السلام عليكم
مشكلتي بإختصار زوجي يدخن الحشيش ويستخدم حبوب كبتاجون كلمته يتركه ويتعالج من هذا السم يعطيني وعود على الفاضي .. لمن يأست منه انه يسمع لي رحت كلمت أعز اخوانه وللاسف ماسوا معاه شيء ولا اثر فيه .. حالياً افكر أكلم أبوي وادخله بالموضوع يا إما يتعالج او نتطلق .. هل قراري صحيح ؟ عندي منه بنت .. ابغى مشورتكم فضلاً لا امراً

__________________

شكراً لك قبل كل شيء
زوجي من ناحيه العبادة مقصررررر جداً
اغلب وقته فالبيت ومقفل على نفسه بغرفه
يعاملنا معامله حلوه انا وبنته .. لكن مو راضي يسمع مني ابد .. هو ماشي بطريق مجهول اخاف وضعه يتطور عشان كذا لازم أتصرف قبل ما يقوى ادمانه

وعليكم السلام
الله يعينك اختي
انصحك بالدعاء في جوف الليل بعد الوضوء له اثر فعال ، والصدقة يوميا بدرهم لدفع البلاء عن اهلك وخصوصا زوجك.
وهذا الدعاء اقرئيه صباحا ومساء: (اللَّهُمَّ إِنِّي أَعُوذُ بِكَ مِنْ الْهَمِّ وَالْحَزَنِ، وَأَعُوذُ بِكَ مِنْ الْعَجْزِ وَالْكَسَلِ، وَأَعُوذُ بِكَ مِنْ الْجُبْنِ وَالْبُخْلِ، وَأَعُوذُ بِكَ مِنْ غَلَبَةِ الدَّيْنِ، وَقَهْرِ الرِّجَالِ).
قرأت عن امرأة زوجها كان مبتلى بالحديث مع النساء ، وكانت معاملته سيئة لها، فكانت حياتها تشبه الجحيم في الخفاء، وتشبه الجنة في الظاهر، فالجميع كان يعيطها لشكلها ولمالها وغيره، فمرت سنوات حتى استيقظت من تلك الغفلة التي هي فيها، فرات انها تتهاون في الصلاة، ومتبرجة، والقران مجرد زينة في منزلها، فغيرت علاقتها بربها من كل النواحي، فسخر الله لها زوجها وهداه.
وشكرا

هل هو تارك الصلاة تماما ؟؟؟
ادعي له كثير كثير
حاولي معه بالحسنى و بالاخلاق الطيبة
دام معاملته حلوة انا اشوف انك تحاولين فيه بكل الطرق وتعتبرينه مريض و يحتاج علاج
اذا زعلتي منه بعدين بيحس انه فقد شي عظيم لان ماشاف منك الا كل خير
مشكلة هالاشياء الجسم ما يقدر يتخلص منها بسبب الادمان

بداية زواجنا كان يفطر برمضان .. وحالياً ماادري عنه .. أوقات يصحى من نومه حتى وجهه مو غاسله ويقولي صليت من تزوجته بحياتي ماشفته ماسك المصحف.. هذا كيف بيربي عيالي

