بهالامور واذا كنتي كذا بتوسوسين على زوجك المفروض مارجعتي للبيت بدري
لان لساتك بكرية واول نفاس لك , اقلها خذتي خبرة فيه بعدها رحتي
لان اغلب اللي ينفسون في بيتهم لهم اسبابهم زي اطفالهم والمدارس وبيوتهم كبار وهكذا اقلها صبرتي شهر !
لكن اللحين مو هذا موضوعنا
اهم شي اللحين تركزين عليه انك تعتنين بنفسك وتغذي وكلي زين
وطبقي امور النفاس كلها , عشان ترجعين له عرررووس من جديد
وانسي من مخك مسألة خيانه وماخيانه انتي معه قدام عيونه كيف يخونك!
ماافي اسباب ابدا , لو كل واحد يخون عشان زوجته بنفاس رحنا فيها كلنا
لاتحطينها مقاييس , وفعلا يمكن امور خارجية برا بيته هي اللي مخليته مشوش
خصوصا ان وضع بيته الان تغير , يعني عطيه وقت يتأقلم ولاتشيلين هم
بيجي يوم يرجعلك , عطيه بس مساحة لاتلصقين , اهتمي بنفسك ووبنتك
من جد مو وقت تشيلين هم اشياء مو موجودة انتي حاليا وبنتك اهم حاجة
لحد ماترجع عافيتك بعدها سوي اللي تبين لان حتى مشاعرك الان وتفكيرك رح يتغير
والف الف مبروك والحمدلله على سلامتك ومبروك ماجاك
وسعي صدرك باميرتك الصغيرة وانسي الهم

ابعدي عن الوسواس
دوامين والله ضغط على الرجال

__________________
يا رب خاتمة حســنة ، وزلفى ، وحسن مآب ..

اختي بعض الرجال حساسون جدا من النفاس،، ويزيد هذه الحساسية ماقد يسمعونه حولهم عن هذا الأمر... وبعض الحريم فعلا فعلا يأكدون تلك الأفكار بحيث شكلهم ولبسهم ونظافتهم وحتى مشيتهم مزعجين للنفس...

انتبهي لكل التفاصيل.. لازم الغسيل يوميا، اذا كنتي ترضعين فالحليب ماشاء الله يصير يقطر من صدرك اذا تأخرني عن ارضاع طفلك او ما صحى بالليل، هناك دوائر قطنية خاصة لها الأمر بحيث تمتص الحليب وبالتالي مايصير فيك بقع أو حموضة تنفر الزوج منك..

كذلك الفوط الصحية الي تستعملين انتبهي لكيفية وضعها ربما زوجك لما كنتي نايمة شاف شي ضيق صدره..

ضاعفي جرعة النظافة وحاولي تلبسي لبس جميل مثل الايام العادية، ابتعدي عن بيجامات النفساء الي تسد النفس صدقيني بعض الرجال يتحسسون من النفاس فلا تخلي أي شي يأكد تلك الأفكار....

ولاتفكريه يخونك او اي شي اهتمي بنفسك اضعاف مضاعفة فقط.

__________________
{قُلْ يَا عِبَادِيَ الَّذِينَ أَسْرَفُوا عَلَى أَنفُسِهِمْ لا تَقْنَطُوا مِن رَّحْمَةِ اللَّهِ إِنَّ اللَّهَ يَغْفِرُ الذُّنُوبَ جَمِيعًا إِنَّهُ هُوَ الْغَفُورُ الرَّحِيمُ}

صدق الله العظيم

ههههههه كلنا نوسوس وتخرب نفسيتنا مع النفاس عشان تغير الهرمونات ..
لا تشيلي هم الموضوع عادي وعند اغلب المتزوجات .. اختي بعد حملها الاول نفس المشكله وكانت تقول ليش وايش فيه تغير ومن ذا الكلام بعد النفاس بدأ يرجع تدريجيا .. وفي ولادته الثانيه نفس الشي ..
ف اتوقع طبيعي بس عشان انت نفاس ومايقدر يقرب منك .. انبسطي وتدلعي وزبطي نفسك وامورك وبيتك واضحكي وفرفشي وتفرجو افلام ووو حبه حبه بيرجع ...

__________________
لاتسعى لتصحيح ظن احد بك ££ خالقك ينظر لقلبك وهذا يكفيك