قصتي طويله لكن بحاول أختصرها لكم وسامحوني إذا ماعرفت شلون أكتب علشان مالي محاولات في الكتابه لكن أتمنى أنكم تفهموني

انا متزوجه من 16 سنه عندي من العيال بنت وولد الله يحفظهم حبيت زوجي وحبني عشت معاه على الحلوه والمره والمره أكثر بكثير من الحلوه تزوجته فقير مايمتلك إلا راتبه البسيط اللي يدوب يعيشنا ثلاثة أرباع الشهر( خذوهم فقراء يغنيهم الله ) حياتي معاه من البدايه الى قبل 3 سنوات من أحلى مايمكن طبعا ماتخلى من مد وجزر وهذي سنة الحياه
أنا وحده رومانسيه لأبعد الحدود وللأسف أفتقر الكلام المعسول من زوجي أو حتى كلمة إطراء وهذي طبيعه في زوجي ولما أحاول أشكي له دايما يقولي أنا ماعرف أقول كلام حلو كفايه بتشعرين حبي لك من تصرفاتي معاك .. ربة بيت قليلة الصديقات ولكني إجتماعيه .. أهتم في زوجي ومن النوع المرح والحمد لله أحب أقوم بواجباتي المنزليه ولكن على قدي يعني مو من النوع النشيط إلا أوقات وأحب أشتغل بمزاج علشان ماعندي خادمه وهذي الصفه الكريهه فيني واللي ساعات تضايق زوجي, مشاكلي أحلها بنفسي كتومه وماأدخل أهلى بمشاكلنا لدرجة انهم يسمونا روميو وجولييت
زوجي من النوع العصبي وشخصيته نوعا ما ضعيفه ودايما علشان يقنع اللي جدامه ياخذهم بطريقة خذوهم بالصوت لايغلبوكم عدواني وشكاك للأبعد حد والكذب عنده سهل مثل شرب الماي أناني من الدرجه الأولى شهر يصلي و5 لا وهكذا تمر الأيام تكثر عليه الديون والمصاريف تزيد .. أهله مايكلمهم مخاصمهم من زمان وماعنده من يساعده في يوم قلت له الذهب اللي عندي أخذه وسدد فيه ديونك .. رفض في البدايه ومع إلحاحي قبلهم ولكن بشرط إنهم يكونون دين عليه
تمر الأيام والسنين ( نسيت أخبركم إني من بلد وزوجي من بلد ثاني ولكن إنولد وتربى وإشتغل في نفس بلدي ) أقمت بعد الزواج في بلدي سنتين ولما ضاق بزوجي الحال رجع لبلده أي موطنه الأصلي أول ماوصلنا حسيت بغربه غربه فضيعه لكن الحمد لله تحملتها علشان زوجي وتحملت قساوتها المهم حاول يدور على وظيفه مناسبة ولكن للأسف فشل في الوقت اللي أنا حصلت على وظيفه ومؤقته ولمدة سنه بس صرت أنا اللي أصرف على البيت من غير ما أشتكي بالعكس كنت سعيده وفرحانه لأني قدرت على الأقل أسوي شي وحالة زوجي تسوء يوم عن يوم وانا أحاول أواسيه علشان كان مستحي مني علشان نركت بلادي وأهلى وجماعتي على أمل يتحسن الحال ولكن خاب الأمل .. مع مرور الأيام يحصل على الوظيفه وسنه ورا سنه الأحوال تتحسن والراتب يزيد والعلاوات تزيد ووصل الى أعلى المراكز والحمد لله والفضل لله وحده وحبنا لبعضنا ماتغير
الى أن جاء يوم قال لي ودي أفتح مشروع صغير وهي عباره عن روضة أطفال ولكن في منطقه بعيده كثير عن منطقتنا اللي إحنا فيها بإعتبار أن هذي المنطقه تحتاج الى وجودها هناك أكثر باركت له المشروع وبديت معاه دراسة المشروع من كل زواياه الى أن تم المشروع وياليته ماتم ,مشكلتي تبدأ من هنا بعد ماتعرفت على مدرسه من مدرسات الروضه متزوجه أصغر مني بسنه وعندها من العيال 4 حادة الذكاء داهيه نشيطه لدرجه تشتغل شغل الحمير الله يعزكم ومع الأيام زادت علاقتي بها لدرجة إني أعتبرتها صديقتي الوحيده شوي شوي توطدت العلاقه وصارت تزورنا اهي وعيالها وزوجها