والله مادري وش اشور عليك فيه
الله يهديه
استخيري قبل تقدمين على اي شيء

ولد اختي نفس طريقة زوجك ، ونفس معاناتك ، وزعلت قريبتي حيث هي نصحته اكثر من مره ولافاد فيه ، وقالت انا عندي بنت وعمرها ثلاث سنوات ولاعاد ابغى اطفال مع هالحشاش وحق حبوب ومقصر بالصلاه وينام بالساعات من اثر الحبوب فهي قررت الانفصال منه بحجة انا عندي بنت واحده فقط ، فليش يغثني بمزيد من الاطفال وهو انسان فاسد ، قلت اطلبي الطلاق منه ، وعندي لك حلول ، فقررت الطلاق منه وقال لو تنط السماء ماطلقتها ، فقلت اقطعي جميع الاتصالات منه والحين روحي لاهلك لاني راح اخليه يتعالج غصب عن خشمه او اذا رفض ايضاً عندي له حل ، فأستدعيناه بالمنزل ، قلت يافلان ، زوجتك ماتبغاك ابد وتبكي واحنا نشوف بان بينكم يمكن سحر او حسد او عين ، قال هي تتهمني باني حق بلاوي ، فقلت اعطها طلقه واحده ويمكن يااخي ينفك منها العين ، قال والله ياخال زوجتي لها فتره تطلب الطلاق وانا احس انها مريضه ، قلت طيب اعطها طلقه واحده وان شاء الله بتطيب من هذا العين او الحسد ، فطلقها طلقه واحده ، قلت الحين روح ، وبنشوف مع الايام الجايه كيف وضعها ، فجلست مطلقه 4 شهور والرجل متواصل معي ، قلت ياحبيبي انت تسمع ولا لا ، اولاً تلتزم شهرياً تحول 500 مصروف بنتك وان ماحولت لاخليها تشتكيك بالمحكمه ونطلب منك 1000 النفقه فان كان عندك كرامه حول ال500 بدون تاخير او زي ماقلت لك البنت بتشتكيك ، ثانياً/ انت رجل فاسد وحق حشيش وحبوب ولاانت كفو تكون زوج لها وانت خربان / والبنت وديناها عند الشيخ وقال البنت مافيها لاعين ولاحسد ولاسحر ، ولكن ياولد اختي البنت ماتبغاك لانك حق بلاوي ويا انت رجال تروح معي مستشفى الامل وتتعالج حتى ناخذ التقرير المفصل بانك خلاص اصبحت خالي من السموم فهذا وجهي لارجعها لك ، او يتضح في التقرير بانك لازلت خربان فهذا وجهي ماترجع لك ، وانا اوعدك لاخليها ترجعلك ولكن بشرط ان اتضح فيما بعد بانك رجعت للخراب فتأكد بانك بتطلقها غصب عن خشومك ، قال ورب القران توبه ياخال معاد ارجع ، وبالفعل اخذته للمستشفى لأكثر من جلسه والولد تحسن بنسبة 95 في الميه واصبح يصلي ، قلت شوف انا برجعها لك ، وان اكتشفت بانك عدت لها هالبلاوي بنخليك تطلق زوجتك ولو بالخلع غصب عنك من المحكمه ، ملاحظه/بعد الطلاق واثناء فترة علاجه جميع الاتصالات محضوره عليه وسوت له حضر بالواتس واصبح يجي يسلم على بنته عن طريق اختي وطليقته قلت لاتخربين خطتي وانا اعرف كيف اخليه يتأدب وهذا ولد اختي وانا خاله وانتي انا خالك واحنا نسعى للحلول ونجمع الناس بالخير وليس بالفراق ولكن مثل هالامور لازم تحكم فيها بالعدل . والمهم طلع التقرير بعد يمكن 4 شهور اثناء فتره علاجه وقال الدكتور بانه لم يصل لمرحلة الادمان ولكن هو على وشك الادمان ، فالحمدلله اعتدل الولد وتحسنت صحته ورجعنا له طليقته والحين هم مبسوطين وعدد مرات تخبرني بنت اختي بانه وضعه ممتاز ، واخر ماهو قبل اسبوع تعشيت عند بنت اختي وامها وهي اختي ويثنون عليه بالخير
فأنتي سوي زي ماسويت ، ياانه يتأدب ويتعالج ويتاكد ابوك واخوانك من المستشفى بانه بالفعل جالس يتعالج ، فان تعافى من الخراب فارجعي له وان لازال مدمن فالله يعوضك باحسن منه ، المهم انه لازم يتأدب عندما تتطلقين منه ، وتذكري بان اذا تطلقتي منه فاقطعي جميع الاتصالات بينك وبينه وسوي له حضر بالواتس ، فان يبغى يزور بنته فيكون عن طريق اهلك فقط ، لازم يتأدب ، واحب افيدك بشي مهم ، ان تعدى اكثر من 6 شهور وهو ماتعالج ، فروحي المحكمه واشتكيه بأن تطلبي طلبين وهي نفقه وحضانه ، فاطلبي النفقه 1000 ريال و500 تكون للعيدين 500 تكون لعيد الفطر و500 تكون لعيد الضحيه ، والطلب الثاني اطلبي صك حضانه لك انتي ، والله يسهل الامور
والله يصلح احوالكم

الله يسعدك ويفتحها عليك وهو هذا اللي راح يصير شجعتني كثيرر ان شاالله أبوي يكون بحكمتك ويعرف كيف يتصرف معه شكراً لك من قلبي على وقتك

__________________