انا عمري 28 متزوجه وعندي ولد وبنت تزوجت وعمري 14 سنه وعشت مشاكل وهموم ربي عالم فيها مع زوجي واهله واهلي
زوجي لمن وصل عمري 23 تزوج علي وكانت صدمة حياتي ومع ان علاقتنا طيبه مع اهله لكن تفجأت بمباركتهم لزواجه ومو هذا اللي زعلني العدل مطلوب منهم وهي بعد زوجة ولدهم
وقفوا بصف الثانيه وصاروا يطلعون عني اشاعات اني مهمله زوجي واني ظالمته واني مستقويه على زوجته
لانها غريبه ومن هالكلام وعشت في مشاكل وقطيعه ربي عالم ان مالي ذنب فيها
كان يغيب عني اربعه ايام واذا جاء عندي دقت زوجته على اهله تبكي وتقول مايجيني وهم يتصلون عليه ويسبونه ويقولون ظالم وزوجتك ممشيتك على كيفها
وماقدر زوجي على المشاكل حطني زوجي بكذا اختبار حتى يقرر مين يخلي وبالاخير طلقها ولا قالي ولا انا سألته
وبعدها جلس سنه متزوج بالسر
اهملني واهمل بيته اكثر من اول وان ناقشته ضربني
كان يطلع الثلاثاء ومايجي الا الجمعه اخر الليل ويقفل الجوالات ويفصل عني التلفون ونجلس انا واولادي بوحده وقطيعه
لا مقاضي للبيت ولا اكل او شرب واذا طلبت شي قال قولي لاهلك
طبعا بعد زواجه الاول علاقتي مع اهله صارت رسميه بعد ماشوهو سمعتي للناس وقالوا عني ساحره ومتسلطه الخ الخ
كشفت زواج زوجي ورحت عند اهلي هالمره وماطالبت غير بحقوقي وانها تطلع رسمي ويصير يعدل
والله شي يقهر ولاتقولون مااحس اللي جربت تعرف وشلون قلبك ينحرق بس كنت اصبر نفسي و اولادي كانوا صغار وبنتي متعلقه بابوها
وكنت احكم عقلي بكثير امور
وافق ورجعت اعدل من اخطائي معه واحاول اكون زوجه متوازنه واتأقلم مع وضعه الجديد
اهل زوجي ماعجبهم رجوعي بدأت الاشاعات . . . . ساحره . . . . ماديه . . . ماسكتت على زواجه الا عشانه كتب لها بيت وعشانه سوا
وربي شاهد ماحصل اي شي من هذا
صارت علاقتي معهم رسميه اكثر واكثر
واهلي بعد زواج زوجي الثاني ولانه اهانهم وتكلم على امي وسبها وامه جات بيتنا
وجالسه تقول احمدي ربك اننا نطالع في بنتكم واصلا ماعرفتوا الخير الا مننا
ورمت على امي 10 ريال تقول هذا مصروف بنتك لحد ماتوصل ورقتها
ورجعت تقول للناس ولدي اعطاني 8 الالاف واعطيتهم حتى قالت لابو زوجي نفس الكلام وصدقها
وبعد رجوعي تناقشنا بهالكلام وعرف زوجي وابوه الحقيقه بس عذرهم كبري عقلك وهي حرمه كبيره
وعندهم ولد يصير اخو زوجي صار يمشي ويقول شفتوا فلانه ترانا رميناها سودت وجهنا
ورميناها مثل ****(وانتم بكرامه ) حتى عيالها حرمناها تشوفوهم من سواد وجههها
وتعرفون الاشاعات حسبي لله ونعم الوكيل الناس شكت اني مو كويسه واني ببيت اهلي عشان سويت شي شين يمس شرفي وسمعتي
هالامور حساسه وانتم عارفين مجتمعنا لكن ماقول غير حسبي الله وكفى
رجعت بعد كل هذا عشان عيالي وقلت اذا زوجي مو مصدق مو مشكله وهو عارف ان اهله يغلطون ومايصدق اي شي منهم بس عادي
مايسوي شي بالمقابل غير تحملي
وتركت كل الناس حتى اهلي واعتزلت العالم وربيت اولادي واهتميت فيهم وطنشته هو واهله وعلاقتي رسميه مع الكل بس مع هذا مجررروحه
واكتم في نفسي
طلق زوجي زوجته اللي مااحد شافها وزعلوا اهله عليها وهم مايعرفونها وحملوني السبب وانا والله والله مالي دخل
