السلام عليكم ..

اعضاء المنتدى الكرام .. بطرح مشكلتي واتمنى القى عندكم الحل السديد

انا متزوجه من اقل من سنه زوجي اكبر مني ب 9 سنوات وانا حامل وعلى وشك الولاده

في البدايه لما خطبني زوجي استخرت الله كثير ودعيت ووافقت بس بعد ماقلت لامي اني موافقه بكيت بعدها ككثير وقلتلها اني خلاص ما ابغاه جاني شعور ضيقه فضيعه لكن امي قالت لي خلاص اعطينا الناس كلمه بعدها تمت الشبكه وبعد الشبكه نفس الشيء حسيت بعدم تقبل ما ادري اصنفه عدم ارتياح والا عدم تقبل لاني ما اتوقعته كذا ..

المهم اننا قضينا فترة ملكه 6 شهور كان فيها حب شديد من طرفه وانا بديت احبه شوي شوي بس كان اسلوبه يا ناس مايعجبني ابعد مايكون عن التفاهم والحوار انا ما ادري كيف كنت معميه عن هذا الشيء انا انسانه ما يقنعني الا الانسان المتفهم المتحاور اللي يناقش بهدوء ويتوصل لحل .. لكن هذا الادمي لا كل شيء عنده بفرض و عصبيه ومناقره حتى توصل مرات لسوء الظن ( انتي كنتي تقصدين كذا - انتي على بالك انا ضعيف - انتي بتفرضين علي كلامك - انتي احد فار مخك ولاعب فيه - انتي ماتحترمين ) هذي الكلمات دايم يرددها علي بشكل مستمر هذا من غير باقي الكلمات الثانيه اللي اوقف مصدومه كيف يقولي كذا .. عجزت اوصل معاه لحل طلبته بالرضا واللين اننا اذا صار بيننا موضوع نتناقش بهدوء و نتوصل لحل لكن كان يرفض يقولي انتي دمقراطيه وانا ما احب كذا انا زوجك وكلمتي تمشي عليك اقوله اكيد انت زوجي وما اسوي شيء الا برضاك وكلمتك تمشي علي بس انا احب حياتنا بالتفاهم يقولي اكره كلمة تفاهم لا تقولينها لي .. ما اتذكر اننا مره صار بيننا مشكله وجلسنا حليناها بهدوء لازم مناقره وعصبيه لين انا خلاص ماعاد اتحمل بالذات اني في فترة حمل و احتاج واحه نفسيه .. كان كل مرا يصير بيننا مشكله يجلس يحسب كلامي بالملي لو كلمه عاديه لو تصرف عادي يحسبه علي لو يشوفني ارتب البيت يقولي كيف تشتغلين في البيت وانا زعلان .. في كل مشكله لو الغلط عليه يشوف انه هو الزعلان وهو اللي يستحق المراضاه مع ان انا الزعلانه وابغاه يراضيني ولو صار وراضاني يجلس يقولي بس ترا انا زعلان واجلس اراضيه لو اني مازعلته بشيء بس عشان الحياه تمشي ولاني طفشت ومليت بعدم اقتناعه بأخطائه مهما صار .. واذا صار بيننا زعل يقسم بالله لو المس اغراضه والا اسويله شيء مايصيرلي طيب .. هذا من غير كلامه اللي ماله داعي كأني واحد من اصحابه ( محد يدوس علي وانا ولد ابوي - مغرور ويحق لي اتغطرس - اذا زعلت محد يراضيني لو الجماعه كلها تجمتع عندي ) ياناس وربي كلام ما ادري ايش اصنفه احسه مراهق مو رجل عاقل رغم انه بالثلاثينات ..

هذا مختصر من اللي يصير بيننا والخافي اعظم ..
اخر شيء صارت بيننا مشكله من يومين وهي انه حاط اسم البيبي في راسه ومايبغى غيره وقد صارت بيننا مشاكل عشان هذا الموضوع اجيه بالهداون ايش رايك حبيبي في هذا الاسم يجيني بالعصبيه انتي بتفرضين علي الاسم بالغصب !!!!!