تمر الأيام والمشاكل مع وزوجي تزيد وتزيد لدرجة بديت أحس بفقداني للأمان وإهماله فيني يزيد والفجوه بيني وبينه تكبر حتى صار أحس إنه يفتعل المشاكل علشان نتهاوش ودايما أصبر روحي وكثير من التنازلات قدمتها علشان ماينهدم بيتي ولكن للأسف .. فصرت أحتاج للمشوره والنصيحه وللأسف مالقيت إلا صديقتي هذي أفضفض لها وأشكيها همي وكانت للأمانه تنصحني
ترقت من مدرسه الى مديرة الروضه وطبعا اللي رقاها صاحب العمل وهو زوجي فصارت المسؤوله المباشره عليها وبحكم الإداره صارت علاقتها بزوجي تكبر كعلاقة عمل بعض الأوقات صديقتي تشتكيني من زوجي ومن كثر خلافاتهم في وجهات النظر في العمل حتى زوجي كان دايما يشكي لي منها ويحاول يبرر مواقفه معاها وبعد فتره يقرر انه يبيع الروضه ويتفركش المشروع وفي نفس الوقت كان يحاول يفتعل المشاكل بيني وبينها علشان أقطع علاقتي معاها بدون أي سبب مقنع .. وبالفعل انقطعت العلاقه بسبب تهمه إتهمها إياها وهي سرقه أشاءه الخاصه من بيتنا .. استمرت العلاقه مقطوعه سنه صبرت على أحوال زوجي وتقلبات مزاجه على أمل الله يهديه وفي يوم بعد مشاده كلاميه بيني وبينه طلقني.. سكت ماتكلمت ولا كلمه علشان كنت مستغربه شلون يطلقني على مشكله تافهه وللعلم أغلب مشاكلنا تافهه بعد طلاقي فكرت إني أخذ العيال وأرجع بهم الى بلدي خبرني المحامي إنك ماتقدرين علشان العيال يتبعون أبوهم واذا أخذتيهم راح يقدر ياخذهم منك وتسقط حضانتك لهم بحكم القانون.. وهو متمسك فيهم ومايبيهم يكونون تحت حضانتي ولما فكرت كحل بديل إني أقيم بنفس البلد على أن يوفر لي سكن خاص بي وبالأولاد رفضوا أهلى بعتبار بدون محرم فضطريت مجبره على العوده له بعد 6 شهور طلاق
قبل لا أرجع له ب3 أيام عرفت من أختي إنه تزوج من وحده ثانيه قبل شهر وإنها صغيره في السن وما سبق لها الزواج من قبل وجنسيتها **** واللي خبرها منه طليقي.. ماعارضت ولا نطقت بالعكس في اليوم اللي رجعت له وفي المحكمه قلت له وبالنص ( أنا دريت إنك تزوجت والله يهنيك بزوجتك أنا ماراح أطالبك بشي لكن لاتخلي زوجتك تنسيك عيالك هذوله في رقبتك ) فرد علي وقال لي( لاتخافين عيالي في عيوني الثنتين وهي مثل مالها حق عندي انتي بعد لك حق وراح تاخذينها بالتساوي بينكم )
بعد 3 أيام حبيت أعرف من هذي اللي تزوجها سألته قال لي نفس كلام أختي ومافي داعي أعرف من هي أو وين تسكن وطبعا ماعندي حد يعلمني من هي إلا وحده وهي صديقتي اللي قطعتها من سنه وخصوصا إن زوجها يشتغل مع زوجي وفي نفس المبنى وهي فضوليه وتحب تعرف كل شي فقلت أكيد تعرف شي