وصرت لمن اجي يجلسون يقولون بنت الرجال مايتزوج عليها زوجها ولو فيك خير مادور غيرك ومن هالكلام
وانا اسكت واتحسب
وماقصر زوجي تزوج مره ثالثه بس هالمره كان شرط زوجته انه يطلقني وهي بتربي عيالي وافق
وعذره ان اهلي مايحبونك وبينكم مشاكل مع انه عارف ان مالي ذنب ودائما يقول شكلك من اهل الجنه
وجلس فتره يقولي ماابغى اي علاقه بيننا اعطيني تنازل عن الاولاد وروحي
تعبت ونفسيتي صارت زفت
وجلس شهرين يكلم فيها بـ الساعات وان جيت اطلع واروح لجارتي اغير جو يقول صدق ماعندك دم باقي لك نفس تزورين احد
و ان شافني اضحك والعب مع اولادي يجي يقول ماتحسين انتي وارد عليه عادي ماسويت حرام
والعوض من ربي مااترجاه منك
وبيوم جلس يكلمها لحد الفجر وجاء وقالي بوديك المستشفى لاني كنت تعبانه ودي الاولاد عند جارتك
ووديتهم واخذني على بيت اهلي في مدينة ثانيه انهرت وبكيت بس كانه جليد يقول ورقتك بتوصلك ولاتتكلمين فيني ولا يسبوني اهلك وووووووو
وبالاخير استسلمت وجاني برود
جلست عند اهلي سنه لاحس ولاخبر
طلبت من ربي العوض ودخلت نادي وغيرت من حياتي وتوكلت على الله ورجعت اكمل دراستي وانبسطت ربي برد على قلبي بشكل لدرجة امي منهاره اكثر مني
والكل مستغرب بس رحمة ربي فيني سبحانه ساعدتني
اهل زوجي الله يهديهم ماخلوا شي ماقالوه عني وعن اهلي
لدرجة يقولون اني ساحره ولدهم مايستقر مع الحريم >> طيب كان اولى اسحره مايتزوج
وطلق زوجي زوجته بدون ماادري حتى انا
واتصل علي وطلبني ارجع وبعد مفاوضات اسبوع رجعت
لافيه رضاوه ولا غيره اللهم طلبت بيت منفصل وماابغى اهله ولازوجته يجوني
واربي اولادي وبس
رجعت وغير لي البيت ونقلني بواحد بعيد وهو غامض وانا مااسأل ومن اول شهر عزم اهله
وصارت حياته طبيعيه وعرفت مع الايام انه مطلق
مرت الايام وزوجي تغير كثير ماصار يضربني وهادي
صح انه مايقضي ولايودي ولايجيب اذا بغيت شي رحت بتاكسي
بس حياتنا صار فيها احترام اكثر وصار يحاول اني ماازعل ويقدرني على قدر استطاعته
وقررت افتح انا صفحه جديده مع اهله وصرت استقبلهم ويجلسون عندي مع انهم يجرحوني ويتكلمون وحتى يجون البيت ومايسلمون علي وتحملت
زوجي مقاطع اهلي من 4 سنين وهم مايجون بيتي
كل اجازه اهل زوجي عند ومو مقصر معاهم بشي لدرجة لو ولدهم يبغى المستشفى يوديه
بس لو امرض انا والا ولدي يقول اعطيه عسل
تهاونت باشياء كثير
عرفت مالي رجعه على بيت اهلي ولازم اتحمل واصبر
طنشت زوجي الا من حقه علي اقوم بواجبي واخدم ضيوفه وربي يشهد اني مو مقصره بشي على قد طاقتي يغيب بالاسابيع لا اتصال ولا سؤال ماادوره الا اذا جاء قمت بواجبي انعزلت عن الناس وقلت مشاكلنا لاني مغمضه عيوني عن تقصيره
اخر سنه صارت مشكله بيني وبين امه تكلمت وسبتني وطردتني من عزيمه كبيره
بسبب ان بنتي ضربتها وحده تقريبا بعمرها وجيت انا وقلت مو عيب عليك
البنت اصغر منك ولو غلطت عليك كلميني انا اتكلم بهدوء والبنت تسمعني
حتى اني اقوولها انتي كبيره وعاقله وانا عارفه انك تعتبرين فلانه مثل اختك وصوتي هادي حتى البنت لسانها طوويل بس استحت مني وصارت بس تسمع الا شوي جرتني خالتي من شعري ودفتني قدام الحريم وصارت تصيح وتقول
فشلتينا يال ....****
يالسحاره ***...
