قبل ساعه حصل موقف سبب لي رعب..
السالفة اني امس رحت موعد المستشفى مع ولد زوجي وكالعادة نقابل زوجي عند المستشفى لان بين دوامه والمستشفى دقايق وبين بيت اهلي والمستشفى عشرين دقيقه ..
الموهم كالعادة رحت معاه .. بس هو ما قد شاف وجهي بس أتكلم معاه كذا بالسيارة ماحصل وقابلته بالبيت ..
لما وصلنا المستشفى تأخر زوجي بدوامه وقال ادخلي عند الدكتورة ودخل ولده معايا .. اول مرا يشوف وجهي وسمع الدكتوره وهي تقولي انه ليا 16 اسبوع حامل ..
الموهم
قبل شوياااااا نايمه بآمان الله بغرفتي عند امي الا اسمع الجرس يررررررن بدون توقف .. صحاني من النوم .. استنيت شويا طليت بالجوال لقيت الساعه 11 ولقيت ع الشاشه اخر رسالة واتس أب من امي قبل اربعه دقايق قلت اكيد فتحت ...
شويا الا رجع الجرس يدق بنفس الطريقة اللي تخوف ورحت اجري وفتحت الأبواب الين وصلت باب الشارع ما فتحت وقفت عنده قلت مين الا حرمه تقول افتحي افتحي بصوت يخوّف .. بلحظة جات أفكار برأسي انها وحده من أخواتي تبكي او صاير شي مو كويس قلت بخوف انتي مين ؟؟؟ قالت افتحي افتحي انا جارتكم

قلت جارتنا مين ؟
قالت مو بيت ام فلان ؟ ( تقصد اسم امي )
قلت أنتي مين قالت انا ام فلان ( قالت اسم ولد زوجي بس ما جا ببالي تكون هيا )
قلت ماني فاتحه قولي انتي مين وايش تبغي ... كان صوتها يخووووف كأنها شارده من شي ..
رحت دخلت وتركتها ... الا دقايق وتددددق ... اتصلت ع امي امي بغرفتها ما تسمع الجرس ...
قلت لأمي : امي الحقيني في حرامية كسرت الجرس وتقولي فكي الباب انا جارتكم ام فلان .
قالت امي : ام فلان مين ؟
قلت مدري بس شكلها من اللي يدخلوا البيوت وخفت افتح.
قالت : لا تفتحي الا جات امي وقالت مين
قالت لها الحرمه : انا ام فلان
قالت امي : فلان مين ؟
قالت الحرمه: فلان بن فلان
(الان هي قالت اسم ولد زوجي واسم زوجي وللآن ما استوعبت هي مين تخيلوا من الفجعه والخوف والله ما استوعبت الا لما قالت انا ام فلان فلان بن فلان .. قالت اسم الجد انا هنا استوعبت
قلت لها : ايش تبغي ؟؟؟؟؟؟
قالت : افتحي الباب طيب وانا اقولك .
وأمسك امي امانه لا تفتحين وربي صوتها ومحاولتها لفتح الباب خوفتني.
قالت لها امي : لا صراحه ماني فاتحه عساكِ طيبه ؟
قالت : طيبه بس بعزمكم عندي اليوم المغرب بدون فلان ما يدري (تقصد زوجي )
ملاحظه :
اكثر من مرا حاولت مع زوجي يجيبني لها وانا ما رضيت وهو قالي اصلا ترى نيتها تجاهك مو طيبه .

رحت اتصلت ع زوجي قلت له زوجتك برا تقول افتحي الباب بعزمك بدون فلان ما يدري.
قال لا تفتحي لها ولا شي انا أتصرف الان.
بهذا الوقت كانت تقول لامي انتي مين : قالت امي : انا اختها.
قالت طيب اديني رقم أمها
قالت امي طيب ايش تبغي فيها.
قالت بتعرف عليها
امي قالت ماني حافظه رقمها.
بعدين قالت لامي طيب افتحي بشوف فلأنه من عند الباب
قالت لها امي : مو وقت زياره صراحه وانا مو عاجبتني لهجتك.
قالت : اهم شي فلان لا يدري اني جيت انا بعزمكم ع القهوه المغرب .
امي تركتها ودخلت .



وربي للان اكتب وجسمي يرتجف ..
ماعاد اروح مع ولدها أخاف تجي معاه بيوم موعدي بمستشفى ..
بالله بؤ كُنْتُمْ مكاني ايش تسووا ؟
انا عارفه انه زوجي ما راح يسكت بس المصيبة انها عرفت بيت اهلي وأكيد تعرف بيتي ومستحيل تتركني بحالي

وربي كان صوتها يخوّف كأنها شارده من شي او مستعجله على شي طول الوقت تقول طيب افتحي الباب طيب افتحي شوي وبالبداية قالت انا جارتكم ما قالت انها هي ..
نفسي افترض حسن النية لجيتها وأخد بالمية ..
بس ماني قادره في ان بالموضوع ..