اختار اسم وانا مو مقنعني الاسم ومشيتها له لكن كل شوي اجيب له اسم ثاني ايش رايك في اسم كذا وكذا يقول غير الاسم اللي قلتلك ماعندي قلتله طيب والله انا مو مقنعني حرام اطلع من الولاده تعبانه والاقيك مسجل اسم مو مقنعني عالاقل خلينا نتفق على اسم مو شرط من اختياري بس يكون بيننا اتفاق قام نافخ وعصب اصلا انتي بتفرضين علي الاسم بالغصب و انتي و انتي وجرنا الكلام لين ماقال الاسم هذا بينسجل يعني بينسجل وغيره مافيه وقفلي الموضوع !! انا عصبت مو معقوله كم شهر تمر كل ماقلتله بنتفق على اسم قال بتفرضين علي وقلتله انت انسان صعب التفاهم معاك معدوم عجزت اوصل معاك لنقطه نتفاهم فيها وقمت اتكلم وجلس يسمع بعدين قال اذا خلصتي هذي الغرفه روحي فيها !! ااه ياناس تعبت منه تعبت تعبت في كل مشكله يصير نفس الشيء ونفس العصبيه ونفس سوء الظن ..

انا صعبه بذكر لكم باقي مشاكلنا في موضوع لكن بكتب لكم الاشياء اللي مرا مضايقتني فيه ..

هو انسان غير موظف معتمد على اخوانه واخواته في الصرف .. احس مايسعى انه يشتغل ابدا بس جالس في البيت على الافلام او الجوال او نايم او يخرج مع اصحابه اتمنى يشتغل لو شغله بسيطه لو براتب الف ريال مو مشكله بس اهم شيء يشتغل .. صحيح يقدم على الوظايف بس خلاص اذا ماطلعت له يجلس مايتحرك ابدا مايسعى مايفكر يشتغل .. واذا فاتحته على موضوع الوظيفه يجلس يعصب وانتي خربتي مزاجي وانا كنت مرتاح وانتي احد فار مخك علي وانا تزوجت عشان ارتاح .. رايه بموضوع الوظيفه صادمني كيف رجل يفتح بيت وهذا تفكيره .. لدرجة اني جلست ابكي قدامه كيف بنعيش اذا جانا اولاد يقول كل طفل رزقه معاه ..
حتى اهلي مو عاجبتهم جلسته كذا لا شغل ولا مشغله

نفسي اكتب اكثر ونفسي احكيلكم عن مشاكلنا اكثر لكن ماذا عساني ان اقول !!

كثير تراودني فكرت الانفصال .. لاني ماعاد اتحمل رجل بهذا التفكير وهذا الاسلوب انا مو مرتاحه معاه ابدا من عدة نواحي ..

بذكر لكم ايجابياته يحبني مررا وانا بعد احححبه مرا اغراض البيت مايقصر فيها يجيبها يساعدني بشغل البيت مرات


اتمنى ان تلهموني وترشدوني ..


تم تغيير العنوان ليتناسب مع مضمون الموضوع

طيب الى الان ما اعرف ليش تبغين الطلاق
اوك انت حامل وحابة ان الطفل يعيش بين ابوين منفصلين
اتوقع هذا السبب الوحيد للطلاق

اخ مهندس


هذا كله غير مقنع للانفصال !!
الذبذبه وقلة التفاهم اللي انا عايشه فيها نفت الاستقرار من حياتي

نعم غير مقنعة
كان من الافضل ان يكون موضوعك كيف احل مشكلتي مع زوجي
بدل افكر بالانفصال
يمكن الحين اعذرك لانك حامل

ماشاء الله اقل من سنة صار فيها زواج وعلى وشك الولادة.. هدي يا أختي هدي مهما كان الي تفكري فيه مو وقتو هلا.. سلامات حامل وماكملتي سنة زواج بالله ماهذا الطلاق راح تتبهذلي وتبهذلي ابنك معاك.. الطلاق سهل وقت مابدك بيجي.. فلا تستعجلي واستهدي بالله..

السنة الاولى اساسا صعبة فكيف اذا تخللها حمل بيصير فيه تعب وتوتر على الزوجين الي لساتهم عرسان وحتى ما تأقلموا على مشاركة بعضهم بالحياة فما بالك بقدوم الطفل الأول وما يحمل معه من مسؤوليات..

اختي تعوذي من الشيطان زوجك عصبي وشاطر بالحكي بس بيحبك ومو مقصر فابعدي عن الشر..

خليه يسمي يختي مافيها شي.. قوليله لخاطرك حبيبي سميه على كيفك مو مشكلة وخليه يفكرك مبسوطة مرره وقبلتي حبا فيه مو بالعين الحمرا ( راح يسميه على كيفو حتى لو مو راضية على الأقل خلي منظرك زين).. ريحي راسك واستمتعي بالحمل ووفري طاقتك لمابعد الولادة..

الله يصلح حالكم..