ضاربه البنت يال ... كلام كبير ماله داعي
ومسويه نفسك تخافين الله يالزا......
قالت كلام والحريم يهدون فيها وصارت تقول والله لتطلع من البيت والا اطلع انا
اخذت عبايتي وبنتي وطلعت الرجال قاموا وصاروا يقولون وش فيه وهي ماخلت شي ماقالته وتبكي وتصيح
خرجت وانا مصدومه
واتهمتني باشياء ماصارت اني ضربت البنت
واني جلست اسب في اهل البيت
جلست استنى زوجي نص ساعه برا واكثر
ماقدر يطلع قبل العشاء عشان مايقولون عنه ورا حرمته
جتني وحده من الحريم وتقول ارجعي
قلت والله مارجع هذا مكاني وانا ماسويت شي عشان انطرد ولا هو بيتها وانفعلت وصرت ابكي
جاني زوجي وتهاوشت انا وياه
وراح لامه وحقق بالموضوع ومن هنا وهنا طلعت امه غلطانه ومافيه شي من اللي قالته صار ورجع يقول تحملي هذي كبيره وتغار منك وماادري ايش ؟
طيب انا بتحمل مو مشكله بس صورتي اللي تحطمت والرجال واللي سمعوه مين يغير ويصحح معلوماتهم
كبرت بين الناس وصغرت بيني وبين زوجي وامه ؟؟؟؟
قلت تتصل انت وامك وتقولون االحقيقه او على الاقل تعدلون الصوره رفض زوجي وقالي انتي مكبره الموضوع مايستاهل
وصار يسب ويهاوش وتقرب من اهله اكثر عشان مايقولون اني مسيطره عليه وانه واقف معي
نفسيتي صارت دمار
جلست 6 شهور وانا متأثره بالموضوع وجات الاختبارات وانا مافتحت صفحة ونفسيتي زفت
لاسيما بعد ماراح زوجي يشتكي مني عند اصحابه واني بس ابكي واني اكره اهله الخ
واني منكده عليه ولولا العيال ماتركني على ذمته وهم متفاعلين الا امك وطلقها والحرمه بدالها الف ومن هالكلام
واحد قام وصف له دواء وسواس قهري وجابه لي زوجي يقول عشان الضغط
وجلست اخذ منه فتره وبيوم حصلت اسمه ورحت سويت بحث وحصلته
بكيت وتعبت نفسيا لدرجة جاب زميله يقرا علي يقول عني مسكونه عشان انا ماحب الناس واني مكبره الموضوع وحساسه بزياده
والله والله اني ماكذب عليكم جرحني جرح ومع ذلك استمريت مع الشيخ
3 شهور قلت خير وبركه وحالي هو حالي
يقول اعتبريها امك ليش تزعلين قلت طيب انت ليش مقاطع امي ماتزوها ولاتسمح لها تدخل بيتي قال غلطت علي !!!!!!!!!!!!!!! وانا مو مجبور اسامحها
ردت فعلي بس ابكي وابكي حسيت اني ضايعه
جات الاختبارات وثالث يوم اتصلت عليه عشان يوديني قالي انا مستلم شوفي احد غيري وغبت قلت ماده مو مشكل
والاسبوع اللي بعده قال عندي مشوار واستغربت انه اخذ ثوب وملابس داخليه
وطلع مسافر مع اهله وخواته وماقالي عشان ماازعجه بسين وجيم عنده زواج قريبتهم وجلسوا اسبوع
طيب يوديهم يوم ويرجع لكن اسبوع كامل ليش وانا عندي اختبار وبديره مالي احد فيها
ولا هو الوحيد اخوانه 9 متزوجين منهم 7
و5 عايشين بمدينة اهل زوجي
يعني زوجي يسافر لهم يوديهم ولمدينة ثانيه
مايطلبون غير زوجي
والباقين لا حتى اخته طلبته يدخل اولادها 4 مدارس اهليه ودخلهم
والثانيه اي مناسبه هو يكسيها وادري ومااعلق اقول اللي ماله خير بخواته ماله خير باحد
بس والله اللي قال هالكلام واقنعنا فيه مايفهم شي واعذروني
