السلام عليكم ..
أول ماتخرجت وتوظفت تزوجت على طول .. بس للأسف الزواج الأول كان فاشل لأسباب كثيره منها عدم الحب وعدم التفاهم .. بس مابي افتح موضوع زواجي الأول لأنه من جد ممسوح من ذاكرتي .. بس رزقني الله بمولود من زواجي الأول .. يعني اول مولود لي من طليقتي وعايش بعيد عني

في زواجي الثاني قبل 3 سنوات تقريبا .. تأسس على حب والحمدلله .. وعشنا أجمل اللحظات .. وخصوصا انا .. احبها لدرجة الجنون .. عشنا فترة طويله مرتاحين وبدون أي مشاكل .. بس كنت أفكر بالمولود اللي عايش بعيد عني .. صح اني اشوفه من فتره لفتره (طويله) .. وأحاول اعوض له حنان الأب .. بس المشكله انه بعيد لدرجة اني ما أشوفه بالسنه الا 3 او 4 مرات .. أنا كأب لازم أفكر فيه .. أفكر وشلون عايش .. وشلون ينام .. مع اني والحمدلله مرتاح من ناحية انه مافي أي قاصر من ناحيه ماديه لأني شهريا ارسل مبلغ معين علشان يلبس وياكل ويصير أحسن الأطفال .. زوجتي انا متأكد انها ما تكره طفلي .. بس ماعمرها تلكمت عنه .. وأنا ساكت قلت يمكن الوضع يتحسن بعدين وتراعي ظروفي وتحسسني انها تحبه وتسأل عنه ..

أنا الحين عندي طفل من زوجتي الثانيه .. عمره تقريبا سنه .. وأنا من قبل لايجي الطفل وانا حالي متدهور .. من كثر ما أفكر بطفلي البعيد احس ان حالتي النفسيه تغيرت .. حالتي النفسيه صارت سيئه .. لدرجة اني تغيرت على زوجتي المسكينه .. مع اني أحبها .. صرت عصبي بدرجه فظيعه .. حطمت قلب المسكينه .. اللي كانت بانيه آمال كبيره في زوج يكون بمثابة الأب والزوج والصديق وكل شي .. انا بعد ما أغلط عليها اكتشف اني غلطت واعتذر .. طبعا بعد ما ينهد حيلها .. وهي المسكينه تسامح وأنا أواعدها اني ماراح اكرر الغلطه وماراح اعصب .. تكررت العمليه أكثر من مره لدرجة انها قللت حبها لي .. كل شي ماصار مثل أول ..تغير

حالتي النفسيه وصلت درجه فظيعه .. حتى وبدون مدح لنفسي كنت ذكي ونشيط بشغلي .. الحين أحس ان تفكيري متجمد وصعب علي أفكر في أي مسأله ... حتى مستوياي بالدوام صار زفت .. لدرجة اني صرت اكره الدوام .. بس متحمل وأقول ان شاءالله ربي يفرجها وترجع المياه لمجاريها ..

قبل فتره بسيطه مرينا بظروف خلتنا نبعد لفتره طويله .. تقريبا 3 اسابيع .. ظروف صحيه .. وأنا راعيت الظروف هذي وما سألتها او طلبت منها شي .. لين تحسنت الظروف .. وذاك اليوم كنت أفكر بدرجه جنونيه و تناقشت معاها في الموضوع .... فتغيرت علي وزعلت من اسلوبي .. انا نسيت اني غيرت اسلوبي في المره الثانيه .. فكنت اذا تكلمت معاها ترد علي بكلمه او كلمتين .. قلت انتي ايش اللي زعلك؟ .. قالت اذا انك ماتحس مو لازم أقول لك .. قلت انتي الغلطانه .. ليش تسألين مره ثانيه ... وانت كيف كان ردك؟ .. كان بأسلوب جاف .. ليش ماتصير حنون ؟ .. ليش ماتحس فيني ؟ ليش انت كذا متغير .. وقالت انها تحس بيأس اني اتغير واكون أحسن .. حاولت اعتذر كالعاده بس استمرت بزعلها .. بس المشكله من جد مشكلتي .. وأنا الغلطان .. بس الغلط اذا تكرر ألف مره صعب الثاني يسامح ..

