انا يا بنات عملت حقن مجهرى لان زوجى عنده مشكلة فى الحركة و العدد و دى كانت اول مرة اعمل فيها فى حياتى و اول تجربة فعلية لان كانت كل معلوماتى عنه من النت و من تجارب البنات
اول مرحلة مرحلة البحث عن الدكتور كنت بسمع عن دكتور شاطر جدا فى النسا بس مسمعتش عن شطارته فى الحقن و قولت الدكتور دا سبب و انا حتوكل على الله و ان شاء الله مش ححتاج شطارة دكتور فروحت للدكتور دا
المهم ابتديت اخد الحقنة اللى تحت الجلد و الحمد لله عدت على خير و دى كانت من اليوم الـ 19 من الدورة اللى قبل الدورة اللى حعمل فيها و دا عشان انا دورتى بتيجى كل 26 يوم مش 28 و لما جت الدورة اخدت اول حقنة للتنشيط لان الدكتور ادهانى من اول يوم "مش عارفة جايز عشان عندى 33 سنة مش عارفة بس قلت ممكن يكون احتمال"
و كان اول يوم لمتابعة التبويض فى اليوم السادس من اول يوم للدورة و رايحة و كلى امل انى الاقى مثلا 10 بويضات اول 12 حاجة كدة تملى العين
(انا كنت فى عمرة فى رمضان اللى فات و دعيت ربنا انه يرزقنى بتؤام بنت و ولد مرة واحدة عشان اعوض اللى فاتنى)
المهم جه الدكتور و لقيت وشه اتغير خير يا عم في ايه؟ طلع عندى 4 بويضات بس
4 بس ازاى انا لما كنت باخد كلوميد كنت بعمل لحد 3 بويضات حجمهم كويس و محدش قبل كدة قال انى عندى مشكلة فى البتويض قلت خييييييييييييييييير و زودلى الحقن لـ 4 فى اليوم بدل 3 عشان احتمال تزيد
و طبعا كنت قارية على النت ان كل ما عددالبويضات يكتر كل ما الفرص تزيد عشان مش كله بيكون بويضات سليمة و مش لازم الكل كمان ينقسم و يتحول لجنين
المهم رجعت البيت و 2 كيلو اكتئاب و حزن و كلمت جوزى على النت و قعد يهدينى ان ربنا ان شاء الله حيطرح البركة فى القليل و اننا مش عاوزين غير واحدة يا سيتى
المهم سبت تكالى على الله و قلت هو مش حيخزلنى و اخدت الحقن و قلت ان شاء الله حيزيدو برغم من ان المساعدة بتاعة الدكتور قالت انه مش اكيد و ان دا مجرد احتمال
و روحت المرة اللى بعدها و طلعو 4 بس بس ابتدو يكبرو و طبعا حزن تانى و كل ما اكتأب اقول ربنا مش حيسبنى اكيد موضوع الـ 4 بويضات دا عند ربنا ليه معنى هو عاوز حاجة منه و برضو سبت تكالى على ربنا و قلت مش جايز يطلع 3 بويضات من الاربعة دول و الدكتور يضطر انه يرجع التلاتة كلهم مش اتنين بس
و اتحدد ميعاد السحب فى اليوم الـ 14 من اول يوم للدورة و روحت انا و زوجى و اتبنجت و دخلت سحبو البويضات و لما فوقت لقيت نفسى جنبى جوزى و ماما و لقيت الدكتورة جت تطمن عليا و قالت ان من الاربعة طلع 3 ماية و واحدة بس هى اللى سليمة و قالت بالنص "مافيش فى ايدنا دلوقتى غير الدعا ان ربنا يكرمنا فيها"
و انا طبعا فاهمة ان مش لازم يحصل انقسام للبويضة دى و قالت لزوجى انها حتتصل بيه بكرة الساعة 6 مساء عشان تقوله ايه اللى حصل فى البويضة دى
طبعا قضيت ليلة ما يعلم بيها الا ربنا و اكتئاااااااااااااااااااااااااب ممتاز و عياط عياط عياط و كان اللى طالع عليا ان ربنا مش بيحبنى طيب انا ايه اللى ممكن اعمله عشان ربنا يحبنى و يرضى عليا
المهم جت الساعة 6 و انا قلبى دقاته اسرع من دقات عقرب الثوانى و اتصلت فعلا جريت و سبت جوزى و روحت اوضة تانية مش عاوزة اخد الخبر كدة فى وشى بس الحمد لله هو جه ورايا و هو بيكلمها و على وشه ابتسامة و عامل بأيده علامة
ففهمت ان ربنا كرم لحد دلوقتى و صليت شكر لربنا و قالت الدكتورة نيجى كمان 3 ايام عشان نرجع الجنين
و الحمد لله روحنا عشان ارجع الجنين و كان دكتورى مسافر للحج و الدكتورة الصغيرة مساعدته هى اللى حترجع الجنين فجوزى اتوتطر جدا و كان عاوز يتخانق قلتله احنا مش محتاجين دكتور احنا محتاجين ربنا ادعى و هو اللى حيكرمنا
و كان المفروض تكون المثانة مليانة و كانت عملية ببنج تانى مش عشان هى بتوجع بس هم عاوزيين انى اكون مرتاحة و جسمى مش مشدود و لما فوقت فهمت انهم حطولى قسطرة عشان مروحش الحمام و فضلت نايمة ساعتين عندهم و رجعت بيتى نايمة فى العربية