حتى الناس يردون دائما لو فلانه مافيها خير اللي هي انا ماعاملكم ولدكم كذا شوفوه مو قصر معاكم ولا هي مقصره وردهم دائما هي ماتدري وهو يخاف منها ولا يعلمها عن شي
وهذي سيرتهم دائما
حتى اجيب لخالتي كل عيد والله مااقصد ان اطلعها قدام النااس بس عيد وجمعه ويقولون الناس ماقصرتي والله بيض الله وجهك
ترد عليهم الله لايكثر خيرها من حلال ولدي
صح حلاله بس انا اللي اشتريتها وهو مو داري اصلا الا بعد ماانتهي منها واغلفها حتى
الايام اللي حضرتها بالاختبار كنت بس ابكي والمراقبات يخففون عني ومايدرون وش فيني
اجي الاختبار مواصله ومو نايمه
وغبت الاسبوع كامل وعذره اني ليش مااخذت تاكسي ورحت ودبرت نفسي
طيب ليش مالي اولويه بحياتك
هل الزواج مهم يعني
يعلم الله اني اطبخ لعشر عوائل باالبيت ومافيهم وحده ترفع فنجال ودائما يقولون مانترتاح الا عند فلان
الان كل هذا ماضي
بس بقولكم نتايجها
وزني وصل 112
صار عندي صلع بكامل شعري
مالي نفس اطبخ او ارتب بيتي
بس تعبانه ومتشائمه وخايفه
طول وقتي ياابكي او اصرخ وفقدت اي رغبه في التواصل مع زوجي حتى في العلاقه الخاصه
وصار يشتكي ويسب ويهاوش وانا مااحس واهم شي عندي مايلمس شي مني
والله ادري انه حرام بس شي مو بكيفي غصب عني حاولت اغير واطلع من حالتي بس كارهه انه يلمس شي مني يجيني غثيان وماودي بعد اني اخذ ذنبه
قلت له روح تزوج انا محللتك بس مايعلق مافيه شي يفرحني
نسيت اقول ان بنتي ماتت بسبب سرطان الدم وهو عندها من ولادتها
وصارت ام زوجي تقول شفتوا ربي نصرني عليها وهالشي هد حيلي ودمرررررررررررررني
مع ان 2من بناتها تطلقوا اللهم لاشماته ووحده تزوج عليها زوجها ووحده عندها معلقه ولا حتى كنت اسأل عنهم ولا اجيب طاريهم
كرهت الناس والحياه والاهم صدقت اني ظالمه ام زوجي والا ليش ربي اخذ بنتي مني
وارجع اقول انا مبتلاه واسأل شيوخ واحكي لهم ورجعت للبنت وامها وقالولي مامنك خطا
النتيجه اني ضعفت عبادتي
لو عمري ينباع والله لابيعه ادعي ربي ليل نهار ان القيامه تقوم ونخلص ولدي صرت اخاف عليه ومااخليه لحاله ولا دقيقه اخاف يصير فيه شي ويصير صبري على الحياه على الفاضي وارجع من الصفر
افكار كثير تجيني
اشكي لكم حرقه بقلبي ضيعتني حتى الصلاه اهملتها كثير
اشتقت لاهلي وجمعتي معاهم
اشتقت لضحكتني
آمنت بقضاء الله بس الناس مارضيوا
طيب وش كان بيدي اسوي
حرقتي على بنتي صارت حرقتين حتى عزاها اكتفوا اهلي بالتلفون واهل زوجي جو ساعات وراحوا
عشت وحده كبيره وذقت مرارتها
دائما يقولون ماصار فيها كذا الا لانها ظلمت بنات الناس
والله العظيم وربي شاهد اني ماتدخلت بوحده منهم حتى الاولى زرتها ببيتها اول ماعرفت ماحبيت احارب زوجي على حلال تعبت والله ابغى اكمل حياتي طبيعيه حاسه اني بسوي شي كبير
مثل البركان اللي بينفجر
كيف اجمع نفسي المشتته
والا ادعولي ربي ياخذني ويكفيني اللي عشته
بقولكم معلومات عن زوجي متعلم الى الماستر
