السلام علیکم

اولا ... رحم الله جميع موتى المسلمين وغفر الله لهم واسكنهم الفردوس الأعلى من جناته

توفي والدي قبل 20 يوم تقريبا إثر مرض اضعف صحته وعانى بحياته كثيرا الى ان رحمه الله برحمته وتوفاه ...

قضيت فتره في منزل والدي قبل وفاته بأسبوع او اكثر .... زوجؤ لم يعارضني بل شجعني لجلوسي مع والدتي بسبب نفسيتها لمرض والدي ...

بعد العزاء ب 3 ايام زوجي ارغمني بالرجوع لبيتي حاولت كثيرا ان اجلس مع والدتي واخوتي ورفض على اني مهمله له ولبيتي .... لم يراعي نفسيتي بوفاة والدي وهو عمه ايضا ... لم ارى حتى حزنه عليه .. رجعت منزلي برغبته وغصبا عني كنت 24 ساعه مقفله على نفسي الغرفه لا اريد ان أتحدث معه كرهت معاملته ... احسست انه سعيد جدا لاني بقيت وحيده ... وكل ماقال شي او يريد ان يصطحبنا للخارج بحجة النزهة.. اقول له احترم عالاقل وفاة ابوي لسى ماله اسبوع وانت مهتم بالطلعات والتمشيات ... يقول ... طيب وش اسوي نجلس نحزن عليه ونبكي ونعذبه بحزننا عليه وهو من زمان متعذب بمرضه وربي ريحه بموته ووو وكلام كتير.... قهرني وسكتت

وقبل يومين طلبت منه اروح مكه حسيت اني بحاجتي لعمره واجلس كم يوم... رفض بحجة شغله ووعدني بنهاية شعبان سيأخذ اجازه ونسافر مكه فوافقت ....

البارحه قال لي انه سيأخذ اجازه من عمله بعد 10 ايام وسنذهب لاهله وقضاء رمضان عندهم ... قلت له ووعدُك لي لمكه !؟ قال مره ثانيه واهلي اولى ومدري ايش ...

طيب ليه كدا توعدني وتسحب علي ... قال ماسحبت عليك بس ابغى اقضي رمضان بيت اهلي .. طيب نروح مكه يومين بس وبعدين نروح لأهلك.... يقول لا مافي وقت ومدري ايش

صارت مشكله بينا وقلت له روح انت عند اهلك وانا بظل هنا عند اهلي ... قال مو على كيفك وبلا دلع زايد يكفي تحملتك كثير وووو .. قلت له خلاص ماله داعي تتحملني اكثر ولا تتحمل دلعي على قولتك وطلقني .... ضحك ويقول مين لك الحين ؟ اخوانك كل واحد مشغول بحياته الزوجيه وفوق هذا رح ينشغل وقتهم بالورث اللي بيوم العزا سمعهم يتكلمون عن الورث والفلوس وبدل ماصار عزا صار مجلس سوالف ومدري ايش ...

قهرني بكيت من القهر لسانه صار سليط اكثر من قبل حسبي الله بس ... قاال خلاص الحين مالك احد غيري وبلاش شغل الدلع وكل يوم والثانيه رايحه زعلانه عند البابا ... ليه صار يكلمني كذااا ليه وطريقته مستفزه بشكل ... اول مره احس اني ضعيفه ... دايما كلامي هو اللي يسكته الحين صار العكس .. قلبه قاسي حجرر .. واليوم يقول جهزي الشنطه للكل بنقضي رمضان والعيد كمان .. ماعرفت كيف ارد عليه قلبي احسه مثل النار مابغى ابين له ضعفي اكثر من كذا ولا ابغى اروح عند اهله اقضي شهرين بعيده عن اهلي صعب والله !!

__________________
-

فأجبر خَاطري .. بفيّض نعَمك ❤ ....

عظم الله اجرك واحسن الله عزاءك وغفر الله لميتكم والله يرحم والدك ويرحم وتانا وموتى المسلمين

__________________
اللهم اني استودعك اولادي وبناتي دينهم وآمانتهم اللهم جنبهم الخمر والمسكرات والمخدرات والزنا واللواط والفتن ماظهر منها وما بطن يامن لاتضيع ودائعه

وعليكم السلام ورحمة الله وبركاته..

مرحبا سمورة حبيبتي، الله يربط على قلبك..

أنت قلت حصلت مشكلة بينكما، ربما بسبب تلك المشكلة كانت ردة فعله هكذا معك

أرى بإنك لا تتحدثي ولا تقولي لن اذهب، فعندما يقول لك ذلك حضري قولي طيب إن شاء الله

في وقت روقانه أخبريه بعمل عمرة لتهدئي وتستكين نفسيتك، سيهدأ فقط ردة فعل على المشكلة التي حصلت..

