السلام عليكم ورحمة الله وبركاته
((عيوب زوجي كثيرة))
انا كنت اتابعكم من فتره لفتره واطلعت ع بعض المشاكل وردودكم واللي خلتني اتشجع هالمرا واكتب لكم مشكلتي اللي اتمنى احصل لها حل عندكم
انا متزوجه من سنه وشهرين وفرق العمر بيننا سنتين وعندي منه ولد عمره شهرين الله يحفظه ي رب ،، عندي كذا مشكله مع زوجي اولها باختصار هي عدم اهتمام زوجي فيني واللي اقصده من الناحية العاطفيه، وهالمشكله من اول ايام زواجنا جاف جامد لا مبالي يعني ما ابالغ لو اقولكم من تزوجته ما سمعت منه كلمه حلوه مثل احبك او اشتقت لك او حياتي عمري ...الخ اقسم لكم بالله ولا مرررا قالها لي ،علاقته فيني من هالناحيه كأني اخته ما احس بالموده والعطف اللي تكون بين الزوجين،
مع العلم اني ما اقصر من ناحية اللبس والنظافه والنيولوك غير الاهتمام الداخلي لكن ما يلاحظ ولا يهتم، نظريته للزوجه انها تخدم زوجها في الاكل والغسيل والتنظيف ووو فقط ولا حمدا ولا شكوراا ومن دون كلمة طيبه لها لأنه يشوف هذي شغلتها حتى لو كانت مريضه او مضغوطه ،،
كمان مشكلته بالتقصير المادي، اول 3 شهور من الزواج كان يعطيني انطباع انه كريم وبين فتره وفتره يعطيني مبلغ بسييط يقول يعني لو احتجتي شي احيانا 300 او 500 خصوصا لو كان طالع للبر او مشوار يومين ثلاثه بس بعدين اختفت هالعاده صار يروح ويجلس احيانا من اسبوع الى 10 ايام ما يعطيني مصروف وغلطتي اني تغاضيت عن هالشي وما صرت اطلبه قبل يروح وهو تعود ع كذا ، غير كذا لما انزل السوق يعطيني بطاقته الصراف ويشدد علي ممنوع اسحب كثير وممنوع اشتري الا الاشياء الاساسيه فقط يعني لو كنت نازله عشان مناسبة عيد ممنوع اشتري الا لبس عيد فقط، لا عطر لا شنطه ولا بيجاما ولا اي شي كمالي كذا وطول ما انا اتسوق يتصل تراك سحبتي مبلغ كذا وكذا انتبهي لا تلعبين بالفلوس ، وهذا مواله في كل طلعه لي مع العلم اني ما اطلع للسوق الا وقت مناسبه فققققط وما يكلفه مصروفي اكثر من 1000 ريال وهذا نااادر ومع ذلك اسكت واقول ماشي ، صار عندي توتر وضغط نفسي من ناحية المصروف ما اعرف اطلبه ابدااا ما تعودت لأني عند ابوي الله يطولي بعمره كان يعطيني المصروف من غير ما اطلب وحاجتي وزياده ، ف تخيلو لو ابي السوق اجلس يومين ثلاثه ع اعصابي ومتوتره عشان افاتحه بالموضوع طبعا السبب هو انه يبدا يحقق ويصير يكلمني بدون نفس ليش وايش تبين ومن هالكلام، مع انه ماديا كثيررر مرتاح وراتبه ما يقل عن 13 الف بالشهر غير شوية التجاره اللي يسويها، حتى انه يسلف الناس مبالغ كبيره 50 ألف 20 ألف غير اننا ساكنين بشقه صغيره في بيت اهله يعني ملك والسياره ما عليها اقساط دافع حقها كاش طيب ليش هالتقصير والبخل معاي ومع اهله ؟ واللي يقهرني انه كريم مع الناس ويحب يعطي ويتكرم عليهم مثلا طلعة بر ممكن تكلفه 3000 وزياده يتكفل فيها هو بطيب نفس منه مع العلم ان هالتقصير مع اهله من قبل يكون معاي
