السلام عليكم

عندي مشكله بسيطه جداً ان شاء الله وان شاء الله احصل عندكم بعض الحلول غير الحلول اللي جربتها

زوجتي كانت بالجامعه وتخرجت مع الإجازة الصيفية

فأصبح وقت الفراغ لديها طويييييييييييييييييييييييييييييييييييييييل

وانا دوامي من 8 الصباح الى 4 العصر

وتطفش المسكينه من الجلسه الحالها وتخلص كل شئ شغل البيت والطبخ وتجلس على هالتلفزيون طفشانه

وظروفنا المادية ما تسمح انها تدخل معهد حاسب او ماشابه ذلك للإرتباطات المادية المترتبه علينا

المهم : انا احياننا ارجع الدوام تعبااااااااااان من جد ما اقوى احرك يدي

وتبي تروح لأهلها واضغط على نفسي واوديها مع اننا ساكنين جنوب الرياض واهلها بالشرق يعني مشوار للي ما يعرف الرياض بحدود 30 كيلو وزيادة رايح و30 راجع

فلما اقولها يالله اوديك تستانس وتسولف وتضحك ومافيه احلى منها

ولما اقولها تعبااان من الدوام ما اقدر اوديك لازم ارتاح تزعل ولا تكلمني اليوم كله

واذا جا اليوم الثاني القاها تحط الغدا وتجلس تقول مالي نفس آكل

مزاجيتها هذي ذابحتني جايبه لي المراره

وكل مره اراضيها ونرجع حبايب بس تتكرر مره ثانيه وثالثه ورابعه وهذا موالنا لابد كل اسبوعين فيها يومين او 3 ما نسولف ونضحك مثل الأيام العادية

المهم امس رجعت من الدوام وقالت بروح لأهلي قلت اصبري اخوي يبيني بمشوار وبرجع قبل المغرب واتحمم واصلي واوديك قالت طيب وطول الوقت جالسه على اعصابها كأنها ما بتصدق متى تطلع من البيت

وانا عااذرها صراحة ما الومها طفش انا لما اوديها وارجع للبيت وارتاح خلاص ابدأ احس بالطفش وانا جالس الحالي واطلع

فما الومها نهائياً

لكن وش الحل انا ما اقدر اغير بالدوام وارجع للبيت بدري

ولا اقدر استحمل مشاوير كل يومين او تبيني اجلس معاها لما ارجع من الدوام ولا تنام ولا ترتاح اجلس عندي وسولف

واذا قلت برتاح ماقدر اجلس تبدأ مزاجيتها وتنتفخ وتزعل

اخر مشكله كان عندنا ضغط عمل وطالع بدري من البيت وهي نايمه وجهزت عملي واستقبلت الزوار وناقشنا امور الشغل وما خلصنا الا 5 العصر رجعت وانا هلكان تخيلوا من 6 ونص الصباح الى 5 العصر وانت مقابل ناس انت مسؤول عنهم

وترجع تحصل كبسة لحم + لبن + حلا + فاكهة = نوووووووووووووووووووووووووووم

ونمت نومة اهل الكهف تقول ميت <<<<< مو كسل بس من جد تعبااااان وقبلها مانمت زين

المهم حاولنا نسوي جدول ليومنا ما نفع

وانا كل مره تسوي لنا هالسالفه اتضايق بس اكتمها واقولها وش تبيني اسوي ما ارتاح بعد عناء يوم طويل ؟؟؟

وتبدأ تتضايق واراضيها ولا اهتم بموضوع زعلها ولا مزاجها المتعكر واستمر الحال على كذا

الى ما طفشت وقلت لها تراك طفشتيني ماني مقصر معاك بشئ ماعمرك قلتي ابي الا قلت جاك

مشاويرك وخالصه وكل شئ تبينه تلقينه وش اسوي اكثر خليني ارتاح شوي

قالت بروح عند اهلي قلت طيب

قالت بنام عندهم اليوم قلت طيب

ونزلتها وسلمت على اهلها وطلعت للبيت

وترسل لي رسالة تقول فيها اذا بغيتني وتحسن اسلوبك دق علي واذا ماتبيني واجلس عند اهلي معززه مكرمة براحتك

