بداية اشكر القائمين على هذا المنتدى وجعله الله في ميزان حسناتهم , فهو منتدى رائع ومختلف جدا عن غيره
من المنتديات الإجتماعية وخاصة قسم " الحياة الزوجية " , ولا أظن أن الإختلاف يخفى على أحد ..
عشان كذا ودي أحط حكايتي بإختصار " وتشفير " لبعض الأمور , وياليت الي ما عنده كلمة طيبة يمر
مرور الكرام مثل الزوار بالضبط .. ويتذكر "
فليقل خيراً أو ليصمت " ..
حكايتــــــــــــــــــــــــــــــــــــــي :
ابداها من جدي الله يطول بعمره , لأنه هو الأساس , جدي ساكن بقرية زي أغلب القرى , ما فيها عمران
إلا بيوت شعبية قليلة ومعدودة , والكهرباء تشتغل نص النهار وتنقطع بالليل واحيانا تشتغل يومين وتنقطع يوم كامل " عاد والله مادري القرى كلها الكهرباء عندها كذا ولا بس قريتهم " , وعيال جدي اللي هم أبوي وعماني الإثنين , كلهم طلعوا من القرية وراحوا المدينة عشان يكملون تعليمهم وطبعاً تزوجوا من المدينة ..
واستقروا هناك وما نروح لجدي إلا بالإجازات , وكلها اسبوع بس ,وبعدها يروحون يصيفون ..
وخلال الدوام الرسمي يمر ابوي وعماني على جدي كل خميس بالتناوب .. طبعاً بدون حريمهم لأنهم
العلاقة بينهم وبين جدتي مش ولا بد " مع أن جده طيبة وحبوبة " لكن هم الله يهديهم يشفونها ماهي قد المقام
وما يتحملون القرية واجواءها وووو إلخ الحجج الي يجبونها ..
المهم : أني أنا أحب جدي وجدتي وامووت بالجلسة عندهم , وكنت يوم نروح لهم , وامي وابوي بيروحون
يصيفون أنا أبكي وأمسك بجدي وما أبغي اروح معهم فجدي يخليني عنده ويوم يرجع أبوي من سفرته يأخذني
بتقولون لييييييش ؟ أقولكم لعدة أسباب :
اولاً : جدي وجدتي يدلعوني على الآخررررر , أي شي اطلبه يجبونه لي , ماهو زي أبوي وامي ياكثر
أخواني وخواتي وما حد معطيني وجه ..
ثانياً: الحياة عند جدي كلها لعب في لعب , وما حد يمنعني ألعب من اصحي إلى ما انام .
ثالثاً : جدتي عندها غنم , وجدي عنده إبل , وأروح معهم لها , ويخلوني اسميها ويقولون إنها لي ...
فاقعد عندهم طووول الإجازة الى ما يتذكرني ابوي وامي ويجون يأخذوني ..
ما حد كان ينافسني على القعدة عندهم إلا ولد عمي , غيااااااار درجة أولى يقلدني ويجلس عندهم ..
مع أن أهله مدلعينه وما هم مخلين عليه قاصر بس تقليد لي يجلس .. وابوه وامه ما يمنعونه ..!
ولا أخته بعد تقلده وتجلس هي الثانية
ووقت أزعل جدتي تقول لا مايصير انتم أخوان وانا أحبكم كلكم وووو وتضحك علينا ونرضى ..
وين المشكلة ؟!!!!
المشكلة أن الوضع ما بقى كذا , أمي صارت تمنعني أجلس عندهم , وأبوي يوافق أمي بكل شي ..
وتقول اني كبرت وما يصير أجلس هناك وخاصة مع وجود عيال عمي " مع انهم ما يجون إلا بالإجازة
واسبوع ويرحون " لكني كنت أبكي وأضرب عن الأكل إلى ما يوافق ابوي يخليني أروح ..
بس بشرط أروح أسبوع الإستعداد للإمتحانات عشان يضمنون ان ماحد هناك , فكنت اروح ...
ولد عمي سالف الذكر ماحد يمنعه بقي على ماهو عليه يجلس عندهم طووول الإجازة واستقر تقريباهناك
يقوم بأشغال جدي وجدي مبسوووط فيه .
.
وبنت عمي ملت على قولتها وما عادت تجي عندهم , لأنها أصلاً كانت تقلدني ..
ويوم صارت ماتجي صاروا ما يخلوني اجلس لحالي , يقولون تجلسين مع مين ا قولهم مع جده وفيه بنات جيران جده ...
وأجلس ازن على أبوي وهو داخل وهو طالع إلى ما يقولي روحي ..! بس تخرب على أمي احياناً وأحياناً اروح بالقوة , وجدتي الله يحفظها يااارب تفرح يوم تشوفني فديتها أونسها واساعدها بشغالها ..
