السلام عليكم ورحمة الله وبركاته
أهلا عزيزاتي ،،
اعذروني موضوعي للتوّ فكرت فيه وشرعت في كتابته ومن حماسي له ماعندي وقت أنمق عباراته أو أنسقه
تدرون وش الي دعاني لكتابة كلامي القادم ؟؟
أموت قهر وأطرطع إذا دخلت موضوع لرجل يبي يتزوج على حرمته وشفت ردود بعض البنات عليه
أنا معكم إن الموضوع أبدا مو سهل ولانقدر نتقبل مبدأ إن زوجي تشاركني فيه وحدة ثانية لكن أحيانا تجيك وحدة ترد على كاتب هالموضوع ويكون ردها حلو ومقنع بس العيب فيه إنها تدعم كلامها بحجج ضعيفة وواهية فيكون ردها غير مقبول وكلامها المقنع يضيييييييع وسط الكلام ..!
مو هنا المشكلة !!
المشكلة إن ردودنا تصير مضحكة ومسخرة للرجال ..
وكل هذا بسبب عاطفتنا الجياشة
العاطفة من أروع الأشياء الي الله خلقها فينا وأحس الرجال محرومين لأنهم ماعندهم مثلنا
لكن المشكلة إذا عاطفتنا هذي خلتنا نحيد عن الصواب ونقع في أخطاء تجعلنا ندرة ومضحكة للآخرين !!
بأقولكم كم مثال وأنتم شوفوا معي:
جا فلان وكتب لنا موضوع إنه يحب زوجته لكنه يميل للتعدد ووده يتزوج ..
تجيك فلانة تقوله: ياخي ليش تعدد وش السبب !! إذا مافيه سبب مايجوز لك تعدد !!
(والله هذي شفتها بعيوني وكذا مرة)
ياحبيبتي من يقول إنه لازم يكون فيه سبب للتعدد ؟!
هذا شرع وربي أحلهم أربعة نساء الي يبي يتزوج بكيفه والي مايبي بكيفه ..
حتى إنه فيه خلاف بين العلماء وش الأصل التعدد أو الإكتفاء بواحدة ..!!
***
جانا فلان ثاني وكتب موضوع مقارب للي قبله ،، جت فلانة تقوله:
لو إني من زوجتك ماأقعد معك لأني ماأقبل بنصف رجل ..!!
أستغفر الله العظيم
يعني الرسول اللهم صلي وسلم عليه كان تسع رجل ؟؟؟؟؟؟؟!!!!
***
وجانا موضوع ثالث وفلان بيتزوج على زوجته ،، قالت له فلانة:
طيب ماقلنا شي تزوج !! بس ياخي حرام عليك تاخذ وحدة أصغر من زوجتك ولاتوها بنت خذلك مطلقة ولاأرملة بس بنت لالالالالالا ماينفع !!
من يقوله ؟؟!!!
وربك سبحانه يقول: (فانكحوا ماطاب لكم من النساء مثنى وثلاث ورباع) ..
***
ومثال رابع << وهذا الي مايخش عقل !!
تجي وحدة تقول: تخيّل إن زوجتك تتزوج غيرك !! وتصير أنت زوجها الأول ولك ليلة وللثاني ليلة !! تقبل ولا لأ !!
بالله الي كتبت مثل هالردّ جادة ولاتستهبل !!
ياحبيباتي لازم نتذكر دائما إن الرجل كائن مختلف تماما عننا ..
المرأة الطبيعية ماتقدر بحال من الأحوال تحبّ رجلين في نفس الوقت ..
ممكن لما تتطلق وتتزوج مرة ثانية تبدأ حياة جديدة وتنسى الأول وتحب الثاني ،، لكن اثنين في قلبها بنفس الوقت ماتقدر ..
والرجل ربي خلق له قلب يقدر يجمع فيه 4حريم بوقت واحد ويحبهم أربعتهم بنفس القدر ويعطيهم حقوقهم كاملة مكملة بدون ماتكون وحدة على حساب وحدة ..
يعني مافيه أي مجال للمقارنة ..
***
هذا الي أتذكره من الحجج العاطفية الخاااااااااطئة ..
بالمناسبة سألنا د.نوال العيد:
هل كره المرأة أن يتزوج عليها زوجها يكون كره لشرع الله ؟
أجابت: لا، فأنا أتقبل التعدد كشرع ولكني أكره الضرر الواقع علي من زواج زوجي ..
***
أتمنى ياغاليات يكون نقاشنا بدون زعل
ولاتحسبوني من الداعيات للتعدد !! لاوالله أنا أول وحدة فيكم بأخلع زوجي لو بس فكر يتزوج
إذاً كلامي مو عن التعدد أبدا لكنه عن عاطفتنا الزايدة وكيف نحاول نوجهها التوجيه السليم ونستخدمها صح