ركزوا معاي بالكلام اللي دار تراه مهم ( إتصلت فيها وكلها إستغراب من اتصالي بعد السلام والتحيات خبرتها عن زواج زوجي من ثانيه وسألتها ان كانت تعرفها قالت أنا سمعت انه تزوج لكن ماعرف من هي وسألتني ليش انتي مهتمه فيها فقلت لها مجرد فضول ولما سألتها عن أحوالها قالت لي بأنها تطلقت صعقت من كلامها إلا إنصدمت وكانت الصدمه الأولى والله يشهد علي شكثر تألمت على حالها والسبب زوجي أختلق مشكله معاها ومع زوجها والمشكله كبيرت فتم طلاقها .. على حد كلامها حاولت أواسيها حاولت أهون عليها وقلت لها لازم ترجعين له لاتنسين بينكم أولاد وعشره قالت لي ريحي نفسك هو تزوج وحده ثانيه وانا بعد تزوجت والطلاق اللي تم بينا كان الطلاق الثالث واللي مافي بعده عوده إلا إذا هي تزوجت من رجل ثاني ) وهذي كانت الصدمه الثانيه بعدها سألتها متى تم طلاقك قالت لي في شهر 7 ثم تزوجت في بداية شهر 11من زوجها الحال وهذي الصدمه الثالثه ولما سألتها من هو قالت انه **** من نفس جنسيتها ومتزج وعنده أولاد ويشتغل مع زوجي لكن بإداره ثانيه تصوروا يعني زوجها السابق وزوجها الحالي وزوجي كلهم بنفس العمل وبعدها أنهيت المكالمه على وعد انها تعرف من هي البنت وتخبرني
بعد أيام لما شفتها تأخرت علي عاودت الأتصال بها وأول ماسألتها عرفتي من هي ؟؟ قالت أتركيها مولازم تعرفين عنها ولما حست إني مصره قالت لي أنا .. أنا اللي تزوجت زوجك وهذي الصدمه الرابعة لا .. لا هذي مو صدمه إنما طعنه وطعنه قاسيه تلقيتها من أقرب الناس لي دارت الدنيا من حولي ماعدت قادره حتى على التفكير غير إني أذكر أنها قالت لي لاتلوميني لومي نفسك فرديت عليها نعم ألوم نفسي علشان فتحت بيتي لوحده مثلك زباله وأنهيت المكالمه
بعدها سألت نفسي أسئله مالها في ذاك الوقت إجابه عندي
أولا: شلون ياخذ وحده كان دايما يذمها قدامي وإتهمها بأنها غير أمينه وإتهمها بالسرقه ومشاكلهم بين بعضهم ماتخلص
ثانيا: إشلون هي تقبل فيه إذا كان هو سبب طلاقها من زوجها السابق على حد كلامها مع إن العكس المفروض يكون عدوها وتحاول تنتقم منه
ثالثا: ليش تزوجت بهذي السرعه طلاقها تم بشهر 7 ( يوليو) وزواجها الثاني بشهر 11 (نوفمبر )
ظليت أسترجع الأحداث اللي مضت وشلون كان في بعض الأوقات يهتم فيها ولما أواجها يقول لي مافي شي بيني وبينها هذي مجرد أوهام في راسك
جلست مع نفسي أفكر لقيتها ماهي إلا مسرحيه سخيفه مثلوها علي وحتى طلاقي كان الواضح بإتفاق مسبق مابينهم والدليل طلاقي اللي قبل طلاقها بشهر واحد سرعة زواجها من زوجي أي بعد إنتهاء عدة طلاقها مباشره يعني خيانه مع سبق إصرار وترصد
وعلى كل هذا حاولت أصبر نفسي فكرت أطلب الطلاق والعيال يظلون عنده ماقدرت أتركهم وأشوف تعبي وتربيتي لهم ينهار وأدري انه ماراح يتفرغ لهم انما راح يتركهم تحت رحمه الحقيره الخاينه
