السلام عليكم ورحمة الله وبركاته
الحمدلله انتهت الايام السوداء من حياتي بفضل الله تعالى
ورجعت حياتي افضل من السابق كليا
المهم قبل العيد تجهزت انه بنسافر لمنطقة اهل زوجي وبحكم انه اول اشوفهم من تزوجنا فاكيد كنت حريصه جدا
على لبسي ولبس ولدي وكشختي وولدي وزوجي عشان النظرة الاولى بالعاده تعطي الناس حكم والاغلب يحكم من نظرة
طبعا سافرنا وكنت مررره مبسوطه انه بشوف اهل زوجي امه واخوانه واخواته ابوة متوفي
طبعا امه متزوجه من رجل اخر
واخواته جميعهم واخوانه من ابوه فقط الا اخ واحد واخت وحده فهما اشقاء له
المهم رحنا اخر ايام رمضان يوم 28 رمضان
رحنا لاامه وتوقعت باحصل فطور مرره كويس نفس استقبال امي لحريم اخواني وحسب المتعارف
جيت وهي مسويه سمبوسه ومسوية عجينة خلية تنتظرني اجي عشان انا اكملها
ودخلت البيت وعلى طول قالت يالله عالمطبخ حسيت اني بابكي زوجي حس فيني وغمز لي يعني مشيها
دخلت معاها وربي مالي خمس دقايق داخله بيتها
وعلى طول فاتحتني بموضوع اجي صباح العيد عشان عندها فطور جماعة زوجها عشان اكون خدامه لهم
انا سكتت المهم جاء الفطور وتمنيت تجيب قهوة من السفر وحلقي ناشف صيام جابت كاس صغير قهوة مصبوب من عند الرجال حتى ترمس قهوة مااقامت بواجبي كضيفه اول مره ادخل بيتها وخصوصا زوجها يعتبر اجنبي من زوجي مايقرب له ولا بينهم صلة قرابة الا يكون زوج امه
وبعد الفطور فاتحت هي زوجي زوجي انحرج وقال اسالي فلانه ماقدر اجبرها
قلت صعبه اخدم عند قبيلة ال فلان لا هو ابوك ولا لك فيه اي صلة غير زوج امك
والفطور من برا كاامل وكل شي من برا بس القهوة والشاي والرجال بيصلحونها بالمجالس الخارجيه
والعيد ابغى افرح فيه ليش اكون هنا بقريتهم وانا ماعرف اي شخص فيهم لو بيت ابوك اخدم ومن عيوني
زوجي وامه سكتهم جوابي
بعد الفطور طلب زوجي احضر لنا فراش ننام فيه قالت امه لا انت تنام بالمجلس وزوجتك تنام جنبي بالغرفة
رفضت وقلت مابي احد ينام معاي وزوجي قال وش فيك يمه ترى هي زوجتي
وجات وقالت تبون مفارش صغيررة !!
وكل ماتشوفني داخله الحمام تشب وتددق باب الغرفه تبي تصحينا اسوء ليلة بحياتي
جيت ابغى اكل ولدي منعتني اطبخ له اي شي مسكين اضطريت اكله سيريلاك ياعمري جبته للاحتياط
وحصلت ترمس قهوة مسويها زوجها ابغى اصب لي فنجان ابي قهوة سحبت الترمس مني حسيت انه بابكي واني صغيرة بعينها
وزوجي حس فيني ويمتدح امه وانها طيبه وعلى نياتها يبي يرقع الشق الله يعين بس
ونمنا الين الظهر وضبيت عفشي ورتبت غرفتهم وبخرتها ببخوري جايبته معاي
وشافتني كاشخه قالت لاعاد تلبسين هاللبس البسي زي لبسي
اقسم بالله بغيت ابكي قلت لها لبسي يناسب عمري وانتي لبسك يناسب عمرك
جات وشافتني لابسه اساور ذهب جات وقالت عجبتني اعطيني اياها قلت لها تستاهلين ياخاله بس هذي
من مهري ومهري يخصني واعذريني
المهم جات وقالت كحلك يجنن وش اسمه مرره استفزتني قدام ولدها قلت لها ياخاله لو مو حنا على باب عيد عطيتك تستاهلين بس العيد مايفتحون الاسواق وباحتاجه
وانا طالعه فرحااانه ماصدقت نطلع
ركبنا السيارة وانا ابكي من تصرفاتها معقولة تغار مني
