السلام عليكم ،،هذي ثاني مشاركة لي ف المنتدى وماكتبتها الا لأني شفت ردود حكيمة من الطرفين وهذا اهم شي ..
الموهم اعتذر ع طول الموضوع بس لاني ابغى حل لمشكلتي قبل يجيني الضغط والسكر..
اولاً انا متزوجة من 7سنوات وعمري 24 وزوجي اكبر مني ب6 سنوات وعندي طفلين..
طبعاً انا صار بيني وبين زوجي مشكلة قبل اسبوعين واكثر ،، المشكلة انه امي واخواتي اشتروا لي مجفف كهربائي هدية ولادتي وله 4سنوات بكرتونه ماتركبت وكل ماكلمت زوجي يطلع اعذار كذابه او يقول ماابغى اركبها كذا كيفي وانا احتاجه مره بالذات مع البرد وكل ماكلمته عليها تصير مشكلة الموهم اخر 4شهور اذا قلت ركبها يقول خلي ابوك يركبها واسكت لحد اخر مرة قلت بتركبها ولا اكلم اي احد يركبها قال كلمي اي احد قلت طيب كلمت اخوي ورفض بسبب شغله كلمت امي قالت طيب استأذنيه نجي نركبها بكرة قال ايوا قالت امي عطيني اكلمه اشوف وش السبب انه مايركبها ورفض يكلمها وقفلت قلت يافلان مايرضيني ابوي يجي يركبها وانت قاعد قال انا يرضيني ويضحك ورايق وعااادي !!
الموهم جا ثاني يوم كلمتني امي المغرب وانا نايمة وزوجي جنبي قالت ابوك بيجي يركب المجفف قام زوجي عصب وقال هات اكلمها قلت طيب بس كلمها بأدب ، والله العظيم انه يكلمها بصياح مو طبيعي كأنها اصغر عياليه يصيح بشكل مو طبيعي وانا مفجوعة اقول له كلمها بشويش هذي امي
قام يقولها الله يحسن لك الخاتمة وخذي لكم فراش ومخده وقام يغلط ويقول لابوي ( الشايب) ( مع العلم اهلي ناس محترمين وملتزمين وابوي شيخ معروف له سمعته ويجونه من كل مكان وزوجي يحبه ويقدره ) ويقول ريحوني تتدخلون ف حياتي مع انه والله ماقد تدخلوا الا لما اروح زعلانة ولا قد زاروني الا 3 مرات يمكن بس صدمني طبعاً انا ماتحملت صرت ابكي اقول كيف تقول لامي كذا قال دعيت لها ومن ذا الكلام الموهم انا شكيت لعمتي(امه) هي عسسسل واعتبرها زي امي مرة واحبها واعزها قالت انه غلط ومايرضيني اللي صلحه ومن ذا الكلام واتفقنا انه تكلمه بطريقة غير مباشرة ،، كل ماجلست ف غرفة جا وجلس عندي ويشوفني ارسل قال لمين قلت لأمك قال والله لو علمتيها ل.. قلت لاتحلف امك تدري عن كل شي قال مين قال لها قلت امي كلمتها ( امي قالت لي اقول لعمتي وطلبت رقمها بعد ماانا قلت لعمتي) قام عصب وكسر الدنيا وراح لاهله( ف نفس العمارة) ويصيح ع امه وهي تقول مدري عن شي رحت انا قلت لعمتي انه ارسلت لك ماقريتي وسويت اني تو اشكي لها قال ليش تكذبين ياكذابه ----الله يحرقك و---- كثير ورا بعض وينذر وانا عيني ف الارض مارفعتها ولا رديت بحرف والله وابو زوجي سمع كل شي ولاخرج من غرفته وامه ماوقفته عند حده !!
قلت انا بروح لاهلي ماصرت اتحمل قالت ام زوجي اقعدي ومالك الا اللي يرضيك وكذا قلت طيب بس انا ف غرفة وهو ف غرفة ورحت بيتي ونام عند اهله اسبوع والبيت كله شباب بيستغربون وش السالفة وانا ف بيتي لوحدي !!
سكتت سكتت كل يوم اكلم عمتي اشوف جد شي وتقول لا ومشغولة ومن ذا الكلام وزوجي ماشفت ف عيونه نقطة ندم وكأنه عادي ومستقوي ونافخ ريشه !!
الموهم انفجرت ف يوم بعد الاسبوع كلمت ام زوجي قلت تعالي انتي وعمي بكلمكم قالت طيب ويعد طول انتظار جا عمي بس وكلمته بأدب قلت انت زي ابوي وانا بنتكم ابغى حق امي بس ماابغى شي ابغى زوجي يعتذر من امي وبس وقال مالك الا اللي يرضيك وكذا وجا زوجي شاف عمي عندي قام قال تافهة وشوفي الزوجة الثانية بتزوجها الحين ولا بعدين وعمك قاعد ويسمع ويصيح ويقول ردي وانا ماارد مو خوف منه انا شخصيتي قوية بس حشمة عمي ماابغى ارادد وتطول السالفة قال تقعدين معززه مكرمة اقعدي ماتبغين انقلعي وخرج!!
قلت لعمي ماعاد لي قعده انتم مااخذتم حقي شكلكم تخافون منه لانه نافخ ريشه ويتكلم بكل ثقة ويصيح ( وذي مو اول مرة كل مشاكلي بسبب الفاظه ومكابرته وعدم الاعتذار)قال اقعدي والله لااهين كرامته وكل ذا كلام مايقدر يسوي شي !!
