ماادري كيف ابدا قصتي معكم انا اعاني من احباط وسأم وملل من سنتين والسبب اني تزوجت من رجل وكان املي اني اسعده ويسعدني لكني فوجأت من اول يوم اني اطالب بالرسمية في معاملتي له الجنسية والتعاملية فاللعب والمزاح ممنوع الزينة بعضها ممنوع وبعضها صار ممنوع مع السنين حتى اني صرت مالاقي شي اتزين فيه لانه كله ممنوع دايما يفشلني ويحبطني ويقول لي انا ماحب كذا وطبعا انا معاه على الخط كل شي السمع والطاعة حتى صارت وظيفتي هي التربية والخدمة 000طبعا حتى الجماع بصورة رسمية وحتى اذا انا حاولت امزح او اسوي حركات او ابادره بالفراش تكبر علي من بكرة
اقلمت نفسي على طبعه لانه ماكان همي الا رضاه
وبعد سنوات وعدة اطفال جابلي مفاجاة تدرون وشي ؟؟؟؟؟؟

تزوج وحده ثانية!!!!!!!!!!!


مع ذلك تقبلت منه الموضوع وقلتله اننا بنصير خوات 0000طبعا تدرون ليش ؟؟علشان ابغى اكسب رضاه

المشكله ماكانت ياخوان في زواجه لكن المشكله ان الرجال تغير مية وثمانين درجة مع زوجته يعاملها قدامي كنها زوجته وانا اخته يمزح يلعب يضحك يشتري لها زينة وانا طبعا مايقدر يمارس معي اي شي من هذا
حاولت اتفاهم معه لكنه كان يقول انا كذا تبين ولا كيفك
آثرت اني اصبر علشان عيالي وبعد سنتين الرجال صار يحط من كل حبه قبه حتى لو كانت المواضيع ما تخصه 00مزاجه متعكر ومتضايق من وجودي بالمرة حتى عصب ذاك اليوم لغير سبب وقال0000


انت طالق!!!!!!!!!



حسيت يومها اني ضيعت جزء من شبابي لانسان مايستاهل لكن اللي كان يواسيني


هو ثقتي بربي انه يبي00000000000 1 ياجرني00000000000 2وينصرني

جلست انتظر العدة تخلص علشان ارجع لبيت اهلي لكنه بعد فتره راجعني فقبلت دون اي شروط طبعا لانه طاب خاطري منه
وبعدها الرجال تحسن كثير لكن مشكلتي هي

انه مالي خاطر فيه ارتاح اذا راح واقلق اذا جاء حاولت اجامله لكني انفجرت بعد فتره لاباس بها وقلتله يخليني لحالي انا وعيالي لحالنا في ديرة ثانية لكنه رفض
ادعي ربي دايم اني اصلح من نفسي
اجاهد نفسي لكني مالاقي منها الا الاحباط والملل من بيتي
قال لي انه صار مشاكل مع زوجته الثانيه
حاولت اني احسن من وضعي معاه لكن ماني قادرة على نفسي
كل ماقريت شي حلو في المنتدى تمنيت اني اسويه له مفاجاة لكني مااقدر وحتى لو صادفت اني قدرت اسويها مالاقي اي طعم فيها

وهالحين يالاخوة ابغى منكم حل يساعدني على نفسيتي لاني تعبانه من هالموضوع من سنتين واعتذر لكم عن الاطالة


تم تعديل حجم الخط

حبيبتي ماأبي أظلمج وأقول ما حاولتي من كلامج وايد حاولتي تكسبيه على حسب معرفتج فيه ومحد يقدر يلومج ...
أنا من رايي تقررين الطلاق أحسن لانه من كلامج عافه الخاطر ماتبيه مو قادرة تتقبلين يكون زوجج وهذي صعبه صراحه مدام كرهتي عشرته مالج قعده معاه فكري شوي بينج وبين نفسج كتبي سلبياته وسلبياتج ابورقة ذا تقدرين تعدلين اشياء اساسية فيهم كان بها كمحاولة محاولة اخيرة بحقه وحق عيالج ما شفتي منفعة خلااص ياقلبي الزم ما عليج راحة بالج واعتقد تحملتي كفاية ...
الله يهدي سرج ياربي ويصلح بالج ويهدي زوجج ان شالله ....

__________________

اختي انتي يااالج ملل منه وهو السبب في هذا لانه كان يكسر خاطرج دوووووووووووووووووم

الصراااااحة هوووووووووو ينعااااااااااااااااااااااااااف وغلطتج انج من البداي مشيتي على هواااه