الشي الثاني، لغة الحوار والنقاش بيننا معدومه يعني لو حصل بيننا تتش ويكون غلطان علي مستحيل يكلمني بالموضوع او يناقشني فيه تصير العلاقه بيننا رسميه بدون كلام او ضحك الين ترضيني الايام وارضى من نفسي وغصب ارجع لطبيعتي وهالشي سبب عندي تراكمات تعبتني نفسيا كثيررر خصوصا انه ايام حملي ما كان يرحمني ابدااا مثلا لما كنت بالشهر الخامس وبدت بطني تكبر وكانت معاي تقلصات بالعضلات جدا مؤلمه غير الآم ثقل عالظهر وتعب الحمل جاني وطلب اسوي قهوه وشاي وعشاء لاصحابه مجمعهم بالبيت وكان واضح علي التعب لدرجه امشي منحنيه من الألم فقلت اوك بسوي لك القهوه والشاي بس العشاء اطلب من برى قال لا، قلت تعبانه والله مافيني اتحرك كثير قال دبري نفسك قلت اوك بس وانت نازل قول للشغاله تحت تطلع تساعدني، قال ماراح اقولها سوي كل شي انتي وطلع ، وربي كنت اشتغل وانا ابكي من الالم ومع ذلك ما رحمني وهذا وضعي طوااال فترة الحمل وهذا مجرد مثال، كان كل من شافني رحمني حتى اصحاب المحلات اللي اشتري منهم كانو يعرضون خدماتهم توصيل اغراضي للسياره رحمه منهم بس هالرحمه انا ما شفتها من زوجي ابدااا، واللي ذكرته مجرد مثال وفيه الكثير والاعظم من كذا وانا قلت هالشي عشان اوضح لكم بس اني افتقد رحمته وحنانه علي وهالشي للحين رواسبه متراكمه عندي لأن هالشي جرحني كثيررر وبدا ينفرني منه ، ما كانت تهمه راحتي ابدا ودايم كلمته الحريم يحملون ويولدون وهم يشتغلون ليل نهار ما ماتو ولا صار فيهم شي !!
وبعد مشكلة انه ما يهتم بنظافته الشخصيه ابداا وبصراحه استحي اذكر لكم امثله لأنها صعب تنذكر، كمان احيانا لما يكون عليه جنابه يطلع للدوام من غير شور وهالشي لاحظته صار كثير خصوصا ايام الشتاء، غير انه ما يصلي الا نادراا وبالبيت مع ان المسجد مو بعيد والاعظم انه احيانا نكون جالسين تحت عند اهله ويأذن وتقام الصلاه ويبدا يهزأ اخوانه الصغار عشان يطلعون للصلاه وهو جالس بيننا ما يروح، هذا الشي عجزت افسره، يعني لو هذا قل وعي منه كان عذرته لكن ينهر اخوانه وهو جالس !! مادري شلون يفكر ، بحثت بالموضوع وكيف اعين زوجي عالصلاه ولاحظت من بعض الردود ان الزوجه ممكن تحمل اثم زوجها لو كان ما يصلي لأنها ما تنصحه او تعينه عليها؟ طيب لو كان هذا الشي صحيح ليش ؟ هو انسان بالغ عاقل وفاهم وينصح اخوانه وممكن يضربهم عشانها لكن هو مو ملتزم فيها يعني هو بهالحاله مقصر بمزاجه او كسل منه ، ليش انا اخذ اثم عدم نصحه ؟ هالشي سبب لي نفور منه وتعبت نفسيتي كثير خصوصا اني سمعت فتوى ان حياتي معاه ممكن تكون حرام لأنه ما يصلي ( والعهد الذي بيننا وبينهم الصلاه فمن تركها فقد كفر ) !!!