و متحركتش خالص هى الدكتورة قالت يومين بس و انا فضلت اسبوع كامل و حتى كان بعد الترجيع بيويمن وقفة عرفات و كنت مترددة اصومها ولا لأ عشان موضوع شرب الماية دا مهم جدا عشان التثبيت قلت انا حسيب تكالى على ربنا و مش معقولة اكون انا بعمل حاجة اتقرب بيها منه و هو يحرمنى قصادها من حاجة نفسى فيها و كنت باخد فى الوقت دا حقت تثبيت و بعيد عنكم الوجع و الالم من الحقن دى
كان جوزى بيديهانى و بعدين بقيت انزل اخدها فى المستشفى اللى جنب بيتى كل يوم و دا تقريبا من اليوم السادس للترجيع بس كنت باخدها و ارجع تانى انام على طول برضو
و بعدبن قعدت اراقب نفسى على اى احساس حساه مافيش غير اللهم يوم السبت الصبح صحيت على وجع جاااااااااااااامد كأن الدورة حتنزل خلاص و دخلت الحمام عشان هى خلاص حتنزل و انا كنت مرجعة الجنين يوم الخميس و كان فى وجع بتاع نزولها و بعدين راح بعد اقل من نص ساعة و بعد كدة بقيت طبيعية خااااااااااالص ولا اى حاجة بحسها
المهم يوم الخميس اللى بعده افتكرت حاجتين:
1- موضوع بنت كانت كتباه فى منتدى من المنتديات بتقول ان خالها دكتور و قالها اذا قيستى درجت حرارتك و لقتيها زادت عن درجتك الطبيعية 3 شرط تبقى حامل
2- موضوع تانى عن جهاز للتوبيض عن طريق قياس درجة الحرارة و انه برضو اذا حصل حمل حيعرف عن طريق درجة الحرارة
فجريت على الترمومتر لقيت درجتى مرتفعة 3 شرط فرحت جدا طبعا و قلت لجوزى و هو قالى ان شاء الله خير و انه متفائل جدا
و فضلت فى موال الحرارة دا شوية الاقيها مرتفعة و شوية الاقيها منخفضة
و مع الارتفاع نفسيتى ترتفع و مع الانخفاض نفسيتى تنخفض
و جاتلى حالة من اليأس لدرجة انى بقيت فى كل صلاة افضل اعيط و اكلم ربنا و انا بعيط و انا فاكرة مرة قعدت و انا بصلى اقول لربنا و بصوت عالى "يا رب انت سامعنى سامع صوتى فوسط كل الناس دى؟ انا محتجالك يا رب محتجالك ارجوك اسمعنى يا رب"
المهم جه يوم التلات اللى هو اليوم الـ 12 من الترجيع قلت حعمل تحليل فى البيت و عملته و طلع خط تانى خفييييييييييييف و صحيت جوزى و قعدت اوريلو الخط يقولى ايوة شايفو و ابعده عنه اكتر و اقوله شايفو من عندك طيب و يقولى شايفو جريت على التليفون كلمت ماما و قلتلها و نزلت اعمل التحليل فقالو نستلمو بالليل يووووووووووووه ربنا يسترها بقى
و كلمنا بالليل و انا خلاص كلى خايف و بيرتجف من الخوف و الحمد لله طلع فى حمل بس الهرمون ضعيف 81 بس فكلمت الدكتورة تانى يوم عشان تكون موجودة فى المركز "تخيلو يا بنات معرفتنيش ، حسيت انها مكانتش متوقعة انى ححمل" و قالتلى لازم اعيده تانى بعد 48 ساعة عشان نشوف الهرمون بيزيد ولا لأ
و عدته و طبعا قلبى على ايدى تانى و نفس العلقة اللى من يومين لا قلم زاد ولا قلم نقص و الحمد لله بقى 251 و قولتلها على طول قالتى المرة دى "مبروك"
الف حمد و شكر ليك يا رب:14: :14: :14:
بس كان فى بالى حاجة ان الدكتورة كانت قالت لى مرة ان ساعات بيكون فى كيس حمل بس من غير جنين و فضلت كدة اسبوعين كمان فى قلق و خوف انى افرح لحد ما سمعت النبض الحمد لله
:14: :14: :14:
المهم يا بنات انى خبر حملى نزل عليا كالصاعقة كنت متخيلة انى حعيط و اتنطط و اعمل كل شغل العيال من الفرحة بس مش عارفة ليه نزل عليا بالتتنيح و انى مش مصدقة خالص
و جينا لامر جوزى انى مقولش لحد فى المنتديات و انى ممكن اقول لصحابى بس
طبعا وافقته بس انا من جوايا حاسة ان ربنا اكبر من اى عين او حسد و انى اذا حتى اتحسدت حيكون دا بأمر من ربنا و كنت سايباها عليه من اولها لاخرها دا انا حملت بمعجزة و الحمد لله بس طوعته و خلاص
و كنت مستنية الويم اللى ادخل فيه الرابع عشان اجى و اكتب حكايتى عشان اقول لكم حاجتين
1- ربنا لما بيريد مش محتاج دكتور شاطر ولا خايبان ولا اى احتمالات للعلم هو اراد و خلاص
2- مش لازم تجارب البنات تكون كلها ذى بعضها و انك بتجربتك اكيد تجربة جديدة تستفيد منها البنات
هى دى حكايتى من طق طق لسلامو عليكو
ادعولى ان ربنا يتملك على خير و يفرحتى بطفل سليم صالح معافى يفرح قلبى و قلب كل اللى بيحبونى
02-03-2009, 01:04 PM
قصة حملى و الحمد لله
ضوابط المشاركة
العرض العادي