وش الحل هل وصلت الامور لهالحد مع انها ما تستاهل هالخرابيط كلها وشئ سخيف

هل اكلمها ولا اخليها يومين تعقل من هالهبال والدلع الزايد

لنا سنه و3 شهور متزوجين

آرائكم الله يحفظكم وهل فيه نظام او جدول ممكن ينفعنا ؟

وعليكم السلام ورحمة الله وبركاتة

أخي في الله

اسئل الله العلي القدير أن يصلح حالكم


طيب فاتحها بموضوع الحمل إذا هذا الذي مضايقك منها فقط


فاتحها بموضوع الحمل


لأنها إن شاء الله لو حملت سوف تنشغل بالحمل


وإذا منَّ الله عليكم بالولد أو البنت سوف يكون وقتها مشغول مع هذا المولود .

__________________

اخوي انا دوام زوجي مثل طول دوامك تقريبا وما كان عندي احد ابد
من جد انواع الطفش و الوساوس والدموع

بس بعد البيبي الاول مع اني الله لايعاقبني ما احب الاطفال انشغلت شوي وخفت الضيقه
وعلى طول جبت البيبي الثاني
وصرت اعقل شوي وما احب اطلع ولا اطري له اهلي
ولو قلت له ابي اروح لاهلي{ طبعا لانا نقلنا عندهم} وقال لي لا في خاطري اقول زين جت منه

ترى الاطفال بدون خادمه شغل بدون شغل

واحب اقول خلها تتوظف ع الاقل تشغل وقتها تفكك من حنتها وشي من مصروفها

__________________

وعليكم السلام
المشكلة مو في مزاجية زوجتك المشكلة بالفراغ والروتين..احيانا الفراغ والروتين يجيبوا ملل..تصبح زوجتك حاسة بالملل والتعب مو نفسها تعمل شئ تزعل من ابسط الاشياء..مو بايدها ضغط الفراغ والروتين...انك تقعد طول اليوم بجدران اربعة مو سهلة يمكن حتى الحكي تنساه بطول الوقت لانها ما تتكلم طول اليوم متعودة على نقص الكلام ..الحل انها تملي الفراغ..لازم شئ يليها شوي...تعمل او تتوظف ان امكن...حاول انها توجد لها هواية تتسلى فيها طرز ..خياطة..اي شئ المهم تعمل شئ ..وتنسى انها لوحدها..والعطل خرجها واتنزهوا..غيروا جو....
لما ما يكون عندها شئ اكيد راح تكون مركزة معك واي غلطة منك تزعلها كثير حتى لو مو قاصد لانه نفسيتها تعبانة ومخنوقة من الروتين..الروتين قاتل ...
وكلمها وقلها انك حاسس فيها ..ورجعها للبيت بعد مشوار نزهة اكيد تكون فرحانة انك مقدر تعبها ونفسيتها وحاول تناقش معها الامر..واكيد هي راح تقدرلك هالشئ..
وحاول بعد ما ترجع من شغلك وترتاح تساعدها بالبيت بالمطبخ ..اتكلم معها كثير حاورها ..حاول انك لما ترجع للبيت ما تروح تنام على طول اقعد معها شوي هي كل اليوم لوحدها وتستناك لما تجي تروح تنام اكيد يجيلها احباط...
اهتم فيها وحاول تنسيها انها طول اليوم لوحدها
الله يهنيكم ويسعدكم

هذا شيء طبيعي اخوي لانكم في بداية زواجكم وهي تبغى الاهتمام الكامل بها .......................:14:

حاول تخصص لها وقت يوم بعد يوم مره تعزمها فيه على العشاء او تغيرو جو بره او يكون يوم رومنسي في البيت ................

واتفق معاها على يوم او يومين بالاسبوع تروح فيها لاهلها وما يتغير و يكون اتفاق الزامي بينكم عشان لا يحصل زعل لا منك ولا منها .....................

اتمنى اني اكون افدتك...................