وياليت مصيبتي توقف عند هذا الحد وبس لكن للأسف صار زوجي أكثر إهمال لي مالي أي حق يذكر كزوجه وإنتوا تعرفون قصدي يعني حتى المعاشره الزوجيه إنحرمت منها ولو إني كرهتها بعد خيانته لي حاول يهيني ويجرح كرامتي صار يجيني بملابسه الداخليه كلها ملطخه بروج ويتكلم معاها بالتيلفون وكله ضحك ودلع وغزل مع بعض ويجيب لي صور لها وهو معاها ولما أثور لكرامتي يقولي هذي حلالي انتي موتي بغيضك ليش محتره..فأقول ليش كل هذا راعي مشاعري راعي إني زوجتك لي حقوق عليك وان بيني وبينك عشرة 16 سنه وأم عيالك تحملت ضيمك وظلايمك لي عشت معاك الحلوه والمره وقفت معاك وقفات أهلك ماوقفوها معاك وتخلو عندك في عز ماأنت محتاج لهم طيب إذا ماودك تصرف علي ولو هذي أبسط حقوقي عندك رجع لي الدين اللي عليك قالي مالك شي عندي موتي بحسرتك وانتي عمرك ماسويتي لي شي تنكر كل شي بيني وبينه وفر لها خادمه من أول يوم زواج لها أشترى لها سياره خاصه وبأسمها وانا مشاويري بالليموزين منع عني المصروف وهي تصرف بالهبل لها ولعيالها كل حقوقها مجابه وأنا لي الله
ياجماعة الخير كل هذا مومهم المهم الحين اللي جاي قبلت بنصيبي وقدري ( قدر الله وماشاء فعل ) والحمد لله على كل حال
صرت أفتقد كل شي من حولي الحب الحنان الأمان الكلمه الحلوه الحانيه صرت تايهه مهزوزه فقدت حتى الثقه في نفسي مع الوقت حاولت أدور على وظيفه تشغلني تبعدني عن أي تفكير بخيانتهم لي وفشلت لكن ماقطعت الأمل والرجاء من الله سبحانه وبواصل بحث ولكن في نفس الوقت حاولت أشغل نفسي بأشياء ثانيه عارفه أنكم راح تلوموني عارفه انه غلط بحق نفسي وسمعتي عارفه ان الغلط راكبني من ساسي لراسي لكن صدقوني لقيته الطريق السهل واللي يعوضي كلام الحب الأطراء والغزل لقيت نفسي أكلم شباب بأسم مستعار تعرفت عليهم عن طريق مكالمه تيلفونيه بالغلط مره والثاني من خلال رقم بالبلوتوث فصرت أكلمهم بشكل يومي مره هذا وأقطع معاه فتره وأرجع للثاني وهكذا مع تأنيب ضمير أنام الليل مو مرتاحه صدقوني انا مو وحده لعوب بالعكس وحده محافظه من عيله محافظه وعمري مافكرت لمجرد تفكير اني أطلع أوأختلي مع أي واحد منهم مع أنهم يلحون علي والله يشهد على كلامي
ياجماعه أنقذوني من نفسي أدري قاعده أمشي بدرب غلط وإذا الله ساتر علي اليوم ماراح أظمن ستره بكره
بعض الأوقات أصلي بالليل أطلب التوبه والغفران والهدايه من الله عله يستجيب لدعوتي لكن لما أشوف زوجي وعمايله معاي أرجع لسواد الوجه مره ثانيه صرت أستحي من ربي عمري ماطلبت من ربي شي وإلا الله إستجاب لدعوتي حتى زوجي يخاف من دعواتي ولما عرفت بخيانته لي دعيت على زوجته بالمرض وأن مايعرفون لها علاج وتحتار أطباءها فيها ومادار أسبوع على دعوتي وإلا بدت تشتكي بآلم في بطنها ولما راحت للطبيب قال لها مافيك شي وبعدها بشهر دخلت المستشفى ونامت أسبوع وأطلعت ما عرفوا شنو فيها وبعدها بأسبوع دخلت مره ثالثه عملوا لها عمليه جراحيه لكن ماعرفت شنو نوعها ولازالت تشتكي حتى مره دخل علي الغرفه صرخ في وجهي وقال لي أدري أنك تدعين عليهم ليل ونهار ساعتها إرتحت بان الله إستجاب لدعوتي لكن الحين صرت أستحي من ربي ولما أبتدي أقرأ سورة الفاتحه وأوصل للآيه (( إياك نعبد وإياك نستعين )) كان ربي يقولي كذبتي فأصيح وماأقدر أكمل
أنا تايهه ضايعه أبي نصحكم أبي مشورتكم أبي دعواتكم لي أرجوكم أدعولي أتمنى اني قدرت أشرح معاناتي وأعذروني على الإطاله

