(انفضحت خيانات زوجي لي )
صراحه مادري كيف ابدا هي مشكله هي فضفضه مشتتهه وضايقهه فيني الدنيا
بداية بحيلكم عن وضعي والسبب الي استنتجتهه من كل الي صار
انا متزوجهه لي عشر شهور تقريبا عمري 23 وزوجي24 وحملت من بداية زواجي ع طول كنت بستخدم منع حمل بس زعل وقتها وتركتهها حسبي الله دامك لسى في طريق الحرام ليه تورط طفل فيك
المهم الحين في فترة نفاسي طفلي لسى ماصار له اربعين يوم
بداية زواجي من الاسبوع الاول كنا رايحين للمول وزوجي شاف وحده كاشير يعرفها ومسك جواله يرسلها وكان يقولي عادي انو كانت تشتغل عنده وبيسلم وبس ومشيت الامر ولا عندي اي شك فيه كتت واثقه جدا جدا فيه وواثقه من نفسي انو ع جمالي الشديد مراح يلتفت لغيري هو الي اختارني بناء ع رغبتهه واصر على الزواج مني وحاول سنين وانتظرني
قلت لكم هالموقف لاني من بعد ماكتشفت فعلا خيانتهه استنتجت انو هو طبعه كذا ولا يملى عينه شي
يعني انا كنت وقتها عروس والحمدلله اتميز بجمال عالي مو معقول اي احد مكانهه ويدور بنات
المهم بعد زواجي ب اربع شهور اكتشفت خيانتهه بمحادثهه جوال وصور عرفت انو له علاقات كثير من قبل الزواج ويقابل كذا بنت ولما اغيب عنهه ووقت ماروح لاهلي ينادي بنات في بيتي ويعطيهم فلوس
وشفت محادثات فيها اهانهه لي انو كنهه ماخذني علشان اجيب له عيال بس واني المسكينه الي مقابله جدران لازم يمشيها والوسخه الي معاه كانت بس تسأل ليه ماتروح لام العيال ليه مادري ايش وكل كلامهم جنس ومتى اشوفك
طبعا جواله طول الوقت مقفل برقم بس شاء ربي وكشفهه نام وكان الجوال شغال ولما جيت بطفيه شفت تنبيهه رسالهه بكلام وقحح جدا
المهم واجهتهه وندم وبكى بس ماعترف قعد يلف ويدور وانا الي في بالي غلط
و تعدل كم يوم وصارت جوالاتهه بدون قفل وظاهريا نفس الي قاعد يسويه الحين انو تاب وصور وكلام ديني بالواتس وغيره
ومامر اسبوع الا شفت محادثه مبين انو كان ماسحها وكان لما يجيني يعطيهم حظر علشان ماينكشف قدامي
ورجع شكي وزعلت ورحت لاهلي ووقته عصب علي وقال انو بيطلقني لو مارجعت لهه
هو تعامله معاي اغلب الاحيان كويس ومو مقصر عاطفيا والي يظهره لي احس انو جد جد من كلامه وتصرفاته انو يحبني ولا يستغني عني مايسوي شي يخليني اشك في حبهه لي بس وقت ماتصير مشكله بيني وبينه واروح لاهلي يكون قاسي جدا ولا يراعي ظروفي تعبانه مم تعبانه ماعليهه حتى ع ايامي الاخيره بالحمل ماوقف وساعدني
المهم الخيانه والطامهه الكبرى الي حطمتني ودمرت نفسيتي
في الايام الي راحت كنت مع اهلي رايحين مشوار ومرينا قريب من بيتي قلت لامي انو ينزلوني في بيتي ع اساس بفاجىء زوجي لانو كان مستعجل وينتظر اخلص الاربعين و ارجع لبيتي
طبعا هو لايمكن يعطيني مفتاح للبيتي بس هو الي معاه ويسبب مشاكل طول فترة زواجي
عرفت الحين ليه خايف اجيهه بيوم لما اكون عند اهلي واشوف الي يسويه بغيابي
لما جيت سمعت اصوات غريبة وكانت تتأوهات بصوت عالي وقعدت اتسمع
الى لمى خلصو من العلاقهه وراحو يسولفون وقتها صدمهه صدمهه في بيتي وعلى سريري كذا ليهه
انهرت تماما وكلمت اهلي وكلمت امهه وانتظرتهم يطلعون ولما طلعت البنت كنت بتصل ع الهيئهه وهو ماعاد يدري ايش يسوي مسكني ومسك امي علشان تقدر تهرب البنت
الى يوم نزل تحت بالشارع شاف ابوي بالسياره شرد للبيت وقفل عليه
والبنت قعدت تصيح وتبكي وترتجف وانو عندها اطفال واخواني بيذبجوني ومادري ايش
المهم صارت احداث مالهه داعي ذكرها ولا ناديت الهيئهه
واحدى الجيران كان شاهد لكل الي صار قالي اذا ودك انو نطرده من العماره لان ممنوع هالشي بس مادري ايش جاني من رحمهه ع انسان مايستاهل وقلت له لا وانو لاينتشر هالشي
المهم ابوي راح يدق علي زوجي الباب ولا فتح لنا ومن بكرتهه جاب لنا سالفه غبيه وتبرير غبي ويحلف ماصار بينهم شي
واربع ايام يرسل لي انه ندم وتاب وسامحيني وقلت له انو يطلقني خلاص ويحلف انه ندم واني طالق لو كلم مره ثانيه بنت بالحرام بس انا عارفهه انو اصلا كان شغله وخوفهه اني انشر هالشي وينفضح
بس احنا ماقلنا لحد ووقتها راح عند خوالي ولا هي من عادته يجيهم اصلا بس كان بيشوف احد درى عن الي سواه ولما تطمن الاخ انو محد درى ارسلي انو خلاص انساه واصبر واحتسب الاجر والله يعين ولدي ؟!!! ايي حرقهه سببها ليي
والى الان مر اسبوع ولا فكر فيني وشفت شي يدل انو لسى يكلم البنات
بس كتب انو المفروض مني لما يغلط اوقف معه ولا اتخلى عنهه واحاول اصلحهه وانو الي يسوي كذا افضل بمليون مره من الي يستناه لما يتعدل
بالله عليه حارق قلبي ودمرني وضيعنيي ويبيني اسوي كذا االي مثله يقعد يحاول ويراضي زوجتهه
طول الوقت والحره بقلبي وبطنيي لا اقدر انام ولا اقدر اشيل الي صار من تفكيري
انا خلاص ابي اتطلق منه بس انقهررر ع الاشياء الي سواها
سامحته كثير واخذ مني الكثير يعني حتى اسم ولدي ماكان عاجبني وسماه بالي يعجبهه وحتى ولادتي ب المستشفى مادفع منها قرش يقول انا كنت ابيك حكومي ليه تروحين اهلي
وقبل كان يسالني عن رايي يقول انو اذ جاته بنت بيسميها كذا ( اسم البنت الي يكلمها ويقابلها ) اسمها قديم اسم جدات
وكمان طلع وتوي اكتشفت لما الحين ابحث عن وظيفهه انو مسجلني بالتامينات نظام سعوده وياخذ راتب شهريا ع اسمي
انا الحين بين شيئين
اما اتطلق منهه بس ورطني بطفل وضيع علي انو اخذ واحد يستاهلني وكلام الناس بيكون اللوم علي وهوا يكمل حياتهه ولا خسر شي اما انا بكمل نهايتي معاه بتنازل مني ع المؤخر علشان يطلقني
او ارجع لهه ابي انتقم منهه ابي اخذ كل حقي الضايع منهه
ابي احرق قلبه زي ماحرق قلبي
نفسي كل العالم تدري عن الي سواهه ليه كذا الرجل مايخسر ولا شي ويتزوج من جديد ولا كان شي صار
والله لو ماعندي طفل منه كان فضحت فيه قدام العالم
حسبي الله عليه