وحطولي تلفزيون عشان هم ينامون بدري وأنا اسهر فاجلس عليه وقت تكون الكهرباء شغالة بس أحيانا تنقطع ,
فما يكون عندي شيء يسليني وخاصة أن بنات جيران جده مستحيل يقعدون معي لوقت متاخر فما القى إلا ولد
عمي جالس بالحوش او وراء البيت عند البئر فاجلس معه نسولف لان أي صوت ببيت جدي وقت إنقطاع
الكهرباء ينسمع عشان كذا نجلس بعيد ..
وهو يجي وقت اسبوع الإستعداد على انه يذاكر بمكان هاادي , وهو خراااط يهرج معي طوول الليل والنهار مع جدي ...
وجدتي الله يطول بعمرها تصحى دائماً قبل الفجر تصلي , فشافتنا جالسين وراء البيت وما عجبها الوضع ,
مع إنه تشوفنا جالسين احيانا بالحوش ودائم نجلس عندها وما بينا إلا سلام وسوالف عادية ..
بس هالمرة عشانا بعيد , قالت لي ياغزلان روحي لأهلك , قلت لها ليه ياجده مليتي مني وبتطرديني أنا وأنا
وووو ألخ وهذا زي اخوي وأنتِ تقولين إنا أخوان .... إلخ ..
وسكتت جده , بس الظاهر إنها قالت لجدي , فقال لنا جدي من تتخرجون أنا بزوجكم .. وبهالكلام جدي جرأنا على بعض خلاص بنتزوج .. فما عاد عندنا مشكلة نجلس ونهرج طوول الليل وبالنهار اروح مع جدتي لغنمها وتكون تعبانة أحياناً فأنا أحط للها العلف والماي ولد عمي يلحقنا على أنه بيساعدنا واخذنا على بعض ..
" ومن البلاهة الي في نسيت أمي وأمه أن بينهم عداوات وما يدانن بعض ونسيت ان أبوي وعمي تابعين لحريمهم ورأيهم من رايهم " ..
ويوم جاء أبوي وامي قال لهم جدي , فزعلت أمي وقومت الدنيا , وطلعت كذبة إني مخطوبة لولد فلان , وابوي وافقها وقال صحيح , كله عشان يصرفون جدي .. وانا لا مخطوبة ولا شيء ..
بس أمي تموت بالمظاهر والفشخره الكذابة ..
وجدي مع إصرارهم سكت وما تكلم وشال يده من الموضوع ولا عاد يعيده , أنا هنا خفت يوم شفت موقف جدي لأني صراحة كنت أنا مختليه ويا ولد عمي ..
بكيييت مع رفض اهلي وحسيت بالخطر , اخواتي يتريقون علي ويقولون كل هذا حب , ماهو مسألة حب وبس ..
الموضوع أكبر بس ما حد فاهم .. ولد عمي حاول يقنع أهله يخطبوني بس أمه أجرم من أمي وأبوه زي أبوي ..
فقال ما فيه إلا نروح لجدتي ونقولها وهي تتصرف , ورحنا لها وقال لها ولد عمي وسألتني صحيح فأكدت لها ..
وقالت لجدي , وجاء يسألني من جد ولا بس عشان نضغط على أهلي واهله لكن قلت له إنه جد ..! ولأول مره
جدي يمد يده علي وضربني , وضرب ولد عمي ..
وارسل لأبوي وأبوه وقال لهم تعالوا بدون حريمكم , جوا بسرعة , وقال لهم الموضوع " وأنفضحنا أكبر فضيحة "!
أبوي ثار ودخل علي وسبني وضربني ضرب ما انساه بحياتي ولو جدي ماهو عندي كان والله بيذبحني لكن عمي وجدي ابعدوه ..
وجاء ولد عمي بيمنع أبوي , فتركني ابوي وطاح هو وعمي بولد عمي ضرب..
أنا شردت لجدتي وجلست أبكي وأقولها لآتخلين أبوي يأخذني ..!
وقال لهم جدي إنه لازم نتزوج , أبوي قال بعدين طبعاً بيأخذ شور أمي لكن جدي أصر عليهم بالإستعجال
فراحوا جابوا امي وأمه .. وطبعاً أبوي وعمي ما يخبون شيء على حريمهم وفضيحتنا كبرت ,
أمي قالت خلاص ما عندي مانع بس ماهو الحين , اعطون اسبوع بس , وراحت لولد خالي بتزوجني اياه
كله كره بجدتي ومرة عمي , ولد خالي أكبر مني بــ 17 سنة ومتزوج وعنده ولد وبنتين ..
بس ماهو هنا المصيبة , المصيبة بيتزوجني بالسر .!!!! حرمته شرانيه ويخاف من ردة فعلها على قولته..