__________________

قلبي معكي اختي الغاليه
لا املك لكي الا الدعاء بأن يعوضك الله بكل الخير
وانتي لم تخطأي فزوجك وهذه اللي ما تستحي ظلموك وخدعوك فلجأتي للرحمن واخذ حقك لأنكي عل حق
لا تلومي نفسك
وانسي ما مضى
لأنه لا يستحق اي اهتمام منك
حسبي الله والنعم الوكيل فيهم

__________________
سبحــــــان الله وبحمده ,,,, سبحــــــان الله العظيم

لا اله الا الله العظيم الحليم ربي اني لما انزلت اليي من خير فقير
دعائكم الصالح لي بالرجل الصالح

عزيزتي الغالية ... إعتصمي بالله الواحد الأحد ... ولتعلمي أن الدنيا مهما طالت فهي قصيرة جدا ..
تخيلي كم سوف يمتد عمرك؟؟ !! لنقل مائة سنة أيضا ... هذا العمر قليل جدا ... خاصة إن علمتي
أن الوقوف أمام الله يوم الحساب خمسون ألف سنة ... سنحاسب عن كل صغيرة وكبيرة ..
أي حساب هذا !!!!!!!!!!!!!!!
"وقد سئل نوح عليه السلام بعد موته: كيف رأيت الدنيا . فقال: دار له بابان دخلت من أحدهما
وخرجت من الاخر" وهو من تعمر ألف سنة.
وبكلام العقل كل شيء في هذه الدنيا يهون ويصغر أمام الايمان بالله وبقضاؤه وقدره
ولتعلمي أنك مبتلاة فارجو لك الصبر وادعي الله أن يصبرك ويفرج همك ويثبتك على الطريق المستقيم
فلتجعلي ثقتك بالله عظيمه وأنه ما أختار لك الى خير فان صبرتي كان عاقبتك مع الصابرين الذين يوفون
أجورهم بغير حساب ....

1. عزيزتي أرجو أن تكوني قوية فلا تنجري وراء المكالمات الليلية ووراء الكلمات الحانية ممن تعرفتي عليهم
فهم أيضا ذئاب يريدوك فريسة لا غير ... ولتلتفتي الى أبنائك فهم مصدر للحب والحنان .

2. قد يكون هناك عقدة بينك وبين زوجك حاولي فك رموزها ومعرفتها جيدا ولتحاولي أصلاحها بمناقشة زوجة
مناقشة جادة وجلسة من المصارحة لا يخلو منها جو الاحترام والحب والعطف.

3. يجب عليك أن تعطي زوجك أهتماما خاصا عند مجيئه لك ولتنسي جروحه ولتحيطيه بالعطف والحب والاحترام
وهذا له أثر بالغ على النفس ولتستخدي كيد النساء معه !!!!

4. يجب أن تصلحي علاقتك مع الله أولا وقبل كل شيء ولتزني كل تصرفاتك على مقياس رضا الله وحده
فأن أرضيتي الله رضي عنك وأرضى الناس عنك بمن فيهم زوجك .

ولتكثري من قول " حسبي الله ونعم الوكيل"

كلماتي لك من القلب فارجو أن تصبل قلبك .. ومتأسف لاني أطلت الرد ولم أراجعه...

