السلام عليكم و رحمة الله و بركاته


أرجوكم بدخل في الموضوع على طول و بحاول أحطه على شكل نقاط و أتمنى من أصحاب الخبرة و الرأي السديد أنهم يدلوني طريقي لإني بجد أحس إني ضايعة و ماني عارفة أقرر !

1. أسلوب خطيبي غير صريح و دايما يعتمد اللف و الدوران. يعني مثلا لما أسأله مثلا مع مين طالع؟ يقول مع واحد! مستحييييل يقول مين هالواحد .. ما أقصد اسمه .. أقصد صديقه ولد عمه ولد خالته جاره إلخ! يعني أتفه الأمور يتعبني فيها و قيسوا على هالمثال!

2. عصبي و غيور جدا جدا .. مع إنه طيب بس عصبي لدرجة أن أحيانا يقفل الخط بوجهي بداعي انه معصب و ماله خلق يتكلم!!! كان ينرفزني الأمر كثيرا لكن كنت أتغاضى بدافع حبي له!!

3. أحس عنده نقص و يحاول يعوض هالشي من خلال اعتداده بنفسه كثير و انه هو و هو و هو ... أحيانا أقول له أنت شايف نفسك و بقلبي أقول ما أدري على إيش!

4. دقيق جدا لدرجة أنه علق على (كل حاجة) حصلت بالشوفة تخصني! حتى شكل عيوني ووووو !! مرات أحس إني ما عجبته لأنه أبدا ما يمدح شكلي!

5. يشوف نفسه أكبر مني فهالشي يخليه ما ينزل نفسه لإهتماماتي أبدا و يشوفها بنظره توافه! و هالشي جدا يضايقني و يجرحني و يحسسني كأني إنسانة تافهة و ما عندي سالفة! مع العلم أن فرق السن بيننا 5 سنوات و أشوف نفسي أثقف منه بكثييير و الحمد لله الكل يشهد لي أن عقلي كبير و ذكية و سابقة سني كثير. حتى أنا أحس أن خطيبي غير مثقف! و لا مرة أضاف لي معلومة جديدة أو حتى أسلوبه يأسرني! بالعكس أحس كلامه جدا عادي و دايما يعيد الكلام و ما عنده مصطلحات أو مفردات جديدة لدرجة إني أنا صرت أضيف لرصيده اللغوي بدل ما هو يفيدني من هالجانب. حاسة أن الرجل المثقف يأسرني يجذبني جدا بعكس خطيبي و هالشي يضايقني جدا و يتعب نفسيتي! بس طبعا بيني و بين نفسي هالإحساس حتى لما أصارحه بشي يثور و يلف و يدور و مستحيل يعترف أو حتى يرضى بإني أوجه له ملاحظة بأي شي يضايقني أو بالأحرى (ينفرني) منه!

7. غيور جدا علما بأني موظفة بمكان مختلط و كان عارف هالشي قبل لا يخطبني .. لكنه يحاول يغيرني بكيفه.. كل شي (لا) و على كيفه و يزعل كثير و ما يرضى أطلع أبدا إلا للضرورة القصوى و هذا إذا تفهم هالأمر!

8. كل شي يعتبره خصوصية و ما يحق لأحد يتدخل فيه .. و يكلمني بصيغة الذكر بالجوال و ما يناديني بإسمي بداعي الحرص كما يقول!!

9. عملنا جلسة مصارحة بطبعه الغريب و كان دايما يبرر أفعاله و أنها عادية و أنه يغار علي و يخاف علي إلخ !! و ما طلعت بنتيجة!

10. أي سؤال يوجه له و ما يبي يجاوب عليه يعتمد أسلوب اللف و الدوران و تحوير السؤال و كأنك تسأل عن شي ثاني تماما!! و دايم أقول له ما تبي تجاوب قول ما أبي بس لا تلف و تدور و تغير الموضوع! و القهر على أشياء تافهة جدا جدا يعني تعذيب نفسي على توافه الأمور مثل لما أسأله على أيام دراسته مجرد سوالف كيف كانت وو إلخ! ما يجاوب يلف و يدور أنا أتعب و أعدّي الموضوع بس يبقى التعب إذا على كل شي!

11. بعد ما تعبت من تصرفاته معاي قمت أحكي للي حولي و يفسرون تصرفاته بالتنكر بالتليفون بأنه إنسان جبان أو له علاقات سابقا و من هالكلام. ما أخفيكم تأثرت جدا لكني ما أجد هالكلام ينطبق عليه لأنه - حسب كلامه - إني أول إنسانة يخطبها أو يعرفها و ما عنده خبرة بكيف يتعامل و أنه يتصرف بطبيعته و ما يتصنّع!

12. بعد ذلك تعبت منه و قررت مصارحته بالإنفصال! و كانت ردة فعله جدا حادة انصدم كثير انجن قام يبكي! أحسه يبكي و يردد يبي يموت و مصدووم بعدها بين لي قد ايش هو يحبني و متمسك فيني و ما يبي يخسرني و شاريني و يترجاني أريحه بإني أتراجع عن القرار و قام يوعدني أنه يتغير و أنه حس بأسلوبه شوي .. أثر فيني بصراحة خصوصا لما أحس فيه يقول مكتووم و يبكي .. أول مرة أشوفه بحالة انهيار بصراحة و هو اللي كان معتد بنفسه كثيرا ..


أدري الموضوع طويل و حاسة متخربطة و محتارة جدا أرجوكم شوروا علي من خبراتكم و الله أحس إني فعلا ضايعة لما أتذكر أن المسألة أبدية يعني طول العمر .. الوحدة بتتزوج مرة بالعمر

مشكور أخوي على ردك جزاك الله كل خير ..

بالنسبة لدينه .. محافظ على الصلاة و ما يدخن لكن ما أدري ليه هو تربى بهالطريقة في التعامل!

أحيانا نكون مبسوطين و نضحك فجأة يتعكر مزاجي لإني مثلا سألته أو حتى من خلال كلامه معاي يتكلم برموز أحس بكتمة ما أرتاح لأسلوبه أبدا و وضحت له هالأمر كثيييير لكنه يحاول يراضيني بأشياء ما تهمني مثل يقول أنه يحبني أو يجيب لي آيس كريم أو كيكة أو أي أكلة أنا أحبها .. بس إلى متى؟؟ مو راضي يفهم أن أسلوبه هو اللي أبيه يغيره و يترك الغمووووض .. يفكر أنه يحبني بس خلاص يعني ملكت الدنيا مو مفروض أتكلم بأي شي ثاني و لا أعترض على شي يتعبني!

ياليت يا أخوي إذا عندك طريقة محببة لعل و عسى تؤثر أكلمه بها لإني ناوية أعزمه على جلسة مصارحة ثانية بس أخاااف يمل و أنا أمل و نكره بعض من كثر النق و الكلام!! علما بإني حاليا أحس أنه كاسر خاطري أكثر من إني أحبه يمكن!! صدقا ماني عارفة وش جاني


أنتظر ردودكم تكفووون