ايش العمل ؟!
حطوا نفسكم مكاني.. وبعد هذا الموقف كيف تأخذوا احتياطكم وتتصرفوا ؟؟

وربي خايفه ... ولما افترضت سوء النية لما رسلت لي الاكل مع أولادها .. قالوا لي حرام عليك ... موقفها اليوم ايش يدل ؟!

معاك حق تخافي
لكن فعلا التمس لاخيك المسلم سبعين عذرا
طبعا منتي ملزومه تقابلينها او تتعرفي عليها
اغتذري منها
اقري سوره البقره وادعي الله يكفيك شرها
صدقيني الي فيها بس فضول
لو بتضرك بترمي شي على الباب وبتروح
ماراح تكشف نفسها كذا

السلام عليكم

انا بعد اقول لا تفترضي سوء النية

يمكن تحب تحسن العلاقات دامك حامل ورح يصير عندك عيال اخوان لعيالها

لا نخلي عواطفنا تحكمنا ويمكن زوجك اصلا وجهة نظره غير وجهة نظرها وظالمها

ما تدرين .. المهم انه المرأة جات لعند بيتك ودقت الباب وكان من المفترض تفتحي لها وترحبي فيها مهما كان هي ضيفة وضيافتها حق عليك ومن قيمتك انت مو قيمتها

خلي الأمور سهالات ولا توسوسين بأذيتها لك .. ربي يسهل أمورك وتولدين بالسلامة يا رب

__________________

فعلا كان فتحتي لها من باب ادب الضيافه

والله العظيم ما كان عندي اي تفكير سَيّء تجاهها..
ولما تزوجت نويت ما ادخل الا بخيري على الناس ...


ياليت والله ياليت اكون انا الآثمة بظنّي السيء فيها ولا تكون جد تنوي السوء ليا !

أنتم ما سمعتوا كيف تتكلم وربي بطريقه تخوف .. ما قدرت افتح ما تسمعوا بالمصايب اللي تصير بالدنيا ؟!
غريب أنكم تسمعوا انه وحده تقتل ضرتها ؟؟؟؟؟
مرا ما راح يكون شي غريب بهذا الزمن لو سوت فيني شي
انا خلقه من ربي خوافه فمابالكم تطلع لي زوجة زوجي .. كأني ناقصتها

بس تدرون !

لو كان موعد زياره مغرب او عشاء والله يمكن فتحت بس الحمدلله انه الوقت مو مناسب اصلا ما ابغى أشوفها غصب هو ؟

للتذكير زوجها قالها لا تفتحين وقالها من قبل نيتها مو طيبه ناحيتك
اجي انا اسوي نفسي اعرف منه فيها وافتح الباب هم يقولي ما قلتلك لا تفتحين!!

صراحه حركتها تخوف
يعني لو اخذت موعد وجات في موعدها بتوكل على الله وافتح الباب واستعيذ بالله من شرها
وارحب واخليها تشوفني وتطفي فضولها!
اما هاجمه على الباب كذا كنها بتخطفني لو فتحت
ولا الوقت وقت زياره ف لا طبعا ما افتح!!

__________________
( والذاكرين الله كثيرا والذاكرات )
ادعوا الله ان يجعلكم من الذاكرين له..

حبيبتي
اقرأي سورة البقرة يوميا لحفظك أن كانت ناويه على سحر مثﻵ
وهاﻻيام كل شي جاااايز
تحسنين النيه وتروحين فيها! ! ضحكتووني ياللي قلتولها افتحيلها واﻻ أدب ضيافة
اللي تبي تحسن عﻻقتها تكذب وتقول انها جارتكم وبوقت مو مناسب كﻻم فاضي صراحه
انننننتبهي لنفسك من باب الحرص
وخليك على الرقيه الشرعيه وﻻتاكلين أي أكل ترسله لك
سوي اللي عليك ولن يصيبنا اﻻ ماكتب الله لنا

عن نفسي كذا بتصرف مستحيل أكل من أكلها أو اروح لها
أو اخليها تدخل بيتي ومن حقي خااصه أن وضعها كان يشكك

بعض الحريم أن تزوج عليها زوجها
من شدة المرض النفسي والقهر تسوي أي شي حتى لو تكفر
وياما سمعنا قصص سحرت بنت الناس عشان تزوجها عليها
الله ﻻيبتلينا بس

المهم انتي طمنينا عن وضعك مع زوجك بعد ما صفت النفوس..؟
هذا هو المهم زوجك وبس..

__________________
( والذاكرين الله كثيرا والذاكرات )
ادعوا الله ان يجعلكم من الذاكرين له..

حصني نفسك وزوجك وبيتك ولا تكوني علاقات أو تتواصلي معها.
والله خير الحافظين وهو أرحم الراحمين.