(تم التعديل ليتناسب مع المضمون)

لا حول ولا قوة الا بالله

اختي زوجك الله يهديه واضح انه متعود على الحرام وربنا فضحه بعد ما ستر عليه كثييييير انفضح بالجرم المشهود وهذا جزاء من يتمادى في الحرام ويامن مكر الله

لكن الي راح تسويه يا اختي قرار راجع لكي يا اما ان تطلقي وولدك يعيش احلى عيشة ترا ما ماتوا من تربوا عن امهاتهم ولكي الحق في الحضانة بما انه ولد ولكي الحق في طلب الطلاق لانه الي سواه مو شوي وواضح انه متعود على ذا الشئ لكن في حل ثاني

انك تصبري وتحتسبي الاجر عند الله لكن من غير ان تنتقمي ابدا ابدا ابدا يا اختي هذا شيطان يريد منك الانتقام من زوجك لكي تعصي ربك انتي اذا هوا قصر معاكي يا اختي مالك الا الصبر او الطلاق لا تعامليه بالمثل لان هذا لا يرضي الله وممكن بسبب واحد مثله تتعذبي في النار يا اختي لو صبرتي فكري في الاجر العظيم وانا من الان باقول لك لو صبرتي لا تنتظريه انه يتغير هذة النوعية صعب انها تتغير لكن ليس مستحيل انا ليش باقول لك كذا عشان تعيشي على نظام حياتي جديد من بعد هذا كله اولا زوجك لا تقصري معاه في واجباته ابدا ابدا ابدا عشان ترضي ربك ثانيا ابنك الله يحفظه لكي ويجعله من الصالحين انتي الي ربيه وحاولي تزرعي فيه الدين والاخلاق والقيم التى قد يفتقر اليها زوجك الله يهديه وخليكي حريصة يا اختي من انو زوجك ياذيكي باي اذى جسماني بالضرب او اي شئ اذا خيانته على نفسه مع بنات العهر ربنا يهديه لكن اهم لشئ لا يتعدى عليكي باذى وانا اشوف اذا كان من النوع الي يشرب ويحشش كمان هذا من طريق وانتي من طريق عشان مصلحتك اهم شئ لو تبغي تستمري معاه يجب ان تقوي وازك الديني وان تحاولي بان تقوي وازعهه الديني عشان احتمال يبطل وما تعرفي امكن يتغيير ويكون احسن من ما سبق