عموما زعلت مني .. وأنا حاولت أراضيها وقالت انها بتتخذ اسلوب ثاني بحياتها .. وانها راح اتطنش .. اللهم تقوم بواجباتها وبس .. لا أكثر ولا أقل .. بس انا حاولت أتاسف وما سامحتني .. صارت تكره كلمة آسف مني من كثر ما غلطت عليها .. كذا مره قلت لها انا تعبان نفسيا .. وأنا لو أعرف طبيب نفسي كان والله أتعالج عنده .. بس مشكلتي ان الأطباء النفسيين يعالجون بالأدويه وهمهم الفلوس .. ما يتعمقون بمشكلة الشخص ويحلونها بجلسات مثل أول

عموما المشكله هذي من يومين .. وانا كتبت لها رساله اني حاس بغلطتي .. ومتندم أشد الندم .. وانا احبها .. وتأسفت على قساوتي معها .. واعترفت اصلا اني قاسي معها .. وحلفت اني ما آكل شي لمدة ثلاث ليالي عقاباً لي .. والليله راح أكمل الليله الثانيه من دون أكل .. وقلت اني علشان أعاقب نفسي .. وهذا كله علشان أحبك .. بس هي مستمره بالزعل .. وتكره حتى اني المسها .. وتكلمني باسلوب جاف .. مع اني قلت لها بالرساله اذا عدّت الثلاث ليالي على خير راح أعوضها وما راح أغلط مره ثانيه .. ولا أقسى عليها .. وأنا استاهل العقاب هذا بس لأجل عيونها .. ولو لا سمح الله مت .. فأنا بندفن بالقبر بس حبي لك ما راح يندفن .. وأنا أقولها وأنا صادق

يا جماعة الخير .. ساعدوني بحل مشاكلي النفسيه .. ساعدوني بأفكار ترجعني لأيام زمان .. أنا والله محتاج أحد .. ادعي ربي كل وقت وأطلب انه يفرجها علينا .. والله انا تعبت وتعبت زوجتي معاي .. ظلمتها والله كثير .. وأنا احبها أشد الحب .. والله لدرجة الجنون .. بس مادري ليش يصير كذا ..

وجزاكم الله ألف خير


الأخ الفاضل :
برجاء البعد عن الوصف الشخصي

المراقبة Reemona

يا أخي أرجع لزوجتك مثل قبل
ولا تتسبب في فشل زوجك الثاني
وخصوصاً أن زوجتك الثانيه ما له دخل في الي تسويه بنفسك
و بنسبه لطفلك البعيد عنك فالفضل تزوره كل فتره
لانك لا تستطيع بعد هذي الفتره أنك تجيب أبنك لي يترباء عندك
وخصوصن أنك تقول أن زوجتك ما تحبه
فحرم تتعب الولد و أكيد هو عند أمه مبسوط ومرتاح وياخذا الحنان من الصدر لحنون له
ولو أنه من حقك بعد ما يصير عمره 7 سنوات تخيرونه في أنه يترباء عندك ولا عند أمه
وإذا تبي الولد يترباء عندك فصارح زوجتك بهذا الشيء بلا ما تعصب عليه من غير ما تدري وش السبب
أعرف لك شخص رب ولاده من 2 يوم من ولادته وكان ذلك بي مساعده من أمه الله يرحمه الي هي الجده للولد والابو تزوج من أخر
وكلهم في بيت واحد وكانت الجده تحبه وتعطف عليه وكذلك الزوجه الثانيه وترباء مع أخونه ولا يحس أنه من أم و أخوانه من أم بل يحبون بعض حتى أن هذا الولد كبر وتزوج و أصبح أبنائه ينادون زوجت أبها ماما من كثر ما يحبون بعض
والله يساعدك على حل مشكلاتك
والله يفرج لك مصيبتك

السلام عليكم،
اخي العزيز حرام تظلمها معاك، انت لازم تقرب اكثر من ابنك بس مش على حساب بيتك الثاني.
اتق الله في زوجتك واولادك منها، وفي ابنك من الزواج الاول.
الله الموفق.

