السلام عليكم ورحمة الله وبركاته

موضوعي هذا للفضفضه احس بضيق مايعلم فيه الا رب العالمين و يمكن اسمع منكم تجارب او كلام يريح قلبي ..

اللي حاب يعرف سالفتي بتفاصيلها يرجع للمواضيع القديمه اللي حطيتها

انا باختصار ضحيه الزواج الاجباري
اللي انجبر علي هو زوجي للاسف

زوجي والنعم فيه بأخلاقه وصلاته ودينه الحمدلله ..
هو اول الايام كان مقصر معاي وماكان يتصرف بشكل طبيعي كأي زوج لين مامرت الشهور واكتشفت انه كان يحب وحده واهله ماوافقوا عليها لاسباب اختلاف النسب والاصل و و

المهم الحمدلله على كل حال مرت حياتنا في ازمات ومطبات والحين الحمدلله الامور مستقره
انا نفسياً اموري استقرت بعد ما عرفت انه اللي يحبها تزوجت لانه لين اخر لحظه مصر انه ياخذها حتى قرر انه يطلقني عشان مايظلمني وياخذها وانا صبرت واحتسبت خاصه انه عندي بنت المهم صارت مشاكل وابتعدنا عن بعض .. وعقب ماتزوجت ورجعنا لبعض

وهو وعدني انه يعوضني ومايقصر معاي
لكن وين المشكله

للاسف قلبه لا يزال وياها مع انه مر على زواجنا 3 سنين وانا والله الشاهد سويت اللي اقدر عليه عشان اكسبه لكن ما احسه انه يحبني وحتى هو يقول لاتجبريني على هذا الشي وانا احاول اسعدج باللي اقدر عليه لكن الحب مو في ايده

المهم يا اخواني والله قلبي يتقطع قاعده احاول اتناسى واتأقلم مع هذه الحياة انه زوجي الحمدلله مو مقصر معاي ويعاملني معامله طيبه وخاصه بينا بنت
لكن كل ما اتذكر انه مجبور علي ومايحبني .. ودايما احسه بهم كبير ويفكر باللي يحبها .. قلبي يتقطع يتقطع انا انسانه لي حد على التحمل وطبيعي كأي انثى ابغي احس اني مرغوبه مع انه يعطيني حقوقي لكن احسه يجامل


وانا الحمدلله مابمدح نفسي لكن دايما يقولي انه مافي مثلي واني ماقصرت وياه بشي


احس بضيق تعبت نفسياً من ناحية انه كل مايعاملني معامله حلوه او يعطيني حقوقي الشرعيه ويتقرب لي احس انه يجاملني وماقدر اتجاوب وياه بشكل عفوي .. كل ما اتذكر كلامه انكسر وماقدر اتخيل ولا تصرف حلو منه انه ياي من قلبه وانا دايما يجاملني عشان مايظلمني مو عشان انه يحبني ..

قلبه لا زال ويا حبيبته القديمه مع انها تزوجت الله يستر عليها لكن دايما يدعي ويتألم احسه يتمنى طلاقها اليوم قبل باجر عشان ياخذها

اتمنى تخففون عني سواء بتجارب مشابهه مرت عليكم و ابغي منكم الدعاء .. والحمدلله على كل حال ، الدنيا دار بلاء ومافي انسان خالي من المشاكل ..

اللهم ياعظيم يامنان سخر قلب زوجها لها

أختي عليك بالدعاء إن الله ينزع حبها ويجعل حبك مكانه وأعظم

حبيبتي هذا الرجل نصيبك وأنت تحبينه
إذا كان رجل نبيل ويخاف الله فيك
تمسكي فيه عشانك
عشان حبك له
وصدقبني مع السنين بتعظم بينكم المودة وبتكبر مكانتك لو ماكان حب بيكون تعوّد وألفه مابيقدر يفارقك ويفارق بيتك وعيالك لأنكم أهله
أهم شيء خلاص لا يفتح موضوعها قدامك ولا يجيب سيرتها حتى لو تكلم قولي لو سمحت أنا أم عيالك لي احترامي وتراني أنثى مو جدار

الله يسخره لك

الله يسخره لك ، اصبري، فبعض الامور في الحياة علاجها الصبر فقط .

__________________
أشهد أن لا إله إلا الله و أشهد أن محمدا رسول الله صلى الله عليه و سلم

مالك الا الصبر و الدعاء
و الحمدلله زوجك خلوق ويخاف الله فيك وهذه ميزة أصبحت نادرة

فمالك الا الدعاء و احنا ما راح ننساك من دعاءنا باذن الله

الدعاء حبيبتي لا تستهيني فيه

لا ما يحبها يحبك أنتي بس الشيطان يزينها بقلبه
ولو تزوجها تركها وتركته في نفس الليلة

أنتي العشرة الحلوة والحب اللي احتواه حتى بأخطاءه

الحب يحتاج معاشرة يعني يحتاج صبح وليل مع بعض يحتاج يشوف المعدن زين

بكل ثقة نامي قريرة العين

أساساً شلون تعرفين إنه لازال يحبها ؟

مو يمكن مجرد وساوس في عقلج حبيبتي ؟

__________________

حاجة الناس إليكم من نعم الله عليكم ، فـ لا تملوا النِعم ☁✨

الصبر ثم الدعاء ثم الصبر ثم الدعاء
ولاتستسلمي لوسوسة الشيطان
اسأل الله ان يسخر قلبه لك

__________________
أشتقت لكم جداً 💔

صحيح كلامها
وكوني واثقة بنفسك جدا تنعكس عليك الثقة .