لله يجبر مصابك ولكن تدكري ان مع العسريسرا
ويكفيك قول حسبي الله ونعم الوكيل
والله عزوجل قادر على اسعادك باذن الله واتعاسهم ولكن عليك ا
بالصبر ثم الصبر ثم الصبر

الله يكون بعونك اختي الصابرة بس لا تداوين الخطا بخطا
وهذي الخاينة لزوجها الاول ولكي انتي صديقتها ما اقول الا حسبي الله عليها ونعم الوكيل
واكيد سيندم عاجلا ام اجلا من زواجه منها
ارى ان تصبري عشان الاولاد ما يهتزوا لكن اذا انتي شايفة نفسك بحاجة الى حب وحنان ورمانسية ومحرومة منها لاتترددي خذي القرار الان ما دمتي في سن ممكن تتزوجي فيه اما اذا كبرتي قليلا فلا اعتقد ان الطلاق وقتها سيفيدكـ كثيرا مثل الان وكان الله في عونك واياكي و دروب الشيطان الطلاق والستر افضل مهما كان الثمن

اولا الله يساعدك ويعينك ويستر عليك
ثانيا ليش ماتدخلين اهلج بالموضوع ! احس ان زوجج ومن كلامج عنه مايخاف منج ولا هب حاسب لج اي حساب ولا كأن وراج ظهر او اهل من كثر ماتنازلتي وخليتي نفسج مداس وسوري على الكلمه ماقدر كل تضحياتج وهذا هو قاعد يذلج ويتحداج وانتي ساكته وصابره لا والمصيبه رديتي له بكل سهوله عقب ماطلقج وعارفه انه خانج هالخيانه وطلق المره من ريلها وخذاها !! اسمحي لي هذا زوجج ماعنده احساس ولا يستحي على ويهه وعلى فكره ترا الزواج اللي ينبني على خيانه وخراب بيوت نسبه استمراره 1% وراح تتذكرن كلامي في يوم من الايام ! مثل ماتنكر لج وقلب عليج وظلمج بدون سبب راح يسوي فيها نفس الشي في يوم من الايام ويتركها ويدور له وحده ثانيه !

انتي الحين ماجدامج الا حلين
1- اما انج توقفين له وقفه وتاخذين كل حقوقج وحقوق عيالج منه وتجبرينه يغير معاملته لج ويحترمج خصوصا انج الاولى وام عياله واذا مارضا دخلي اهلج او القانون اذا لزم الامر !!

2- تتركينه وبعد غصب عليه يعطيج حقوقج الكامله ! والعيال تاخذينهم طبعا دوري لج مخرج قانوني !

اما سالفه الشباب والنقص العاطفي فأنا ما الومج ولكن لازم تذكرين هالامور قبل ماتكلمين اي واحد منهم:

1- ان رب العالمين ماراح يساعدج ولا راح يوفقج بل بالعكس يمكن تبتلين زياده لانج قاعده تعصينه وتدمرين نفسج مع ناس ماراح يجييج منهم غير الاذي وسؤ السمعه ويمكن الانجراف والزنا والدعاء مايستجاب من العاصي

2- اللي تكلمينهم ماراح يسكتون وراح تصير سمعتج على كل لسان وراح تعطين زوجج فرصه يتكلم عن شرفج وتدخلين في بلاوي انتي غنيه عنها

3- فكري في عيالج اللي انصدمو في ابوهم لا تخلينهم ينصدمون في امهم ويكبرون ويسمعون من الناس ان امهم وحده مغازلجيه وابوهم انسان غير كفىء خان امهم وتركهم وامهم اللي المفروض تعووضهم هالنقص سيرتها على كل لسان المترديه والنطيحه ماراح يعذرونج ولا راح يعذرون ابوهم


توكلي على الله واتركي هالطريج وشوفي مصلحتج ومصلحة عيالج واقفي وقفه حازمه مع زوجج خليه يعرف ان وراج ناس وانج ماراح تسكتين ! هالاشكال ماينفع معاها غير الحزم والشده !! والله يعينج

