زواجي على حافة الإنهيار
السلام عليكم و رحمة الله و بركاته .. انا عضوة جديده فالمنتدى و ترددت وايد اكتب ولا لااا .. كل مره اقول مشكله و تعدي بإذن الله لين ما وصلت للحافه
تزوجت من سنه و شوي عمري 24 و عمر زوجي 32 و عنا ولد .. بدا زواجنا مافي أحلى عنه نحب بعض و متفاهمين و الحمدلله
ساكنه وياه في بيت العايله البيت الكبير مع امه
لاحظت من بدايه الزواج تعلق زوجي بأهله واايد .. مو ابن باهله حسيت طفل باهله .. يوم يقعد معاهم يتم يضحك و يسولف و يقول كل شي .. فالبدايه كان عادي عندي و عاجبني الوضع .. بس عقب تضايقت يوم ما يعبر وجودي بينهم .. يوم يستشيرهم بكل شي و ياخذ كلامهم امر عليه ..
اخته بعمر امي يحبها وايد و يحب يروح بيتهم عيالها بعمره تربوا ويا بعض .. وغصب علي اكون قريبه وااااايد منهم و الروح بروح غصب .. هن طيبات بس مو ميتات علي وعلى صداقتي ..مشغولات وانا اتم قاعده ادور منو يقعد معاي انحرج
اول فتره من زواجنا سويت الغدا و ما سخنته وايد .. قالي ردي سخني سخنت و تغدينا خلصنا .. عقب اشوفه قاعد مع امه و اخته و انا بالغرفه الي قريبه منهم مايعرف اني اسمع يقول حطت الغدا بدون تسخين بارد و من هالكلام .. طلعت و دخلت غرفتي على طول ما تكلمت و هو حس اني سمعت فاستحى مني وانا طنشت
ثاني شهر بزواجنا مر بظروف ماديه قالي عنها ف قدرت هالشي بس المشكله انه ما عوضني عن هالشي بالعكس .. كان يروح الدوام يرد اهله يكونوا مجتمعين فالبيت يقعد معاهم و شوي معاي و يطلع مع ربعه .. كنت اقعد مع اهله واحس اني غريبه كرهت البيت و كرهت وجودي فيه
كنت اقوله مب شرط نطلع و نصرف الفلوس مب كل شي.. هو طلعاته مولات كوفيات سينما وانا ما احب احب الطبيعه .. بس مايمشي عاللي اباه .. اقوله طيب نقعد فالبيت مو شرط نطلع مافيه فايده
بعد هالشهر ردينا طلعات يقععد معاي نطلع و يسهر بالليل و يا ربعه يتاخر وايد .. هاللشي كان جدا مضايقتي كنت احس انه مجبور علي و مايحبني
دوام عقب دوام ثاني مؤقت كان يتعذر دوم غيابه بدواماته و عقب يسهر مع ربعه و يرد البيت .. امه اغلب الوقت تسير عند بناتها عيالها وجيه
وانا من بدايه اليوم بروحي يرد زوجي ينام يصحى يقوم دوامه الثاني يخلص يرد عند ربعه يسهر و يرد البيت.. كنت كل فتره احاول المح له اني متضايقه مو متعوده على هالجو الوحداني يقول عقب بعوضج ان شاءالله ..
الويكند الخميس جمعه اهله و الجمعه في بيت اهلي و السبت يتجهز لدوامه طبعا كان طول الويكند يسهر لاخر الليل يقول يبا يرتاح عقب الاسبوع الطويل
مريت بايام كرهت عمري والله كله فالبيت و بروحي كنا مرات نطلع عقب يروح دوامه مرتين ل 3مرات فالاسبوع .. كل ما مرت فتره يتغير للاسوا
اهله يشوفني اني مقصره معاهم .. انا شخصيتي مب اجتماعيه وهو يقول اصلا ما تحبيهم ولا تبين تقعدين معاهم بس اهلج و خواتج اقوله خلني اتعود عليهم ..واهله طيبين وايد واحاول قد ما اقدر اتداخل معاهم بس هو قاعد يفرضهم فرررض
حملت ولله الحمد توقعت اهتمام يراعي نفسيتي بس للاسف عقبها بكم شهر كنت في بيت اهلي بنام لليوم اللي بعده اتصل االيوم اللي بعده اتصل العصر يبا يروحني(متصل عسب يخلص مشواره يفرني فالبيت و يطلع)قلت خلني و شلني عقب ما ابا اتم بروحي فالبيت تكلمنا عقب عصب و تنرفز ما اتذكر شو الكلام تزاعلنا و خلاني 3اسابيع لا اتصال و ولا شي.. ابوي اتصل فيه قال بينكم شي شو مستوي قال والله ماشي اترياها تتصل .. عقب كم يوم يا البيت .. ابوي تكلم شوي معانا و خلانا على طول زوجي صد عندي و قال لو تبين تردين عندي شرطين ما تزورين اهلج الا مره فالشهر! و السوق وياي بسس!!