__________________
{قُلْ يَا عِبَادِيَ الَّذِينَ أَسْرَفُوا عَلَى أَنفُسِهِمْ لا تَقْنَطُوا مِن رَّحْمَةِ اللَّهِ إِنَّ اللَّهَ يَغْفِرُ الذُّنُوبَ جَمِيعًا إِنَّهُ هُوَ الْغَفُورُ الرَّحِيمُ}

صدق الله العظيم

ما شاء الله
أنت زوجه صالحه هكذا أحسبك و لا نزكي على الله أحد

أنتبهي من التركيز على السلبيات

أنتبهي من نقل أسرار و مشاكلك لأهلك

أنتبهي من الإستماع لكلام الناس في نقد حياتك و حياة زوجك

أظن أنك صغيرة في السن و تنقصك الخبرة و لايوجد حولك شخص يهدي الأمور و ينصحك بالحفاظ على بيتك بل على العكس يرشون الملح الجراح
أسأل الله لك التوفيق

__________________
أنا جنتي وبستاني في صدري أين رحت فهي معي لا تفارقني إن حبسي خلوة وقتلي شهادة وإخراجي من بلدى سياحة
إبن تيمية

غالبا ما تكون بداية الزواج صعبة اخت سام ، اسألي الله في صلاتك الفرج

__________________
أشهد أن لا إله إلا الله و أشهد أن محمدا رسول الله صلى الله عليه و سلم

مسك الليل

الحمل صار بعدم رغبه مني لاني ماكنت حابه احمل على طول بس كات رافض فكرت حبوب المنع .. الله يصلحه بس ابعد مايكون عن التفاهم حتى لو رضيت وقلتله سمي على كيفك يشوف الموضوع من ناحية اصلا غصب عنك مو بكيفك ..


محب السنه
الحمدالله ما اشتكي على زوجي قدام اهلي ابدا بالعكس احاول المع صورته قدامهم .. رغم انو اهلي شايفين حالتي كيف باين علي الهم

نعم انا عمري 23 سنه ينقصني الخبره اكيد بس متأكده مافيه بنت بعمري في هذا الزمن تستطيع انها تسوي اللي انا سويته و تتحمل من زوجها هذا الكم الهائل من الكلمات والتصرفات .. وفعلا اهلي يرشون الملح على الجراح لما يشوفونه مايشتغل وبس جالس ومشدد علي من الخرجه معاهم يسألوني ليش يسوي معاك كذا

وعليكم السلام ورحمة الله وبركاته
كل رجل وله مفتاح .. نقطة الألتقاء هي محبتكم لبعضكم .. جميل
زوجك لديه مشكله .. والحل صعب لا أتكلم في طلاق وأنفصال أتركي هذا الخيار
بعيد ولا تجعليه يتردد في عقلك عند كل مشكله ..
أكيد تزوجتيه وهو بدون عمل ويجب ان تتحملي وضعه لأنك من أختار
أسم الولد لو كان عرضك للخيارات في فترات متباعده وأوقات مناسبه أتوقع ستجدين تجاوب منه ..
طبائعه وسوء الألفاظ وهذا مافهم من تلميحاتك فهي لن تستقيم إلا أذا أستقامت صلته بالله وألتزامه بالعبادة والصلاة أكاد أجزم أنه غير مواظب وصلته بالله بعيده ..
أتكلم من واقع تجربه شخصيه ..
واما موضوع أهلك وأنهم غير راضين عن وضعه الحالي بخصوص الوظيفه فنصيحه ابقيهم بعيدين عن محيط مشاكلك فتدخلهم يعقد المشاكل ولا يحلها ..
ركزي على دينه وعبادته ليستوي خلقه ...
اسأل الله أن يهديه

__________________
‏عابرُون و الدّنيا ليسَت لنا
‏سنمضِي يومًا تاركين خلفّنا كل شَي
‏ربناّ اختمْ حياتِنا بعمل صَالح نلقّاك به

اعذريتي اختي فاتني هذا الجزء من موضوعك..

لازم تشوفي حل لهذي النقطة.. لأنها من أسوء الطباع في الرجل.

أتمنى غيري يفيدك ان شاء الله..

__________________
{قُلْ يَا عِبَادِيَ الَّذِينَ أَسْرَفُوا عَلَى أَنفُسِهِمْ لا تَقْنَطُوا مِن رَّحْمَةِ اللَّهِ إِنَّ اللَّهَ يَغْفِرُ الذُّنُوبَ جَمِيعًا إِنَّهُ هُوَ الْغَفُورُ الرَّحِيمُ}

صدق الله العظيم