مغرور بنفسه كثير وتصرفاته غير مدروسه ماعنده وظيفه رسميه كل شوي يدخل مشروع ويخسر فيه ويطلع بديون كثيره
اغلب الناس ماخذين عنه فكره سيئه انه ياخذ فلوسهم ومايردها وهو دائما يلقى له مخرج شرعي
لبسه دائما غالي ويصرف على نفسه بجنون ساعاته توصل الى 14 الف من وين وكيف يجيبها مو مهم
كل شوي سياره جديده واخر موديل ويتباهى قدام الناس
كانت تمر علينا ايام مانلقى والله العظيم ريال واحد اشتري فيه خبز والا لبن لاولادي ويقول وش فيها سوي لهم عجينة واخبزيها بالفرن وايام عنده فلوس مايدري وين يوديها ويضيعها على اشياء ساعات جزم وانتم بكرامه زوجات كل وحده لها مؤخر لايقل عن خمسين الف جوالات بس شي للمستقبل ماافيه
انا زوجته ماعمري ركبت معه طياره ابدا والا سافرت معه رحله سياحيه الا لمكه عمره ومرتين رحنا الجنوب وسفرياته كلها لوحده لبنان بلجيكا دكا تونس سوريا دبي قطر المانيا بريطانيا وكلها كان يتعذر بالشغل ويجلس الى 3 اسابيع لا اتصال ولا سؤال
اهله مقدس عندهم لانه مايرد لهم طلب وغير لهم بيتهم كذا مره ومعطيهم صوره عن نفسه مختلفه عن الحقيقه
وشايفين اني بعز ودلال مااستاهله وعلى بالهم عندي ذهب واملاك من وراه
يكفي اقولكم على هالصوره الى الان ساكنه بايجار ولاعندنا أي شي نملكه من هالدنيا
ماادري هو طيب وحنون والا انسان مستهتر والا انا بس اللي ارضى بأي قليل منه لو يجلس هاجرني شهر ويجي ويعتذر بكلمتين صدقته وفتحت صفحه جديده
ماعمره انتقدني بشي ويعتمد علي بكل شي حتى بمقاضي البيت والتربيه والضيوف ولايشيل هم ابدا
بعد زواجه وانفصالنا الاخير تغير كثير وانا بعد تغيرت طورت من نفسي واسلوبي معاه وكملت تعليمي مثل ماذكرت لكم واشغلت نفسي حتى بمراجعة المستشفيات لبنتي الله يرحمها كنت لوحدي واتنوم معاها وهو لاهي ومسافر يجي البيت والجو مستقر وافضى له ونتكلم بشكل عام وكان يستشيرني ويثق برأيي
حتى دائما يقول انتي مظلومه وماتستاهلين وهذا ابتلاء من الله واحيان يقول شفتي فلان والله انه يستاهلك وش رايك ازوجك له ؟؟؟؟؟؟؟؟؟؟
اسكت ماادري صدمه والا قهر على زوج بهالشكل
مرات كانت تصير مشكله بيننا يروح يتصل على اصحابه ويجي يعطيني التلفون يقول كلميهم يعقلونك ؟؟؟؟؟؟
استنكر تصرفه واقول خسرتني حياتي لاتخسرني ديني
ومرات كثير يرسل اصحابه يستدرجوني بالجوال ويرددون دائما نفس الاسطوانه نوعدك بالحب والحنان وماراح نخدعك واسرارنا بيننا وعهد الرحمن بيننا ومن هالكلام
ماراح اغشك ولا اخدعك وهذا الكلام دائما كلامي لزوجي وطلباتي منه
وكيف عرفت لانه بعد زواجه الاول عمل نفس الحركه بس اول مارجعت اعطيته الرقم وقال ايه هذا انا بغيت اختبرك
ولاني اخر سنه كنت اخذ دورات تطويريه اذا توفر معانا مصروف وكان مبسوط اني مشغوله عنه بس بعد مانجحت وصرت معروفه ومطلوبه صار يعلق احمدي ربك اني اخليك تجلسين مع الرجال على طاوله وحده تضحكين وتسولفين