وطلعنا للمدينة الكبيرة الي بمنطقتهم وكانت رائعه وافطرنا فيها واعلنوا العيد
ثاني يوم بالعيد يجتمعون باستراحه كل اخواته واخوانه وحريم ابوة المتوفى
انا كنت اخر وحده دخلت عليهم وطبعا مايعرفوني وكنت حييل كاشخه لانه عييد واول مادخلت هي شافتني اقسم بالله حسيت حلقها نشف وعيونها تفتحت وقالوا لي غلطانه يالاخت بالاستراحه وامه موجودة وساكته
قلت لهم انا زوجة فلان اخوكم
رحبوا فيني الا هي عاتبوها قالوا ليش ماقلتي هذي زوجة ولدي فلان قالت مادري عنها
جلست جات وكانت شايفتني لابسة طقم ناعم من الذهب واسوارتين جات وطلبتني اياهم قلت لها ياخاله هذي اكسسوارات ابغى افك عينها عني وقمت من مكاني وبنات اخوات زوجي جوو عندي ويسولفون بس احسهم فرري مع زوجي جاء زوجي يسلم على خواته الا وحده فيهم تقول تناديه باسم دلع متى بتجيني وتمشيني
انا تصببت عرق وهو ناظر فيني وقال ام فلان الي هي انا اغنتني عن كل الدنيا
انا عرفت انه بينهم سر
رحت بيت اخوه قالت لي انتبهي منهم وبس
المهم بعدها بيوم دقت علينا بنت اخته وتطلب خاله يجيها خالها يتعذر قلت له حرام خلنا نروح هو يتعذر
انا بشوف وش وراها
المهم باخر الليل ارسلت لزوجي رسالة انا لابسة لانجري احمر وانتظر فلان تقصد تنتظر زوجها انا انقهرت هي وش تبغى ترسل هالكلام الماسخ انصدمت من متى والمحارم بينهم كلام زي كذا
المهم العصر الثاني رحنا لها لابسه لبس مخزي مررررره
لابسة فستان مستحيل البسه عند حريم ممكن عند زوجي
فستان احمر الى فوق نص الفخذ وانصدمت لما شافتني قلت لها انتي بنت فلانه قالت اي
قلت وين زوجك قالت طالع مع اخوانه
وتحاول تتميع ومو لايق ابد ناظرت بزوجي وقلت له دايم انتم كذا قال لا بس مادري وش جاها
المهم جلست جلسة اقسم بالله اقشعر منها بدني خفت السقف يطيح علينا قلت لزوجي يالله نمشي قالت وين ياخال
المهم هي دخلت وشوي اشوف زوجي جاته مسج هو على طول ارتبك انا نطيت جنبه ماكان احد معنا هي دخلت داخل وحنا بمجلس الضيوف ارسلت له صرف زوجتك ابيك بمشوار نتمشى وننبسط
انا قلت اقسم بالله لو ماترد عليها رد قاسي لااطلع من هالبيت واروح ركض وانت عارف ماادل شي بهالمدينة
شوي دخلت وهي تتدلع دلع مخزي وقال لها ماتستحين على هالرسالة ترى انا خالك خافي ربك زوجك يرضى بهاللبس وهالكلام قالت اي عادي قال طيب بدق عليه واساله وزوجي مسك جواله قالت خال ماله داعي تسبب مشاكل
قلت لها تراك طحتي من عيني كذا مع خالك اجل مع غيرة وش بتسووين
ورحنا السيارة وانا فيني غصصة من الصدمة زوجي ادري واعرف انه ماكان يبغى هالموقف يصير
الي مجنني هي وش كانت تبي بالضبط
معقولة تتجراء على شي فظييع
ووحده جاتنا تسلم على خالها اقسم بالله لبس مااسخ ينلبس للزوج فقط
زوجي وسيم بس هم زودوها يقولون بمياعه وووواو انت مره وسيم تجننن وشوي وحده فيهم قالت خلاص ماتحمل بدخل تقصد انها دايخه مررره انصدمت وحلفت لو باقي رد عليهم ماعاد اجلس ببيته لحظه وحده
هم محارمه ووجودهم معاه اثم عظييم
اعطووني ارائكم انا ماتربيت على هالفظاعه انا لما ادخل على خالي او عمي احرص مايطلع مني شي من المفاتن واحرص ماالبس حتى قصير ولا بناطيل احترم حد المحارم
والزين اخليه لزوجي

