(كيف اقنع زوجي بعلاج مشكلتنا بالانجاب)
السلام عليكم ورحمة الله وبركاته

اتمنى يكون الجميع بخير وصحه وسلامة .

بشكل مختصر جدا واسمحو لي اكتب بالعامية ..

انا عندي مشكله كثير حساسه واحتاج من كل قلبي لنصيحه صادقه في الاسلوب اللي لازم اتعامل فيه مع زوجي .

باختصار انا تزوجت بعمر 29 وزوجي يكبري قليل مطلق من غير اطفال ، وقبل الزواج سألته عن سبب عدم الانجاب وخبرني انه عنده مشكله بسيطه وطلبت منه قبل عقد القران انه يعمل تحليل والله يسامحه الدكتور خدعنا وقال كل الامور تمام وكتب له على فيتامينات عقدنا القران وبعد كم شهر تزوجنا . ومن اول شهرين انا بديت اراجع علشان اعمارنا مو صغيره الحمدلله انا سليمه وكل اموري بخير . ولما تأخر موضوع الحمل طلبت منه يعمل تحليل عند دكتور ثاني مشهور وشاطر عندنا والنتيجه كانت انه عنده ضعف بسيط اخذ علاجات كم شهر وتحسنت الحالة كثير وطمنا الدكتور انه ممكن يحصل الحمل طبيعي استبشرت خير وفرحت لزوجي كثير ، وعلشان نستغل الوقت عملت 3 عمليات تلقيح وكلها ما نجحت .. نفسيتي جدا متحطمه الان عمر زواجنا سنتين واشوي .

المصيبه والبلاء الكبير اللي نزل علي كان بسبب اخر عمليه اللي كانت قبل شهر ، اخصائي الاجنه خبرني انه عينه زوجي كثير تعبانه على الرغم انه الاجنه في هالعمليه افضل من السابقة فعمل زوجي تحليل وهنا كانت الطامه العينه تعبانه كثير كثير وصعب حصول الحمل من غير عمليه والان الدكتور مايفضل نعمل عمليه قب لما ياخذ زوجي علاج كم شهر علشان ماتتكون اجنه ضعيفه ومايحصل حمل .

العمليه متعبه واجراءاتها طويله تعب نفسي كبير وجسدي ومادي لحد الان رغم انه حالتنا الماديه كويسه بس دفعنا كثير على هالمراجعات والعمليات حزنانه عليه مو راضي اساعده ولو بالقليل .

انا تصبرت قدام زوجي بعد كلام الدكتور ومؤمنه بقضاء الله بالعكس حمدت الله وشكرته الله يمتنحني وان شاء الله يؤجرني بس بعدين انهرت كأن عندي احد عزيز متوفي اكتشفت انه الامومه هو حلم كل حياتي مع انه مو ناقصني اي شي ثاني وظيفه وشهاده ومال وزوجي انسان كويس صحيح في اختلافات احيانا بس بشكل عام هو انسان يستاهل كل خير لانه نقي ورجال بمعنى الكلمه . انا مستعده اضحي علشانه واحس انه ربي سخرني له واخذت عهد على نفسي اصبر لحد ماافرح قلبه وانا اهديه باذن الله طفله اللي حلم فيه كثير .

بس هو مايبي يشوفني ابكي ولا اضعف عجزت معاه نروح نتعالج برا مو راضي، في ادويه مش موجوده بالخليج والطب متطور في المانيا مثلا رافض الفكره ويقولي لا تتنططين خلك بمكانك ابي طريقه اقنعه فيها ؟؟
احيانا يقول شوفي نصيبك لا تربطين نفسك فيني ؟؟ وانا مااقدر مستحيل استأمن اي احد على اطفالي غيره لانه شهم واعرف ماراح يحافظ علي وعلى اطفالي اي انسان غيره .
قلبي يألمني عليه مايستاهل وابي اكون قوية موقادره احس عمري يضيع واللي بعمري اطفالهم كبار بالمدراس واحس بالحسره احيانا واقول لو تزوجت واحد سليم كان الله رزقني واستغفر ربي واقول هذا نصيبي وكل شهر مع تغير الهرمونات احس اني اكره لانه سبب عذابي وتعاستي وارجع اشفق عليه .