كل هذا يا اختي انتي يا اختي لا تزالي تملكي الحق في الطلاق انا وجهت لكي النصح اذا حبيتي ان تصبري وتحتسبي الاجر انا هنا بدوري ناصح ولكي الخيار

طيب ممكن اصبر وارجع واعيش لنفسي ولولدي اما الي بينا انتهى وتضيع السنين وانا ممكن اخذ واحد يستاهلني لو تطلقت
انا لو كنت اضمن اني راح اتزوج وربي يعوضني بزوج يستاهلني ممكن مافكرت بالرجوع والانتقام
بس الي يخليني افكر بالانتقام اكثر الي سواه وانو احتمال ضعيف اتزوج دام معاي طفل

ياحبيبتي والله مدري شقول بس انتبهي لنفسك انتي الحين توك طالعه من ولاده الزعل مو زين لك..
واضح انه جبان وهذي اعذار الجبناء ينكر ويلف الموضوع.. تصرفك حلو عشان اهلك يكون لهم بينه وخليتيهم يشوفو بعينهم..
طيب اش رأي امك وابوك في موضوع الرجعه؟؟

__________________
الحمدلله

يا اختي اولا هذا ابتلاء من الله واعلمي ان لكي من الاجر فيه الشيئ الكثير كون انك تفكري انه بما انك تملكي طفلا ومطلقة لن تتزوجي هذا غير صحيح يا اختي انا معك ممكن يكون زواجك صعب لكن ليس مستحيل وطول ما انتي مفكرة في الرجوع والانتقام الشيطان سيزين لكي الصبر على زوجك ويشوه لكي نظرة الطلاق بطفل حتى تقبلي بالرجوع لزوجك وتنتقمي منه وتغضبي ربك .فكري في الموضوع ملئيا والله ما هي الا وساوس شيطان يا اختي اذا كنتي لا تقدرين على العيش معه تطلقي ليس في هذا حرج اولى بان تنتقمي منه وتعصي ربك وانت قلتي انكي على قدر من الجمال وهذة صفة ممتازة فيكي وباذن الله لن يطول بكي الدهر مطلقة فكري في ايجابياتك .

اعلم اختي الكريمة ان نار الحقد قد حرقت قلبك لكن والله ماجورة وانتي الان الطرف المنتصر عند الله عز وجل فاذ انتقمتي ضاع اجرك وصبرك هباء . لو فكرتي فيها يا اختي حتى لو فضحتيه هوا لن يضره شئ لاني اتوقع انه لن يتزوج بعدك راح ينبسط بعيشة العزوبية والحرام ولن يمسه ضرر في الدنيا انتي من ستخسرين في الاخرة .وان فكر في الزواج سيلقى من يتزوج ولا تعتبري انه بفضحكي له ستنقذي بنات حواء من ظلمه العالم واسع وراح يلقى بنت يتزوجها . انتي بصبرك عليه تؤجري يا اختي من ستر على مسلم ستر الله عليه وانا اقصد بالستر عدم التفضيح اما لو سالوكم الناس عنه مثلا جوكم خطاب من طرفه قولي لهم ما وجهتي لتنقذي بنت الناس اهم شئ انتي منتي على ذمته

زوجك زاني،والعياذ بالله،
إنت قلبك محروق عشان اسم وتكاليف،وانتقام،!!!!
اﻷمر لك فانظري من ستعاشرين وماذا تريدين.

إنا لله وإنا إليه راجعون

كان الله في عونك

يقول الله عز وجل (الطيبات للطيبين) ارجعي أختي الطاهرة العفيفة لتفسير هذه الآية الكريمة في سورة النور وتأملي أقوال أهل العلم

وأكثري من الاستغفار...واستشيري الثقات في موضوعك،

ولا تخافي على ابنك فالله سيرعاه

استخدم بيت الزوجية كوكر ليمارس فيه الرذيلة
وأنت ستار وطفلك حتى يقيدك به ولا تفكري بالطلاق..

ينصفك الشرع من هذا الذكر ..

يا اختي ،،لا خير في هذا الرجل"مدام" هو في غيه
وهذا ليس ابتلاء،،،الا قل دين و قل خوف من الله،

__________________

لا تفكرين مجرد تفكير انك ترجعين له ولو انك بلغت الهيئة كان أحسن عشان لما تطلبي الطلاق يكون عندك اثبات ويطلقك القاضي من فوق خشمه بدون ماتدفعي المؤخر ....