يالبيه الله يعينها

الفراغ هو اللي متعبها ومتعبك من جد الفراغ مرض
لازم تشغلة
اما تتوظف او تدرس كان من فترة فيه دبلومات مجانية بجامعة الامام
تمارس هواياتها مثلا التصميم تصفح نت تطريز اي شيء تحبة
سالفة انها تروح لاهلها هي تريد تطلع تغير جو بس لانك اكيد بتنام وبتتركها وبتعيش اليوم كله لحالها
فالحل اذا انت شايل هم المشوار انقل جنب اهلها مافيه الا هالحل طبعا اذا بيتكم ايجار
غير روتينك اطلع انت وياها سوا لاي مكان غيروا جو
واذا تبي رايي
قل لها تقلب جدولها مثل جدولك
كيف يعني انا بقولك
وقت ماتنام اهي تنام وقت ماتصحى انت اهي تصحى
لشان ماتحس انها عايشة لحالها

والله يوفقكم ويسخركم لبعض

إرجع من الدوام الساعه 4 ,,, توصل البيت خمسه أو أربعه ونص ,, تغدا ونام ساعه للساعه سته أو خمسه ونص ,, صلي المغرب وأخرج أنت وهي روحوا المولات وتمشوا وشوفوا الدنيا ,,,

وش فيها لما تخرجوا تتمشوا كل يوم بس بدون دفع مصاريف ,,, تغيروا جو وكمان زوجتك تغير جو ,,,

ولما ترجعوا البيت شوفوا فيلم حلو مع بعض وجلسه كدا حلوه ,,,

====


بالمناسبه أنا مدة دوامي مثل دوامك لكنني حين أعود للمنزل أنام لمدة مابين نصف ساعه وساعه فقط ,, ومن ثم أعاود نشاطاتي من الخروج وإنهاء أي مقاضي للشراء ,,, ولاأشعر بالتعب الذي أنت تشير إليه في موضوعك هنا

حبيبي مشكلتك ترى بسيطه وعاديه جداً وتصير بأي بيت ـ المهم ان تحط ها الشيء في راسك.

اولاً وقبل كل شي متى ماجا وقت رجعتها اتصل عليها وكيف الحال وانتوا طيبين وخليك تمام التمام ، ولا كأنك قريت المسج.

أسال عنها وعن اهلها ، المهم قولها يا الله انا جاي اخذك ، وخليك طيبيعي جداً وتسوي مثل ما تسوي كا العاده يعني لو تنزل تسلم او تسوي اي شي، المهم لا تفاتحها في الموضوع ابداً ابداً، واذا فاتحتك هي با الموضوع على الجوال قول لها يا حبيبتي موب وقتها انتي ارحعي لبيتكم ولا راح يصير الا كل خير والي يرضيك.

اخذها وارجع لبيتك اشتر عشا وتعش انت وياها، ولكن لا تصير كا العاده، خليك اثقل من قبل بحبتين ، يعني لا تكثر الكلام ، ولا تكثر الطلبات اخدم نفسك بنفسك، حسسها بغلطاتها باللي سوتها ولكن بأسلوب راقي،ان كلمتك كلمه كلمتين وخلاص ، سو نفسك تعبان وانك تبي تنام، اخذ دش وضبط امورك وروح لغرفتك.

انا متوقع بنسبة 90 با الميه انها بتعصب وراح تجيك تكلمك بحرقه وبعصبيه ليش انت تسوي كذا او وش قلت ووش رايك با المسح الي ارسلته لك وليش ما رديت علي.

قولها بليز انا وراي دوام بكره وابي انام وانا رايق ومرتاح، لا قمنا بكره ورجعت نسوي الي تبينه.

المهم اذا ما سكتت ولا هونت اطلع انت وياها با الصاله او انتوا بمكانكم جيبها لحضنك او اجلس جنبها ، وقول لها حبيبتي انا مقصلا معك بشيء، قد طلبتي مني شي ولا لبيته لك ، قد بغيتي مني شي ورديتك فيه؟؟؟؟

طيب انا وش تبيني اسوي ، اذا المشوار بعيد علي واكون وقتها تعبان ولا اقدر اوديك با الوقت الي تبينه ، يعني اذا انتي ما قدرتي حالتي من بيقدر ، من لي با الدنيا غيرك ، لو انتي ما قدرتي وضعي وحياتي مين يقدرني ، يعني انتي من هنا والعمل من هنا ، انا ما اصدق على الله اطلع من الدوام ارتاح جنبك وبحضنك وببيتي قريب منك وانتي تضغطين علي، مهماً كان انا لحم ودم انسان اتعب، وبعدين انا اتعب لمين ، موب لك وعشان البي لك الي تبين ، انا اقوم بدري وارجع هلكان متأخر عشان البي لك الي تبين ومريحك با البيت ومخليك ملكة حياتنا وبيتنا وانا الي اتعب عشانك ما استاهل منك شوية تقدير.