الان ابي طريقه كيف اتعامل معه بدون مااحسسه انه سبب عذابي ؟؟ وكيف اقنعه نسافر برا ؟ ابي شي اشغل نفسي فيه وانسى موضوع الحمل ؟ يمكن الله ما يعطينا طول العمر مو معقوله بظل مهمومه طول الوقت ؟؟
والا هل انفصل أفضل ؟ انا في حيره من امري ؟؟

(تم التعديل ليتناسب مع المضمون)

عزيزتي .. رزقكم ربي الذرية الطيبة الصالحة
إن كنتِ تحملين هما .. فهو يحمل ضعف ما تحملينه
هل بدأ بأخذ العلاج؟
عملتي تلقيح داخلي أم طفل أنابيب؟

__________________

اسأل الله ان يرزقكما الذرية الصالحة..
ﻻتفكرين كثير بس احب اقولك تمسكي بزوجك نااادر بهالزمان الرجال اللي مثل زوجك
واللي معهم اطفال بالمدارس ماتدرين عن ازواجهم واخﻻقياتهم
تأملي نعم الله عليك والسفر بين فترة وفترة جيبي السالفة بهدوء ومو طلب بس مثل الاقتراح يعني دافع دافع نجرب وكذا وبدون نقاش وصياح
ومن ادمن طرق الباب يوشك ان يفتح له
ان شاء الله مع كثرة طرح الموضوع يقتنع
وخليك واضحة جهزي اسم المستشفى والمدينة والتكلفة التقريبية علشان يكون عنده تصور واضح ويسهل اقناعه ان شاء الله

وعليكم السلام ورحمة الله وبركاته

حاولي بكل الطرق ان تقنعية بالعلاج عن طريق والدة مثلاً او والدتة
لابد بأن يثابر في هذا ولا يجعل الإسستسلام في اول الحلول ...
ثقي بأنه يعاني أكثر منكِ وبأنه في حالة نفسية لايحسد عليها بل ورجولتة مشروخة الآن.

فإن أبى العلاج واستنزفتي كل الحلول واستعلمتي كل الطرق فأنتي مخيرة
إما أن تكوني عزيزة عند رجل شهم وحمالك معة مرهون برحمة الله
أو أن تنفصلي عنة وعذرك معك.

اسأل الله العظيم أن يرزقكم كل خير.

__________________
استغفر الله واتوب إليه

شكرا

زوجي ولله الحمد قوي جدا وعنده يقين تام انه الله بيرزقنا وانا ايضا بس احيانا اضعف واحس صبري نفذ ، وهو خبرني انه له فترة من بعد العمليه الاخيره ما ياخذ العلاج لانه يحسن نتيجه التحليل، فوقفه فتره قبل التحليل الاخير علشان بالضبط نعرف وين المشكله وعنده استعداد يتعب ويجاهد معاي بس يتنرفز ويكره المستشفيات ويقولي اسلوبي السبب لاني ادقق بكل شي واحب اقرا واعرف كل شي

الان العلاج اللي المفروض ياخذه مو موجود بالخليج والمفروض الدكتور يرتب معاه اشلون يوصل له فالان هو ما بدا فيه والدكتور شدد علينا ضروره انه نعيد العمليه بعد شهرين من العلاج

العملية الاولى تلقيح
وعمليتين اطفال انابيب

السلام عليكم ورحمة الله وبركاته. ..
أختي الكريمة زوجك يعاني نفسيا أكثر منك ،وانزعي فكرة بأنه سبب عذابك !
وتمسكي به فزوجك من الرجال النادرون في زمننا ، طريقة بكاؤك في اﻹلحاح لا تجدي بل ستزيد من نفسيته سؤء، الطب تطور في هذا الجانب كثيرا
ولله الحمد ...
حاولي بكل الطرق إقناعه وسيقتنع فهو لن يحرمك من الأمومة لأنه رجل شهم ويشعر بك ، لكن طريقة ضغطك عليه تجعله ينفر ويظن بأنه لا علاج ..
ارفقي به أرجوك ..
ورزقك الله الذرية الصالحة ..

شوفي هذا الموضوع بتهون عليك مشكلتك ..
الحمد لله زوجك مارفض العلاج :

http://www.66n.com/forums/showthread.php?t=254784

اختي المملكة من افضل الدول بالعلاج ليش تسافرين برا وتتخسرين
روحي للدكتور بندر العبدالكريم يمدحووونه كثير

واللي تعانينه عانيته والى الان أعاني فرج الله همي وهمك 💔

__________________
ربي لا تذرني فرداً وانت خير الوارثين

الله يرزقني ويرزقك وكل من تتمنى الذرية الصالحه
اما اقناعهم صعب جدا جدا

شكرا على الرد
الحمدلله على كل حال
انا حاليا خبرته عن مستشفى واسم دكتور وارسلته له مارد علي وما تناقشنا بالموضوع فخليته براحته
عندنا موعد عند الدكتور بعد كم يوم وبنشوف