بسم الله الرحمن الرحيم
أخي العزيز
بكل صراحة سرني كلامك عن زوجتك وعن حبك لها و أتمنا لكم السعادة الابدية

بنسبة لولدك اظن احسن مكان يعيش فيه هو حظن أمه
وما في احن من حظن أمه حتى لو كانت زوجتك الثانية ملاك في الرحمة والحنان
في هذه الحالة أعتقد الحل الانسب أنك تزور أبنك بين فترة وفتره أنت تحساه مناسبه لزيارة وكل ما أشتقت له روح زوره وانت ان شاء الله مراح تقصر عليه من الناحية المادية ولا من الناحية العطفية
عندها أنت عرفت أن ابنك يعيش في حظن يخاف عليه حتى من الهوء
وانت اعرف بحظن وحنان الام

بنسبة لزوجتك الثانية وسلوك العصبية
أنت تذكر كل ما نظرة لزوجتك
أن هذه المرأة تفديك بحياتها
لان المرأة اذا حبت تضحي بكلشي من أجل حبيبها
اعزمها على مطعم وراضيها ترى مافي أحن من قلب البنت اذا حبت
والبنت قلبها مرهف جداً

والله أسعدني حبك لزوجتك
بس أنتبه لا تهدم الحب
والصبر له حدود

الله يهنيكم

__________________

أشكركم أعزائي( f10 ) و ( najwa78 ) و (أنا حساس) على ردودكم ..

أنا والله مافكرت ان طفلي الأول يعيش عندي .. بالعكس .. مقتنع انه كونه عند أمه وتعود على حنانها أحسن له .. هي المسأله مسألة عيشة الطفل .. اذا اني متأكد انه راح ان شاءالله يتربى صح وراح يكون مبسوط فمافيه داعي اني اعذبه واجيبه عندي وهو ماتعود علينا .. وأخليه يفقد حنان أمه .. أو أمه تتعذب .. والله صدقوني أنا متطمن انه عايش عند امه .. بس كأب وعايشين بعيدين عن بعض أكيد بفقده وأفكر فيه كل لحظه ..

أنا كل اللي أبغى منها انها تحسسني انها معاي .. وتشاركني تفكيري .. صدقوني لو تسأل عنه بين فتره وفتره يكفي ..

عموما .. مشكورين على الرد .. ماقصرتوا والله يكثر من أمثالكم

اخوي سوزوكي..
بعض الناس اسمه حمال الاسيه ..
ولو ماكان عنده مشاكل يدور عليها ويتقمصها
غصب يتمشكل
الله يصلح قلبك ياخوي..
مادام الله قدر عليك تطلق الاولى وصار لك ولد
وعلى كلامك الولد عايش عيشه طيبه مع امه..
ووفقك بزواج ثاني ناجح جداً..
فما اشوف طرف غلط بالقضيه الا سوزوكي..
زوجتك الثانيه تحبك وتموت فيك..
وسلبيتها اللي تحسها تجاه الولد لأنها حاسه
بغيره منه وتخاف من رجوع العلاقه مع امه..
بس هي لايمكن توضح هالشي..
وانت جيت وخربت الدعوى وأكدت شكوكها
باهتمامك الزايد بالولد وتفكيرك الدائم فيه..
لاتستبعد انها تشك انك تفكر بأمه!!
لأن تفكيرك بالولد ماهو طبيعي..
هو نايم !!
هو جوعان!
مادام انت موقن انك ماقصرت بحقه وتزوره
ويجي لعندك..
خلاص ريح بنت الناس..
ولاعاد تتكلم فيه قدامها بزياده ..
وفهمها انك تحس بواجبك ناحية ابنك ولو كان
ماعليه قصور من اهل امه..
هذا احساسك بالابوه اللي تكنها لأبنك الله يقر
عينك ببره..
وحسسها انها الحبيبه والوحيده بحياتك..
ارجع زي اول ولاتخسر نفسيتك وتحطم زوجتك
اللي مالها ذنب.
وتأكد ان عدم سؤالها مرده خوفها وغيرتها فأرجوك اعذرها..
والله معاك.

بارك الله فيك اختي واحة الاحزان كلامك 100%

اخوي سزوكي زوجتك لما ما تهتم بلسؤال عن الولد فهي اكيد تغار عليك من زوجتك الاولى

وهذا دليل حبها لك وش تبغى اكثر من كذا وفقك الله وزوجتك ...

__________________







[SIZE]عامٌ قد بدأيلملم اثوابه استعداداً للرحيل فأغفر يارب ذنبي فيه وزللي وتقصيري .

اللهم اسالك بمنك وفضلك ان تحقق لي أمنية حياتي ...

أخي الكريم سوزوكي ,, إسمحلي مشكلتك في هذه اللحظه تحديدا هي

الجوع أنت جائع !!!!

إذهب أولا وتناول شيئا وذر عنك هذا النوع من العقاب البدني والنفسي ,, ماذنب معدتك تخويها لثلاث أيام ؟؟ لماذا تعاقبها وهي بلا ذنب ؟؟؟

زوجتك لن تألُ بالا بجوعك ما دمت قد جرحت مشاعرها ,, وستتركك تنفذ عقابك لنفسك !!

