اول شيء بعطيكم نبذه عني انا أبويه هذلي قبيلي وامي اجنبيه مو عربيه بس متسعوده وأهل أمي جو مكه وسكنوا فيها ..
أبويه كان مايحب يأخذنا لإعمامنا فما كنّا نعرف عنهم شيء وكنا دايم نختلط بأهل أمي لدرجة اني كنت أقول كلمات اجنبيه وأحسب لغتنا كدا .. وكنت اكره البدو وقصايدهم ومرا خالي قالي يابدويه زعلت وطنقرت .. ماكنت اعرف شيء عن قبيلتي ، والغلط من أبويه اللي ما اهتم فينا ، وغير كدا حتى الناس لما يشوفوني يحسبوني اجنبيه يقولوا لي انتي باكستانية او هندية او اردنيه الخ ،،
كبرت وجاء خطبني ولد عمي وابويه وافق عليه واتزوجنا ودحين ليا 4 سنوات متزوجة ....
نجي للمشكلة الأساسيه وهي لهجتي 💔
انا اتكلم زي حضر مكه وأحس لهجة ولد عمي تختلف عني كثير وبعض مرات اذكر المؤنث والعكس وزوجي مايقصر يقعد يتصيد الأخطاء ويعلق عليها ومرات يقولي انا ما أحب أولادي بعدين يتكلمو كدا ودايما يمدح في قبيلتو ، نحنا أهل الفصاحة و الجزاله ومن دا الكلام ولا كل شويه يجيب لي كلمة جديدة وهذي في اللغة تعني كدا وفي القاموس ومدري ايش. ...
وانا بصراحه طفشت مرا طفشت منو ، اي كلمة من كلامي ماتعجبو ع طول يباني اغيرها ولا تقولي كدا زي مثلا مرا قلت له هذا ايش فيلو قال مافيلو شيء ويضحك ويعلق ع كلمة فيلو ويقول فيلو ولا ديناصورو وبعد التتريقه قال مرا تانيه لا تقولي دي الكلمة اصلا كرهني فيها 😡 ودحين ماعندو غير يتصيد الأخطاء ويعدل فيني ومرا بكيت وزعلت وقلت له دام انت تبغى الفصاحة ع قولك ليش ماتزوجت وحده هذليه أصل وفصل و لا اتزوجت معلمة لغة عربيه مو كان أحسن انت جاي خاطبني وانت عارف جنسية أمي ايش و تعرف كيف لهجتها وقعد يضحك وجاء اعتذر مني ولا أمس يضحك عليا سألني فين الشيء الفلاني قلت له في الدُرج قام يضحك ويقول ايوا يـ واد فينو في الدرج ؟ويضحك قلت له مو عاجبك الكلام انقلع وقام ضمني ويضحك
احسو يحب يتسلى فيني ...... انا خلاص طفشت من تعليقاتو ع أخطائي ايش اسوي معاه ؟؟ كيف اوقفو عند حدو 😭😭😭

اهلًا اختي
المشكلة ذي اذكر كتبتيها من زماااان
هل نفس الموقف اتكرر؟

__________________

حبيبتي ليش مكبرة الموضوع لهالحد
اقلبي الموضوع مزح وكوني واثقة من نفسك ولو نطقتي كلمة خطا وعمل ملاحظة اضحكي وعلقي عليها ولا تريه ابدا انه هذا الامر معقدك لانه راح يتمادى اكثر واكثر

__________________
ربنا هب لنا من ازواجنا وذرياتنا قرة اعين واجعلنا للمتقين اماما

نفس زوجي

بس انا عكسك انا مفتخرة بلهجتي
واطنش واقول يحصلك بس وحدة بدوية
وهلجتها حضرية ؟ انا بيرفكت مافي مني: )

واحيانا يقولي ياربيه كيف تتكلمين كذا
يقصد طريقتي بالكلام واني امطمط الكلمة

اقولو امااانة انا اتكلم كده ؟
يعني ربي رزقك بوخدة كلامها دلع رباني

لو اني بقرارة نفسي انا ماني حاسة انو قاعدة اهرج

زي ما بيقول لكن اطنش واخذها بضحك
وابينلو ان هذي دلع وغناجة
لو اني بقرارة نفسي عارفة اني منجبها: )

أنتي مكبره الموضوع

__________________

ردي عليه بالانجليزي بمصطلحات صعبة.

__________________

ههههههههه
لهجتك حلوه
وزوجك يحبك ماشاء الله
اما اشوف مزحه معاك دليل محبته
وايضاً هو معجب بطريقة كلامك
وفيك بشكل عام

فما اشوف الموضوع يستدعي زعل
اضحكي معاه والا تغنجي يعنني زعلانه وإنتي من قلبك مو زعلانه

والله يسعدكم دائما

لا تاخذيها بحساسية وسعي صدرك عادي احنا عندنا العايله كلها داخله في بعض قبايل واخذين من حضر وقبايل اخذين من حضر والقبايل اشكال شي من الغربية واخذين من الجنوب وشوفي تنوع اللهجات ودايما التريقه على اللهجات وعادي يضحكون مااحد يزعل

ماشاء الله تبارك الرحمن تحفظكم

هههههه

الله يسعدك

زوجك يعشقك ومعجب فيك وبلهجتك

والدليل مزحه الدائم معك والتعليق عليك

ولما تزعلي يعتبره دلال ويضمك ويراضيك

☺😊