الموهم وقتها بنفجر وهو كمل سهرته عند اهله كلمته قلت ابغى اروح لاهلي ع طريقك وديني قال لا خلي ابوك يوديك الموهم هو بيودي امه مشوار نزلت معه قفل الباب ف وجهي ولعني الموهم جو عمي وعمتي وسمعونا اقول وديني ويقول لا انا ابغاك تكلمين ابوك وتسهلين لي الطريق قلت بروح زيارة وبرجع اليوم بس بسلم ع امي سافرت ورجعت ماشفتها قال روحي ولاترجعين ماتكسرت عليك !! وداني بعد ماامه قالت له سلمت عليها ف راسها هي وعمي وقعد يتريق علي ومالتفت له ( لانه مايعرف شي اسمه احترام وتقدير) رحت وطول الطريق ساكته وصلت بيت اهلي ومامعي ولا لبس وحفاظ ولا شي ع اساس زيارة ، ثاني يوم اتصلت ام زوجي قالت حنا جايين ناخذك قلت ليش انتي تتصلين مو ولدك ! انتي لك الحشيمة والقدر وكم مرة تصير مشكلة واجلس والله عشانك بس ذي المرة اهلي عرفوا وحاقدين عليه والله ياابوي يقول خليه وعيشي عندي معززه ومكرمة ولي جزء مستقل ،،
الموهم قالت طيب انا مشغولة قلت لاخلصتي كلميني ، انتظرتها تتصل ماتصلت انتظرتهم يجون ماجو سكتت ، الموهم بنتي عندها سفرة ومواعيد مستشفى كلمت ام زوجي قلت تسافرين معها لاني ماابغى اكايد ببنتي وابغاها تروح مواعيدها وماابغى اسافر مع ولدك ، قالت مااقدر ابوها يقول بيسافر فيها لوحده قلت لا مستحيل مين يغير حفاظها واكلها ولبسها وبنتي لازم لها عناية خاصة قلت خلاص انا بأجل المواعيد بس ولدك لايسوي لي مشكلة الموهم فجأة عصبت وصارت تقول ولدي ماغلط قلت ماغلط ع امي قالت لا ماغلط دعى لها !!
قلت ويوم لعني ونذر ودعا وتلفظ وانا مارديت بحرف ماغلط قالت الا غلط بس انتي تستاهلين استفزيتيه !!
قلت والله انه لعب براسك تو كنتي واقفة معي وشفتي كل شي قالت برضى ع ولدي ومابرضى عليك ! قلت والله كنت اعتبرك زي امي ومااحب يمر يوم مااسمع صوتك واقدرك وتعرفين وهي كمان تقول انا احبك وامدحك ف كل مجلس واقول لولدي مابيلقى ف جمالك ونظافتك واهتمامك واخلاقك بس انتي اهلك يشجعونك ع الطلاق وانا احاول اصلح بينكم وترا اقدر اقول لولدي خلها وبزوجك بس انا ابغاك ترجعين بيتك ومن ذا الكلام وقامت قالت اشياء اني سويتها وانا والله ماسويتها قمت احلف وابكي واقول مااسويتها اكيد فهمتي غلط تقول قصدك انا كذابة !!قلت لاتقوليني كلام ماقلته بس انا ماتطلع مني ذا الاشياء وقعد تجيب سواليف قديمة وتفسرها بكيفها وانا وربي اعاملها زي امي واحبها ومااقصر ف شي الموهم كل ماقلت كلمه تفسرها بطريقتها عشان ولدها يحس اني غلطانه قلت اهلي ماقصروا علي وانا عند زوجي بيقصرون علي وانا عندهم قالت هذي اهانه بحقي تقصدين ان حنا بخلاء!!!
الموهم صدعت من مكالمتها قالت زوجك بيجي ياخذك وتفاهموا مع بعض قلت طيب بس لاعاد يلعن وينذر ويخرجني من بيتي !
جا زوجي وقبل يجي ابوي الله يحفظه كلم ابوه وكلمه وكذا
الموهم رحت بيتي مااتكلم معه نهائي واجهز الشنطة للسفر وهو يسألني ويتكلم معي وكذا وارد برسمية ومع كثرة الاسئلة صار بيننا سوالف ورجعت علاقتنا عادي من دون اي اعتذار او عتاب او ووعود او حوار واحس السالفة ف قلبي مااقدر انسىى وللحين ماتواصلت مع ام زوجي ابداً ولااكلمها وهونفس الشي ماتواصل مع امي ولا اعتذر ، انا نفسياً تعبانه الوضع مو عاجبني واحس لو صار موقف سخيف بنفجر لاني مافرغت غضبي الاول
عطوني طريقة اخليه يندم فيها ويعتذر من امي وارضى وانسى ،
مع العلم زوجي يحبني وحنون جداً جداً وطيب وماعنده خرابيط ابداً وصريح واغلب صفاته حلوة.. بس عيبه لسانه والمكابررررره ودايم اقوله مافي كرامة بين الزوجين بس مايفهم!!
اسفه ع الاطاله وانتظر ردود الحكيمين وكيف اتعامل معه وقت -- مرات احندر ويزيد ومرات اعصب وتزيد ومرات اطنش ويتمادى تعبت ..
تم تعديل العنوان ليتناسب مع المضمون
01-03-2017, 12:32 PM
رد: ابغى حل لمشكلتي مع زوجي 😢
ضوابط المشاركة
العرض العادي