__________________

لاإاله الا أنت سبحانك إني كنت من الظالمين

اخي حكيم الزمن :
كلامك جميل مقنع إلا عندما قلت في النقطه3ـ ماقلت ؟؟؟؟!!!!!!!!!
نعم إني أرى معك ان استطاعتها تنفيذ ذلك مع توفيق الله سيكون فيه علاج او بعض العلاج ولكن!!!!!!!!!!!!!!!!!!!
كيف يستطيع المقتول تقبيل يد قاتله ..... ربما عرفت كما عرفت من القصة إلى إي مدى أحبت لكن الآن جف الحب وبقي الحقد.....إنك لاتجني من الشوك العنب.............فاقد الشئ لايعطيه!!!! هذا قياسأ على نفسي وإن رأيت يا أخت ريم الدوحة أن بإستطاعتك فعل هذه النصيحة فحاولي ولا تترددي...
وانا ارى ان تعطي كل ماتمكي من عاطفة ومشاعر لأبنائك عوضك الله وإياي بذريات خير العوض ....كذك فكري في الحل الذي طرحه الأخ إمرؤ الخير فهو جيد جدا..............واحذري خطوات الشيطان فأنت اسمى قدار......فرج الله همك وجبر كسرك واقر عينك .................آمين

حبيبتي يعلم الله كم أحزنتني قصتك وكم هي مؤلمة الخيانة من زوجك ومن تلك المجرمة ولكن ألا تنظرين أنك عالجتي الخطأ بخطأ آخر أنت بإذن الله لك الأجر والمثوبة من الله على صبرك كل تلك السنين ولكن لم تضيعين أجرك بسلوك طريق الإنحراف والإنجراف وراء الشعور بالإنتقام وهو انتقام من نفسك قبل أن يكون انتقام من زوجك ماهو شعور أبنائك وهم يرون القدوة أمامهم تنهار كيف ستحمينهم من الإنحراف وأنت غير قادرة على حماية نفسك من الإنزلاق وراء خطوات الشيطان ...

أختي إذا شعرت أنك غير قادرة على الصبر فاطلبي الطلاق خيرا من أن تنحرفي عن الجادة وخصوصا أنك تقولي أنه غير محافظ على الصلاة يعني حشفا وسوء كيل ...

هداك الله إلى الحق وثبتك على الدين والحشمة والعفاف ....

__________________
اللهم إن أبي نزل بك وأنت خير منزول اللهم أكرم نزله ووسع مدخله وارفع درجته وجازه بالحسنات إحسانا وبالسيئات عفوا وغفرانا .. آمين

السلام عليكم ورحمة الله وبركاته

اخوتي وأخواتي الكرام night2005 - حكيم الزمن - اكره الدنيا - امرؤ الخير - أسيل - مناجاة الليل – بنت طيبة الطيبه
أشكركم على سرعة إجابتكم وتفاعلكم بمشكلتي
أخي حكيم الزمن:

الله يعلم شلون أحاول أكون قويه وماأكلم حد منهم وبالفعل أنجح لكن بصوره مؤقته وأرجع لما أشوفه يزيد من إهانتي
أما عن إهتمامي فيه ماكنت أقصر معاه

مره قعدت أدردش معاه وكنت أبي أعرف ليش أحواله معاي تغيرت وشنو الشي اللي ينفره مني .. قالي ماعدتي تهتمين فيني غشمرتك ودلعك وحبك لي ماعاد مثل الأول .. هو بالفعل ماعادت إلا إنعدمت وأنا أعترف بهذا الشي ولكن تعرفون ليش .. أخبركم
1 _ لما يرجع من الشغل يتغشمر ويضحك أبادله نفس الشعور وأزيد ولكن إذا كان تعبان ومتضايق يرمي نفسه على السرير ماأكلمه لكن أقوم بعمل مساج له وهو يحب هذا الشي لكن مع الوقت يتضايق ومره قالها لما تشوفيني منبطح لاتقربين جنبي ولاتدخلين الغرفه وخليني ليما أصحى بروحي بقوم ( إذا حد يقول لك هذا الكلام تقدر تعودها مره ثانيه طبعا لا)
2_ لما يطلع للشغل الصبح أودعهبقبلةودعاء له بالتوفيق وألحقه الى باب البيت الخارجي وأودعه وهذا التصرف يحبه ويستانس عليه.. بعد مرور الوقت تغير علي ويقولي ليش تلحقيني اليوم مو إخر الشهر يقصد علشان أحصل على فلوس أو مصروف زياده مع إن هذا الشي يصير كل يوم ومن سنوات .. فإمتنعت لما شفته يقولي هذا الكلام
3_ لما يكون بالشغل أتصل عليه وأتغزل فيه وأخبره إنه وحشني وهذا كل يوم وإذا إنشغلت وماإتصلت هو يتصل لكن بعد مرور الوقت لما أتصل يقولي ليش متصله تبين شي .. ولا تبين تتأكدين إن كنت بالمكتب ولا لا
هذا قليل من كثير ويبيني أهتم فيه طبعا ماراح أتغشمر أو أدلع إذا كانت هذي تصرفاته فقلت له شوف تصرفاتك معي وبتعرف ليش أنا تغيرت عليك