وخلال هالفترة أنا كنت بيبت جدي ابوي قال ما يبغي يشوفني وحلف ما ادخل بيته.. وبعد يومين جت أمي وقالت لي أن ولد خالي وافق وبيدفع المهر وانها اتفقت على كل شيء , الله يهديها الكره عماها وقامت تتصرف تصرفات ماهي صاحية ..
انا رفضت وقلت لها أنا ماني لعبة عندكم ووو الخ , ضربتني وقامت تدعي علي بالحريقة وأن الله يأخذ روحي ويفكها مني , واني جبت لها العار والفضيحة ونزلت مستواها لمرة عمي وجدتي وشمتهم فيها ...!
طبعاً ما فكرت فيني لا فكرت بمستواها وبأعداءها وانا بداااهية .. أهم شيء تستر علينا على قولتها ..
(بتستر علي وهي فضحتنا وعلمت ولد خالي الي فزع لها بيساعد والله عالم هو علم مين بعد..!)
جت جدتي على صوت امي وهي تصارخ علي وحاولت تهديها , لكن أمي غلطت عليها وتلفظت عليها بألفاظ وقحه ..
وقالت لها : كل منك , أنتِ الي كل شوي هاتوها لي , وأنا أمنتها عندك , وخليتها لعبة لولد فلانة .. تقصد مرة عمي جدتي ما تحملت وجلست تبكي وتحلف أنها ما درت ووو إلخ . قطعت قلبي أول مرة اشوفها كذا .! وحقدت علي أمي ليش تسوي بجده كذا ..
-راحت أمي وهي مصرة تزوجني ولد خالي وبالسر , " ياربي مين يمنعها , ابوي تابع لها , جدي وجدتي ما ابيها تغلط عليهم " .. فما كان قدامي إلا الشرانية ... زوجة ولد خالي هو يخاف منها وهي مو دارية إنه بيتزوج ..
وصيت أختي دق عليها وتقول لها : أن زوجها جاي يخطبني وأنه قال إنها موافقة , وانا ماراح أوافق إلا اسمع موافقتها بنفسي وإذا ما هي راضية تنسي الموضوع ولا حد بيدري ؟؟ قالت لأختي : أن زوجها كذاب وان فيه وفيه ...إلخ وان القرار لي ..
بنفس اليوم جاء ولد خالي لأمي وقال أن زوجتة كسرت البيت وأخذت جواله وراحت بيت اهلها, وقال عطيني
فرصة شهر شهرين إلى ما تهدأ زوجتة ويمكن يمكن يتزوجني إذا رضت زوجته. ! وراح وما عدنا نشوفه ..
وزعل وقال لأمي إني انا الي كلمت زوجته , جتني أمي وانكرت وقلت إنه كذاب وإنه يتهرب من الموضوع ..
وإنه ماهو رجال راح وخلانا من درت زوجتة كيف لو تزوجنا بيطلقني من اول ما تقوله طلقها ..!!
( كل هذا صار خلال يومين بس من دروا أهلي بموضوعنا ) ..
- وهذا المشاكل كلها من جهة أهلي ....
نجي لجهة أهل ولد عمي :
نفس موقف أهلي , وأمه أشد من أمي , وأكثر بغض لنا ..
عارضت ورفضت وجتني ببيت جدي وسبتني وتلفظت علي بألفاظ قذرة ووصفتني بالـ ......! وقالت إني ساحرة ولدها وإني أغويته عشان يتزوجني , حاول ولد عمي يسكتها لكن عجز , وقالت له ماني امك لو تزوجتها , وأن جزمة ريم " بنت أختها " تسواني وقالت له انها بتزوجه ريم بس يتركني ... !
كل هذا وابوي وعمي ساكتين وجالسين بالمجلس ينتظرون حريمهم يحلون المشكلة ,, وجدتي وحليلها مو عارفة
إش تسوي فيهم جالسة بس تصيح ..! لكن جدي الله يطول بعمره دخل وطرد أمي ومرة عمي وقال لأبوي وعمي
خذوا حريمكم لا أشوفكم ببيتي , وعيالي أنا بزوجهم وبيجلسون عندي ..!
وما كان من ابوي وعمي إلا الرضوخ لجدي والعصر ملكوا لنا , وبالليل جدي سوا لنا زواج بسيط ببيته ..
وأهلي واهل عمي كلهم حضروا وجيران جدي بس ماحد بارك لنا إلا جدي وجدتي وجيرانهم " طبعاً ما يعرفون بالموضوع " وبسس ..!
مرة عمي ترمي علي كلام طول الوقت وما باركت لولدها وقالت له أنسى إن لك أم , ولا عاد أشوفك إلى ما تتخلص من الـ......وتزوجتها !
