السلام عليكم ورحمة الله ،،

انا وزوجي نعاني ضغط كبييييييير
بسبب ؟؟؟

راح اشرح المشكله بموضوعيه وحياديه وصدق
لاني ف النهايه اريد حل من الحكماء

بداية :
حبيبتي ام زوجي احبها واحب امي كثييير بس انا وحده تزوجت وشرطت في عقد الزواج منزل مستقل
منزل مستقل
منزل مستقل
ماطلبت منزل وبس
لكن شرطي الاستقلال

لاني اعلم ان شرط نجاح تأسيس كل منزل ( الخصوصيه) طبعا بعد التفاهم والحب

زوجي حبيبي حط لي مسكن لكنه غير مستقل
لانه فوق اهله ( وانا احبهم كثيييير فقط للتوضيح )
لكن انا وحده ماتزوجت مسيار عشان اسكن عند اهلي او اهلي الاخرين اللي هم اهل زوجي
من حقي انام متى ماابغى واقوم متى ماابي واطلع متى ماابي وادخل متى ماابي
من حقي اتقهوى انا وزوجي مع بعض ونسولف
من حقي نطلع مع بعض من حقي اسوي اي شي
بدون مبررات للي حولي

وانا اكتب طرت علي مواقف ومواقف متعبه بالنسبه لي بس خانني التعبير وانكتمت

ام زوجي - وانا احبها كثير والله- طلعت عن بيت ام زوجها وكانت ام زوجها زعلانه من خروجها عنهم وكانت ام زوجها تقول اذا سكننا ف مكان تسكن ف جهه ثانيه عشان تبعد عنهم وترتاح
وهي تحبهم بس كانت تتعب عندهم وتسمع كلام يغثها

المهم ان ام زوجي تشكلت عندها عقده ان اولادي راح يتركوني اذا تزوجوا ف قامت تشحنهم بشكل غير مباشر بقصص ناس حوالينا تركوا امهم جلسوا مع زوجاتهم ف الغرفه سووا كذا عملو كذا
امك لاتتركها واظهار الضعف له وان مالها غيره ومن هالكلام

عيالها انشحنوا من هالناحيه ع زوجاتهم امي وامي وامي
لدرجة وانا عروس زوجي قال لي كلمه بعمري بحياتي ماراح اسامحه عليها ولازال قلبي شايلها عليه
قال ترى امي اغلا منك !!
طيب ماله داعي تسمعني هالكلمه خلها بقلبك
وانا عروس ابي اسمع شي يسعدني
انا ماني ضد حبه لامه لكن مالها داعي هالكلمه
وانا عروس مالي اسبوع دخلني المطبخ عشان ترضى امه !!!
ماطلعت معه ف شهر العسل >> عفوا شهر المطبخ اسمه واستقبال وتوديع اهله ومجاملات
انا احبهم بس احس اني وحده زايره عند ناس
زوجها ماتشوفه الا اخر الليل
حتى طلعات معه ماتطلع عشان ماينتقدونه او ينتقدونها !!!
تعبت من هالحياه
تعبت وانا اجبر نفسي ع اشياء مااقدر عليها عشان اطلع قدامهم بمنظر كامل ويحبونني وماينتقدوني !!
انا ماني عايشه عشان ارضي الخلق
لانفسنا علينا حق تعبت والله وزوجي اشوف التعب ع وجهه باين

المصيبه ان اهله اذا قصر معهم بشي بسيط وكان مو قادر ع هالشي بسبب ظرف مادي او ضغط شغل التهمه جاهزه زوجتك غيرتك !!!
وشدخلني انا ؟ بس هالشي عشان يتخوف من زوجته ويبتعد عنها وترتاح خالتي اني ماراح اخذه !!! والله ماراح اخذه منكم قسم بالله ههههه
تعبت والله ،، فانيه نفسي وحياتي لهم ومحمله نفسي شي فوق طاقتي عشان مايكرهوني او ينتقدونني
لانهم انتقاديين درجة اولى
قيل وقال
زوجي يحملني مسؤولية كبيره وهي ارضاء اهله ع حساب نفسي ونفسه