أختي أسيل:
للأسف أهلي مايقدرون يسوون لي شي الوالد متوفي والوالده كبيره لاحول لها ولا قوه أما إخواني الكل لاهي بنفسه وأنا بالفعل مالي ظهر مثل ماقلتي عشان جذي هو مستقوي لكن وين بيروح من رب العالمين
انا ماعرفت إنه طلقها من ريلها إلا بعدين بعد مارجعت له وأعترفت لي هي بالتيلفون بهذا حتى الخيانه كنت مستبعدتها .. لكن فيه أشياء كانت تصير جدامي ماكنت أحسب لها حساب أو حتى أهتم فيها واليوم لما أسترجع كلامها أستغرب من نفسي شلون ظليت ساكته ولساني مربوط
مثلا مره قالت لي ( جوزك يتعامل معي على أساس إني !!!!!!! ( تقصد بنت ليل ) (إفهموها) إنصعقت من كلمتها وقلت لها أنا ماأسمح لج تقولين عن زوجي جذي وأنتي أصلا شلون قبلتيها على نفسك ردت علي بضحكه ........ وقالت لي بصراحه هذي أنسب كلمه أقولها على نفسي علشان أنا من النوع السليط اللسان وعلشان جوزك يريح راسه معي يعطيني كل اللي بدي إياه )
ومره سافرت لأهلي وفي بيت أختي كانت جاره زايرتها تقرأ الفنجان وحبت تقرأ لي فسمحت لها من باب التسليه بعد ما نصحتها بأن هذا كله حرام وتستاثمين عليه فقالت لي ومن ضمن الكلام إن في وحده تحاول تجذب زوجك لها وتبيه .. أنا من باب المداعبه لما رجعت لزوجي زارتني الخاينه وخبرتها عن قارئة الفنجان .. وبدون تفكير كان ردت فعلها إنها صرخت وقالت لي أنا أنا ولما إنتبهت لكلامها قالت لي لا .. لا جوزك زي أخوي وأنا من غبائي عديتها
الشواهد كثيره لكن ماكنت منتبهه لها او بمعنى أدق كنت مثل المغيبه لامباليه بشي
أما حق العيال بالعكس هو شايف واجباته معاهم وأكثر ومايرد لهم طلب والحمد لله وهذي شهاده بحقه ماأقدر أظلمه فيها ومو مقصر معاهم بشي .. حقوقي أنا المهضومه واللي مايدري عنها شي حتى المحاكم مقدر أعتبها لأني أشوف روحتها كبيره في حقي حتى لو كان فيها إسترجاع حقوقي منه .. حقي إن شاء الله آخذه من اللي ماتنام عينه وماأقول إلا حسبي الله ونعم الوكيل

__________________

اختي ريم الدوحة
من بعد عن الله بعد الله عنه
اختي من اصلح ما بينه وبين الله اصلح الله ما بينه وبين الناس
فلم ولم ولم ولم ولم ولم ولم ولم ولم ولم
لم اضعت صبر سنين بنزوة ساعة
لم جزعت من رحمة ربك
لم وكنت المستجابة من ربك
لم وكنت القريبة لخالقك
لم وقد اصبحت بينك وبين الله كمدة صبرك وتحملك
اختي لن اكتب اكثر من هذا
ولكن فاحمدي ربك على نفسك اللوامة
وعوووووووووووووودي الى ربك ولا تتركي للشيطان مدخل الى نفسك

__________________

	في المدرسة نتعلم لنمتحن وفي الحياة نمتحن لنتعلم