واحد غيري مايرضاها ويشهد علي ربي انها ماصارت ولا حتى اتجرأ اني اتناقش بحظور الرجال
وبطلت اكمل بهالمجال وصرت اخذها عن طريق النت
معلومه بسيطه طلقني زوجي 5 مرات بس ولامره خلاني اطلع من بيتي يقول الطلاق ماوقع وكان يلقى لها مخرج شرعي
اما اني مااكون على طهاره او انه كان يتلاعب بالالفاظ عشان يعقلني على قوله
او انه معصب وفاقد السيطره على نفسه
تزوج زوجي 8 مرات كلها كنت انا اكتشفها وكنت كل مره اطلعها انا واقول ابغى العدل ويطلق والمرات الاخيره صرت اسكت واعدي لاني تعبت واحيان اطلب منه يخليني على ولدي ويروح لها بس هو يرفض يبغاني اكون له زوجه بكل شي
دائما يكرر ماالقيت مثلك وانا احبك بس انا ماشفت من الحب هذا الا التعب والدمار النفسي والاجتماعي
أي حب وانا اجلس بالبيت 4 شهور ماااطلع واحيان توصل 7
أي حب وانا امرض وماحتى يكلف على نفسه يوديني طبيب
اقضي ايامي لوحدي ويقول انتي شخصيتك ضعيفه واخترتي
لا. انا مااحب المشاكل ولا وجع الراس احب اعيش ببساطه وهدوء
امه تكلمني تقول ياشرمـــ . . . . وانتم بكرامه وقدام الناس ولما ازعل تقول زوجتك حساسه ومدلعه وبنفس الوقت لمن اجي واسلم على راسها بس بدون يدها تجلس تبكي وتشتكي وماتعديها وتجلس تعبي راسه تكرهنا ماتبغانا قايله لك من اول
تعبت مافيه اسلوب واحد نعامل فيه بعض لو لمست فعلا منهم عدم الحساسيه كان قلت ماشي طبعهم واسلوبهم
غير كذا اتهموني مره اني دخلت رجال بيتي في غياب زوجي حقق زوجي واكتفى يابختك انتي من اهل الجنه
وطلب مني اقفل على الموضوع وان ناقشته مع انه مر عليه سنين وجاااااااااااااااااااارحني يقول انتي حقوده وعندك أنفه وماتتنازلين وغيوره جدا
اي غيوره وانا اللي اشوفه ملون بالارواج واسكت
واشوف هداياه لهم ومااعلق كأني ماشوف لاني مالي خلق مشاكل ولانه دائما يقول ثبتي انا صابر عليك
الان هو متزوج ولما ناقشته واثبت هالشي قال طلقتها وقفلي على الموضوع هذي حياتي الخاصه لاتتدخلين فيها
طيب وانا مالي حياه اعيشها ؟؟؟؟ ويحلف انه يحبني واقول الدليل اعطيني دليل واحد يقول انك على ذمتي الى الان وقدام الناس انتي الاساس
اذا تزوج يهجرني ولايحط عينه بعيني من سفر وشغل لين يطلق ويرجع وعلى كذا ولما اناقشه انها تطلع ولا اكون مخدوعه يقول بس تقطعين علاقتك باهلي
طيب انا عندي ولد من حقه يتربى بين اعمامه واهله وبعدين وين اروح ان قطعتهم اجلس لوحدي بالبيت والناس بالعيد كأني انا الغلطانه
واهلي مستحيل يسكتون عن هالوضع واصلا ماراح اتحمل اسئلتهم واستفساراتهم
انا تعبت نفسيا ماعندي ثقه بشي دمرتني الوحده وهو مو مساعدني يقول اهجري اهلي
طيب وزواجاتك يقول من حقي
وانا يقول ماكله وشاربه وش ناقصك ربي ولدك واجلسي ببيتك
لا احد يقول اصبري لاني تعبت من الصبر ودي بحياه بدون مشاكل ولا وجع قلب
لمن اشوف زوجين متفاهمين والله انحرق على عمري اللي راح بدون حب وبدون استقرار ولا حتى سمعه زينه
ولا احد يقول طنشي وعيشي لولدك لاني صرت متوتره على طول وكئيبه