والنكته ان امه بنفسها طلعت بمنزل مستقل ف بداية زواجها
وبناتها كلهم ف بيوت مستقله ويطلعون ويدخلون ويسافرون وينامون ع كيفهم ويقومون ع كيفهم
عندي مطبخ بس يطالبني اسوي كل الوجبات لهم
طيب وين الاستقلال ف الموضوع !؟
اكون متواجده معهم طول اليوم

انا عندي ولد يسهرني وابي انام وارتاح واحيانا اكل شي خفيف مااطبخ
ليش اعيش حياه على كيف غيري
انا احب الناس والحياه معهم
لكن بشي معقول وبحدود طاقتي
وانا احب نجتمع ع السفره واطبخ لهك بس مو شي اساسي يعني احيانا اكون تعبانه او طالعه لاهلي او احب اكل شي خفيف انا واسرتي
ليش يجبرني التزم بالقعده الصباحيه والعصريه والطبخ دايما معهم
حتى ام زوجي تلمح لي اني لازم اطبخ لهم دايما
طيب ياخالتي ياحبيبتي عندك خادمه مسؤوله عن هالشي
وبناتك كلهم ياخالتي يزورون اهل ازواجهم زياره اسبوعيه بكامل قدرهم وقيمتهم
ليش انا لازم اتحمل مالا اطيق ؟

وبيتي وحياتي بدون خصوصيه تعبت والله وماني قادره اتحمل اكثر
كلهم مرتاحين ومستقلين الا انا
امه ابوه خواته كلهم الا انا
وعايشه حياتي انا وزوجي عشان نرضيهم ومو راضين !!!
اتأمرون الناس بالبر وتنسون انفسكم

والله ماراح اخذ ولدهم منه وانا بنفسي اوصيه عليهم بس وين حقي انا على نفسي وحياتي وخصوصية بيتي
منزل مستقل يعني مستقل مايحتاج احد يشرحهااا
!
يعني اعيش حياتي ع كيفهم عشان يرتاحون ؟؟
تعبت والله وهي تطلع وتوسع صدرها
بس انا لا عايشه معهم ف بيتهم
ابي البس اطلع اروح اجي

للتوضيح انا والله احبهم وماارضى يضرهم او يقصر معهم
بس بالمقابل ماارضى حياتي انا وزوجي وعيالي على كيف الناس ومزاجيتهم
لنفسي علي حق
وانا زوجه وام حتى عيالي ابربيهم مثل ماابي
بدون تدخلات
وانا عندي قيم تربويه مااتنازل عنها
بس عدم الاستقلال متعبني
وانا لي طاقه تحمل معينه ماابي اوصل للحظه الانفجار
وبهاللحظه محد راح يعذرني لاني الكل عايش مرتاح الا انا وزوجي وعيالي للاسف

وزوجي حاط لي مسكن لكنه غير مستقل
تعبت والله تعبت تعبت تعبت

احكموا بيننا الطابق العلوي لنا
لكن من نقوم الى ان ننام وحنا معهم تحت
زوجي مااعرفه
استقل ابي استقل

فية بعض الامور تحتاج توضيح عشان نفهم الوضع كامل

هل الدور له مدخل خاص ؟؟ اذا له مدخل خاص ودرج خاص فهو يعتبر مستقل ولا يخل بشرطك

ثاني هل قلتي هالكلام لزوجك ؟؟ وش كان ردة فعلة ؟؟

هل اخوانة نفس وضعه ؟؟

مبدائيا ممكن ترفضي باحترام وتوضحي وجهة نظرك ،، اتوقع مشكلتك ماتقولي لا .. حتى لو على نفسك ،، ولا تحمي نفسك فوق طاقتها ،، نزولك تحت وطبخك لهم ليس واجب عليك ،،

صدقني اخوي تناقشنا كثيييييير وتهاوشنا كثير لهالسبب
بالنسبه له اهم شي اخدم اهله ويحبوني
وياويلنا اذا كرهوني مثل زوجة اخوه اللي كرهوها !!!
يعني زرعوا براسه ان الولد يتزوج عشان زوجته تونس امه وتخدمها وتطبخ لها !!!؟
طيب وبناتك ياخالتي ليش ماتلزمينهم بهالدور يسوونه مع امهات ازواجهم؟؟؟
للامانه انا احبها
واحب اسعدها بس مو ع حساب نفسي وعائلتي الصغيره
زوجي مضغوط مثلي بس مايتحرك متعقد يبغاني ع كيفهم ويحبوني
حبهم مايهمني
وانا شرطت شرط ولازم ينفذ