علما اهله هو دايما وياهم ما يتركههم و انا لو عندي مشوار يقول كلمي فلانه بنت اخته ولا اخته .. ولو عندهن طلعات يزعل لو ما طلعت معاهن ..!
رفضت وصار كلام يت امي قعدت و رفع صوته يقول تبا ترد ترد ما تبا خليج شد مع امي و يقولي ليش تدخلت مع انه هو قاللها كل شي .. زعلت من موقفه .. و رفضت و طلع .. ورد اتصل و حاول فيني قلت مستحيل
عقبها بفتره كان يصير كلام بالفون تخيلوا احاول اقنعه و هو صاد بايعنها قال هذي شروطي تبين ومستحيل اتنازل .. و اخر شي قالي وهو يصرخ تبين شروطي و لا انتي طالق !! دخلر بهستيريه بكا ما توقعت امي خافت عالبيبي
بعدها بفتره ابوي قالي يا بنت لمصلحتج ريلج عصبي ماعنده تفاهم فيه حلين تبين الطلاق ولا ارجعج .. فكرت قلت بكسر الشر و برد قال ترا بردج وانا مكسور بس عشانج .. ردني ابوي و دخل سلم عليهم و تكلموا عقولة ريلي هجموا علي يقصد ابوي و اخوه
ردينا تعدل ما قام يسهر حده لساعه1 و يوم اكون عنده يفر الفون يقعد معاي يتصل فيني و هو برع .. عقب رد مثل ما كان يسهر طول الليل وكله دوام يالله يذكرني ..
ما يوديني لبيت اهلي الا فالشهر و اهله كل يوم وثاني .. والقهر لو قلت ليش بيت اهلي يقول اطلبي بيت اختي بيت حد كله بيت اهلج!
خالتي نفس الشي بيتها 10د رافض لنفس السبب .. صديقاتي ماشوفهم مايثق فيهن.. و صديقات بنات اخته ولا حد من صوبهم عادي
كنت اكلمه مرات يقوم يعصب كم مره يقول روحي بيت اهلج خلاص و من هالكلام ..
كنت اريح بيت اهلي و حتى بيت اهلي ما صرت اروح له و لا يطلعني .. خلص دوامه بعد رمضان يتم بعد برع يقول خليني على راحتي اعيش حياتي لا تضغطين علي وانا لي الله
مره كلمته بهدوء وحاولت فيه قلت له انا امل اتعب طول الوقت فراغ ب فراغ بروحي وانت كله منشغل عني .. نتيجه كلامنا بيت اهلي جمعه و جمعه لا و الجمعه اللي ما بروح نطلع ..
كنا نقضي مشاويرنا ايام الاسبوع شوي شوي الجمعه بس يعني ما اطلع الا الجمعه و الجمعه اللي اكون فيها بيت اهلي اتريا الاسبوع اللي بعده عشان اطلع لو عندي مشوار .. يعني مو نتمشى فيها .. مرات نطلع مال ساعتين عقب يفرني و يروح بيت اخته عقب اصدقاءه .. طلعتنا هو كله عالفون ما يكلمني ابد ابدا .. يرد الليل و هو علفون يتابع مسلسلات .. ولو انا وياه يفتح الالعاب كله ولا اشوف شو يسوي بفونه .. يوم اقوله تعبانه يقولي لو تعبتي اكثر اتصلي اوديج المستشفى!
