السلام عليكم .. انا مخطوبة من شخص خلوق جدا و محافظ في دينه
ما كانش بيناتنا اتصالات و زيارات .. يعني من يوم النظرة الشرعيه معاش قعمزت معاه و كانت قبل 4 سنين
صارت الفاتحه و كانت بموافقتي
في اول يوم لما جي خشيتله و جوي عادي . جلست معاه ما استريحتش و كانت تصرفاته عفوية ممكن هوا هكي او من الفرحه ما نعرفش بالضبط !!
حسيت بالندم لاني استعجلت ع الموافقه تمنيت اني قعمزت معاه قبل الفاتحه . لكن هذا اللي صار قدر الله ✋
يوم الفاتحه تهربت منه و تحججت اني نعسانه بنرقد طبعا قلته لخالتي كانت حاضرة .. ما قلتش اني هاربه من مكالمته لكن درتها هكي و رقدت
استمر وضعي شهر و نص و انا مش حاسه بنفسي فرحانه بيه ولا انسجمت ولا اي شعور لهفه و شوق من ناحيته لكن انا ما اهتميتش للامر قلت توا نتغير و شي طبيعي مش حاجه كبيره المهم انسان يبيني و شاريني و ولد كويس و توا خلاص فاتحه و تمت
المهم بعد شهر ونص وضح عليا اني مش منسجمه و جوي حزين و ابصر كيف
اول زيارة ليه في حوشنا ما فرحتش لجيته و حسيت مضااايقه و ماما و اختي كانو عارفين جوي . خشيتله فوق من النفس و يشهد الله انه شعور ما نقدرش نتحكم فيه و تمنيته يروح بسرعه لاني مش طايقه نقعد جالسة معاه
فاتت شهور و انا على نفس الحال
توا عرسي قرب و انا مش فرحانه بكل بكل نبكي و خلاص و ما فيش حد فاهمني يقولولي بعد الزواج لما تعاشريه توا تحبيه
نصحتني امي انه يجي زيارة باش نستريح لان موضوع الانفصال امر مستحيل بالنسبة ليهم باعتبار عاطيين كلمه و قاري فاتحه و هوا عارف ان الوضع مش تمام و ما حاولش يبعد يقول توا توصلني و تتغير مع انه ما عاشش جو الخطاب و الحب الا في الفترة الاولى . . طبعا ناديته على امل اني نستريح قبل ما نوصله . لكن !! 😔 .. تعوذت من الشيطان و خلاص ما قدرتش نتقبله حتى جنبي بمجرد ما يقرب كان نلقاه يبعد من عليا كيلو متر .. كميه نفور مش طبيعيه ما حسيتش ب ولا ذرة حب و لا اي رغبه ليه حتى بمجرد ما يشد ايدي ما تقبلتهاش و مع هذا غصبت على نفسي و تعوذت من الشيطان و الموضوع وراه زواج و عشرة عمر ضروري ما نتقبل غصبا عني .. و الله وصلت بيا لدرجة اني تقززت و قريب تقيئت منه .. و الولد راهو انسان نظيف و ما ريت منه شي
و ناديته مرة ثانيه برضو تكرر نفس الشعور 😔
توا عرسي قريب و هوا مش عاطي للموضوع اهميه ولا اهلي مهتمين يقولو هذا الي كاتب الولد يبيك ما نقدروش نبعدوه و توا مع العشرة تتقبليه
انا مشكلتي ما نبيش نحبه و شعوري من ناحيته مش ميت زي اي بنت تمر بالحاله هذا
شعوري بالنفور منه و عدم تقبلي ليه كيف ممكن انحيه و هل شعوري هذا بعد ما نتزوجش يمشي ؟؟
امي تقلي لما تعاشريه و يعاملك معامله حسنه توا تتغيري
لكن انا مش شعور عدم رغبتي ليه ولا ما نحباش بس .. انا ما نحبش حتى مجرد قربه ولا اتصالاته نحب نرد عليها
لكن لو ننفصلو و يتزوج نحس اني ح نغار بما انه الحوش من اساسه داره ليا و معاملته الطيبه معاي و حبه ليا
نبي وحده مرت بنفس الشعور هذا و تحكيلي كيف صار معاها .. ح نتابع التعليقات لو ما تقدرش تكتب ف التعليقات عادي تقلي و توا نخشلها ع الخاص
#ملاحظه .. دايره قبل حجامه و رقي عليا شيخ ما فيش منه موضوع السحر
و اي وحده تحس اني دايرة فيلم باش نبعده من عليا ع خاطر شخص .. لا و الله
نبي حل كيف نتقبله بس و حد مار بيه الشعور و يضمنلي اني ح نتغير
و بارك الله فيكم

وعليكم السلام.ورحمة الله..... اهلا بناس تونس او المغرب... اختي لو انك.كتبتي بالعربية الفصحة لانو ماراح يفهمو عليك...
اختي نفورك.من خطيبك ليس طبيعي فالامر الطبيعي وقت الملكة يكون.حياء خجل عدم راحة بسيطة ولا تصل لحد التقزز و اايضا تريدين الاستفراغ هذا ماهو الامر الدي جعلك بهده الحالة هل شكله الخارجي لم يعجبك
وايضا هل الراقي من اهل الثقة فهناك رقات حقيقتهم مشعوذين وليسو برقات فتاكدي ولا تكوني ضحية لهذا الزواج و تظلمي الرجل ايضا.... كم عمرك؟

تم التعديل

عند خطبتي كان عمري 18 و الان 23

اعتذر تم التعديل انا من ليبيا عدلت بعض المصطلحات ارجو ان يكون الكلام واضح

ابدا شكله الخارجي منظم و انسان نظيف
عمري 23
لا هم شيوخ اهل ثقه .. اعلم ما تقصده

اهلا لما قلتي توا حسبتك من تونس... والنعم في ليبيا و اهلها
بما انو انسان جيد و انت متقبلة صورته الخارجية و تمدحين اخلاقه.... فيمكن هذا الخوف و التردد من طبيعتك
هل.انت من النوع المتردد في أُمور أخرى و صعب تاخذي قرارك ام العكس
استخيري و توكلي على الله و رب يسر امورك و يشرح صدرك

نعم هو على خلق و دين
بالنسبة لشكله الخارجي هم يقولو انه جميل
اما انا لا ارى ما يقولون

لو تدخلي موضوع تطلقت ولا ادري السبب بالضبط هناك من ذكر نفس حالتك في التعليقات الصفخة الثانية