ما ناقشتيه ليش هذا ممنوع وليش ذاك لا

عشان يحس ان الحياة تبادل افكااار موو أوامر وبس

اضني هذا هو اللي خلاه يدووووووور على الثاانيه

ويوووم الثاانيه سوت معااه مشاااكل رد لج انتي

وصدقني الثاانيه لووو ردت له بيتركج وهكذا

اختي اذا تبي تطلقي منه هذاااا حقج

واذا مب هاينه عليج العشرة ارجعي له بس بشروووطج

وخلي زمن الاوامر والعبوووودية تنتهي

وحطي راسج براااس زوجته الثاانيه وبراسه هووو بعد

وربي يوفقج

اشكرك اختي فيلة
ماقدر اختي اطلق لانه حاط عياله بعيونه من وين اجيب لهم رجال زي ابوهم وبعدين انت عارفة ضحية العيال بالطلاق
واشكرك اخي بحر الاحزان لكن ابغى اقولك اني ناقشته مراراوتكرارا كل مامنعني من شي فما كان يقول لي الا انا كذا مااحبه
واما بالنسبة لمشاكله مع زوجته الثانية فهي تروح وتجي يعني مرة متصالحين ومرة متهاوشين والرجال ثابت على تحسنه معي
واما بالنسبة للاوامر فهو هالحين يستجيب لاوامري بدل يوم كنت استجيب لاوامره تصدقون انه طالب مني تغيير جو لكني ماني قادرة اروح معه
لكني انا ابغى حل يساعدني على تحسين نفسيتي معاه لاني تعبت منها
واشكركم مرة ثانية على تفاعلكم

طبيعة الرجل في بداية حياته الزوجية أن يثبت للزوجه انه قوي وصاحب سلطة
فالكثير من الرجال يعيرون الرجل الهين اللين اللي كلمة تجيبه وكلمة توديه
وأغلب الرجال للأسف يعتبر القوامة إذلال للزوجه فيظهر الجبروت والجور
وفي النهاية لايصح الا الصحيح !

الزوج مهما تجبر مهما تكبر يرضخ للأمر الواقع ويعيد حساباته من جديد
هذا تحليلي البسيط المتواضع لشخصية زوجك والله أعلم ..

أما بخصوص موقفك وثباتك فهذا يدل على دينك ووعيك وزيادة تعليمك
مثال بسيط :
الفلاح المكافح ينثر الحبوب في الارض على أمل حصد الثمار
ولكن متى يحصد هذه الثمار ؟
بعد ريها وسقيها وحمايتها وتوكله على الله اولاً وآخراً
فالحياة والموت بأمره سبحانه وتعالى
قد تسرق الطيور المهاجره الجائعة أطراف السنابل
ولكن هذا الفلاح لا يبالي فالله سبحانه لن يخيب أمله ويضيع عمله
أختي الكريمة أنتِ بذرتي الخير وضحيتي بالكثير في حياتك
وجاء وقت الحصاد فهل تتركي الحصاد لعابر سبيل ؟
اعتبري زواجه الثاني تجربه مريره في حياة زوجك
لاتفكري في نفسك كزوجه فقط وانعكاس سلبيات الماضي
فكري كأم في مستقبل أطفالك وضحي من أجل بقائهم مع ابائهم
أجعلي هذا الهدف في مستقبلك القادم ولا للندم على مافات
وان شاء الله سوف تعود المياه لمجراها الطبيعي وتطيب الجراح

تحياتي / هتــــان

اشكرك اختي هتان وكلامك صحيح ورائع لكني اريد طريقة لتغيير نفسيتي ( )مع زوجي

__________________

تبين شوري أبدأي تحبينه من جديد .
فكري في أيجابياته وحاولي تنظرين اليه نظرة جديدة
ودايما قولي لنفسش أني أحبه
وايد رددي هاذي الكلمة
عشان تقدرين تتقبلين الوضع معاه
وشي ثاني فكري في سعادتش لو حسنتين من تعاملش وياه ويش بيصير
راح نفسيتش انتين راح تتغير للأحسن.
الدنيا بنعيش فيها مرة واحدة فكري بالأشياء الحلوة فيها بدل من الاحباط الي عايشتنه.
وارجع اقول ليش حاولي تحبينه من جديد لاتخلين ابليس يلعب على عقلش ويخرب بينش وبين زوجش لان هذا الي يبيه ابليس الله يلعنه.
اتمنى ليش التوفيق من كل قلبي.
تحياتي بنت الأصول.

شوفي اختي

انا متفهم جدا لكل ما ذكرتيه وقدره منك تماما

لكل يبقى الاحسان لمن اساؤوا الينا ولم ينصفونا

ومن عصى الله فينا اطعناه فيه



تحياتي

وال

__________________

بخصوص التغيير :
( إن الله لايغير مابقوم حتى يغيروا مابانفسهم )
اتوقع ان التغيير مايحصل فجأه خصوصاً الاحباط اللي عشتي فيه لفتره
ولكن لاعادة إتزان النفس يجب على الانسان المقارنه بالاسواء في كل الحالات
انا متزوجه أفضل من كوني مطلقه وانا مطلقه أفضل من كوني معوقه محرومه من ممارسةالحياه الطبيعيه
وتذكري أن الله رحيم بعباده ويبتليهم والمؤمن يصبر في الضراء ويشكر في السراء
يقول الرسول صلى الله عليه وسلم ( عجبا لأمر المؤمن إن أمره كله له خير وليس ذلك لأحد إلا للمؤمن
إن أصابته سراء شكر فكان خيرا له وإن أصابته ضراء صبر فكان خيرا له )
كل إنسان لايخلى من السلبيات والايجابيات فلنتذكر إيجابيات الآخرين وندمح زلاتهم ونحتسب الأجر
إن تطويع النفس على الحب والكراهيه ليس بالهين فالنفس وماتشتهي عليك بالصبر وطرق باب الأمل
والله سبحانه لن يتخلى عنك ان شاء الله لأنه رحيم بعباده هذا واتمنى لك السعاده ..

تحياتي / هتــــان