انا تعبت من الصبر وناويه ادخل احد حكيم بيننا ..
واعتقد مافيه احكم ولا اعقل من والدي
شخصيته رزينه عاقله مايرضى بالغلط لا على نفسه ولا على غيره
لدرجة لو غلطنا ع الناس لو بمجرد كلام يزعل علينا ربي يحفظه
ومايرضى احد يقلل من قيمتنا

للامانه

ايجابيات زوجي

كريم + قلبه طيب + محافظ على صلاته
+ مسؤول عني مسؤولية تامه مادياً ومن ناحية احتياجاتي وعلاج وغيره يعني مو من النوع الاتكالي

سلبياته : عصبي + مزاجي +غيور شكاك + ينقاد بسرعه لكلام اهله واصحابه
+ يعاكسني كثييييييير يعني مايحب يطيعني بشي اتوقع انه متشرب هالصفه من كلام اللي حوله
ان اللي يطيع زوجته خروف
واللي يجلس عند زوجته خروف
وووو .. الخ
عقد كثيييببره متشربهاااا

تأكدى فى البداية هل هذه المسئوليات الملقاه على عاتقك طلبتها أمه منك او منه؟
أم أنها طلبات زوجك يلزمك بها من تلقاء نفسه؟

لأن بعض الأحيان الأم و الأب ما بيطلبون من ابنهم أو زوجته و لا بيمنعوهم من السفر و لا من الخروج
إنما بتكون اوامر فقط من الزوج لزوجته يبغى يطلب رضا أهله على حسابها و هو مو تعبان بشىء

لست ضد أن تساعدى أمه و أبوه و لكن حددى يوم أو يومين فى الأسبوع

و نصيحة لك أنت أيضا كفى عن النظر لغيرك و مقارنة نفسك بهم أنت تقولين أمه مرتاحة أخواته مرتاحات زوجات إخوانه مرتاحين و أنا لأ ... اهتمى بحالك و لا تنظرين لغيرك و أطلبى حقك بالمعروف فقط لأن ما فى حد فى ها الدنيا مرتاح كل بنى آدم له مشاكله

شكرا لردك
بالنسبه لقولك ان اتأكد هل الاوامر منه ام من اهله
انا اقول لك كل الامرين
منهم شوي وهو يزيدها كثيييييير
شخصيته تضخم الامور وعنده عقده طلب الكمال
وهو مو كامل
وانا ايضا مو ضد مساعده اهله لكن احيانا مااقدر او تعبانه او مالي مزاج او ابي اتغدى ببيتي والا اليوم مانبي نسوي غدا مو مشتهين طيب ؟
اما كلامك اني اقارن حياتي بحياتهم
المقارنه مو عشان غيره والله
والله احبهم واتمنى لهم كل خير
لكن مثل ماقلت لك انا لنفسي علي حق
واذاكانوا اهله يلمحون له ان زوجتك مو لازم تطلع كثير او لازم تخدمنا او او او
فأنتم شوفوا انفسكم اول بعدين الزموني بهالاشياء
وانا هذا هدفي من قولي انهم يطلعون ويدخلون الموضوع مو حسد والله
لكن ابين انه شي طبيعي من حق كل امراه
لراحتها بحياتها وراحة اسرتها
ولو كان السكن بدون خصوصيه مريح لهم كانوا هم سكنوا ايضا مع اهل ازواجهم
وبدون خصوصيه ايضاً
هذا مقصدي من الكلام اتمنى مااحد يحمل كلامي على مقصد سيء لان حياتي مع زوجي اغلبها مقاصد سيئه ابررها طول الوقت وهالشي صرت اكرهه ومااطيقه
قصدك كذا .. ومو قصدك كذا .. لانها مو امك تتركينها تكرف .. فعلتي كذا لانك كذا شافك فلان .. احلفي .. سويتي كذا عشان كذا !؟

افففففف شي يطفش

في الحقيقة معكِ حق.