السبب اللي خلاني اكتب اليوم واطلب المساعده مع اني ماتوقعت بيوم اسوي هالشي لأني كنت اعتبر هالشي خاااص ولازم احل مشاكلي بنفسي لكن من جد بديت اكره زوجي وبديت اشك بانوثتي عنده ، اسمع المدح والثناء والدلع من اللي حولي الا منه هو ! صرت احس اني عنده كأني خادمه اهم شي وحده تطبخ له وتغسل وتنظف بدون ادنى مشاعر او عبارة تدل ع الرضى، انا بطبعي هااااديه جدا وعاطفيه واحب اخدمه وارضيه واسعى لراحته من طيب خاطري وما ابالغ لو اقولكم طول فترة زواجنا الى يومنا هذا ما رفعت صوتي عليه او ضغطت عليه بشي بالعكس لما تصير مشكله اسكت وابدا اعامله برسميه واحسسه انه غلط علي لكن لا حياة لمن تنادي، مع العلم واللي فهمته منه انه يحب هالطبع فيني وانه صار يحب البيت من الراحه اللي يحس فيها عندي لأنه كان يفتقده مع اهله كانو يتعاملون مع مشاكلهم بالصراخ وتقليل الاحترام ووو ، ويمكن هذا عيب فيني ما اعرف اخذ حقوقي منه واطالبه فيها واخاف اناقشه لأني ما اضمن ردة فعله تجرحني او تسبب لي ازمه وانا مو ناقصه ،،
اخر موقف صار بيننا كان قبل فتره بسيطه بعد ما خلصت فترة الاربعين رجعت البيت وكنت اتمنئ منه هديه بسيطه لو ورده لكن للأسف ما حصلت منه اي شي وخليت هالشي بنفسي ولا حتى لمحت له وعديت الليله ع خير ،، حتى امور صيانه بالبيت بسيطه لكن مسببه لي ازمه كثيررر كنت ابيه يعدلها ومن بداية زواجنا كنت اطلبه هالشي ويأجل احيانا واحيانا يصرفني وصرت بفترة الاربعين اذكره يضبط الامور قبل ارجع للبيت وقالي اوك وبعد فتره قال لي انه خلاص عدل كل شي لكن فجأه ارجع للبيت وهو ع وضعه يعني كذب علي عشان يسكتني !
قبل كم يوم طلبت منه جهاز جوال جديد لأن جهازي وصل لمرحلة ان المحلات صارت ترفض تسوي له صيانه او حتى تشتريه طبعا قلتها بمزح وضحك ما ودك تجيب لي جهاز جديد ؟ قال لا ليش ؟ كملت بضحكه اني ولدت ما جبت لي هديه المفروض تجيب لي طقم ذهب انا جبت لك الولد اللي تتمناه جلس يضحك علي ورد علي برد دمرني نفسيا ماراح اقوله بس كملت اترجاه اني احتاج جهاز جديد قال لي عطيني جهازك ابيعه واشتري لك غيره طبعا هو يعرف اني مستحيل استغني عن جهازي هذا لأن فيه ارشيف 5 سنوات من صور وملفات احتاجها، قلت له ان الجهاز معدوم وماينفع معاه لا بيع ولا صيانه قال لي هاتيه لو ما يجيب الا 100 ريال !! قلت ليش طيب حرام ابيعه وانا ابيه هالمبلغ ماراح يفرق معاك كثير قال خلاص مافيه جوال ورفض النقاش بالموضوع وكالعاده اقتنعت غصب عني وقفلت عالموضوع
واللي ضايقني كثير مو انه رفض الطلب بس انه ما حسسني بقيمتي كزوجه وشريكة حياته من رده علي
،، كل اللي كتبته ولا شي عند معاناتي معاه مع العلم اني مو مقصره ومدلعته ع الاخر وطلباته كلها انفذها بدون نقاش حتى لو ما كنت راضيه ما ابين له ، ويمكن هذا السبب اللي يخليه يعاملني كذا ، لما اكون طيبه معاه وادلعه يستقوي علي وما يرحمني ولما يطفح الكيل عندي واعامله برسميه واطنشه يبدا يدور رضاي بطرق غير مباشره ، طيب ليش لازم اكون كذا عشان يحترمني ويقدرني ؟ يغلط علي كثيرر لكن ولا مرا اعتذر او راضاني تعبت من حياتي معاه، انا مو ناقصني لا جمال ولا اسلوب تعامل ولا مقصره معاه بشي واستاهل زوج افضل وحياه اهدا واريح من حياتي حاليااا مابي حب ابي حنان وعطف وموده ورحمه بس ابي احس اني زوجة لها مكانه واحترام مو مجرد مدبرة منزل،، عشان كذا انا اطلب مشورتكم ورايكم بموضوعي مع الشكر والامتنان مقدماا وبليزز لا احد يقول لي جلسة مصارحه ونقاش هادي لأني جربت هالشي وهو من النوع اللي اثناء النقاش يتحمس ويتفاعل ويسوي مقتنع بكلامي وانو معاي حق يعني يسلك لي ويعطيني جوي لكن لما يجي بلحظتها تكون افعاله غير ولا ينفع معاه شي ف برايكم ايش الحل !!
((تم التعديل ليتناسب مع المضمون))