أخي الكريم قد تهدمت حياتك الزوجيه الأولى سابقا ,, فلا تتسبب بهدم حياتك الحاليه ,, ولا تجعل إبنك الثاني ضحية أخرى يدفع ثمنها بلا ذنب بسبب بعده عنك .

شعورك كوالد طبيعي جدا وأحد منا لا ينكره عليك ,, مع ذلك أنت على يقين من سلاسة حياته مع والدته وما يدفعك للتفكير العميق به هو شوقك لفلذة كبدك ليس إلا ,, ولا بد انك تستبعد أن يكون معك في حياتك الحاليه ,, حيث أنك قد لا تضمن وضعه مع زوجتك ومهما بلغت من درجة الحنان فسيبقى القلق ينتابك خلال فترة عدم تواجدك في البيت ..

أنصحك أخي الكريم ,, لا تتسبب في إرباك حياتك الزوجيه والعملية أيضا ,,

ما يُطمئن في إمكانية إيجاد الحلول ,, هو اعترافك بالخطأ في جفاء معاملتك مع زوجتك ,, فثق تماما بأن الكيل ومهما استوعب فسيطفح في النهاية ..

إستعن بالله أخي الكريم ففي ذمتك الآن زوجه وطفلين تنفق عليهما فلا تتسبب في امتعاض واستياء أرباب عملك من تقصيرك في أداءه على الوجه المطلوب , حيث أنهم ومهما أحسوا بما تمر به من مشاكل إجتماعيه فلن يصبروا كثيرا ..

توكل على الله أخي الفاضل وفوض أمرك إليه تعالى فهو البصير بالعباد .. وهو أقرب وأكثر عطفا منك على ولدك ,,

أحسِن إلى زوجتك التي تحبك واكسب وجودها كزوجة محبة في حياتك ,, لا تفرط بها فتندم حين لا ينفع الندم ,,, اقترب منها وعاهد نفسك على معاملتها بالحسنى كما أحببتها فالمسأله ليست عواطف فقط ,, هناك تطبيق عملي قولا وفعلا ,, فزن كلماتك معها ,, واحرص على مشاعرها المرهفه وارفق بها .

وحاول ان تُسِر مشاعرك في يخص إبنك الأول في نفسك أمامها ,, حتى لا تترك لها مجالا في أن تذهب بالأفكار بعيدا ,, حيث الشك برغبتك في استرجاع زوجتك السابقه ,, وتأكد بأن الأخوين سيلتقيان يوما وسيتحابان ما دامت علاقة الدم تجمعهما وما دُمت تساهم في غرس ذلك بهما .

دامت السعادة عامرة في بيتك.

__________________

ألا بذكر الله تطمئن القلوب

اخى الكريم ارى انك متحامل على زوجتك وكانك تعاقبها على بعد طفلك عنك بس الحقيقه يمكنط ان تزور طفلك وتتود له وهناك كثير من السبل التى تساعدك على ذالك اما بالنسبه لزوجتك اعتقد انها عندها حق فى اسلوبها معاك يجب ان تعتذر لكن باسلوب اخر اى انك تاتى لها بهديه او بباقه زهور وتحدثها برومنسيه واعتقد ان هذه الطريقه تصلح باذن الله

اذا طلق الزوج زوجته الاطفال هم اللى يضيعون

الاب يتزوج

الام تتزوج

الاطفال فى النص

الله يفرج همك وهم جميع المسلمين ........اكثر من الاستغفار اخى الكريم

__________________

تزود من التقوى فإنك لا تدري إذا جن ليل هل تعيش إلى الفجـر

فكـم من فتى أمسى وأصبح ضاحكا وقد نسجت أكفانه وهو لا يـدري

وكم من صغار يرتجى طول عمرهم وقد أدخلت أجسادهم ظلمة القبـر

وكـم من عروس زينوها لعرسـها وقد قبضت أرواحهم ليلـة القـدر

وكـم من صحيح مات من غير علة وكم من سقيم عاش حينا من الدهر

فمــن عـاش ألفـا وألفيـن إنـه لابـد من يـوم يسـير إلى القبر

الله ارزقنى الذريه الصالحه وكل محروم ولجميع المحرومين يارب .
اللهم يامقلب القلوب ثبت قلبى على دينك