نهايه شهر 1كان بدايه شهري .. اخاف يوم يسهر انه اولد .. تخيلوا مره كلمته بالليل الساعه2ونص عصب يقول ولو تاخر شو فيها هو الريال انا ما يحق لي و من هاالكلام قلت له كيفك بس اخاف اربي يصير فيني شي يقول اتصلي قلت له لو ما قدرت بعدها بساعه ونص تقريبا يا البيت بدا يتكلم و يتلحطم و انا ساكته قال قولي شي قلت شقول ماعندي شي اقوله و نمت .. صحيت و يبين انه حاس بتانيب الضمير و كان يوم جمعه و رحت ببت اهلي و بالليل تعبت و جتني الولاده و الحمدلله ربيت وقمت بالسلامه ..
وصلني لبيت ابوي و نزل لاول مره بعد المشكله و سلم على ابوي .. كان يجي يسلم عالولد شوي و يروح و لا كاني موجوده .. يتصل مال دقيقه يطمن علينا وشو ناقصنا و يسكر كنت متضايقه حيل احاول نطول المحادثه ارسله كلام حلو يطرش قلب وخلاص .. ابوي يوم يجي يقعد شوي و يطلع يقول عشان ناخذ راحتنا وهو يروح ..
اليوم اللي بعده واحنا قاعدين وهو عالفون يلعب كنت ابا اكلمه عالحليب الصناعي الولد فيه صفار و الدكتور قال نعطيه هو رافض الولد كان يجوع الطبيعي مايكفيه
شاف كلامي حنه و عصب و قوم الدنيا قال انا الرجال الكلمه كلمتي و انا الزوج اآمر و انتي تطيعي و من هالكلام قلت خلنا بمصلحه الولد بعيدا عن كل شي .. اخر شي قال حرام طلاق ماتعطيه علما هالكلام السبت و والجمعه على اساس اروح .. دخلت وانا معصبه قلت بكلم اخته الكبيره شفتها مع الطبيعي تقول اصبري بيطلع لج حليب قلت ما تكلمت لين ماشفت الوضع يومين وهو كله يبكي وعرفت انه ماخذ بكلامهم ولا ما بيكون متعصب لان بالعاده يقولي انتي ادرى
انا عطيته صناعي وعرف وعصب و صارت سالفه ماخذنها عناد تدخلوا الاهل ابوه متوفي الله يرحمه اخو يا البيت كلم ابوي طلع الغلط كله علي و يقول لاابوي بنتك الخسرانه كلامه يسم البدن المهم تمينا تقريبا شهر عقب تكلمت انا وياه بدون فايده اخر شي قال بيتصل تمينا نتكلم 4ساعات هو يقول انتي عصيتي ريلج ماطعتيه واقول انت طلقت وعصبت ولا صح طبعا مطلعني الغلط ولا ما كان عصب اخر شي اتفقنا ندفن هالموضوع و قال مشاكلنا الثانيه نحلها فالبيت نفس المره اللي طافت حليناها و رد
قال بيدخل البيت ويا اخوه و يتكلموا قلت ما بطلع والموضوع عند ابوي .. عقبها بكم يوم مكلمني يبا يشلني انا والولد لعند امه !! قلت تبا الولد شله بس انا لا .. وطرشت كلام انه للبيت الي انا فيه احترامه مب زياره تشلني و تردني بينا مشاكل لين نا نحلها و من هالكلام قال عصب وقال اصلا انتي ما تبين تردين و رقمي عندج متى ما تبين تردين اتصلي بيي اخذج هجم علي و تناقشنا و خلاص
الحين ما عرف كيف اتصرف .. اطلب الطلاق فالمحكمه ..اكلمه .. للعلم بالرغم من كل شي أنا أحب زوجي وااايد واتمنى ما توصل لطلاق وتنحل المشاكل يارب
مستجدات الرد8
http://66n.com/forums/showpost.php?p...65&postcount=8
03-04-2016, 08:19 PM
زواجي على حافة الإنهيار مستجدات الرد 8
ضوابط المشاركة
العرض العادي