والله ماهم على حق
ام زوجك غيرانه وواضحه
بسس ماعليك منها

لكن زوجك وش قصته!؟
من متى متزوجين انتم وكم اعماركم؟

في شي مو طبيعي
وش التصرفات الي تصير بينهم
لو هو محترم معهم مايتجرؤون يسوون كذا

السؤال ..

زوجك دايم يزورهم ؟؟ او هو على تواصل معهم عن طريق الجوال او الواتز ...

وبعدين وش هالميانه ..
وانت يوم كنت بتزورين بنت اخته هل هياللي عازمه ؟؟وهل هي عارفه انك بتجين ؟؟والا على اساس انه بيجي زوجك الحاله

فيه وحده من سلفاتي مرره طيوبه حكيت لها قالت لي البنات الي تقولين عنهم عذبوني اول ماتزوجت يبون يبينون لخوالاهم شوفوا احنا كيف نلبس وهم مايعرفون وش نلبس لازواجانا ببيوتنا
اختي بنت اخته تقول لزوجي كيف باقي تكلمنا وزوجتك خذيت الزين كله
سالت زوجي قال اقسم بالله بيني وبينهم شي عادي وانا مو معاهم بنفس المنطقة عشان يتعودوا علي
خالهم بعد متضايق من هالتصرفات
وسلفتي قلت لها تخبر زوجها يكلم زوجي انه بنات اخته معروفين بقلة الادب ويحبوا يطلعوا بهالشكل الغلط
واخو زوجي حكى له وقال له ابتعد عنهم انا اول ماتزوجت كل وحده تسوي مغريات وكانت بتصيير بيني وبين زوجتي مشاكل
اعوذ بالله كييف وهم خوالهم

والله انه افكر فيييهم حسبي الله علييهم ماصدقت انتهي من حكاية الخيانات
انا متاكده زوجي صار لي ولحالي وهو متغيير للافضل
بس التواصل ماشوف شي الا كان يتواصل ويمسحه لان جواله مقطوط عندي ودايم افتحه وماشوف شي
هي عازمه خالها لحاله وانا قلت لزوجي بنروح لها ولاتدري انه باجي معاك بعد رسالتها له انه لابسه لانجري
وقلت لزوجي ترى ماهمتني واقدر بكلمة مني انزلها للارض يشهد علي ربي بس كنت ابغى اخوفه

أعوذ بالله من ه العيله
والله البنات مو صاحين الله يستر علينا ولا يبلانا
أعود بالله من الشيطان الرجيم
هذولا مريضات
أبعيد عنهم وبالنسبه لزوجك قوي الوازع الديني له
ايش قله الأدب هذي والوقاحه في الكلام
مو متربيات ابداااااا
والأقارب مايصير بينهم هالكلام وهذي المسخره

__________________
ريم نواف سابقا

زوجي الحمدلله محافظ على الصلاة وبشدة والذكر وقراءة القران يارب لك الحمد
بس بنتظر وقت وامسح ارقامهم واعطيهم حظر واتس اب

الله يوفقكم يا اختي الحمدالله عدت الأيام الصعبة
يا اختي اسلوبك مع امه مره مو زين ، حتى لو ماضيفتك او قامت بواجبك عديها لها هذي أمه لا تنتظرين منها جميل مفروض انت اللي تبدين بالجميل معها حاولي تحسنين علاقتك معها عشان ربي يرزقك بعدين بزوجة ولد زي العسل
اما بنت اخته اعوذ بالله منها ما اقدر اعلق على ناس وصل الانحطاط فيها لدرجة تحط عينها ع محارمها

يا جروح الملكة ماغلطت على ام زوجها. بالعكس هي ضيفه واجب الضيافة 3 ايام وبعدين تصير من اهل البيت
لكن هالعيله غريبه عجيبه
بالصراحه انا اهل طليقي كانوا يستقبلوني كأني ملكة الله يحفظهم جناحي نظيف. ومبخر ثلاجتي فيها كل مالذ وطاب غير سرير النوم والشموع عمري ماشفت ناس زيهم بالصراحه وهدايا لي ولاولادي يساعدوني في بناتي يوم كانوا صغار
واحنا نفس شي عند اهلي اذا جا احد من اخواني بيت اهلي جناح خاص فيه هو وزوجته وصينية الأكل لغايه عندهم توصلهم وأمي الله يحفظها تخدمهم بعيونها ولا تضايق عليهم بشي ابدااا

__________________
ريم نواف سابقا

اختي امه على عيني وراسي بس لو وش يصير مااعطيها من ذهبي انا لما جيتها جبت لها هدايا وفلوس
وهي حتى هدية عمرها ماجابت حتى لحفيدها
وانا عالصامت معاها انا انخذلت فيها وهي متضايقة من وجودنا اول مره اشوف ام تتضايق من ولدها وعائلته
رحت عندها يوم كاني في مجاعه وبيتها زوجها مرره كويس جايب كل شي
جاب لها ولدها جلابيتين فخمممه حييل وتعبت وانا اختارها وجاب لها مبلغ كبير اول ماعطاها قالت ماعجبتني الوانها ولدها شفت عينه انكسرت رحمته هو قلبه عليها وهي مايهمها
بعدين قالت لنا انتم مالكم فضل علي هي صح مالنا فضل هي امه بس الشكر ولو الكلمة الطيبة
اخر مره قابلتها عند اخو زوجي قبل نسافر مسوي اخوه مناسبه لنا وداعيه اول مره احد فيهم يعبرنا بشي
اول مادخلت قلت السلام عليكم مشت من عندي واعطتني ظهرها قدام الحريم وربي شي يقهر انا مااسويت شي عشان تسوي هالاشياء
بكيت وقلت لزوجي ماحصلت احترام عند اهلك وهو حاسس فيني
مااعرف وش طبعهم مره احترت وخايفه من القادم معهم