بعض الناس يفهمون دور زوجة الابن خطأ .. ويحمّلونها مسؤولية ليست من مهامها ولا مطلوبة منها.



المشكلة يا عزيزتي أن زوجكِ يعارض وجهة نظركِ .. وهذا ما قد يصعّب عليكِ الحل.


رأيي أنه يجب ـ قبل إدخال والدكِ في الموضوع ـ أن يسمع الرأي الشرعي بخصوص علاقتكِ بأمه وأهله وما هو المطلوب وغير المطلوب منكِ تجاههم.

بعدها أرى أن تلجأي لأحد من أهله هو .. إن كان فيهم شخص عاقل وحكيم جداً ووجهة نظره متوافقة مع وجهة نظركِ (وأفضّل أن يكون رجلاً كأخ أو عم أو خال مثلاً) .. لأن تدخل والدكِ ربما يؤخذ على محمل أنه سيقف في صفكِ لمجرد أنكِ ابنته .. وليس لأن كلامه منطقي بالفعل.

فإن لم تجدي بينهم مثل هذا الشخص فلا مفر من تدخّل والدكِ.

__________________


اللهم طِيبَ الأثر .. وحُسْنَ الرحيل.

ارى ان يكون الحل منك اخبري زوجك بما كتبتيه هنا ووضحي له وجهة نظرك ومن بعدها لا تنزلي لهم واستقيل بحياتك افعلي الواجب والمعقول وتوقفي عن التبرير والمجامله على حسب حياتك وعلى حسب ردة الفعل اتخذي الخطوة التي ذكرتيها من تدخل الأهل

الله يعينك ويشرح خاطرك

رأيي ياعزيزتي لا تدخلين أحد ولا تكلمين أحد لأنهم خلقه متحسسين من هالموضوع

اشتغلي على نفسك
نامي الصبح وقومي متأخرة
قالوا شي قولي سهرانه مع ولدي وتعبانه وقفلللي الموضوع حتى لو سمعتي سب
وكرريها بأيام متباعدة

الطبخ إنزلي ووكلي الشغالة تقطع وتتبل وأنت إشراف بس طبعا بدون ماتثيرين بلبلة
بعد فتره صيري ادخلي المطبخ قولي لها اعملي كذا واطلعي
وإذا قالوا شي قولي متحممه ما أبي تنشب فيني الريحة وكدا

شوي شوي انسحبي من حياتهم
تأخري العصر قولي أكلم أمي عندها موضوع
صديقتي تستشيرني أمسح البيت أعزل الملابس طلعي لك شغله وتأخري عشانها ساعتين وفعلا سويها عشان إذا دخل زوجك يشوفك تشتغلين
وممكن إذا نزلتي انسدحي والا حطيوساده على ظهرك قولي تعبانه من التمسيح و و عشان مايطلبون منك شغل
لأنهم يشوفونك فاضيه

توظفي إذا ممكن لو دوام مسائي قصير عشان يتعودون على شكلك تطلعين

إذا رجعتوا من أهلك قولي لزوجك مشتهية آيس كريم عوديه تشترون وتستمتعون بأشياء صغيرة

أهم شي تتصرفين بعفوية وسكوت يعني لا تقولين أبدا أنا مليت أنا من حقي الشيء الفلاني عشان ماتصير السالفه فيها تدقيق وعناد


إذا تكلموا عليك كلام قوي ردي بأدب وأسلوب مزح بجد
مثلا وحده من بناتهم قالت مانزلتي بدري قولي أحسن من اللي ماتروح إلا يوم بالأسبوع واضحكي بطيبة

يختي اللي ينزل راسه حتى الناس الطيبه تستضعفه
حطي حدود والله إن يحترمونك وبادليهم الاحترام واستمري على العلاقه الطيبه بس خلهم يعرفون إنك مو مخلوقة لإرضاؤهم

هالشيء رغم إنك تخافين من نتائجه لكنه فعلا يبني شخصيتك قدامهم يوم ورا يوم
اللي يحط لنفسه حدود حتى لو الناس استغربت أول شيء بترجع تحترمه وتفهم دوافعه
خلك قويه عشان بيتك لأنك لو انفجرتي محد بيرحم ولا أحد بيقدر