انا ما ابي اسهب مع اني احس انس اسهبت بزياده ، ولكن حبين اني اوضح لك صيغه الكلام المفروض انه ينقال بها الوقت ، وبها المناسبه.

المهم انك تجاريها با الكلام الحلو الين تطيعك وتسوي الي تبي وهي راضيه ومبسوطه بعد.

وان شاء الله تنحل مشكلتك يا رب، مع اني اشوفها موب مشكله ابداً ، ترى هذي تصير بأي بيت وباي عائله، اهم شي انت لا تضغط على عمرك وانا اخوك ، خليك كوول.

وبعدين نصيحه لوجه الله.

انت ليش ما تحدد يوم با الاسبوع تزور فيه اهلها ، ولو تبي تجلس يوم كامل عندهم.

يعني مثلاً، تخلي يوم الخميس من كل اسبوع من العصر او من الصباح (مثل ما تتفق انت وياها على الوقت) الين الليل ومتأخر بعد وهي عند اهلها ، ومسأله النوم تخليها مثلاً تنام يوم با الاسبوع عند اهلها ، ترى صدقني بترتاح وهي بعد بترتاح لأنها بتكون عارقه متى تروح ومتى تجي.

حبيبي ترى بناتنا الله يحفظهن ويسترهن طيبات، وحفاظاّت،ترى بناتنا مثل الكاس، الي تصبه فيه تشرب منه.

تحط طيب وكلام حلو تلقى اكثر صدقني يا الغالي، والعكس با العكس، ادري يا الغالي منتب مقصر ، ولكن هذي حياتك لابد انك ترتبها وتأقلمها بأسلوب يناسبكم جميع، من دون ما يلقى احد منكم اي مشكله او ضغط على نفسه.

لا تتأخر با الاتصال على زوجتك بوقتك المعتاد ، صدقني تراها تحتريك يا الغالي

الله يوفقنا ويوفقك يارب.

__________________
ديمـا الله يصلحها ويهديها كبرت، وبدت تحبي، وتحاول تمشي بسم الله عليها.
هبلت بي وطلعت الشيب في راسي، الله يعيننا على امانه تربيتها، ويعينها علي. اللهم اصلح لي النيه والذريه.

الله يعطيكم العافية اخواني على النصائح

على فكرة انا مو كل يوم انام العصر

يعني بالاسبوع يوم واحد يكفيني

والحمد الله انا رجل اكره الروتين اساساً

فيومي متغير وطلعاتنا كثيرة حتى اننا نطلع للسطوح نشوي احياننا ونسولف

بس كنا متعودين على نظام قبل تخلص الجامعة

وللحقيقة كانت ترجع من الجامعة وتظبط الغدا وتجهز الامور كلها ب 3 ساعات فقط

فكنا نريح ساعة نوم وكل شئ تمام

بس من خلصت هالجامعة وصار عندها وقت فراغ صار مزاجها مش ولا بد

والحمد الله البيت ملك ولله الحمد بس علي قرضين الاول زواج والثاني تاثيث البيت

فما يبقى بالراتب الا شئ بسيط اقسمه بين مصاريف البيت ومصروف لها شخصي ومصروف لي

ولا انا ودي ادخلها معهد الصبح تتونس فيه وتضيع وقت فراغها

وبالنسبة للعمل انا مو معارض انها تشتغل وتتوظف بس من كثر الوظايف عندنا البنت محتارة وين تتوظف <<<< يتلكع

صعبة تحصلون وظايف باقي ندور لها وظيفة وندور واسطات والله يعين

وبالنسبة للجدول لزيارات اهلها جربناها ما ظبطت

الظاهر مالي الا اصبر على هالتعب الى ما يرزقنا الله بمولود تلهى فيه

ادعولنا بالذرية الصالحة الله يجزاكم خير على المشاركات والنصايح اخواني

تحية طيبة

الله يرضى عليك اخوي تركي توني اشوف ردك بس اتوقع انه وافي وشافي

وان شاء الله يصير خير الليله وانت مثل ما قلت ما تسمى مشكله بس تضايقت من الرسالة لانها مو اول مره يحصل فيها هالشئ ولا عمرها ردت بهالشكل

ويمكن رد فعل منها لما قلت تراني طفشت من هالاسلوب

يعطيك العافية اخوي