أمي ما قصرت علي بالكلام الجااارج " إلى الآن ما انساه " وقامت تقول أني ارخصت نفسي وتزوجت واحد ما
عنده حتى بيت , واني أخترت نصيبي بنفسي واستاهل ما يجيني .! وشوفي اختك " أختي كانت ملكة وبتتزوج
قريب" شوفي زوجها وين بتسكن وين بيكون زواجها وكيف بتعيش ..!!
ابوي ما شفته من وقت ما ضربني , بعد الزواج نادى أمي وطلعت وراحوا ولا شفته ..!
- مع إني حسيت براحة بعد ما نتهي الموضوع إلا أني خفت بنفس الوقت وحزززنت كثيير ..
( كانت أسرع ملكة واسرع زواج كل شيء صار بسرررعة كبيرة بدون تفكير ولا تخطيط ولا شيء وبدون حتى رضا أهلي وأهل زوجي )
طبعاً مانتهي الموضوع إلى هنا .. لالالا !
تقريباً من هنا بــــــــــــــــدينا ...
جلسنا عند جدي إسبوع , وجدتي " وجودها خفف علي كثيير " فرحت فينا واستانست كثيير بوجودنا عندها
وهي الي جهزت لنا الغرفة , وجابت لنا دبل " ههه دبل بعد الزواج وحليلها جدتي " ما حد عطانا وجه غيرها هي وجدي , وقت لبسنا الدبل سوت غداء لجيرانها تقول أن أمي ومرة عمي ما خلوها تفرح بالزواج ..
وفرحااانة إن الزواج صار بيتها ..!
كانت ناقصتني اشياء كثير ودي أجيبها من بيت أبوي فقلت لزوجي قال لا ما فينا على الهواش والمشاكل يكفي الي جانا .. لكني اصريت فقال بالاول كلمي امك لا نروح وتفضحنا هي وابوك, طلعنا ويوم وصلنا كلمت أمي قالت لي لا تجيني اغراضك برسلها عليك كلها .. ! " أعووذ بالله معقولة ما تبغين تشوفيني " ..!
لكن زوجي قال عناد بنروح وخلي أحد يتكلم أنتِ زوجتي الحين , رحنا كان ابوي موجود سلم علينا بجفاف
بعد ماكان يحضني إذا جيت من عند جدي , وكان واضح إنه ما يبغى يشوفني لا أنا ولا زوجي .
.
أعطاني فلوس على باله أني جاية ابغي فلوس , لكن زوجي رفض وقال ياعم زوجتي ما بينقصها شيء
-رحنا بيت أهل زوجي قال بيشوف ابوه وامه , خفت صراحة من امه , لكن أصر نروح , عيت تسلم علينا وقالت لزوجي لا اشوفك وهذى حرمتك , وابوه تركنا وراح .. !
رجعنا بيت جدي جلسنا شهر وتوظف زوجي وظيفة بسيطة وطلعنا من القرية واستاجر شقة صغيرة , ومازلنا فيها .
وتمرمطنا مرمطة ما قد شفتها خاصة مع مرتبه الضعيف , والملل الي انا فيه , ما عندي حد , وأهلي رافضيني واهل زوجي أشد رفض , عايشين منبوذين منهم .. !
قلت لزوجي نرجع لبيت جدي أكرم لنا , لكنه رافض ويقول لمتى بيصرف علينا وصعب نستقر هناك ..! وانا
سمعت كلامه مع إن عارفة إن افكاره احياناً تودينا بداااهية ..لكن شسوي لا حياة مستقرة ولا أهل عدلين ..
- ما توقعت ابوي وامي بهالقسوة , وحتى أهل زوجي قسوا عليه , وابوه اخذ السيارة الي كان
معطيه إياها ,ليه طيب , ؟؟! صح ان جدي جابله سيارة غيرها بس مادري ليه كل هالبغض ..!
حرااام والله الي يسونه , الى متى يعني بيقاطعونا , سب وانسبينا , وضرب وإنضربنا , وتشريد وتشردنا ,
وفضيحة وإنفضحنا وش بقى أكثر ؟!! يعني معقووول كل هذا ما فش غلهم ..
إذا كان الله يقبل التوبة ليييش هم ماهم راضين يغفروا لنا ..؟!!
-
خلاص دفعنا ثمن غلطتنا , غلطنا وبعدين تزوجنا , يعني نرجع الماضى وما نغلط عشان يرضون علينا زوجي يقول من وحنا صغار وحنا عند جدي , اش معني الحين حنيتِ لأهلك ..!
وصراحة مادري ؟ بس وحشوني كثير امي وابوي واخواتي وبيتنا , وعلاقتنا المستقرة , نفستي تأزمت
وحنا عايشين ومو عايشين .. وزوجي الي مو راضي يرجعنا لجدي ..
02-05-2011, 05:47 AM
ضوابط المشاركة
العرض العادي
