‏زوجي سافر أربع شهور للدعوة إلى الله قبل السفر قلت له خليك معايا لين اولد رفض وقال ايش أسويلك ‏اولدك انا ولا ايش و لازم نضحي عشان الدين وبعدين انت مو أول وآخر وحده تولد !!!

راح وما فكر فيني وهذي مو أول مره يسويها فيني هذي المرة الثانية قبل كم يوم اتصل عليا ‏وقال انه راجع بعد شهرين قلت له لا ترجع ما أبغاك و اللي بينا انتهى قال نحنا ترا اتفقنا ولما آجي تمشين معايا ‏وخلك من هالحركات تراك منتي صغيرة قلت له انا مااتفقت معاك انت سويت اللي براسك ولا فكرت فيني حتى بالسكن مااخترت رايي تسوي كل شيء ع كيفك خلاص روح ولا اشوفك مرا ثانيه
بإختصار أنا ماني عارفه ايش أسوي !! افكر لما يجي مااروح معاه وأعطيه الاطفال الصغار واخلي الرضيع عندي وأقعد عند أهلي أربع شهور بحجة إني بعد ابغى اخرج في سبيل الله مثله و اخذ لي فترة نقاهه اربع شهور وبعد الاربع شهور ارجع .. ؟ او ارجع معاه وكأن شيئا لم يكن ؟

ماني عارفه ايش التصرف الامثل ؟
غير كذا احس نفسي كارهته لما اتذكر نفسي بعد الولادة لما كتبوا لي خروج من المستشفى وانزل ومامعي احد وانتظر احد يجي ياخذني ومحد جاء و ابويه رافض يجيبني و جلست معايا النونو بيد وشنطتي واغراضي باليد الثانيه ..
ابكي واحس بالضعف احس مالي في الدنيا احد ،، ساعه كامله جالسه وافكر اكلم اي وحده قدامي وابكي عندها عشان ترجعني للبيت .. كنت وقتها ابغى احجز مع كريم وجوالي طفى علي وماكان معي الشاحن !! حسيت كل شيء بوجهي تقفل ..
والا اشوف امي تجيني مع ولد قريبتنا و معطيته فلوس عشان تجيبني ... فرحت وانبسطت لكن حقدي زاد ع ابويه و ع زوجي حتى ابويه لما رجعت صار يتحاشى يشوفني و ماكلمني الا بعد اربع ايام لما شافني بالغلط وقال مبروكه !! سكت ولا حتى طالعت فيه احس خلااااص ما ابغى اشوف وجهه لما افكر انه ضربني وانا صغيرة وزوجني واحد ماابغاه غصبا عني لما اتذكر العذاب قبل الزواااج واتذكر اني سامحته ع كل شيء سواه فيني انقههر من بعد اللي صار لي بعد الولادة كرهته احس خلاص ماني قادرة اسامحه مرا ثانيه وغير كذا حتى بيوم العيد ماكلمته ...

واما زوجي لما اتذكرالازواج جالسين مع زوجاتهم بعد ولادتهم واسمع كلامهم!! هاه كيف يافلانه !! تعبتي ياروحي ولا لا ؟! و ارتاحي لا تتعبي نفسك ويجيب لها اكل من برا ويضحك مبسوط بالبيبي وجايب لها هديه ... اقعد ابكي ع حظي
صرت افكر بالطلاااااق كثيير .....

صرت افكر اغير حياتي افكر ادخل بمشروع و يصير ليا دخل شهري واستقل بحياتي والغي شيء اسمه زوج واب ..

ياعمري الله يعينك ويصبررك ..

فعلا رايك سليم .. غيري حياتك وابدي سوي لك مشروع ينفعك تنشغلي فيه وغير كذا تستقلين ماديا عن زوجك وابوك ..

مشكلة اغلب المتشددين في الدين ... يحاول يصلح حياة الناس ويدمر حياته وحيات اسرته .. " الاقربون اولى بالمعروف"

الله يفرج همك وينزل على قلبك السكينة والراحة والإطمئنان الز ما عليك حاليا راحتك وسلامة الطفل .

اترك المختصين يقدمون الحلول المثلى.

الله يحقق لك كل ا تتمنين وجزاء الصابرين كبير عند الله

حبيتي قدر يخليك 4 شهور
وماوقف معك بعز حاجتك انتي واطفالك
هذا قلبه حجر

دامك قدرتي تعيشي شهور لحالك
بتقدري تعيشي سنين
ابدأي مشروعك وخططي لمستقبلك
وتجاهلي اي علاقه مدمرة لنفسيتك

الله يوفقك

الله يفرج همك
انسي عشان تقدرين تعيشين بسلام

مااعتقد موضوعك يستاهل الطلاق
موضوع انه سافر بوقت ولادتك لغير الضروره صح انه خطأ
ولكن من الممكن التفاهم معه والحياة تستمر بينكم

واما والدك عليك بره ولايجوز هذا الكلام بحق ابوك وحتى لو ماجاك او ضربك
يبقى ابوك اللي الله عزوجل فرض عليك بره واحترامه

هو لسّه فيه دعوه إلى الله بهذا الشكل في يومنا هذا؟!



اهم شي ابوك ماعليك مه بيظل ابوك ولازم تعامليه بالحسنى..

وفكرة الاستقلال ماديا باي طريقة مهمة جدا لكل المرأة لاننا لانعرف الايام بماذا تأتي.. خاصة اذا كان زوجك بهذا الشكل..

الله يعينك ويصبرك شوفي الي يريحك وسويه

وابوك مهما كان واجب عليك تبريه وربي رح يجازيك باولادك