رده الله إليك ردا جميلا..

ميخالف ياعسل نفذي اللي يطلبه منك زوجك بنية طاعة الله
ولا تعاندينه.. زوجك مايجي بالعناد

وترا زوجك بالعكس متضايق من الوضع ومن هالحاله ويحاول يطلعك من جو الكآبه ..هو راحمك يبي يغير مودك لو بالطلعه

ومن ناحية انه يجرح بالكلام او يستقوي عليك طنشيه ..خليه يفهم ان هالكلام ماراح يأثر عليك ..ولا تبينين ضعفك قدامه من هالناحية

سألتك بالله ايش استفاد ابوكي من حزنك عليه!

واصلاً من قال انك حزينة عليه!!!!!

انتي حزينة على نفسك وهمك نفسك انك فقدتي سند لك

اما هو (والدك ( الله يرحمه ويتجاوز عنه ) ) ولا فكرتي فيه من اجله هو (هل بحثتي عن الديون اللي عليه؟ - هل عملتي له صدقة جارية ؟ - هل استغفرتي له؟ - هل بحثتي في الدين عن حكم الحزن اللي انتي بتسويه الان ومهملة زوجك وبيتك ( اللي راح تحبيه وتحزني عليه بعد مايموت هو كمان!!!!!)


اقول :

اصحي لنفسك انتي وغيرك

وسمّوا الامور بمسمياتها الصحيحة

لاتقولي انا حزينة على بابا!!!

انتي حزينة على نفسك وبتفكري بنفسك!

بلا طبطبة ودلع زايد يقلب الامور الى عكس حقيقتها.

__________________

عظم الله أجركم وابدله الله دارا احسن من داره واهلا خير من اهله انفطر قلبي والله الاب عز الله يصبرك اختي ابكي ولا تكتمي وبيني ضعفك وانكسارك دون جزع كيف سيعلم حالتك ان لم تظهري واطلبي منه ان يراعيك واطلبي منه ان امكن ان تبقي لايام في بيت اهلك قبل الذهاب لاهله والله يكون معك

لما تكون البنت تحت طاعة ابوها

توريه الويل بعنادها ودلعها وطيشها

ولما تتزوج وتنتقل الطاعه الاولوية لزوجها

تطنش زوجها وتحن على ابوها!

لا وياريت حنيه يستفيد منها الاب ؟!

لا هو ولا هي مستفيد

وانما وضع الأمور في غير نصابها!!!!

ياريت نضع كل شي في مكانه الصحيح ونسمي الامور بمسمياتها

نسمي المثلث بالمثلث ونضعه في الفتحة المثلثة والدائرة نسميها بالدائرة ونضعها في الفتحة الدائرية والمربع نسميه بالمربع ونضعها في الفتحة المربعة ( مثل لعبة الطفل ابو سنتين)

__________________

لا أستطيع مجاراتك في ردودك الفلسفية تبارك الرحمان لكن لا تشكك في مشاعر الزوجات نحو ابائهم لو استطاع الزوج ان يملأ الفراغ الذي يتركه الاب لما تعلقن به اكثر من كونه اب
فالبنت معروف منذ سنواتها الاولى تميل للاب وهو يفظلها على اخيها وهذا لا يضايقني في ابنتي لاني نفس الشئ هو ابي وصديقي وحبه لي غير مشروط عكس الزوج واعطف عليه حتى من شيب رأسه وسنه

وعليكم السلام ورحمة الله وبركاته

غفر الله لوالدك ورحمه وأسكنه فسيح جناته

رغم أن رد الأخ الكريم لماذا نتزوج ؟ شديد بعض الشيء
لكني أراه الصواب وأؤيد كل ما قاله ونصح به
ومن يريد العلاج يصبر على مرارة الدواء

طريقة زوجكِ عليها ملاحظات كثيرة ويحتاج تصحيحها باللين .. لكني أحس بأنكِ سبب في هذا التعامل
راجعي نفسكِ

واحذري من طلب الطلاق بدون بأس .. وأنتي تعرفين الناحية الشرعية في ذلك

ختاماً:
أسأل الله لكِ السعادة .. وأن يصلح الله حالكِ وحال زوجكِ وأن يصرف عنكم كل سوء وشر الشياطين

أكثري من:
الصلاة على المختار والاستغفار ولا حول ولا قوة إلا بالله

موفقة بحول الله.

__________________

اللهم امين ... شكرا لكم

المنسيه .. حاولت معاه بالطيب لكن مصمم على تأجيل العمره لبعد العيد .. رتبت شنطته فقط .. اذا هو يريد السفر فليساف وحده

اذا هو راحمني ياريماس يسمعني الكلام اللي كل يوم اتصبح واتمسي فيه !!

__________________
-

فأجبر خَاطري .. بفيّض نعَمك ❤ ....