من فترة و انا ملاحظة* زيادة تطنيش زوجي و تجنبه لي على جميع الاصعدة:كلام مقتضب و جارح و جاف،جفاء عاطفي و شبه انعدام للجنس. ما يبين لي لا حاجاته و لا رغباته و الادهى حتى وجهه دايما عابس وياي! كل كلمة اقولها يردها علي بالعشر و كله كلام يغث!!

لحد ما انفجرت على صدره قبل شوي و انا ابجي قلت له: احبك و احتاجك عفية لا تطنشني.
هز راسه بالايجاب و عطاني ظهره !
اقسم بالله اني مو هامتنه و لاني شايفة لي قيمة في قلبه.يدش و يطلع و يروح و يجي و انا وضعي مثل كرسي البيت او شغالة! انظف و ارعى اولاده.
اولادنا تارسنهم عاطفة و حب و حنان و دلال !
اقوله يالله من مال الله،عطني مثل ما تعطيهم انت كريم و انا استاهل. لكن ابد ماكو لا تفاعل و لا تقدم!

احس اني بستخف خلاص بصير مجنونة! لاني في ارض و لاني في سما !
كأني عدوته! اقوله خله نستمتع مع بعض خلنا نعيش الحب و التعامل المرن! الرجال كل حركاته توحي انه عايف او كأنه صاير شيء جايد بينا! قبل شهر انهرت بعد و بجيت قلت له لا تطنشني تعبت! قالي ضبطي امورج و شاوري نفسج! سألته شنواضبط علمني قولي للحين احبك و ادور رضاك. بجيت قدامه من الضغط الشديد و بعد ما اهتم!!

انا ابغي اعيش دور الزوجة الي يحترمون مشاعرها و يعطونها حقها الشرعي،و ما يطنشونها لأيااااام و من غير توضيح السبب! انا ابغي استقر ٧ سنين كفاية كل يوم اشاور نفسي:يحبني او لا !
انا مو واثقة من مكانتي بقلبه! و ما ابغي اتكيف على هذا الوضع الصحراااوي الممل الكئيب !

*

الله يفرج همج اختي
والله قلبي عورني لاني تذكرت نفسي يوم قريت موضوعج الحمدلله

بس ما سألتيه شو يقصد لما قال ضبطي امورج وشاوري نفسج ؟؟؟
كلامه يدل انه فيه شي

مثلا انا زوجي لما اسأله واصر اعرف ليش منقلب علي كله صمت في صمت ويقول مافي شي


عالاقل ريلج بين لح فيه شي
ولازم تعرفين شو يقصد في ضبطي امورج

قولي له ابشر اموري بضبطها اذا عرفتها
بس كيف اضبطها اذا ماعرفت شو تقصد (تكلمي بثقه بدون بكي )

وانتي نفس الوقت حاولي تراجعين نفسج
كيف ومتى ريلج انقلب عليج
هذا في حالة انه كان معاج زين وفجأه انقلب عليج وتغيير

الحمدلله بينكم عيال يعني العلاقه بينكم كانت تصير وياب منج عيال يعني له رغبه فيج

بس صده عنج بشكل ملحوظ ومفاجيء اكيد وراه تفسير

ونصيحه اختي دام انج مسويه كل واجباتج وماقصرتي معاه ابدا لاتذلين عمرج وتركضين وراه وتصيحين
لانه في رياييل مايحبون هذا الاسلوب
يحبون الحرمه القويه
ويمكن اذا تكلمتي بثقه وقوه بيحترمج ويقدرج اكثر

تصدقين اني لما اصير وايد طيبه وبريئه ومسكينه ريلي الله يسامحه مرات يدوس على راسي

لكن لما اعصب واكون قويه جدامه احسه يحترمني اكثر ويحسب لي حساب

عسى الله ايسر امورج يارب

ولاتحطين في بالج انه ريلج مايحبج
صدقيني اكيد يمر بضغوط او ظروف معينه يمكن لج علاقه فيها

اجمعي شتاتك اختي انتي خاويه من الداخل تبين اي علامه او اشاره منه لاتشحذين منه العاطفه والعطف انشغلي بهدف بتنميه دراسه وقوي نفسك بيشوفك طفتيه بيلحق فيك مع مرعاة حقوقه ولاتكثرين عليه ... الله يقويك .

__________________
رَبِّ أَعِنِّي وَلَا تُعِنْ عَلَيَّ، وَانْصُرْنِي وَلَا تَنْصُرْ عَلَيَّ، وَامْكُرْ لِي وَلَا تَمْكُرْ عَلَيَّ، وَاهْدِنِي وَيَسِّرِ الهُدَى إِلَيَّ، وَانْصُرْنِي عَلَى مَنْ بَغَى عَلَيَّ، رَبِّ اجْعَلْنِي لَكَ شَكَّارًا، لَكَ ذَكَّارًا، لَكَ رَهَّابًا، لَكَ مِطْوَاعًا، إِلَيْكَ مُخْبِتًا قَلْبِي

بدون سبب هو كذا!!

خلاص عيشي طبيعي .. انتي مو تهتمين بالاطفال كواجبات لا ..

استمتعي معاهم لاعبيهم .. ارسمي معهم قصي لهم .. اشغلي نفسك معهم واستمتعي بوقتك معهم .. وفرشي اسنانهم وانتي تلعبين معهم وبروح حلوه .. اكيد هو موجود او مو موجود نفس الشيء خلي هذا روتينك .. طبعا مع الاهتمام بزووووجك عطيه الاهتمام المحترم مو قطه النفس..

يعني ماي واهو داخل البيت .. شلونك اليوم .. بود تقولينها .. لابسه وانيقه .. مو تنطرينه عشانك لابسه ..

وعقب عيشي نفس الدور اللي يلعبه هو مع عيالك العبيه ..

بتطويلن عبال ما يتغير .. ويفز قلبه لك .. لانه بالبدايه بيستنكرك ...


ونصييييحه .. لا تسألين احد عن حبه لك او غلاتك ..عنده

اقرى عيونه وشوفي تصرفاته وبس .. وكلامه خله له.. لان كثر السؤال يملغ الشخص

__________________
أعلل النفس بالآمال ارقبها .. ما أضيق العيش لولا فسحة الأمل

انصحج عزي نفسج ولا تذلين نفسج عليه اكثر من هالمذله واضح انج مب هامته

انشغلي عنه ولا تخلينه محور حياتك سوي لج برنامج مع صديقاتك او اهلك

انشغلي عنه و كافئي نفسج ودلعي نفسج

اذا ربطتي سعادتج باهتمامه راح تموتين من النكد. لا تخلين سعادتج معلقه الا بالله سبحانه


الرجال يموت علي المره اللي تحقره وعايشه حياتها اهم شي انتي و ثم عيالج
كل ما طلبتيه بيرفسج وكلما ترفعتي وانشغلتي عنه بتصيرين غاليه
وجودج في حياته برغبه منج وبكيفج مب لانج محتاجته لازم تحسينه بالشئ هذا


الزواج ما يكمل النقص اللي عندج انتي تقدرين تعيشين به وبدونه علي فكره بس بشرط لا تخلينه محور حياتج وسبب سعادتج الوحيد وتغانيتي عنه !!
طبقي نصيحتي وبتشوفين ان حياتج بتصير اسعد وأجمل بالف مره



عزي نفسج بيعزج

ذلي نفسج وبيدووس عليج